血色黎明

瑞銀撇帳１９０億美元、供股１５０億美元、連續兩季業績虧損。

股價反而升一成二。

金融時報問，點解會係好消息？

市場解讀係，撇帳金額雖然大，但唔似舊年係毫無先兆，至少係市場預期之中。

不過跟據標準普爾估計，次按撥備總額達二千八百幾億美元，現在投資銀行累積只是撇帳千五億美元，未仔壞消息仲會一個接一個。

另一個解讀為好消息，是瑞銀股東肯供股，而雷曼發行可換股優先股亦超額完成。

華爾街日報話，銀行有辦法搵到資金來源，現有股東又唔需要被攤薄權益，銀行亦至少唔需要賤價沽售資產。

另一個憧憬係收購合併，瑞銀今次供股要到五月先完成，市場已經揣測好似係美國銀行、以至摩根大通有能力進行收購，而唔少歐資銀行好似係西班牙ＳＡＮＴＡＮＤＥＲ就有興趣提出收購，而滙豐行政總裁紀勤亦表明，開始重新留意併購機會。

歷時八個月嘅金融風暴，中間都曾經多次憧憬、以為最差情況已經過去。

好似舊年十月初多個主權基金入市，或者十一月大摩大幅撇帳３７億美元，市場都曾經以為最壞情況已經過去，可惜每次都是換來更大失望。

即使見到曙光，但前景仲要視乎盈利前景，大摩估計今年投資銀行盈利會倒退兩成，削減成本包括裁員係當務之急。

事實上，新任瑞銀主席已表明，未來需要進一步重整業務。

金融時報就話，即使金融市場開始見到黎明，呢個黎明都會係非常血腥(Bloody Dawn)。