2010年2月26日星期五

白宮群英(海嘯版)

今日想同大家繼續分享下前財長Hank Paulson回憶錄On the Blink的情采場面。

書長478頁,意思即係「在邊緣上」。

顧名思義,企喺金融大災難嘅邊緣,身為白宮群英之一嘅保爾森,真係好多回憶想同大家分
享。

保爾森退休一年,先將回憶集結成書,雖然唔係「頭啖湯」,不過論趣味,真係可列入三甲!

書中唔少記錄,的確相當戲劇性。話唔定可以抽出黎拍全新一輯「West Wing」。

我地唔係書評家,不如試下從戲劇角度,抽出書中四大戲肉,比埋頁數大家,無時間睇都可以只看精華。

第一幕,一定係「長跪不起」。

保爾森向眾議院議長佩洛西下跪,書中講晒來龍去脈。

話說零八年九月,當時嘅共和黨總統候選人麥凱恩,Call齊人馬開大會,商討撥款成立救市基金,當時喬治布殊都有參與。

但根據保爾森嘅描述,雖然會議係麥凱恩召開,但基於佢實在太遲頓,開會前亦唔似奧巴馬做足功課,連布殊都頂佢唔順,會議最終毫無建樹。

當會議室,只係淨低奧巴馬同佩洛西等一眾民主黨議員時,極度沮喪嘅保爾森就突然向佩洛西下跪。

佩洛西見到,第一個反應係笑左出黎!

「乜我從來唔知你係教徙(Catholic)黎?」

保爾森話,當時嘅佢,就係想緩和氣氛啫!

堂堂大男人,肯向自己老婆以外嘅女人下跪,字裡行間見到,保爾森對佩洛西,的確心存敬佩。

書中第423版,特別加插一幕「巧遇奇連伊士活」。話說保爾森喺零八年十二月,同佩洛西喺白宮傾計,「奇大導」突然出現,拋低一句「Mr. Treasury,呢個女人比你更強,你信佢無錯架啦!」

同場特別加映嘅呢一幕,無非都係想借書,再報答佩洛西支持救市嘅呢一分恩情。

講開救市,唔單在爆多單。

「七千億救市方案」嘅「七千億」,究竟點計架呢? 聽完你都咪話唔兒嬉!(266頁)

原來當時枱上擺左三個選擇: 保爾森就諗,五千億,未必夠喎...

嗡一萬億,去到「萬萬」聲,又怕嚇親班議員。

結果就隨便嗡左個中間數,七千億喇,既唔覺多、又可以多啲錢使!

最後一幕,當然都要寫番啲,為兄弟赴湯蹈火,感動下各位。

保爾森同高盛關係密切,大家都知。

佢話,為左唔想再多間大機構出事,曾經放下尊嚴,為左高盛,去求老友中國副總理王岐山,游說中方入股。(273頁)

保爾森仲要周六晚九點半,喺屋企等王歧山電話!

可惜,王岐山今次無捱義氣,最終令白宮要轉投友好嘅日本,先解救到高盛危難。

保爾森話,佢曾經絕望到想叫喬治布殊打比胡錦濤再遊說,不過最終好在John Mack搵到日本仔打救!

相反,原來布蘭克費恩喺保爾森心目中,並唔係真係咁叻,話佢後知後覺,要佢幾番警告先識出去搵新資金。

好在最後關頭有股神出手,保爾森先可以瞓番一次好覺。

3 則留言:

亞羊 說...

唔知有冇"媧居"
i-cable 唔會會拍??

咩... 咩.,.. 咩,.,

pakman 說...

5 not enough
10 too much.

7.5 seems unscientific.

Thats by the way how the 7.8 peg for HK Dollar was "decided" too

亞羊 說...

once of "國家機密"

咩... 咩... 咩...