2017年3月8日星期三

消失的貿易


當全球最大兩個經濟體系,二月分貿易數據、居然出現五年及三年來最大貿易逆差,大家會問,到底邊個國家咁有本事,可以賺到全球貿易順差?

內地二月分貿易數據,的確令經濟師完全摸不著頭腦:出口放緩都可以賴農曆年假因素,咁進口大幅飊升44%又點解釋、諗無可諗唯有都係賴一次性因素。

的確,大宗商品價格急升、當然係最好理由,好似期內煤及鐵礦砂價格急升1.1倍及83%,自然推高進口值,但唔好忘記,相比整個進口市場,原油、鐵礦砂同煤,佔整體比重、只有9%、5%及1%,絕對唔係決定性影響。

其實二月進口急升之謎、兩日前,已經由前人行政策委員李稻葵講左比大家聽,只係言者有心、聽者無上心。

按李稻葵講法,正係虛假貿易,佢推算出過去兩年、內地流出5000及6000億美元資金,絕大部分是假進口。以去為例,一半既走資,大約有3000億美元,就係由國際貿易之中既假進口流走,反而居民換匯不會是走資主要來源。

講到假貿易,大家自然會諗起香港呢個「造假基地」,不過放心,今次唔關香港事,因為累計頭兩個月,來自香港進口金額係大跌四成半,相反一年前同期就係升左89%。

按經濟師解釋、香港既海關其實已經加強同內地海關總署合作,堵塞虛假貿易既渠道,而家好難再靠香港造假。

相反、來自東盟同台灣進口,期內就大幅飊升左37%及30%,甚至連台灣政府自己,都對出口到內地急升、感到意外同唔明白,高盛相信台灣已成為新既走資基地。

李稻葵之前已經指出左,最熱門既假貿易渠道,其實係高新科技進口,企業話要買新技術,拿到外匯後,就改成出國投資。翻查二月分高新技術產品及集成電路進口,都有23至25%增長,而且比重佔整體已經增加至31%及14%,遠高於大宗商品。

所以話「橋唔怕舊」,最緊要識變通,好似琴日拆局所講,連大型央企國企都唔獲准將資金調出國外,其他民間當然係會想盡辦法走資,當一道閘關上,資金好快會搵到新渠道。

幾個月前有一個大型國際調查,就係用全球民間數據對比各國官方貿易統計數字,結果發現,2014年有高達2.1萬億美元總值既貿易差距,佔當年總體貿易額11%,機構形容呢個係「消失既貿易」。

值得留意、係內地同香港,排名在各國之中係第二同第三位,佔左當中既一成。如果有關既數字唔紏正,其實對國家制定經貿以至經濟政策時候,都有可能出現偏差。

沒有留言: