2014年9月24日星期三

禾雀股

細價股惹人喜愛,細價股亦令人流睙。

近期儘管大指數疑似見頂,陽燭成為罕有資源,但大指數以外,中、小及其他相關概念股,依然起舞,如痴如醉。

禾雀亂飛好的一面,在於市場情緒不變,資金繼續尋求回報,未有離場,但審慎一面,以往禾雀亂飛之日,意味大市已屆行將重大調整之時。

但老實,一年多以來,禾雀亂飛已好幾次,幾個禾雀亂飛周期,大指數反而每每更上高位,於是禾雀亂飛已經由調整先兆,反過來被理解為上市預示。

內地股市由零七六千,至今指數不及當年一半,但內地細價股日日當炒,概念可更新、創造力持續,今日炒3D,明日大數據、最近再大玩國防、軍工、下星期隨時又來絲路概念。

而近日,內地股評家提早預示年度概念股,諾貝爾是也,情況有如去年上帝粒子、前年幹細包一樣好炒,中國依然有影子股供應,滬、深兩市某程度上有如淘寶網,撇除真偽,要咩有咩,!!

滬、港連線,以香江股市近年概念及相關中、小股炒作頻密程度,咩叫內地化 Mainlandlization,活生生現於面前。

但用黃國英講法,全球大企業股份主導,中、港細價股大收旺場,本身是反世界主流一種,或者咁講,好野既然唔再係好野,咪搵其他野扮好野!!

七十年代有隻股份叫香港天線、九十年代有隻叫東寧、二千年當然有叫盈動的物體,當炒之時,話升就升,既有市傳目標價、亦有路線圖,時間表等等。

近日未致於一模一樣,但觀乎個別禾雀股行情,市傳開口即中、財經專欄作家準繩度更勝大摩、高盛,到底可理解為一山還有一山高,抑或股市反專業化?

剛才提國防軍工內地成為概念可持續性股份,於是一隻「二三二」中國航空工業一抽兩成!

純粹滄海話當年,二三二自從九十年代已經開始憧憬注資,當年炒紅籌及航天,今日憧憬國防、軍工。

中期報告顯示,二三二營業額大部份來自紡織,航空相關業務營業額卻為零。正因如此,中國航空工業國際,注定成為一隻長生不老注資概念股!!

沒有留言: