四大衛對哥利亞

美國雖然經歷金融海嘯，不過要挑戰佢世界霸主地位，一啲都唔容易。

不過有四小子一於無有怕!

代表新興市場嘅「金磚四國」BRIC，下星期就會雲集俄羅斯，討論儲備貨幣問題。

而作為會前「熱身」，俄羅斯同巴西都率先表態，話會減少外匯儲備中嘅美元資產，準備購買國際貨幣基金組織債券。

金磚四國一致行動，先有俄羅斯同巴西都表態，會減持外匯儲備中嘅美元資產，轉而購買由國際貨幣基金組織發行嘅債券，各自會購入嘅規模大約一百億美元。

「金磚四國」之中，除咗俄羅斯同巴西外，中國同印度，都會減少外匯儲備組合中，美元同美債嘅比重，中國將會購入大約五百億美金嘅「基金組織」債券，印度購入嘅規模，亦同中國嘅差唔多。

目前金磚四國喺基金組織嘅投票權，加埋都唔夠百分之10，好難同美國匹敵。

金磚四國今次嘅行動，有助擴大佢地喺「基金組織」呢類國際金融機構嘅發言權，制衡美國喺基金組織「一言堂」獨大嘅情況。

主席胡錦濤，下星期會出席喺俄羅斯莫斯科附近嘅凱薩琳堡，舉行嘅金磚四國首次峰會，商討美元嘅「國際儲備貨幣地位」問題。

目前金磚四國，加埋嘅外匯儲備，大約有2萬8千億美元，淨係中國就有大約兩萬億，而且主要係美元資產。

峰會嘅決定，對美元同美國債券後市，有主導作用。

高盛指，金磚四國已經減持緊美元，「沖淡」美元貶值，對本身外匯儲備所造成嘅損失，包括中國在內嘅國家，已經將持有嘅美國政府長年期債券，逐步轉為短期債券。

美國財政部最新拍賣嘅１９０億美元十年期債券，各地央行為首嘅海外認購，反應雖然踴躍，但市場要求嘅利率，就明顯高咗，反映央行對長債價格，態度審慎。

可以睇下淡友中堅分子、「末日博士」魯賓尼點睇，佢都認同美元儲備貨幣角色、無可避免受削弱，雖然唔會一夜之間出現，但長遠一定會發生。

個個都唔願意買長年期美價，債息自然係升完又升，琴日一度見過四厘嘅八個月高位，結果係扯高埋三十定息按揭利率，升到去五厘七九，比兩個星期前升左八十點子，對樓市都咪話唔傷。

華爾街日報計過，當按揭利率跌至五厘以下時，可以幫到萬幾二萬個家庭，每年透過轉按可以慳番二千五百美金，而家利率升返，當然一切就化為烏有!

其實債息上升真係對啱啱復甦嘅樓市又打一棍! 睇下斷供情況，就知未有改善。

五月分美國斷供宗數達到三十二萬一千四百幾個，按年增加左一成八，係連續三個月喺三十萬宗樓上。

即係每三百九十八個美國家庭之中，有一個就會斷供，其中重災區繼續係內華達州，每六十四個家庭就有一個斷供，比例係全國水平嘅六倍。排喺之後就係加州同佛羅里達州。

調查機構估計，上半年斷供總數會達到破紀錄嘅一百八十萬個。

摩根大通更預期，到左明年中，總斷供人數會高達六百四十萬戶，而樓價就會累積下跌三成九。

咁美國呢個哥利亞，真係咁難打底?