自食其果

央行減息、匯率反升，完全顛覆咗傳統經濟教學理論。

今年嚟英國、新西蘭等多個央行相繼減息、加大量寬，但貨幣匯價竟然不跌反升，扭曲咗貨幣政策嘅效果。

理論上、放寬貨幣政策會減低貨幣價值，匯率應該相應下跌，但今年以嚟嘅情況啱啱相反。

上星期四、新西蘭儲備銀行減息0.25厘，並暗示仲會降息，但結果公布之後，新西蘭元兌美元匯價，反而升到一年高位。

澳洲亦有同樣嘅情況、月初時再減息0.25厘以嚟，澳元都持續強勢。

呢個並唔係個別事件、南韓、台灣、俄羅斯及印尼等地，舊年先後減息，但都無推低本身貨幣匯價。

市場對央行政策無所適從、造成亂局，聯儲局不斷開口話要加息，但由年初估算要加四次，到宜家一次都未加。
日本央行行長黑田東彥、又講一套、做一套。
歐央行行長德拉吉一味話乜都可以做，但又「擠」牙膏式推措施、攪到環球資金調配大亂。

摩通認為，負利率係罪魁禍首之一，因為一啲地方就算減息，仍然係正利率。面對負利率嘅大環境，對追息一族嚟講、依然有一定嘅吸引力。

好以新西蘭同澳洲噤、就算減息去到歷史低位，但仍然都分別有兩厘同1厘半息。

放眼全球、推行負利率嘅央行，除咗歐央行同日本，仲有瑞士、瑞典、丹麥同匈牙利，據摩通統計，現時環球去到負利率嘅國債，總和多達8萬8千億美元，係全球國債總額嘅3分之1。

法巴指、近乎零息環境下，央行愈嚟愈難以管理貨幣匯率，好似瑞士央行，為咗要將瑞士法郎匯價，釘緊住歐元，被迫大量吸納歐元，造成外匯儲備中有4成1已經係歐元，但弱勢歐元，只會削弱外匯儲備，瑞士央行唯有加大投資，博取更高回報。

今年上半年投資美股、急增多5成，創紀錄達到近620億美元，蘋果、微軟、強生同埃克森美孚等大藍籌，都係吸納對象，買入嘅蘋果股分最多，甚至超越美國最大嘅公共僱員退休基金嘅持股。

日本央行同樣由管理貨幣、變咗股市大戶，據彭博估計，喺日經指數成分股入面，日本央行已經喺81間公司入面，位列前5大股東。喺上個月、決定加大購買ETF規模之後，預計到明年年底，更會成為當中55間嘅第一大股東，即係佔咗225隻成分股入面當中嘅4分之1!

咁仲唔係自食其果??