2014年12月24日星期三

共識

普天同慶,新一年亦就嚟到。舊年今日,各大經濟師、股票分析員、策略師做前瞻同預測,3百幾日後嘅今日,成績點呢?

樓價跌,股票升,係舊年分析界對今年走勢共識之中嘅共識,結果全線錯誤!

樓價破位持續,反而恒指全年埋單、極有機會要跌。

發展商,代理日日唱好樓市,話開價極抵,事後孔明,原來最老實,無呃過大家!!

陶冬曾經預期,今年內地增長7.8%,內地唔減息,勁錯!!

有股評人提出2014年兩大孖寶股份推介,騰訊及銀娛,後者幾乎血流成河。

同樣貨不對辦嘅,當然有麥嘉華,每次揚言美股大調整,每次美股都係升勢依然。臨近年底,今年唔尋常嘅事情太多,近嘅、包括港股一改成交例淡,臨近長假期,竟然有過千億。

而美國經濟增長向上修定至5%,十一年增長最強,道指、標普十二個月後目標,兩星期內已經觸及,大節當前,固然可以視為聖誕前漂亮嘅天鵝。

今日可以成為漂亮嘅天鵝,聽日隨時可以構成黑天鵝事件伏筆,包括經濟太強,美國可以提早加息,甚至包括美股太盡,預測市盈率超過十七倍,大有牛市第三期嘅現象。

油價低,美國經濟強,美金勁,股市繼續看漲,係目前市場對來年預測共識。

共識形成,往往係市場走勢逆轉之時。

大家有留意嘅話,內地大媽、券商、大戶共識已成:
係股市繼續提振、A股坐四望五。但相比美股嘅美麗天鵝,內地股市近日太有醞釀黑天鵝味道!!

借孖展炒股本應係風險之極,但市場近日對融資融券餘額急升券商集資去做孖展業務極其受落,大叫利好,太有反智意味。

美股掂,美金強,內地股市進入新牛市,呢三個共識,任何一範稍有唔對辦,某程度上,係互相牽動。

近期,本港私人樓大賣,居屋排隊攞表,市民大呻、只要有貨,唔怕住郊區,本港樓市長升不跌嘅共識形成已久,亦都暫時未有出現違反共識嘅跡象。

銀行界共識仍在於:美息即使升,港息可以唔跟。無疑,資金氾濫,本港資金仍比正常多嘅情況下,上述推斷毫無漏洞

要留意嘅係,港匯一改年底例強情況,美電升至7點76水平,或多或少喺加息預期下,港美套息盤已經出現,適逢人民幣極有機會改為緩步貶值最少流入本港資金誘因,已經大打折扣!!

沒有留言: