2016年5月27日星期五

A V T

真人真事: 以為股市靜局,誰不知晚飯時間,一樣偷聽到一對年輕夫婦對話。

「隻阿里巴巴點算? 琴晚跌得好勁!」
「無事啩,好似被美國證監會查緊。」
「我地110美元買,早知聽人話騰訊好過,創新高啦。」

雖然阿里意圖淡化SEC調查,亦得到大行力撐。不過華爾街日報繼續發功,力指SEC 今次針對、正係長期被疚病既GMV計算方法。甚至引述分析員指、谷數誇大程度,可能多達五成。

如果今日對照一下騰訊、股價表現就更說明一切:
阿里巴巴上市後、歷史高位近120美元是在2014年9月創出,但到而家回落幅度達34%;相反同期買700,回報接近三成!

同阿里巴巴處處以馬雲為核心唔同、馬化騰幾乎將自己消失到無影無踪,但部署整個集團發展,就非常有步驟。

先以遊戲及手遊吸引用戶、再發展QQ及微信等社交媒體,之後完成網上廣告及微信支付,整個生態圈已經成型。日後焦點已經放到AI、電子內容、及O2O會接力為新增長點。

與馬雲經常將「雲」掛在口邊、騰訊更多是將「雲」視為商品及工具,而且阿里巴巴雖然王國夠大,但好多時都缺乏焦點、更缺乏好似微信呢個重要既社交平台。

作為兩大科網股巨頭、MSCI 下月全數計入ADR後,本來應對阿里巴巴有利、騰訊反而會被攤薄。

德銀之前就估計過、被動同主動基金因為ADR調整,需要追入合共400億美元股分,當中最受惠、正係最近負面消息不斷既阿里巴巴及百度,估計比重會增加至8%及5%,相反700 就會由12%攤薄至11%。

有基金就正睇中呢點、認為指數基金任何調整減持騰訊,就正好係買入機會,不過似乎市場早已經Front Run 呢個CALL!

話說回來、今日無厘頭升市,除左700 應記一功,疑似深港通開通,亦成為借口。

坦白講、市場渴求好消息,已經到左亂來階段。

深港通開通、領導人早已拍板,只是刻下中證監換新主席、對風險控制視為重中之重,連MSCI 都懶得招呼,何況一個深港通?

確實、開通只是年來遲早之事,係六、七、八月邊個月公布,真係咁重要? 以一段港股通額度用剩不足千億、額度可能三個月內用盡,作為擴容先兆,「順便」配合埋深港通推出,屈機程度,其實不下於華爾街日報老屈人行。

沒有留言: