完美句號

和黃最大武器，唔係3G、唔係財資，原來係物業。

市場預期和黃盈利3百億左右，結果爆出6百幾億盈利，為可能以和黃名義公佈的最後一份業績，帶嚟完美句號!!!

物業重估收益，長實去年有125億，減少一成半，惟和黃卻高達251億，比對上一年度3200萬，增幅達783倍！

251億、相當於匯控第四季盈利加倍仍要多，其他大多數藍籌全年盈利相比亦望塵莫及。

和黃二長老李澤鉅解釋，錄得大額重估收益，只係參照會計師建議嘅正常做法，而且相當保守。

聽落好有Hea feel !! 當然亦有市場人士懷疑，和黃目的係為左充撐盈利。

但中環觀察家斷言否定，用重估谷盈利假設。遲不谷、早不谷，即使要盈利勝預期，亦犯不著一估、要估多二百五十多億！

觀察家相信，和黃用物業重估這部重型武器，是為嫁入長和，為集團重組鋪路，以便日後新集團、新時代，製造新亮點。

李澤鉅無呃你！集團旗下物業估值相對保守，但佢未有進一步透露半點口風。

重估後，和黃物業入帳估值736億左右，但原來據分析員計算，和黃旗下物業，由於以投資為主，入帳值長期超低於市值，按目前市況計，和黃物業組合其實值1500億。

換句說話，重估後，和黃物業組合仍然有條件再向上估值。

外界估計，最後可以book夠一千億！「重估」跟「重組」有咩關係？

眾所周知，超人強調是低的負債、強的資產負債表。但和黃併入長和後，外界關注點是負債高。

如是者，超人配合重組，索性將和黃物業組合一併重估，即時結果是，Debt to equity ratio股本負債比率大降。

遲一步拆出「長地」時，估值及價值亦進一步提升。

或者因為釋放出重組包袱，為將來釋放更大價值，李生今日記者會無論對樓市、經濟、業務，都較往年樂觀。

樓可以買、經濟幾好、利息難以升。

咁豈不是、經濟烏托邦縮影！？有問必答嘅佢，唯獨被問到同中央關係時，卻避而不談，反而更惹人揣測!!!