遙不可及

若非有世界杯，有天氣熱，令華創啤酒業務超級增長，不然的話，二九一華潤創業第二季成績表，可以形容為極度、異常、十分之差勁。

華創第一季營業額四百一十八億，第二季，四百一十七億，即生意無多到!!

盈利第二季五億七，數字上比第一季好好好好，但其實獨靠一枝大啤。

事關華創啤酒業務第一季核心利潤僅六百萬，到第二季卻有四億一，一來一回三億多，正正是集團一、二季整體核心盈利之分。

華創業務比重用大，最錢最多，但最醜怪，正正亦是零售，而亦因為零售，華創形同盈警，今年唔得，出年都唔得，未來幾年都未必得。

華創零售業務第一季賺四億六，到整個上半年拉勻，盈利只得四億三左右，意味第二季蝕二千多萬。第二季出咩事？？市道問題？

非也。而是來自跟Tesco剛進行整合，合營項目投入運作，結果一整合，即出事。

華創當日信逝旦旦，話變相收購Tesco內地業務，有效益，有協同。但大摩早前白紙黑字指出，按目前情況，用一個量化模型量度雙方協同效應，太遙不可及。

其實，老早有人批死，華創跟Tesco談不上協同，但可以視為協助，協助對方離場!!

超市及大賣場，是當日華創希望透過合營項目搞得轟轟烈烈範圍。兩者合共有六百八十三間大賣場，仍然輸俾高鑫九百多間，再者華創未有合營前，多個城市分店數目一早大幅拋離Tesco，唯一例外是上海，對方有四十一家，華創是零!!

強弱懸殊，算吧，但幹什麼要整合經年？當中涉及Tesco分店項目幾大問題：
一，位置差、
二，成本及營運效益，比華創更差、
三，生產效益只及行業七成半。

簡單來說，華創做錯交易，只愛來路品牌，不理營運數字。

華創原本同時睇準Tesco自家品牌產品可以托高毛利，但據稱，內地其實祟尚品牌，「自家」唔會有人理。

更弊，Tesco呢個名，按協議，頂多可以再用多二十四個月。

內地既然講度創新，華創既然硬吞Tesco，含淚奮戰，倒不如直抄對方英國經營模式，就是分店寸土用盡，由賣貨品，同寄賣金融產品都有，Tesco亦因而轉型，索性英國申請銀行牌照!!