2010年8月20日星期五

報國

FT今天有篇文章令人莞爾。

話說北海道千歲有一個新樓盤開售,首批十七幢小屋公開發售,每間House賣三千萬Yen,

由於唔係一線城市,雖然設有機場,但講得白的,根本係鄉下,原本不寄厚望。但點知內地資金大隊殺到東洋,二話不說,一口氣買曬,每幢作價圍起大約三十五萬美金。

熟識日本朋友話,十七間屋咁嘅價錢,聽落好抵,但鄉下地方,其實一的唔平。

千歲神話,由國家資金隊蒂造。東瀛本來寄望,廿年來泡沬爆破嘅困局,亦可以由我國同胞協助解困!

根據金融時報報道,國家資金隊對東瀛物業市場食指大動,無他,錢無地方使,令到日本近期多個物業銷售講座,坐滿我國神州子民,買樓地點由北海道直落福崗,今次仲唔係變相資金曲線侵瀛,大報六十年前國仇家恨?

有日本學者戲言,說自己已是"來自三號國家--日本"。顯然佢係悼念一個時代的終結,影射日本第二季度經濟已經被內地超越!

日本經紀話,內地人同佢地講,日本買間屋,就係佢地第二個家。其實,都係一個字: 利字當頭。

論回報,原來日本物業平均有八至十厘回報,比香港上海兩,三厘多的是,條數根本係人都識計!

當然,中國人係聰明。要投資,當然係賺盡。日本買間屋,其實買埋幅地。拆一間起三間,再分租,就即係由一變三,完全係「空間大改造」。

所以近期,唔少由中資買落嘅日本祖屋,通通拆曬,起過較細嘅TOWN HOUSE,對象就係日本留學生,既賺回報又可以幫到同胞,仲唔係一舉兩得?

拆一間,起三間呢招,中國人喺澳洲、加拿大已經連番建功。今次係繼解放後,第二次資金移民潮,全球資產漲價,怪就怪,錢唔見得光,亦都捉唔著。

所以我更信內地人完全唔志在收租,佢地買左樓後,根本唔會放租,因為要收回物業實在過於麻煩,更重要係佢地「唔志在」!

同胞深明,將賺得的錢放在國內,無論如何隱敝,阿爺都有方法充公,只有放到海外時,那些錢才是真正在自己錢包內,因此那怕物業只是納空租,他們也不大介意。

唔信可以去西九睇,要揀夜晚喎,數數有幾多單位有燈火?

3 則留言:

匿名 說...

「同胞深明,將賺得的錢放在國內,無論如何隱敝,阿爺都有方法充公」--已故史學家黃仁宇極力話中國已經開始脫離呢個不尊重私人財產的怪圈,睇來佢係過於樂觀也。

匿名 說...

its not acceptable to make such mistake..
http://cablenews.i-cable.com/webapps/news_video/index.php?news_id=340482

MoneyCafe 說...

真是抱歉,其實已即時發現,在1800 cast已更正。

不過既然是錯,打就應該企定,再次感謝指正!