樓市疫情

屯門管翠路住宅地截標，收到9份標書、其實呢區供應多，但係都有搶地氣氛。

地皮喺掃管笏、附近係國際學校哈羅，大部份單位望海景，估計起洋房加分層單位係最值錢。

地價有支持、皆因現貨去得快!

信和喺將軍澳嘅新盤帝景灣、收票三日，收到900票，超額7倍。

至於永泰同南豐喺紅磡嘅何文田山畔解封15伙，平均減價13.6%，折實呎價21651 蚊。

反映發展商開盤、尚算克制，唔似二手市場咁，業主追求破頂價至肯將單位甩手。

樓價指數証明到!

再創新高、8大分區指數首次全部升穿收緊樓按前水平。

7項樓價指數齊升、其中6項創新高，新界西區成為最後一個重返收緊樓宇按揭前水平。

整體樓價指數按周上升0.95%，連升兩周共升2.13%。

不過一單疑似新沙士個案啫、就令樓市出現恐慌? 青衣盈翠半島就被唱會跌價?

但係下一句、就係話，要借定錢入市，就係呢份等入市心態: 大跌嘅幅度未必大。

業界估計、疫情一旦爆發，相信二手樓成交，會首當其衝。

睇下往績、回顧過去，香港先後喺2003年經歷「沙士」，當時樓市短短兩個月就下挫一成，之後兩年強力反彈兩三成。

到咗2009年期間、面對「豬流感」，當時樓價不跌反升，一升係連續六年到而家都未停。

過去兩次疫情爆發、對樓巿，可升可跌!

今次呢、業界唔敢輕視，因為目前供應持續增加，樓價所受壓力大過之前。

過往疫情爆發期間、正值私人樓供應開始收窄，好似03年咁，大約26400伙跌至09年得番7200伙。

反觀近年政府大力搵到地起樓、預計今明兩年落成量，會遞增至分別13000伙以及超過2萬伙，供應大增同時加重樓價調整壓力。

加上03沙士期間、樓價尋底，供樓負擔比率低見15.8%，意味當時渣樓係輕鬆。

至於09年豬流感期間、正值金融海嘯之後回升階段，當時供樓負擔比率大約3成。

反觀近年樓價節節攀升、供樓負擔比率亦一路加重至而家嘅44%，預期現階段如果再有疫情爆發，樓價由高位回落嘅壓力，亦相對高過之前。

業界恐怕嘅、新沙士如果大規模爆發，首要打擊係本身已經疲弱緊嘅零售市道，屆時失業率會喺呢度打開缺口。

最壞情況下、樓價有機會下跌1成至1成半。

最壞..聽落都唔係好壞!

主因係目前普遍業主財務狀況穩健得多，按揭比例低。本港自置物業而又無按揭嘅比率由2001年48.5%，持續上升至2011年高達60.1%。

香港人儲錢又叻、存款金額高達10.5萬億，遠遠高於03年約3.3萬億。況且政府多次收緊按揭成數，出現負資產嘅機會無當年咁大。