「Deal」!

今日有時間再仔細研究,電盈私有化交易,有同事提到,可以簡單一句形容:「好 Deal!」

再簡單直接講,應是:「Deal!」

電盈經歷由香港電訊同盈科數碼動力合併,股價由過百蚊,五合一,到而家4蚊都唔夠。

我地問過由合併開始、已經揸住電盈嘅曾淵滄曾教授,佢手頭嘅電盈股分,平均買入價都要37蚊,多次喺報章嘅專欄形容自己對電盈心死,面對今次大股東,以融資派息方法進行私有化,佢話唔合理。

「由百幾蚊跌落來,無論你比四蚊好、五蚊好、六蚊好,對高位買股東來講,都係得番啲「揸」,不如留番佢(紀念),都幾好!」

說來哭也不是、笑又不是,相信好多股東會身同感受。

李澤楷聯同網通,話會俾每股4個2,即係總數接近155億進行私有化。

實際呢,一蚊都唔駛!

交易巧妙嘅地方係,收購完成後二十日,電盈會向股東派息,最終李澤楷、佢旗下嘅盈拓聯同網通,可以收番最少169億嘅股息。私有化後可能仲有14億袋落袋。

實際上呢筆用嚟派息嘅錢,係電盈喺今年七月,向包括滙豐在內嘅多間銀行,將手頭30億美元債項,再融資成234億港紙嘅五年期貸款,當時電盈借錢嘅理由係要減低借美元嘅融資成本。

評級機構穆迪投資批評,電盈靠貸款派息支付私有化,會額外增加公司負債72億之外,亦影響股東對電盈嘅公司管治同信息披露嘅睇法,因此將電盈列入負面觀察名單,仲話唔排除會調低評級。

最令人有興趣、係穆迪講到明,關注大股東嘅野心,可能令公司前景更唔明朗!!! (都真係幾白!)

不過呢個算盤打唔打得響,都要睇小股東,因為一旦有一成獨立股東反對、或者是相等於總股本5.2%的小股東投反對票,交易即時告吹!

里昂就計過數,電盈既然俾得起百七億股息俾大股東,小股東會質疑,呢筆唯番每股兩個半至兩個九嘅現金,點解唔直接派俾股東?

高盛都相信,呢個派息安排會惹嚟股東不滿,加上出價4個2,比之前盛傳嘅五蚊低,令私有化難以通過。

其實文件都留有尾巴,稱任何收購價如要修訂,都需要交易各方同意,看來好戲在後頭。

留言

亞羊說…
算吧.....

大家現在不如講句國家的"一保一控"港版.

一保:保住自己份工,免被失業.

一控:控制自己支出,有謂或冇謂支出(v v wet wet),可免則免..

若各位能導守此準則,對國家,香港將是最大的報國啦...(語重深長)
好自為之,你想食國家,定國家養你???

我就上山放羊了.....,
匿名說…
日久見人心,小超人多年來醉心財技,難道大家還以為持有電盈、跟著他會有好的結果嗎?
曾生有本錢把股票當作紀念品,可憐其他人卻沒有這個財力及福份。


大時代的我
Leona說…
可不可以找人向我們這種不懂財技的普通人解畫,究竟小小超為什麼要私有化電盈?不費分文將之買回來固然厲害,但之後是為了什麼?再將之善價而沽?誰會成為最大受益人?

又,小小超逢有大deal即上娛樂版,難道都是巧合?

(作為你們的常客,很慚愧我只懂問普通得近乎愚笨的問題…)
匿名說…
小小超正一下價橙黎...
咁既愚人deal就梗係冇人俾佢deal 啦
匿名說…
私有化之後電盈就唔需要向公眾交代,即係小小超就可以更為所欲為,兼且之後盈利亦唔需要再派息,自己袋袋平安。既然佢而家諗倒條屎橋唔駛自己出錢仲可以袋十四億,佢個算盤都算打得响。日後間公司如果又有炒作機會(市場有憧憬唔代表一定要電盈賺倒錢),佢又可以再上市從新集資,佢真係以為全世界人都係傻架喇。事實係買親佢啲野都蝕到仆街,佢而家咁做以為自己好醒實質做到佢自己個名臭晒,以後佢仲想出黎集資就難喇

此網誌的熱門文章

「急於求成」 JPEX 爆煲引證證監會監管不力

減辣不單徒勞無功 甚至「好心做壞事」

三十而立的金管局:思良將