2016年6月8日星期三

對沖


今日大市靜靜地、不過有兩隻股分都創左一年新高,佢地都有一個共通點,就係由政府賣出股分上市。

講緊66港鐵同 823 領展、特別係領展今日創出年半新高,好似我地嘉賓羅尚沛今日咁講,買呢隻兩隻股分、唔單止係投資價值,更重要係對沖番自己既社會成本。

試想下、梗有一間係左近、有邊個唔需要幫襯領展商場? 又有邊個唔使搭地鐵?

與其見佢日日加價,倒不如做咩佢股東對沖。

所以見到領展去年多賺逾一成,股東愛它、租戶恨它,領展全年每基金單位派息2.06港元,升一成三,勝預期。

旗下物業租金調整率25.9%,單單商鋪部份升幅兩成九,股東袋一舊,租戶捱多刀。

由「匯」,變「展」、由屋村商場管理、到今年銳意成為創新世界級房地產投資及管理機構。

領展業績公佈後,曾見五十,創新高,觀乎領展,贏在三大方面:
一:叫房產基金,而非普通收租股,全球喝息大前題下,其實唔做野都大把人買、
二:目標清晰,只為股東,而不斷加租,更新商戶組合,少一份勇氣及厚面子,頗難成事、
三:做本業營運,作為實驗工場,資產提升、海外收購、兼任發展商等等,可見一班。

糾纏於問領展租金前景,實為浪費時間,因為實加。

觀乎823最新部署,業績報表內已有透露,領展做了兩件事:
一,資產提升之餘,進一步升級資產提升,如是者,將本港物業組合分類為都會、匯坊及鄰里三大組別,以確保能夠長遠有效地提高營運表現。

以都會為例,龍翔商場已成歷史,取而代之為南館、北館,擺明要食黃大仙祠人流條水,換句說話,五個字:加租指日可待。

第二,領展4月1日起,將二十個本港物業分類之外,並組成五個物業群,各自有各監督負責,大前題固然要提升價值,用分析員說法:
文明一點,可理解為提升效率及營運、
坦白一點,近乎引入內部競爭文件,五大山頭爭表現,結論又是四個字:加租指日可待。

林鄭媽三大山之一,領展佔一佔位,千一億以上市值,買起領展,咪玩啦。

事到如今,要怪當日為咩將房委財赤問題不斷煲大?要解決領展,倒如如在旗下屋村商場左、中、右或附近,將屋村商場復辟。

沒有留言: