2008年1月18日星期五

海岬型


航運股日日跌,原因係反映航運業周期的「波羅的海乾散貨指數」未見底。

以為星期三單日跌百分之五點七、已經創紀錄最大跌幅,點知星期四再跌多百分之六點四,創多一個跌幅紀錄。

由舊年十一月高位11000點跌落嚟、兩個月唔見左四千五百點,跌幅四成一。

指數連跌八日,已經引起全球關注,不過拆開睇,並非所有指數都跌,今年以來跌得最多,是一個叫BCI海岬型指數,今年就已經跌左近三成,十一月高位計、兩個月更暴跌五成四。

到底咩叫做海岬型指數?其實就係指運載十七萬噸以上、主要運載「鐵礦石」嘅巨型貨船,十條航線之中,就以來往澳洲同中國嘅「澳洲寶山」航線跌幅最驚人。

對於呢個發現,其實一啲唔意外,原因係鐵礦石廠同鋼廠、特別係內地「寶鋼」新年度合約價格談判破裂。

澳洲最大鐵礦石公司「BHP」為左向中國施壓,舊年十二月已經開始減少付運,希望推高鐵礦價格,可以在「談判桌」上爭取更有利籌碼。

仲會跌幾多?目前關鍵是鐵礦石廠同「寶鋼」幾時重新進行談判。

由好處睇,海岬型貨船嘅供應已經大減,而另一個不明朗因素係,BHP 同第二大鐵礦公司RIO TINTO股權爭奪戰,亦可能影響談判結果。

4 則留言:

damon 說...

(你們)行內人可以取到或留意到咁多數據才決定會否買一隻股票(予取予携)..我們這些小散戶,就算真係有心做功課也未入找到咁多資料才去買一隻股..!航運股的跌價我身受其害..$7.15買的(368)直至昨天收$4.52(最底位至$4.2)比高位$8.25消了接近一半.究竟係當日開價太太太太高...還是公司的基本因素差呢?天知曉(或者瑞銀而家都未知).....我$5.06才止蝕!!!!超重創!!

MoneyCafe 說...

其實真係好睇鐵礦石談判係咪可以重新展開。基本上航運需求應該是有的,特別是亞洲航線,只要一旦談判重新展開,相信反彈力度也可以很大。

會計仔 說...

嚴格來說, 應是談判暫停, 宜家係傾4月1日起既新價, 全國鋼廠hold 住定單唔買礦, 只吃國內的低品位礦同自己存貨.

如果傾掂, 或真係 certified 破裂, 唔再以negotiation price 而係market price 計, 礦石需求都會番黎.

BCI 係跌幅既重災區, 受影響重大依次為中遠洋, 中外運航運, 中海發展, 太平洋航運, 主要係看船隻大小. 中海集運完全唔關事, 不過亦係前景最差的, 乾散貨係import iron ore, coal and cereal, 依d 受美國影響較少, 但集裝箱係食出口美國既需求, 中得最應.

等鐵礦石談判results annouced call 1919 亦係可考慮(有風險) 既策略之一, 中國鋼商餓左3個月礦既威力會好大...

MoneyCafe 說...

原來經濟學人今期都有提到波羅的海指數,指去年基本原材料只係上升百分之1.3%,遠追不上金/ 油/ 白銀升幅。

結論係樓市大跌、股市大瀉、消費開支減少......崩潰多個「波羅嘅海」,都不是甚麼大不了的事情。