心寒

通勝的確精準，是日大寒，不旦天陰地暗，氣溫急降，配以市場情況，倍感凄厲及心寒。

股匯雙擊、
雙邊套戥、
大鱷狙擊、
係咪似層相識?

下午時段，單單一系列市場表現已夠交易檯忙過不停，時光又再倒流：
美國十年美債債息穿兩厘、德國十年債息見0.464、
美期跌三百，日股正式進入熊市、
一年期美電溢價計，遠期港元跌至本世紀最低。
歐洲時段一年期遠期美電計，反映市場預期一年後港紙見7.9樓上，比弱方更弱。

財經頭條的確好恐慌，仲有期權，話跌穿7.85弱方保證機會率，由去年底只有9.5%，急升至55%，一年遠期兌換價，更跌穿7.9兌一美元。

不過真係講到今時今日同97年比較、仍然有好一段距離。
要挾息，今時今日港元銀行3600幾億。
要挾息，除非問到耶媽或者阿爺借錢，唔係點挾呀?
唔好唔記得，全球對沖基金自己都傷痕累累，仲想翻炒97年一招，算吧?

我地嘉賓羅尚沛，今日講出左港元最後最後一道防線!
同83、84年，以及97、98年比較當時佢阿媽問佢，要唔要換走全港元。
今時今日，佢話無收過阿媽電話，證明香港人對港元，仲係有信心喎!

由今日地產股不問價沽售、恒地大跌過8%，長實跌至上市新低，多間大行都驚死大家唔知，話關注近期港元情況。

對樓市影響、摩通相信本港有可能半年內要加息，瑞信就指，有85%業主都係以拆息計價上會
呢批供款人士，正正係最受港元流動性及拆息表現影響。

拆息的確係急升至2007年高位，不過三日夾埋、升幅累積都係八分一厘，我地自己都計過、借一百萬，其實都係每月供多百幾蚊，以實質按揭利率只是一厘多，實質殺傷力有幾大?

公平些講、加息只是樓市影響因素之一，樓價早在去年十月、美國加息之前已見頂轉勢回落。

加八分一或四分一厘息，影響有幾大，大家心中有數。大和更計過數、以地產股今日估值，其賓等同跌到去沙士、以及亞洲金融風暴水平，係咪有些過分?

大部分人將IMF 報告目光，集中到聯匯，其實IMF都力排眾議，表明雖然樓價有下跌跡象，但由於供應短缺問題未解決，仍然有回升風險。

按IMF計算，港匯實質匯率去年平均升值一成，較一二年更實際升值一成七，以現時香江基因，及市場逢中必沽大勢，香港單憑呢份CV，足夠招徠炒家雲集，炮製初一、十五大茶飯。
但中環人提醒，
炒家狙擊港紙之說，味精成份仍然太重：
一，現水平現貨美電離兌換保證下限不足三百點子，水位有限、
二，現價大手沽空港元圖利，除非假設俊華與陳總裁十拿九穩，決定與勾絕緣、
三，目前雖屬大風大浪，但離類似九七、九八盡地一煲仍相距甚遠、

市場對香江聯匯，某程度上是講的人多，知的人少，例如近日充斥有關785一穿，預期金管局必然入市言論，其實形同廢話。

皆因機制上785弱方保證一穿，八十八層高必然要掃清港元沽盤。

換句說話，正如渣打所指，有錢入，等如要有錢走，港匯觸及七八五，88樓接沽盤，結餘減少，拆息上升，繼而拉近港美息差，減低資金外流，一套未必太多人理解的機制，其實清楚不過。

惟現在最大疑團是，當一穿785後，結餘會減少多少？而結餘減，拆息會上升多少？

簡而言之，港紙弱已不是新聞，最大不明朗仍然是接沽盤後事態發展，難怪中環人認為，既然遲早要發生，倒不如本周提前實現更好。

瑞銀提出一個分析頗為中肯，該行首先否定狙擊之說，繼而質疑港匯近日表現，由始至終大部份原因在於環球資金大舉調配前，市場從來對沖不足所致。

首先，瑞銀認為，去年人仔小貶事件後，流入過千億結餘體系，是累了大事，事後回想，該筆人民幣拆倉錢當時可能投入部份利差交易，種下市場波動加劇。
第二，去年底大批港元相關票據發行，早就觸發遠期美電買盤，跟炒作無關。
更甚是，瑞銀引述交易權指，區內，尤其南韓充斥一大批衍生票據，主要成份涉及對賭國指，國指越觸及處決位，市場越有需要在做港元期權空倉對沖。穿八千才是惡夢，而非785!!

今日，可能成為以後會有記載的「一．二零」流血事件，與其內媒上身，單邊歸咎鬼子佬，倒不如借用IMF報告內容作結：
中港融合既成就了香港，亦加劇了波動及負面因素。
呢句，政府新聞處當然隻字不提也。