鴿性

每次地皮截標、每星期二手樓成交，總會有人著迷，如獲至寶。

但狂熱過後，咁又點？

上述兩大因素，對現今樓市影響有幾大呢？黃埔即使零成交，係咪等於叫價低兩成，業主又會肯？

鄉郊地曾幾何時作價遜預期，樓市向上依然。

更何況，近年潛在土地買家多了一批久休復出港企、及新晉國家紅色發展商，好聽一點，出價進取，難聽一點，係唔知價!!

你信誠哥抑或保利？

耶倫面有難色，事到如今，主導權一手奉上比華爾街，大家信耶倫十月加息!? 等如相信豬都會有爬樹一日!!

到底係眾望所歸，定係意料之外? 被認為係近幾年最重要一次FOMC會議，可以咁講，唔加息多少都已經係市場預期之內，但耶倫記者會對答「鴿性」之強烈，就令市場大出意外。

特別係講到近期環球市場波動，以至搬出內地經濟風險、可以話係歷任主席之中少見!

被認為係聯儲局「喉舌」，華爾街日報就搬出以耶媽穩陣性格作為解說。話耶倫就算搭飛機、都會提早幾個鐘去機場；預備重要演說、更要幾個星期前計作預備！
結論就係耶媽不論作為領袖或個人，都係希望迴避風險。

但正正作為一個領袖，唔係就要因應有限資訊，作出既審慎、又果斷既決定？凡事都要百分百肯定，其實即係咩都唔使做!

所以華爾街大行普遍預期，12月才開始加息、利率期貨更顯示，明年一月加息機會率，只是剛高於一半

隨著耶媽釋放善意，及聯儲局內一男子預測負利率，劈價、撻訂等標題，似乎將由買家追價、業主封盤等取而代之。

無他，過去幾年拜八十八層高及一眾高官洗腦教育，加息才等於樓市要跌，已牢記在市民瞄中，現在，不加息固然可理解為樓價升？!

陳德霖強調，年內仍然會加息，買樓要小心，但現實係結餘氾濫，花旗大國即使加兩、三次利息，香江小島實在毋須跟隨，作為特區央行行長，要用利率再教育市民，
作為風險警示的話，不如教大家咩係實質利率啦？

估樓價升，不合常理，估樓價跌，就成為主導。

想脫穎而出，市場推廣學核心之一：要夠激!!!

瑞銀就預期，樓價要跌兩成半至三成，人人轉載，皆因夠爆!

瑞銀估算、係由而家至2017年底的兩年零三個月內樓價表現，而逐年計的話:
今年估跌半成，明年估跌一至一成半，後年預測半成至一成，加埋正好是30%!

瑞士邦預測，其實同市面睇齊。佢地同時強調，樓價跌雖然係共識，觸發樓價跌，未必是利息，而嚟自經濟，呢點或者更需要注視。