2016年5月20日星期五

陪葬


一年前今日,有隻股分叫566、當日公司開股東會,會議期間,有股東發現公司股價被「腰斬」一半,即場質問管理層,之後既故事、相信都唔需要多講。

一年過後、漢能股東會又再召開,李河君亦有現身。

與去年唔同既係、公司今年股東會不設在港,而是搬左去北京奧林匹克森林公園東門,即是漢能的清潔能源展示中心、試問有幾多香港股東會去北京出席?

時間只係過去一年、呢隻曾經係股王漢能,已經人面全非,甚至連李河君本人及3名高層人員,亦在晚上公布辭職。

而過去一年單係566漢能本身,因為重組、已經裁員2000人,母公司亦不好過,裁減人手高達三分一至一半左右。

暫時失去交易上市地位、過去一年漢能已經失去新華聯控等幾間公司股權認購協議,無左275億既潛在資金。業績方面,收入大減同巨額撥備,由盈轉巨虧122億。

據內地媒體了解、曾經被李河君稱為現金牛,每日聲稱淨現金流有一千萬既金安橋水電站,早已經無法再錄得盈利,並先後兩次被抵押,漢能控股更有出售打算。而呢分出售名單、仲包括埋旗下光伏電站項目。

李河君其實唔係無諗辦法、基本上過去一年,佢都係四處搵錢,特別係向國家各部委拍門,包括今年初、山東一個項目就獲得國開行專項基金一筆6億幾貸款,更一度引來國家未放棄漢能既猜測。

事件吊詭既係、雖然漢能被打沉,但之前睇淡既對沖基金,一樣要陪葬。

原因好簡單、就係佢地之前借貨沽空566,雖然真係買中方向,但漢能停牌一年、對沖基金不旦唔能夠平空倉獲利,反而仲要蝕借貨利息。

同漢能一樣、長期停牌超過一年上市公司,數目有43間,好似天合化工、佳兆業、市值夾埋有超過3000億。

同美國唔同、SEC要求公司最長停牌時間只可以有十個交易日,即使有調查或者其他訴訟,公司只要充分披露就要復牌。

相反、本港既上市規則,就對長期停牌公司,並無任何監管要求,停牌數年公司,大有人在。

按證監會原先想法、咁做其實係想保護投資者,但諷刺既係、好似李河君可以在場外以大折讓九成減持股分,但小股東、資金就只有無限期鎖死。

彭博更引申、由於本港既停牌機制,令本港市場估值有交易折讓,對比資產淨值只有1.03倍,低於MSCI 全球指數1.97倍。

港交所都明白問題所在、今年初已經表明會修改長期停牌既造法,消息話,好大機會會參考美國做法、只要充分披露,公司在限期過後就要復牌。

話說回來、漢能一日未復牌,小股東都無咩可以做? 唔通真係寄望、7月公司介紹既新能源車發布會,可以好似Tesla 咁一鋪翻身?

沒有留言: