2016年5月6日星期五

打劫經濟學

上午美孚發生一宗銀行劫案。

打劫銀行,自從09年起打後,每年累積數目不足雙位數,僅僅介乎一年2-4宗,令銀行劫行近年已漸變而成罕有新聞。

經濟轉差,生活無以為繼,兼且內地經濟呆滯,刺激罪案上升,真係咁邪?

澎湃新聞同日報道,溫州民企老總由於無能力支令員工薪酬,於是帶同員工向鄰居打劫!!

有經濟界口痕友提到,一旦銀行劫案趨升,會否等同於經濟轉差程度遠出所想?

事實上,無一個客觀數據及研究,但睇睇,零八海嘯年,打劫銀行有十宗,按年多兩成半,01、02及03年市面一片不景,先通縮、又沙士,期時銀行劫案每年有介乎34-54宗。

調轉另一個角度,銀行劫案低企,亦不等同於經濟處於一片好景。

判斷經濟及市場問題,分析界最忌避用上「結構性」呢三個字,奈何,觀乎香港經濟情況,至今為止,最少兩大結構性問題浮現明顯:
一,成本高昂、
二,零售銷售結構性向下。

打從2014年底起,除一個月份外,零售銷售持續按年下跌,昔日當紅炸子雞,貴價品,珠寶鐘錶銷售均錄按年跌幅。2014年中起,每月按年跌幅持續超過一成半。

結構性零售市道轉弱,怕的是一個結構引申更多結構,從而製造無窮無盡結構。

瑞信分析員每逄佳節必落場,已成為慣常動作,五、一期間,該行「蘇珊梁」巡尖咀,過銅鑼灣,結論是大場水靜河飛,難怪高盛昨日密謀變身,為收租股披上新衣,呼籲投資者睇Yield 唔睇Rent。

外界只顧中國PMI,望望特區PMI的話,十四個月處於萎縮水平,情況足夠與九十年代末,二千初相題並論。

最晴天霹靂莫過於,企業勞動投入成本出現09年以來首次下跌,即係咩?工資正在下移,但生活成本高企未有扭轉,陰乾式下行,一帶一路救港,咪玩啦!!!

沒有留言: