阿里巴巴的芝麻大門

招股前突然加價，阿里巴巴今年嘅預測巿盈率，已經係「過百倍」，科網股爆破咁耐都未見過，完全如入無人之境。

想買貨嘅又點止散戶，基金大戶今次同樣係押重注，由於反應熱烈，國際配售部份亦要提早兩日喺星期三截飛。

雖然有雅虎，思科同多個大孖沙入股，令阿里巴巴成為近期最炙手可熱嘅新股，但有外界就質疑佢哋係咪可以成為另一個科網神話。

我地被網友質疑係咪唱得太好，看過招股書，同大家分享下:

目前阿里巴巴，最依賴嘅收入來源，就係２５萬個，註冊付款嘅「信誠通」用戶。
靠住呢個龐大嘅電子商貿群，形成左佢哋獨有嘅市場壟斷優勢。

不過招股文件顯示，來自「國際信誠通」登記用戶，今年以來只是多１％，即係百多人，與去年增長近四成比較，明顯已經放慢。

有內地用家亦批評，阿里巴巴認證系統唔完善，好難做得成成生意。

係咪能夠為投資者，打開財富嘅芝麻大門，仲要取決於阿里巴巴上巿後表現。

不過今次發行嘅８億幾股入面，有超過７成係來自母公司舊股。

招股書話，馬雲日後最多得三成時間會放喺上市公司，但已經同其他舊股東齊齊套現左超過８５億元。

風險係咁多，馬雲的確是一個懂得控制預期的奇人，到底入唔入，都係個句：量力而為！