2015年12月10日星期四

背馳


利率期貨話八成半,大行交易員拍心口話肯定九成九,聯儲局下周勢必加息!

吊詭是美元指數周三晚、出乎意外大跌超過1%,匯市血流成河,好多大倉都斬到一頸血!

美元急跌、起因是有歐洲央行委員指,市場無正確評估歐央行上周發出的訊號,過度估計歐央行可能採取行動,令市場重新評估歐、美央行貨幣政策背馳的前景,結果將美元好倉盤平倉,令匯價顯著受壓。

事實再次證明,當市場過分單邊,以為加息因素會推高美元,其實所有消息都反映價內,結果容易出現反手做淡!

更令市場不明朗是、所謂Not so Dovish 取態,其實反映加息四分一厘,好可能只是一次過。

華爾街日報收風、耶媽已經決定、要傳達緩慢同審慎態度去決定加息,問題係點樣去表達先最好。

耶倫其實由上星期起、已經不斷強化加息預期,仲話再唔加息,結果只會令金融體系更不穩定。

耶媽呢個觀點、就引來金融時報主筆馬丁.沃夫強烈批評,認為呢個觀點本身就有問題,因為一個貨幣政策、如果可以穩定實體經濟供需、惟獨是不利金融市場,咁出問題既、其實係咪金融市場本身?

耶倫上場,已經不再一次被金融市場騎劫,最好例子莫過如九月議息。馬丁.沃夫更提出四點理由,逐項批評聯儲局唔應該咁進取:包括低通脹、逐步加息可能引致經濟收縮、以及勞動力參與率仍然偏低。

馬丁.沃夫之前,喺佢既專欄,Lunch with FT,同搵「真銀」既前主席伯南克見面,雖然伯南克唔肯對接任人有任何提議,不過伯南克都表明,根本不需要過分擔心通脹問題,批評QE只係幫有錢人更加站不著腳,難道聯儲局任由大蕭條發生?

至於日益增加既貧富懸殊,伯南克承認係有問題,但應該去國會同財政部、而唔係去聯儲局。

雖然有大行已經靠嚇,話若果決定加息、期貨市場就會即時出現沽壓。不過美林反而持相反理論,相信只要當局提出、唔係「太鴿」既傾向,其實新興市場、特別係亞洲,反而可以享受一段短暫反彈期!

難怪連黃師傅今日都MAKE左個CALL,就係叫淡友唔好再做淡,係佢9月叫人買、同10月先人沽貨後,再次表態,大家好好記低呢個日子啦。


沒有留言: