回報

通街不斷問：買Reits好嗎？

的確，香港房產基金跟美國以及香港債息曲線，成反比，債息越低、房產基金越升，伯南克陰霾下，純粹為收息回報，Never too late!!

但高盛今日提出理據，亦有其道理，首先，本港多隻房產基金既嚴重跑贏大市，亦嚴重跑贏地產及收租股，以估值計，相當於過往平均5年上限水平。

高盛假設美國十年債息低於一厘八平均值計，領展頂盡61.54元；一旦十年債息升至兩厘半的話，引申基金單位合理值相當於41.68港元，依家先買823，潛在升幅僅一成四，派息回報三厘七，但承受下跌風險就超過兩成二！

正因如此，高盛叫換馬! 事關領展為首百分百分派，現水平所謂Yield，頂盡三厘尾、四厘頭，反而地產及收租股，平均派息比率只有五成，但派息率已達3.8%，即係咩？
即係高盛叫你當地產及收租股係Reits!!

摩通亦認同，收入及派息穩定大前題，美國債息下跌的確觸發資金轉投磚頭股，但摩通同時提醒，地產股及實體地產樓市，勢必分隔，前者好、不代表樓市一樣風光如晝‧尤其無證據顯示資金一如既往大舉流入。

近期，本港銀行按揭減息新聞，佔去部份篇幅，但與其數銀行、問趨勢，其實要搞清兩件事；
一，銀行實際下調幅度只有「一滴」;
二，今次係銀行罕有在拆息上升期間減按息‧

外界話，息進一步跌，但查實，目前三個月拆息為0.555%，無論比年初0.399%，及去年今日0.387%都要高。

換言之，減按揭息並非出於資金流入及息低，而係銀行未發市，貸款需求難比預期低，這才是重點在所!