1954年

今個星期，有一個市場同一間公司，都跌到去五十四年來最差，市場係講日本股市。

其實佢地就唔係跌到五十四年低位，而係連跌１２日，成為一九五四年以來最長跌市。

不過有間公司，股價真係跌到去１９５４年以嚟最低水平。

今年踏入一百周年的通用汽車ＧＭ，在七月二日股價５４年來、首次跌穿十美元水平。

經濟學人話，當時喺街到行緊車，應該係「Cadillac Eldorado」凱迪拉克、或者是甲蟲車呢類經典懷舊車，
真係有時光倒流FEEL。

星期三當日，本來通用對上一日出嘅銷售數據好過預期，令投資都對佢前景睇番好啲，點知美林出報告唱淡，指汽車業嘅集資壓力比市場估計嘅仲要大，情況惡化嘅話，通用汽車破產並唔係「無可能嘅事」，仲將佢嘅評級，由買入大幅下調到跑輸大市。

結果就觸發股價急挫一成半，令呢間舊年全球排名第五大市值公司，市值得番５６億美元。

其實好似金融時報分析咁、面對住全球原材料包括鋼材價格同塑膠原料大漲價，成本已經係飊升，加埋車仲要用油，經濟又差，連屋都無得住、又點會揸車？

雖然話，ＧＭ六月銷售好過預期，但其實通用單係六月分銷售就少左一成八，不過都好過豐田同ＦＯＲＤ，以上半年計算，通用銷量就下降左１６％，多過豐田６．８％。

有業內人士預計，今年美國汽車銷量將降至１４５０萬部，係１５年來最低。

面對油價高企，ＧＭ已經決定跟隨其他行家好似係福特同佳士拿、喺本土推出低馬力嘅慳油汽車，將呢款喺海外市場出售嘅MINI CAR，攞番到美國賣。

呢部一點二公升三門小房車，估計定價只係一萬美元，在油價高過四美金一加侖嘅年代，呢類慳油嘅MINI CAR銷售喺上半年反而增加左三成，話唔定真係可以成為「殺手鐧」。

金融時報都認為，ＧＭ破產機會唔大，因為以今年需要支出七十億美元開支計，ＧＭ手頭流動現金仍然有６０億美元，雖然都係唔多理想，不過估計真係要破產機會應該唔大。