2016年2月17日星期三

心虛


內銀業績期未展開,已經好消息多籮籮,但反而覺得係有人心虛。

內銀盈利倒退已是不爭事實,NPL上升亦非秘密,當前內銀股價持續呆滯,已唔多唔少反映大部分負面因素。

到底下調撥備覆蓋率點樣幫助銀行改善盈利? 要知撥備覆蓋率運作,就係呢條「紅線」定於150%,咁銀行如果有一蚊既壞帳收唔返、銀行就要由盈利中撥出1.5元單位提撥。

黃師傅提出當局而家用既思維、係「逆周期」,當經濟好時、提高「龍門」多收取撥備覆蓋、一旦經濟面對下行壓力,就可以動用上一輪儲起既撥備核銷壞帳,即是「好天收埋落雨柴。」

但調整撥備覆蓋率其實都係一次性調整,歸根究底,銀行要改善盈利,其實都係依賴息差收入同埋減少貸款損失,呢兩點、特別係壞帳率、似乎市場都幾擔心。

當然官方數據早已無咩人信,東亞中國咁細既Operation,壞帳率都超過2.3%,內地整體既然只是1.6%? 邊個信?  高盛就用左工業企業利息幅蓋計算,得出驚人既NPL實際應為9%,潛在虧損驚人。

更弊係有分析員計過,如果NPL開始增至3至4%水平,已經開始蠶食銀行資本,加上一個計時炸彈Coco bond,後果可大可少!

COCO Bond官方翻譯係「應急可換股債券」,其實係零八年金融海嘯後,由監管機構設計,目的就是避免銀行重演「大到不能倒」。

而且唔好以為COCO Bond係「鬼佬野」,全球發行量最多既六間銀行,其中三間就係中行、農行同工行,過去兩年內地銀行總發行規模已達600億美元。

話COCO Bond會爆煲,似乎相當危言聳聽,畢竟而家內地四大行資本率平均達11.5%,要COCO Bond觸發「債轉股」條款,資本率要跌至5.125%以下。不過以內地經濟惡化速度之快,有對沖基金已預警內銀要減值10%資產,相當於3.5萬億美元股本,到時肯定會沖擊銀行資本率。

雖然上月新增貸款破紀錄,理論上有新錢批出、可以還到舊債延遲違約,不過瑞信陶老爺已篤爆,一月信貸急速上升只係表象,實際金融狀況仍然緊張,生產借貸成本超過十厘既多年來高位,人行跟本係「Behind the Curve」!!

沒有留言: