2016年4月13日星期三

密月期


由發改委突然召集周三要發表宏觀經濟數據, 心水清既中環人已經立心, 開市後就要掃貨!

結果無令人失望, 由周一PPI數據, 到進出口回暖, 發改委一句「開門紅」係有事實跟據, 已經變相通知大家,綠芽出現!

無論係Sky Sir 定黃師傅, 對後市都信心十足, 黃師傅本來預期大市要回調到19800, 先行整固先會再上, 結果都唔使等, 加上RSI 仲係「好舒服」, 下個位可以等到21800, 叫大家好好享受下近日升浪!

SKY Sir 就索性叫大家做單邊! 佢自己兩日前就已經轉身, 形容最近出現陽燭既股分多達600幾隻,過去一年未試過咁多! 應該就買股好過買市, 下個目標要睇到250天線, 一下唔覺意Overshoot, 分分鐘可以到23000點!

佢地理據Q2會係中國經濟回暖密月期, 同意綠芽出現, 識買既、早就買齊鋼鐵、水泥、同建材, 貿易數據只不過係錦上添花

顯然, 由琴晚IMF明明下調全球經濟增長預測, 但就「零零捨捨」調高中國經濟增長預測0.2個百分點, 預測今年可以達6.5%, 經濟學界已經開始估計, 周五公布的首季 GDP, 可能無想像中咁差

今日最爆既一個經濟評論, 首選肯定係匯豐首席經濟學家屈宏斌, 上星期佢大老闆歐智華先話中國經濟, 要達到全年6.5%並非易事, 今日「屈首席」就話, 三月數據令人欣慰, 爆出年內經濟可以增長7.4%, 簡直令全行震動!

其實要數唱好中國理由, 真係有千千萬萬個, 明明MSCI 擺明覺得中國未解決到, 流通量及行政干預問題, 大行唔理一於就話三個條件符合兩個、年中就勢必入摩指咁話!

瑞信策略師陳昌華, 明明就睇淡股市前景, 但瑞信就要以另一分策略報告, 以PPI同股本回報做比較, 「度」出PPI見底就等如ROE可望回升, 問你服未?

講到呢度, 回頭再望下隻聯旺, 每手要成11萬, 市值已超過140億, 仲高過翠如bb「娘家」TVB市值123億, 都係欣賞BB一句: 「爸爸繼續努力建路,女兒繼續努力做戲,媽媽繼續買平菜!」

炒股既嘢,真係識條鐵咩!

沒有留言: