打孖

老實，盛來運主持第二季經濟運行記招，相比第一季自吹自擂，今次明顯虛中有實，「穩、進、新、好、難」五字形容意義不大，中央任務係經濟一切從穩，又點能夠、一如首季咁吹噓為、亮點紛紛呈現!

上半年新增貸款超過七萬億，六月貸款數字逾萬三億，簡單一個財政開支增幅兩成多，擺明中國依然靠擴張式財政及貨幣政策。

六月、固定投資升幅7.4%，相比5月、升幅只係低0.1個百分點，基建投資增幅、擴大至21%，運輸相關固定投資、六月升幅19%，比五月高近十個百分點，貸款、投資、好橋唔怕舊。

讚盛來運在於他遠比以往老實，及有備而來，皆因正當央企固定六月升幅由22%擴大至24%之際，民間固投叫人吃驚，升幅由五月只有0.8%，到六月更錄得0.5%跌幅，恐怕對上一次難以翻查記錄了。

盛來運承認，民間固定投資疲弱，為下半年經濟、埋下不確定性，人行官員再補充，M1升幅，相比M2增長相差擴大至超過十二個百分點，正正反映企業及民間有錢而唔投資。

仲要嚟自官方口中，實在難能可貴。

第二季之強，只是市場預期得弱，正因如此，巴克萊將全年預測由6.3%，上調至6.6%，明年由調高至5.7%，亦有欠意義，事關調高之後，依家仍是全城下限。

6.7、6.7、兩季打孖上後，大行形容是「L型派」全面勝出。好的一面是經濟托底，但壞的一面固然是政策狂熱份子嘅憧憬、短線仍然落空。

值得一提為，樓市說成為牛市重臨瘋癲搶樓，但整體房地產投資增幅只有3.5%，比五月少3.1個百分點，新動工增幅亦大降至7%，又到底咩事？