2015年3月19日星期四

市場預期


業績呢家野,是好,是壞,好過預期,差過預期,並非由股評人、分析員、基金經理判斷,係股價決定一切架!!!!

股價升,咪話好囉、相反,股價跌,咪話差囉,基於如此,分析員評論個股業績時,其實尤如賭大細,並添加個人喜好。

以吉利為例,擺明一般,但既然股份勢頭靚,分析員咪索性強調,已經好過盈警時預測,更炮製成為第二隻小米概念,講白的,係沿用小米模式,鬥平,鬥炒,侵佔市場。

騰訊一日升九個一,單日成交90億,市值增加800幾億,淡友輸足九個一皮。

有分析員承認,企鵝仔去年第四季數字,大大小小,談不上標青,極其量只係四平八穩,但對股價爆升「有此一料」,所以報告基本上要hea著嚟寫,避重就輕,以免醜死鬼。

對基金界而言,騰訊作為個人社交平台,生態圈發揮會比巴巴佔優,但對科技界而言,騰訊最大問題仍然是數億用戶,生態圈發展講到天花龍鳳,但實際收入增長賣點,暫時只有廣告收益,骨子裡,騰訊依然係一隻打機股。

騰訊背後是幸運,天時、地利及人和,中移動卻是不幸,馬化騰五億用戶,可以升九個一,奚國華八億用戶,反而一度要穿一百蚊。

的確,相比騰訊用戶多是希望,中移動用戶多是成本及代價,簡單一個ARPU第四季僅得57蚊,盈利跌幅歷來最大,而更致命是,大摩兩年前批死佢地負現金流,終於出現。

用戶上升,但中移動去年淨現金流減少6%,同時間資本開支急漲,令到941出現上市以來首次負自由現金流,一間現金流賣點公司,出現負自由現金流係斷正!

叫人遺憾是,有別於市場對資本開支見頂,今年會大減的假設,中移動2015資本開支預算,仍然有1997億,比去年減少不足二百億,換句說話,一旦公司繼續補貼月費上客,經營開支增,中移動隨時繼續負現金流。

無網絡,就無網絡平台,騰訊成功其實是建基於中移動網絡覆蓋上,時不與我,941唯一賣點,原來係產品銷售,去年有關方面收益近六百億,增加五成一,佔集團營運收益比重,升至9.2%。

奚國華,不如你同騰哥傾傾,搞搞網上O2O產品銷售平台,將香港先達概念在國內發揚光大啦!!

沒有留言: