2014年9月18日星期四

第一口價


阿里巴巴上市六大牽頭銀行,涉及來自紐約、香港及倫敦約一百六十名參與銀行家,現時最大煩惱,是如何評估,開市後第一口價、及交易情況。

因為馬雲「棄納、取紐」,令紐約交易所成為是次全球最大集資新股上市地,稍為登入紐交所網頁,早於七月十二,及九月六日兩個周末,已經召集出市代表,為阿里巴巴上市當日,議定工作流程。

基於集資大,無論開價、首兩小時交易秩序要緊,面子尤關,紐交所亦會於明晚八時三十分,即正式開市前一小時,召集各大出市代表、券商等等交易系統及運作部門開電話會議,更新開市後為呢隻來自中國重量級新股,在開盤後,潛在任何問題及應變。

美國新股上市前廿四小時,對參與銀行家來說,是死亡二十四小時!

好簡單,因為會做死!!

未來幾小時,阿里要定價,而參與銀行亦會決定如何定出第一口指導價及涉及股數。

Facebook正正因為開市秩序出現亂子,令納斯達克輸俾紐交所。按紐交所規舉,上市首日新股,會被參與銀行先批出一批股份,予以市場參與者,即Floor traders競價,從而形成第一口價,即上市承價。

呢個過程可以很快,亦都可以歷時半小時以上。紐約交易所出市代表信心十足話;「怕咩,我地身經百戰,最緊要開盤正常、半個鐘、一個鐘完成承價,並非問題」。

但對巴巴參與投資銀行來說,定價、開市意外價之外,今次會面對更大額外難度,皆因有為數總值八十億美元原始股,由於毋須接受禁售期,可以隨時沽貨,而基於該批股份成本極低,咩價沽都利錢甚豐,正因如此,是明日其中一大風險源頭。

原始股理論上是接受禁售期,唯獨阿里有一批罕有例外,更奇怪是持貨人身份不明。據稱,百六名參與銀行家,各自聯絡線人,探子,相熟經紀等等,四出查探,到底有無原始股東首日要做大事,同馬雲玩過!! 可惜,至今答案不詳!!

阿里合共有二十間銀行參與上市,嚴格上最大只有六間,更嚴格上,可以話事,只得三間,分別為高盛、瑞信及大摩。

瑞信早於盤古時代,已跟巴巴有淵源,高盛則早在阿里B2B業務本港上市,已身為保薦人。

香港投資者聞阿里定價吸引,合理價最少八十五美金,於是分別查問相熟券商攞貨,而無論A、B、抑式C組行,間間承諾有辦法,據聞近乎全線碰璧。

有留意阿里招股書的話,中資券商有三,包括中銀國際、中金及里昂,但知情人士指,三行均屬於輔助角色,既無貨、亦無分貨權,結果阿里未完成路演,多間券商已改為建議客戶轉買騰訊,甚至改為認購神州租車算吧!!

沒有留言: