2014年9月10日星期三

One More Thing


當Tim Cook 在台上,有啲尷尬咁講自己成世人第一次句:「One More Thing」時,基金經理望著蘋果股價、已經暗叫不妙!!

凌晨兩點正是103美元高位、當時升近半成,「One More Thing」後、反高潮股價就急插水,曾經倒跌過2%,唔通Apple Watch 真係咁唔掂?

「有讚有彈」係坊間最籠統講法、不過有心水清者提出,首批iPhone6居然出乎意外、無分在內地進行「首發」。以今時今日中國市場的重要性,似乎有些講唔通!!

最奇係三大電信商、之前拍晒心口,又偷偷出廣告,想靠iPhone6谷 4G,而家完全失晒預算。

最慘係網民全面鬧爆、話蘋果「腦殘」歧視內地市場,以後都唔要爛蘋果咁話。

咁最開心莫過如先達一批「果農」、之前已已爆響口話九千全部掃貨,今日內地就爆出「賣腎價」,話要最高開二萬八!

聽清楚係二萬八、人仔喎!! 網民話要賣夠兩個腎先掂!!

二萬八就有少少誇張、但連人民網都轉載,二萬人仔似乎係公價,所以話、鬧還鬧,有得買咪一樣會去排隊!

所以話「炒機好過炒股」現象,又再出現。唔少睇少流入先達既資金、場中人話以億計,唔怪得美林都要專登計條數,話iPhone6出口可以刺激中國出口、額外多一個百分點!

同我地留意機款機價、以及Apple Watch 靚唔靚唔同,大行更關心、係Apple Pay呢種支付系統。大摩最簡單直接,話新支付系統直接向銀行收費、將可以提供高毛利收入來源,如果好似iTunes或App stores咁成功,將會改變蘋果產品周期。

Apple Pay結合左目前支付系統最重要元素、包括不單有信用卡功能,而且仲加入埋「記帳卡」,大行都讚係意外驚喜!

Tim Cook 聰明之處,係將電子支付最成功要素、集諸一身,之前廣受批評既Touch ID,而家應用在支付都顯得非常MARK SENSE。

而且要同GOOGLE作區分、Tim Cook講明Apple Pay不會收集個人信息,擺明無需好似google一樣,將資訊收集用喺賣廣告,令用戶用得更加安心。

而且一開始、Apple Pay已經同AMV,即係運通、Visa同 MasterCard,並取得佔83%交易量的銀行支持。

要知道、大銀行一直對電子支付有保留,二月時摩通戴蒙講過,所有科技公司都想搶銀行一杯羹! 不過今次摩通都要派出消費部門主管出席,有銀行甚至形容Apple Pay係歷來最好電子支付工具。

里昂就計過、如果Apple Pay交易額可以突破一萬億美元,咁就有利蘋果提高每股盈利4%!

大家都知道手機支付係未來,但問題係點樣爭取市場。睇睇騰訊,微信支付一直都係以小步形式開通,未有全面落實商業化營運。

淘寶同支付寶雖然喺內地佔有八成電貿市場、不過喺移植至手機支付,進度未算理想。

而家一個Apple Pay,如果在內地開通,後來者分分鐘「遲來先上岸」!

沒有留言: