2015年2月23日星期一

時不與你


歐智華算老實,業績報告第二段,開宗明義承認Profits disappointed!

而九哥喺致員工嘅信,亦多次強調前景有挑戰,較早前定落多項三年目標、要面對現實

炒房出身嘅九哥,舊年近乎被炒房打垮,全年有關業務稅前盈利跌37%,第四季更輸錢。

若細心一睇,炒房業務地區分佈表現嘅話,歐洲更大吃市場一驚,全年歐洲炒房稅前虧損近15億美元。

炒房為昔日嘅歐智華,帶嚟自信,但今日嘅歐智華,就係敗於炒房、敗於外圍經營環境、更加敗於監管制肘!

股價表現證明市場投下不信任一票。

即使按年報第314以及315頁,獨立委員會給予匯豐、以及九哥舊年嘅評分,集團得分僅僅合格,而歐智華表現評分,八大指標當中:有三個零分!

包括股本回報、成本收入比率控制、同埋收入增幅大於成本漲幅,至於兩項滿分:嚟自漸進派息、以及資本實力,兩項都係大象家檔!!!

2011年上任以來,九哥領導嘅大象,舊年稅前盈利、股本回報都係四年來最低,成本開支就係上任後最高,比紀勤年代更驚人。

的確,公佈一份上任以嚟最差業績,九哥字裏行間表現出鬥志已經今非昔比,責任未必係佢本人,而係耶倫、德拉吉、以及歐美一眾監管機構。

匯豐年報最新假設,係利率每季上升二十五點子,集團額外利息收入,有8億8千5百萬美元,低過舊年假設,如果要利率平均每季上升25點子,怕且、仲難過中六合彩!

反而,匯豐最新假設,如果包括債息在內、利率平均每季再下降25點子的話,匯豐整體利息收入,會額外減少21億美元,相當於每季可能減少五億美金

年報上述有關部份,道出匯豐基本盈利增長空間無望,而業績報告第23至31頁,變相宣佈大象未來仍要面對大量額外開支。

印象中,匯豐報表內用九頁紙篇幅披露潛在訴訟風險實屬首次,而單單舊年,涉及英美等監管撥備開支或罰款,已有31億美金,按年升55%

范智廉強調,目前環球環境有變,經營以及監管情況亦都不盡相同,不幸嘅係,范智廉點出咗問題,但未有解決辦法,用現實為理由、修訂股本回報目標,市場都預咗。

但市場心嘅是,范、歐配、稍後再以現實之下嘅更現實對策,係咪要修訂漸進派息政策!?

而事實上,歐智華喺員工信明言,漸進派息政策維持,但亦都要符合監管不穩定因素以及資本要求上升的大前題,留有一定伏筆!

環境既然不盡相同,匯豐在在有需要秉棄舊思維向市場低頭,並且承認環球金融只有痛苦滋味,完全沒有智慧可言。

正如德銀話,保守如匯豐,豈可保證全球72個市場,26萬名員工唔會觸及任何監管陷阱?

該行認定,大象今明兩年每年監管相關撥備及開支都要每年30億美元以上,匯豐不是iBank,但業務比重貢獻越嚟越大,令到大象比一般商業銀行,額外要投放多150點子資本,而且英國註冊,各式其式嘅監管要求而且被列為系統性主要銀行,瑞銀計算,額外拖低匯豐股本回報九十點子。

既然係咁,匯豐或者需而回歸91年模式,放棄或者降低ibank 比重、遷冊、甚至攪投行最愛嘅股價催化,例如分拆!係時候向匯豐講一句:時不與你喇!

沒有留言: