世界很危險

由假票據、假國債、到假保函，內地假貨五花百門，估唔到連金融產品亦都一樣，套用馬雲一句，唔通真係假貨比真貨好?

假貨始終只係呃得一時、最終咪要穿煲? 但問題係假貨充斥之多，連市場都自己呃自己時候，作為當權者，其實又點可以怪大媽大叔落來香港沖保險產品?

繼銀聯落閘後，最新大媽已經改變手法，轉戰招商銀行「一卡通」跨境資金管理及本票服務，甚至出現有大媽逼爆大堂，銀行界指出，內地居民來港開戶，短短數月已錄雙位數增幅。

到底「一卡通」係咪真係可以走資，其實都係眾說紛紜，因為招行內部監控其實唔弱，意圖進行跨境走資，絕非話咁易。無論如何，事件正正反映，內地居民要力保資產決心，其實先係「洪荒之力」!

經濟學人今期封面故事、道出正係2016世界好危險，其中表表者肯定係中國。無錯，表面睇一切美好、GDP三季有6.7%，PPI連負54個月後終於轉正數，企業盈利又有改善，去產能更提早達標，邊個話中國危險?

經濟學人指出，呢啲正正只係表象，無論境內境外、風險正在不斷提高。當中國在加入WTO十五周年之際、原本正想打正旗號取得市場經濟地位，點知一個特朗普上場，就將一切局面打破。

富瑞開宗明義指出，內地目前債市問題，其實同舊年股災同出一徹，槓杆借貸、理財產品氾濫、以及監管寬鬆，目前債市泡沫基本就係源於去年股災後遺症，換言之、一年過去其實咩都無改善過。

而債市問題爆破、亦令人行貨幣操作更趨兩難，特別是增加貨幣供應，令實際利率下跌反而加速資金外流，基於當局不願意加息損害經濟，結果勢將加強資本管制。

但懂得經濟學都知，任何管制面對市場沖擊，日後承受既惡果只有更大。正如經濟學人指，管制只會令大媽更擔心人民幣單邊貶值、倒頭來只會更想辦法外逃，同時亦影響對內投資信心。

由GOOGLE SEARCH既熱門搜尋都可以睇到，對中國最熱門SEARCH，已經由去年既股市變成既資本外流，喺亞洲區內既排名，只係僅次於特朗普同TPP之後!

呢啲都可以解釋到、一度已被指已死既比特幣，連續三日出現暴漲，更一度突破900美元，係三年高位，其中九成既成交，都係來自內地。

說來諷刺，比特幣既出現，本來就係要對沖美元因為濫發印鈔而出現貨幣失效，但而家對沖得最多既、反而係人民幣。

今日既表面穩定，其實就基建於浮沙之上，特別係明年政府換屆，任何一個政府官員，都只會有多一事不如少一事的想法，無人願意承擔改革失敗既風險。盛如經濟學人所說，投資者都喜愛穩定既外表，但要避免日後出現硬著陸，而家學識「剎車」其實唔係壞事。