2011年3月26日星期六

萬惡之首

七十年代,許冠傑名作加價熱潮,一曲唱通街。當年,油價高,通脹高!

今日油價更高,通脹未必有當年咁高,但升勢未完。的確,今年正式踏入加價熱潮。政府預全年通脹百分之四點五,外界話,太低估全球超級通脹威力!

成本上升,加上聯匯拖累,政府早喺一九八三年九月,已經將控制通脹嘅自主權放棄。

入口價值受港紙低殘影響,只有升,無得跌。七點八呢個根本問題,廿六年嚟,當權者一直視而不見!

私營機構,早就因為頂唔著成本上升,要加價。有做飲食業朋友話,如果講加價,其實已經遠低於食品價格升幅。

一間快餐店,食材價格可能升足五成,但加價一定唔可以有五成,否則趕客。結果,老細一係硬食,一係分量細的。

結論係,大家樂股票,買唔過!

衣,食,住行。

酒樓,餐廳加價無人鬧。同樣係衣食住行,巴士加,港鐵加,就被外界發動輿論攻勢,話萬萬不能!

都係果句,成本高企,在商言商,加價,無可厚非。港鐵加百分之二點三,唔係幫佢地講說話,但幅度溫和,對港鐵盈利頂多只係提升一,二個百分點。係咪加突呢,心中有數!

加價無人想,亦造就反對聲音。某大報社論話,為免商譽受損,港鐵不應加價。親中大報更指,港鐵要將盈利捐出嚟,做發展基金,抵消加價影響!

加價潮聲中,呢的民粹言論,有市場。連當日,支持港鐵可加可減機制嘅尊貴議員,亦醞釀轉軑實錄。但講到尾,到底我地要一個理智社會,定係民粹充斥嘅不務實聲音呢?

如果純粹係港鐵乘客,你會百分百反對加價。但身分加多層,你既係乘客,又係港鐵股東,你可能一半反對,一半支持。

又假設,你既係乘客,又係股東,亦係堅持成本控制嘅小生意人,你反對港鐵加價比重,可能降至三分一。

凡事,代入唔同身份,作出不同分析,會有可同結論。加價係唔好事,無人會歡迎,但有無諗過,電力公司好,個別巴士公司好,金融風暴後,捱足多年,都無加價?!

我地面對超級通脹來臨,美元亦步入無止境下跌階段。

與其俱泥於一兩間公用事業機構加價,倒不如將重點,聚焦七點八聯匯存廢‧財經拆局立場係,盡快脫勾!

2 則留言:

pakman 說...

If I was passenger, I WOULD BE FOR TARIFF RISE!!!

Why?

Because at this rate the car will get more and more cramped... and the car will get more and more decrepit.

Patrickov 說...

咁當局而家點解會死守聯匯先?一定有理由吧?