減價累事

有無諗過，手機收費減價，會令日本央行放慢加息步伐？

目前日本有一億人用緊手提電話，城市滲透率超過九成。

呢個電訊競爭激烈的市場，一直係以高昂的流動電話月費，去補貼手機機價，因此手機往往可以做到貼近香港的零機價，不過收費就明顯偏高，亦做成誘因令用戶頻密轉換手提電話。統計顯示，日本每五人就有一個會在兩年內轉換手提電話(似3乎香港的數目會更高一些。)

不過自從舊年SOFTBANK收購左VODAFONE後，我們早就提出日本手機收費必然爆發減價戰(見i-mode out, super 3G in )，加上日本政府修例，要求電信商增加收費透明度，
因此當地第二大電信公司KDDI今個星期公布大幅減低收費四成，而最大電信高DOCOMO，亦表明會跟隨減價。市場估計今次減價，會令兩間公司今年損失六百億日圓盈利。

而家市場係觀望到底統計部門點樣去計算收費減價、對物價的影響。

政府在二月時候，開始將一些會在短期內大幅跌價的貨品，例如係LCD電視，計入物價指數內，令二月數據再次出現通縮。

由於日本人用電話非常廣泛，今次大幅削減電話費，實在做成太大影響。皇家蘇格蘭就估計，最差情況會令物價下跌零點六個百分點，以目前通脹率只係負百分之零點一計，影響可以係相當嚴重。

試問以日本目前的經濟狀況，加上政局混亂，日本央行又怎能隨意加息？日圓的升勢又可以持續多久？