派糖

做財經我地經常留意經濟數據，呢個星期本地焦點就放到農曆年零售銷售、又或者是澳門博彩收益，但原來有個數據、好易被人忽視，但其實已經響起警號!

講緊係本地貨櫃碼頭競爭力，去年貨櫃吞吐量由前年排名第四，進一步跌至第五位，如果光陰倒數十年前，香港港口排名是全球第一，曾經是全港最繁忙港口，可惜今時今日已經風光不再。

香港港口吞吐量，已經連續18個月下跌，唔好睇少呢個行業，香港既港口直接聘用近10萬員工，而相當物流及貿易佔本地經濟活動近四分一，由大型國際貨船營運商、到小營進出口代理，維繫著大量相關行業同數十萬員工生計。

由零售、地產、以至投資、港口貿易、甚至領「一時風騷」既金融行業，都因為市場波動、而出現大量倒閉裁員，據聞今年財爺對經濟前景評估，相當唔樂觀。

去年本港GDP，大行預測都唔樂觀，而政府之前預算，全年增長2.4%，消息相信係可以達到，特別提到，當中有1個百分點屬於政府刺激措施，而呢個亦成為新一分預算案主題。

中環消息話，特首同財爺對係咪繼續派糖，有好大分歧，甚至引起激辯。觀乎最新消息連公屋一個月免租都無埋，咁新一分預算案仲有咩可以憧憬?

又唔需要太擔心，基於財爺對今年經濟評估相當審慎，甚至乎估最差可能無增長，因此今年預算案會一改慣例，即使預測下年度未必有大量盈餘，政府仍然會以提振經濟、刺激內需為目的，增加開支。

睇嚟刺激內需，唔單止係內地奉行、連財爺都緊跟中央路線。大摩已經估計，對個別受重創行業、包括零售、旅遊同貿易相關，都有紓緩措施，希望可以推動經濟發展。

只可惜香港既深層次矛盾、唔單止在個別行業、而是廣泛存在於政治經濟社會層面。而且產業結構年年講要改善，但年年都舉棋不定。

面對阿爺叫停人民幣國際化，香港金融最獨特既賣點都逐漸失色，難怪超人一早預警、今年「生意難做」。