2016年12月7日星期三

最大敵人


對小川行長來講,來年最大挑戰、唔係特朗普、唔係沽空大鱷、而係應付十四億人口。

簡單數學、每人每年兌換限額5萬美元,以目前對人民幣信心「江河缺堤」,唔好講多、只要有1%人口全數兌換,就達到七千億美元走資,多過今年頭十個月走資6200億美元,儲備真係到時會跌到二萬億!!

你會話、內地唔係個個有錢走資嘛? 不過聽聞唔少黑市都有炒賣兌換 quota,其實想得出、內地有咩唔賣得? 有限額既野好自然就有黑市價!

以目前人民幣貶值勢洶夾狼,今次唔到小川行長唔頭痕。以今年一月數據為例,單月居民外幣存款就急升8%,套用在今天的貶值預期,恐怕來年一月資金流走規模只會更大。

有策略師既分析都算有趣、面對大鱷或者沽空人民幣既炒家,人行仲可以用計量方或甚至數學模型,調整貶值步伐、甚至用挾息方法打擊炒家。不過對於一啲容易受投資情緒影響既大媽同大叔,同佢地講道理只係晒氣,不如索性落閘好過。

瑞信數過,自十月底以來當局最少六項有關收緊資金外流措施出台,相信背後有三大理由;
除擔心特朗普當選總統後,美元加快升值,同時間,但更大原因、正係出於要先事前部署、免得明年一月個人兌匯五萬美元額度重啟,居民加速走資。

而家外匯儲備已經跌至三萬億美元紅線,即使口講唔擔心,人行目前面對正係經濟學家口中既「不可能的三角」:既要開放匯率、又要有獨立既貨幣政策以及資本帳開放,根本不可能。

其實唔使經濟學家分析,有留意內地政策轉向,都知小川行長正係三管齊下,既收緊貨幣政策令資金收緊,同時亦加快匯率貶值,最後殺手鐧當然係資本管制。

內地銀行界已經有傳言,明年初重啟匯率兌換,銀行會設有額度制,唔會容許居民一下子全數將5萬限額盡兌。

不過內地大媽大叔盡有唔同方法、嘗試避開外匯儲備,有「賓卡」就話,內地資金近日南下、唔係買「港股通」、而係加快掃入豪宅。以香港人比辣招稅15%計,佢地多比15% 亦覺得物有所值,唔好唔記得,人仔今年都貶值超過6%,持有兩年貨仔已經喺返到。

何況以四姨太近日斥資13億,掃入九倉同南豐合作山頂Mount  Nicholson,平均呎價都要八萬大洋。有內地豪客話、唔少中半山豪宅只賣四萬蚊呎,直頭超值,所以已經部署密密買入,既可走資防貶值,分分鐘學四姨太兩個星期唔夠又搏到物業升值添!



沒有留言: