A50

適逢今日講到QFII，係時候澄清下呢隻A50。

長期高據成交榜。今日成交榜排第三位，有37億幾成交額。

現水平，較資產值13個1毫半，已經有溢價。

A50係根據新華富時指數入面50隻A股作為「參考」組。佔最多係平保A股，有近9%，其次係招行，交行A股。佔最少係華能，同上海電氣，換句話講，組合入面，大部分股分都係H股有掛牌。

亦因為咁，外界認為，A50波幅夠，亦具備AH差價對沖作用。

加上大部分都係重量級嘅A股，近日被個別報章冠以為A股「盈富基金」。

總之有人買，愈吹愈大，就更多人買。

基金經理話，A50成交活躍原因之一係多相關衍生產品，莊家亦較活躍。

市場熱炒之下，A50發行量每日俱增，依家流通有三十一億八千幾萬個單位。較上星期多近四億個單位。

問題就喺呢度，受歡迎增發，正常不過。但A50情況，就值得探究。

牌面上，A50係投資50隻A股。

但如果翻查佢地網頁，佢地已經講明，基金唔係直接投資A股，已係透過A股接連產品，進入A股市場。

原因係，A50發行商，巴克萊旗下I SHARE並無「QFII」資格。

佢地要透過另一中介機構，有QFII資格先買得，估唔估到係邊間?

就舊年幾乎「Too Big to Fail」的花旗，透過花旗，A50先可以投資A股。到最近先加入瑞銀。

問題就出喺呢度!

如果基金係直接投資50隻A股，投資者風險理論上係50隻股分升跌。

家下由於多左一種關卡，A50多左一個交易對手風險，就係花旗，同瑞銀。

當然，佢地需要提交抵押品支持A50基金，但根據網頁，花旗只係提供5億美金做抵押。

另一個問題更加實在，同值得留意。資料顯示，A50總資產值有4百幾億港元，即係50幾億美金。

呢個金額，遠遠超過單一機構QFII額度，就算今日放寬埋都係得十億美元，似乎無可能!!

銀行界人士話，如果QFII爆額，基本上唔可以再增發。但要增發，發行商都會經接連產品發行機構，買入相關衍生產品，作為BACKUP。

至於A50，喺網頁介紹中已經講明，佢地唔係直接買入A股之餘，其實係經中介機構，買入A股相關衍生產品。

至於衍生係咩，唔好意思，無講。

但好簡單，A50投資者，其實係買緊A股相關衍生產品。

目前同A股相關指數基金有好多，包括由中銀保誠負責嘅標智系列。

兩隻基數基金，都係同A股相關衍生產品掛勾者，而唔係同正股。當中亦涉及交易對手風險。

反而唔屬於指數基金嘅翔龍，就係匯豐直接用QFII額度投資A股嘅少數上市基金，但就不設贖回。