降落傘

由碧桂園斥資逾5000億人民幣，打造馬來西亞既森林城市，本來被寄予厚望，希望日後可以容納七十萬人。

當中有七成買家，預計都係內地居民、但出乎意外，碧桂園內地多個森林城市既售樓處，最近陸續關閉，原因簡單：中央落閘，一切海外走資全部免問。

森林城市既售樓處，當然無寫話唔比內地居民購買，但碧桂園已經轉移策略，將賣樓對象目標轉移至中東，包括首次在迪拜開設售樓處。

看小川行長今日既個人表現，風采一如當年，而發問問題之中、有近一半都係同內地匯率有關，包括有記者直接問，居民換匯係咪受到壓制？出國旅游留學係咪受到影響？

當然呢啲問題點會難到小川行長？先提出有管理浮動匯率對國民係有利、再舉英鎊為例，其實人民幣兌英鎊都係有所升值，旅遊升學都有著數，最後將焦點放到對沖基金刻意唱淡人民幣賺錢，結論係大家唔需要心慌。得左！　

但心水清既人即刻指出，過去兩年小川行長都係話人民幣匯率無持續貶值基礎，但結果呢？２０１５年有８１１匯改，到舊年、人民幣累計貶值６％，是０５年匯改以來最大跌幅，咁樣你仲信？

耶媽加息在即，期貨反映今年有十幾個巴仙機會，加息次數會達到四次，好似大和賴志文所言內地居民同企業，都係要千方百計走資，但面對外匯儲備跌至三萬億美元既紅線，真係可以用「平常心」去看待？

國內經濟只係剛剛企穩、目前只能夠用中性貨幣政策控制著、唔能夠大幅加息，結果就只有繼續落閘，而且資本管制既力度，恐怕會愈來愈大。

對於樓市，小川行長解讀係住房貸款仍然相對比較快速度發展，但重點是適當平衡。觀察家形容，平衡既形容係相當巧妙、既不能完全鬆手放任，但同時又不能壓得太死。

實際上、內地頭號熱門城市深圳，丁Sir 今早已經提醒，過去兩個月已經有見頂跡象。深圳布吉一個新樓盤，去年下半年賣緊4.5萬一方米，而家跌價到3.8萬，有業主帳面已經虧左60幾萬，正在微信發起要到售樓處維權。

深圳樓市作為內地風向標，甚至北京上海都只能望其項背，顯然內地去槓杆已經令樓市升勢逆轉，丁Sir形容，香港樓市在四個月後亦會見頂回落，而股市之後亦有爆煲風險。

莫非英雄所見略同？今期經濟學人亦以股市泡沬為題，形容目前股市泡沫水平、只有2000年前科網泡沬前、以及1929年大蕭條前見過。

目前按所有推動股市因素，其實都顯得唔實在，特別係中美歐央行收水，特別係人行，因為全球有八成民間信貸、背後金主都係來自中國。

更深層次問題，其實來自政治及經濟之間矛盾。面對民粹主義抬頭，過去幾年備受打壓既打工一族，都希望可以在選舉之中取得更大既餅。

當民粹取代全球化，企業既商品同資金唔能夠再隨意流動，經濟學人警告，選票同股票只能二擇其一，投資者係時候搵定一個降落傘。