2014年10月3日星期五

黃金周


市況多變,政局亦然,港股由開市前「黑期」跌六百、開市後跌過3百,至到午市過後倒升2百!! 
中環人話,要數功臣,絕對唔係價值投資浮現、市場開始理性、又或者政府處理佔中運動得宜,而是要歸功於港大、中大兩校長。

及時降溫、及時勸諫、小心安全,避免衝突,以免前功盡廢,恰到好處,激動人心。連特首、政府高官、以至左中右政黨、唔能夠做到嘅事,兩位校長用三言兩語,就將學生帶番去理性討論之路,呢個未必係功力之分,而係真假之別!!
大是大非,社會同市場信心都異常脆弱,傳聞、謠言滿天飛。包括大規模走資;大鱷老部署佔中期間當港股提款機;
有人事先沽2千、甚至2萬張期指等。傳聞從來係傳聞,謠言止於智者,此時此刻,為本港好,緊守崗位嘅話,切記唔好誤信傳聞。
佔中影響市況,令人擔心會觸發更大嘅資金流走。但係睇下港元,由星期一7.776,到星期五轉強到 7.757,要三個交易日。
再睇股票資金流,截至十月一號嘅一個星期,即係佔中前後,股票資金唔單只無大幅外流港股,反而增加,由對上一個星期、淨流入二千三百萬美元,進一步增加至一億一千萬美元。
無論港元、以及股票資金流兩組數字,反映出市場對任何消息反應快,消化亦大,適應能力極強,止蝕同止賺一線之差,點到即止,保留實力。
呢一點,現時運動領袖可以多加細味。
香港未來要成功,並非只係靠示威和平,集會有秩序。要爭普選,就更加需要有賢能之士,以供選擇,既有能耐,並且懂得及時止賺或者止蝕嘅真領袖。
香港人到目前為止,仍然贏盡掌聲,但係經濟元氣大傷,亦係鐵一般事實。
市場現實,受佔中拖累行業一切有殺錯,無放過:零售、收租、以至澳門股一一重創。
呢場運動,香港市道有如時光倒流03年,黃金周頭兩日內地訪港旅客罕有錄得按年下跌、零售商全數呻窮。
用星展統計,卓悅、六福、周大福有5至3成7街舖正正位於佔中區。
零售佔本港經濟貢獻三成七,經濟影響與否,視乎行動維持幾耐。過去一個星期,香港人上咗寶貴一課,即將亦會再上一課:機會與成本嘅實戰!!

沒有留言: