2008年11月4日星期二

冒牌股神?

四叔首次減持中國人壽,作為投資者,我相信其實都無咩指標性可言。

多次評論股票投資,仲俾人叫股神。

但今時唔同往日,經歷咗金融海嘯,恒基主席李兆基都要減持股票投資。

港交所嘅資料顯示,李兆基喺上星期四,減持三千一百八十二萬股中人壽,每股平均價十九個三毫八仙七,涉及資金六億一千幾萬。

減持後,李兆基喺中人壽嘅持股量,降到得百分之四點七二。

睇番李兆基減持當日,中人壽股價大升一成二,收市報二十一個三。

李兆基係喺零三年底,中人壽上市時透過策略認購。

其實當年與李兆基一齊認購,仲有李嘉誠同鄭裕彤,不過他們在04年中國人壽禁售期解禁後,先後在每股5元價位進行減持,其中鄭裕彤獲利1.9億元,回報率高達50%,李嘉誠凈賺超過3億,回報率亦逾40%。

不過李兆基並不眼紅,當年他認定中國人壽是好股,可以學股神長揸,一於做其價值投資,結果給他看中,在07年11月中旬,2628股價一度高達54元,四叔的帳面利潤達200億。

不過今時不同往日,李兆基透過發言人回應話,今次減持中人壽嘅作價同五年前買入價比較,獲利超過六倍,佢話係趁而家市況波動,鎖定部分有利潤嘅股分。

但佢同時亦有喺市場買入股分,好似今日就用咗二千萬,以每股十六蚊買入125萬股東亞股分。

兆基財經向外披露持有嘅股分,有神華、平保、股價屢跌到新低嘅碧桂園。以及最近最近炒輸外匯嘅中信泰富。

有無發現,四叔既做法,同一般羊生羊太無咩分別? 見到大市跌,不是先沽出弱勢或基本因素轉差股分,反而是將手上帳面仍然有利潤的好股沽出,搏其他質素更差的股分可以有反彈?

基本上,四叔是認輸了。

好啦,四叔認輸,不過他的兆基財經,跌得再多仍然有過千億資產,其他之前又信左四叔的散戶,諗住「五窮六絕七翻身」的投資者,到了十月分理應「氣絕身亡」了。

我仍然想,四叔出發點不是誘人接貨,真的是一個好心腸的老人家,想分享一下自己的投資心得,可是市場是無情的,旺市時合上眼個個也是股神,當熊市來臨,就算是更強的強者,也有低頭時。

自己作為傳媒一分子,為四叔佢老人家、為觀眾著想,其實我覺得,係咪是時候想一想,可以減少對四叔的篇幅報道?

2 則留言:

亞羊 說...

好平常..
富豪們大都視錢財如雲,現在可能互相射水救亡.

睇睇... 唔知邊間銀行要政府接管先??

定(冇謂再講)費時俾別人話唱X香港啦..

咩.. 咩... 咩...

木宰羊 說...

查實四叔只不過是一個散戶,可能一個羊生羊太的炒股成績也好過他,最慘就是很多人都相信他,跟他買金木水火土,最後連累人家破產。希望今趟可以給大家一個教訓,不可盡信大媽沙。