2016年1月13日星期三

冷淡對待


A lot of talk , but little hope!!!
CNBC對有關施政報告報道起題,算是云云之中,既簡,而精,而又為肖為妙的一個。

閱讀過年度巨著的中環賓卡形容,特區區長鴻圖大計有餘,防御預警嚴重不足,若非有雞腸及繁體中文板,更一度以為是十三、五規劃的香港增訂版。

目前,特區之下最少有十一個委員會,既有扶貧、有策略發展、有經濟發展、有人口政策督導、更有可持續發展、因為一帶一路關係,振英區長決定又添食一個一帶一路督導委員,輔以跨部門辨公室成立,兼再升格成立海運港口發展局,又是令政府架構進一步膨脹。

督導委員員,是否等同於政策大命題能水到渠成?君不見扶貧委員會周教授滿肚怨言、策略會至今似乎亦一事無事。

一帶一路是國策,但國家亦強調供給側,精簡架構,難怪中環人形容,區長政治既正確,但亦不具智慧。

客觀事實係、所謂一帶一路慨念,根本就係被中環人冷淡對待,明眼人好多都知,阿爺所講一帶一路策略,根本就係要解決內地產能過剩及疆屍企業問題,將中國本身多出產能輸出,但問題係、錢從何來?

於是,就成立了「亞投行」,就是擔心一帶一路沿線及中亞國家無錢買產品,索性借埋錢比對手,買自己產品,試問、咁樣既模式當中可以有幾多融資同集資機會?

講到集資機會,388小加總裁一向一馬當先,連人民幣下跌、都被佢借助理「心神不寧」借題發揮、變相推銷港交所人民幣債務產品。但心水清BANKER 問,你幾時見過小加講「一帶一路」?

李小加自己在內地都講過,一帶一路根本係「雷聲大、雨點小」,原因正是一帶一路沿線國家好想買中國既產能,但無錢,中國又無可能白送。於是想出一帶一路,就係由沿線國家攞資源出來交換。

方法就係PPP,第一個P是當地政府,第二個P就係中國政府同企業,中間再透過亞投行、先融資買中國產能,再用當地政府資源做交換。

簡單講,根本就係一個以物易物的交易,試問當中香港可以攞到幾多融資機會,甚麼伊斯蘭債券、點心債、再保險中心,算吧啦!

仲有,有無留意內地官方出的「絲綢之路經濟帶」、以及「21世紀海上絲綢之路」,官方版本有湛江、廣州、海口,但唯獨就係唔見香港,咁明晒啦!

講到成分施政報告一無是處,真係無好野?

都有,不過真係要細心發挖。有無留意、CY講海陸空「大龍鳳」時,唔覺意講左,香港已制定多項措施,發展香港成為航空融資中心?

而家全球最發達兩個航空租賃中心,分別是愛爾蘭及新加坡,都有特惠稅率,包括折舊稅務優惠,出租人亦有優惠稅率,香港要發展成為航空融資中心,稅務優惠一定要追上。

有顧問提出,亞太區未來20年,對新飛機需求高達1.4萬架,總值達2200億美元,而近日區內已經有多個新晉競爭對手加入,包括長建亦染指呢個行頭,小超人睇得上眼,應該仲有更高潛力。

難怪今日1848收市,都升到四個巴仙!

沒有留言: