日航與高鐵

今日跳出美國，去日本搭下日本航空(JAL)。

眾所周知，負債嚴重嘅日本航空，近年年年虧蝕，更可能短期內申請破產保護，成為日本有史以來第六大破產個案。

對於日本航空，新一屆政府早已表明無力援助，首相鳩山由紀夫表示，日航既股東應該對自己既投資負責，但唔肯評論日航係咪會除牌。

新任財務大臣菅直人更指，日航經歷過五屆內閣政府支持，表現都毫無起色，令人質疑到底要幾多援助先足夠。

受到有關消息影響，日航股價一開市已經大跌四成半，係東京交易所容許最大跌幅，之後只有沽家無買家，變成再無交易，股價於是跌至新低。

日航目前總負債高達一萬五千億日圓，早前有報道指，日航會向法庭申請破產保護，由國有企業重組機構出手，借出三千億日元俾日航繼續運作，同時要求債權人豁免欠下嘅三千五百億日元債務。

日航未來三年就要裁員一萬三千人，約佔員工總數三成，同削減國內外五十條航線。

說到日航之死，當然大家會覺得是日本航空體制過分龐大、機構又過於官僚，於是經不起全日空同新晉的廉價航空SKYmark競爭而死亡。

不過，真正令日航幾乎倒閉，是Shinkansen!

當然新幹線不是新鮮事物，日本早在1964年已有首架Tōkaidō Shinkansen，不過當時時速只有210km/h，直至03年先提速至最高破紀錄的581 km/h。

日本有研究發現，如果兩個城市之間同樣有新幹線同航機，日本人會選擇三小時以下行程搭新幹線。如果行程要四小時以上，就寧願選擇搭飛機。

以東京至名古屋為例，過去JAL亦有提供航線，不過自從新幹線將行程縮短至兩個小時後，航空公司已經被迫放棄呢類短途航線。

因此03年後新幹線大幅提速後，就正是做成日航搭乘人數由高峰期逐步下降、每條航線都幾乎蝕錢的理由。

看埋票價:

1. 東京至大阪
新幹線12,000日圓
JAL/ANA
10,000 - 12,000日圓
Skymarkt(廉價航空)
5,000 - 7,000 Yen

2. 東京至福崗
新幹線21,210日圓 (需時4小時55分)
ANA/JAL
33,800日圓
SKYmark
18,800日圓 (需時3小時30分)

不過由於航空公司經常有提供折扣，減價時段分分鐘減至12,100日圓，所以長程是有更多人揀搭飛機。事實上，JAL國內最重要航線正是東京飛福崗，每周有130航班。

另一條熱門國內航線當然是東京飛札幌，不過隨著北海道新幹線2015年落成，時間大幅縮短至3小時57分。你問我，就肯定寧願搭又近市中心、又免卻上落機麻煩的新幹線!

說了這麼久，又同高鐵有甚麼關係?

日本早有研究顯示，新幹線的發展不單改變了城市發展藍圖，更大大令城市之間的人文生活出現變化，整體是提高了生活質素。

隨著去年底武廣高速鐵路正式通車，一部「和諧號」將武漢至廣州行程縮短至不用三個鐘頭，香港實在輸不起「邊緣化」的危機。

就如李永權說，其實看到一批「八十後」願意走出社會發聲，一改過去「無慾無求」的心態，其實是令人高興的事。

不過高鐵與政制真的是兩碼子不同的事情，相信「八十後」都有旅日經驗，大概不會有人反對新幹線可以在東京市中心方便乘搭，那我們又為何拒絕在西九搭高鐵?