2016年4月12日星期二

原罪


相比「八字頭股」嘅癲瘋狀態,五十隻成份股組成的恒生指數,早已經成為明日黃花‧

如果將去年上市嘅一批創業板股份、編制一個指數,一早就創下歷史新高!

8359 Hypebeast,周一上市較配售價高開九倍之後,

早就令中環人眼界大開,今日再下一城,兩日累積最高升幅達到九倍半!

世界之大,一山還有一山高,見你高開九倍,今日8319思博開市早段、已經高過配售價近十倍,而且段段有力再上,臨收市見三個一毫半,比配售價兩毫半,高十一倍‧

思博屬於脫僵野馬型。同日上市的8217 聯旺,大可界定為極速品種。

配售價兩毫六,一開市報兩蚊,高開幅度達到七倍,未夠,中段曾經再爆一段上到四個八,較配售價高近十八倍,換句說話,開市價兩蚊買入,即日高位放出,回報仍然達一倍四。

人人話香港創業難,尤其新經濟大環境下,又睇睇由翠如BB嘅爸爸做大股東的聯旺,故事話比大家知,建築同渠務工程可以致富,一經成功上市更加係身家暴漲之時。

無論Hypebeast、聯旺、及思博,基於創業板上市關係,盈利數字在在一般,Hypebeast九百多萬稅前盈利,算有增長。

但神奇小子聯旺截至去年十一月的八個月,盈利下跌四成半,只有639萬。

賺六百幾萬,聯旺竟然願意、駛近2100萬上市,五千萬左右集資額,近半用於上市費,其餘兩間集資數千萬公司,上市費亦介乎千七至二千四百萬。

用上一年都未必能夠錄得的純利做上市,看似不值。但觀乎首日表現,非旦物有所值,更是物超所值吧!

幾毫子配售定價,配售結果部份僅輕微超額,經一經交易所過過機,股價倍增,若非其它原因,那必然是配售定價過程徹底錯誤,好小子有眼不識泰山!!

爆升唔係罪、爆跌亦唔係罪。

八字頭股份癲瘋,係按程序之下誕生,投資者自行決定的結果。

咁,錯在邊個?原罪又是誰?

沒有留言: