國有化?

星期一「膽粗粗」Buy Call，既然扑中、莫非丁蟹效應咁快玩完?

一日不足以論英雄，但關鍵都係要留意兩大指標，就係官方媒體有無改變支持股市論點、以及港紙有無回落。

當然，升市都要炒啱板塊。以為南北車仲有得去就真係太傻太天真，相反可以買中941、抄即日高低位都差四蚊!

中移動都算升得有理、至少業績「對板」，反而今日隻291阿媽用「怪招」回購番成間公司業務，華潤創業變成華潤啤酒，市場除左莫名其妙外，真係諗唔到更好形容詞。

當日整死華創零售業務，皆因宋林好大喜功要做國際收購，結果「孖左」個Tesco，點知原來係個大氹，根本難以翻生。

新主席傳育寧身經百戰、看見291 股價跑輸大市四分一條街，居然諗到呢條絕橋「斧底抽身」，懶理仲有無得留喺藍籌、中環人都不禁讚果然夠果斷夠狠!

大行似乎都buy 華創呢招，Jefferies 話按收購價反映啤酒業務比起同業有33%溢價，摩通更誇張，用過去5年時間比較，認為華創啤酒「完勝」青島啤，市佔率更穩佔24%全國第一、加上執行能力強，足以支持今次交易28倍PE估值。

大行要做生意、大家都明既，但用咁多歷史數據去證明估值，反而不理會去年啤酒盈利倒退兩成，而全國啤酒銷售更有見頂跡象，前景先叫人擔憂。

交易細節其實全部合規、但叫人唔舒服地方係母公司將所有業務收歸國有，只剩底一枝啤酒留比股東。

簡單比喻就係阿爺唔再信香港、將金融中心地位全數轉讓比上海，然後再派番每人十萬、八萬現金比大家，你會唔會「袋左先」?

到底今次係「削肉還母」、定係阿媽「削肉救子」，相信大家有自己判斷。好似黃師傅一語中的、作為華創股東，最樂觀收到11.5蚊特別息外、比盡你賣到所有股分比華潤集團，都係收多12.7元，加埋24.2，比起今日收市價只係多收五毫，點解唔係呢個價沽出、穩穩陣陣收錢落袋? 反而仲要冒險等華潤決定買唔買自己手上批貨?

有中環人睇完上市公司通告，都大駡寫法誤導，既然唔係全數用12.7元收購股分、實際只係五股買一股，點解要落個參考價話有六成溢價?
唔通阿媽真係擔保他日完成交易、計埋「除息」效應仲收到咁多錢?

當然，有「藝高人膽大」股東，會搏華潤日後繼續注資291、確保唔會成為華潤啤酒，話唔定未來繼續有注資概念，包括「執靚」返零售業務條數，再注入公司。甚至好似267咁、變成整體央企上市，到時就不得了!

要指望華潤可以用三至五年將零售業務「起死回生」、再重新放入291，好似管理層咁講太長遠啦!

值得一提係、內地媒體近日針對華潤報道得最多，唔係今次交易，而係內地華潤超市被曝光售賣假茅台，更被官方追究。

似乎都說明、三至五年翻身，真係可能似一個夢!