2011年6月20日星期一

平反.居屋.2011

翻查舊Blog,原來我們早於去年三月,已經提借需盡快恢復居屋以平衡樓市供求:

「天真以為用每年增減居屋供應來調控樓市當然不可行,但房委會可以提出一個較長遠的供應方案,列明每年提供若干單位數量居屋........最少可以紓緩部分中、低階層的置業需求。

畢竟,政府作為一個社會利益再分配的執行者,可以透過稅制、以至基建投資,彌補私人市場的不足,下下都話政府干預自由市場,似乎經歷過金融海嘯後,講法已經不合時宜。」

當時背景是剛推出的預算案,公布一系列穩定樓價措施後,但樓價升勢一直無停。

之後樓價表現如何? 2010年整體升21%,不過地產股當時只升百分之二。樓價今年頭五個月,升13%,地產股更加要跌一成二。

即係,市場的聰明錢,已經知道沒完沒了既特區會胡亂出招的破壞力。

最少三次收緊樓按,兩次加印花稅,一次再收特別印花稅。又再限制打擊炒樓政策,例如個人名義樓花唔俾摸貨。內地投資移民又唔俾買樓。

如果真係對症下藥,就唔好導致胡亂出招出現。邊個話地產霸權,政府買佢地怕? 大曾領導之下,創出光輝一頁,係亂招不斷,樓價不跌,但地產商怕怕。

曾經何時,鄭局長話,家家有層樓、資助市民唔係政府政策。但政府用行動講明,今日係政策,明日可以唔係!

感激王光亞,明讚澳門,實彈香港,居屋搞珠歷史性鏡頭,有望重演。

港官對澳門,特別敏感。有得派錢,正係澳門創出。唔好忘記,當日胡主席,向董先生講一句查找不足,最終有人要腳痛,事發地又係澳門!

今次港澳辦話係大曾房屋政策唔夠濠江好,又係喺濠江發言。

對希望榮休嘅當奴,令居屋復活,雖則由佢拍板,但手尾下屆負責,呢條又係絕世好橋,幾乎可以拍得著當年英國人留返個資產泡沫炸彈比老董、有異典同工之妙!

老實講,居屋訴求大大話話講左兩年,依家先聽到??

居屋殺傷力,有無部份分析員講得咁大,屬見仁見智。如果一次超多,當然有。但復建係有必要,因為私人市場價格太唔符合基層因素,買唔起樓,唔係一個問題,但因為樓市,造成既社會問題,先係最大問題。

到底居屋翻生,起幾多好? 的確考功夫,太多有問題,太少又無誠意。唔好忘記,十月就算話起,以政府撥地,規劃效率,三,四年後既事。!!

用供求分析一樣有問題。因為,樓市同資產市場一樣,從來無供求平衡呢樣野,樓市複雜在因為影響民生,所以政府當日明知需求大,但視而不見,已經犯上極大錯誤。

如果政府一早做居屋,同時再增加土地供應,樓市未必搞成咁。依家反而胡亂出招,由於部份政策有滯後,擔心本港樓市已經到左危險區。

今天要再做居屋,最大隱憂同97一樣,又是令市民在樓市泡沫期接貨,結果樓價一旦急挫又係傷亡慘重。

其實政府真的可以考慮擴大居屋折扣,即是以「低價」賣比合資格用家,如果一直只是自住,亦不怕樓價大跌。相反日後樓價真的可以復元,到時既然賺錢就自然不怕多付補地價金額,因此亦不怕被指政策傾斜。

當年港大研究樓市,前中央政策組首席顧問顧汝德就一句到肉,以香港人力財力,做咩政策都得。但問題係,依家既政府,根本唔知問題在所,所以亦唔知應該做的咩野!!

15 則留言:

匿名 說...

其實置安心是對症下藥了,只係D人覺得置安心不比居屋有jetso,才不斷叫要居屋

匿名 說...

如居屋要原價賣回給政府,社會上果D住房需求就會馬上消失

匿名 說...

講到底就是要納稅人補貼他們買樓甚至炒樓!
果班大食懶冤氣就理,納稅人的就唔使理!

匿名 說...

This piece of article from Money Cafe can just reflect one of the many view points of HK people.
There is in fact another group of people in HK opposite to the point of view of the writer.
If the write just think that his point of view can represent all of the HK people, the quality of him is really very low.

匿名 說...

反對復建居屋,就比你班死報棍標籤做炒家,面對居屋不公平的地方,你班死報棍就好似盲左完全唔講,香港有你這些報棍真是香港之恥!

MoneyCafe 說...

當然我們只能代表自己意見,不過香港可愛之處不正是各人可以自由發言、自由表達自己觀點嗎?

我們相信,真理只會愈辯愈明。

的確,居屋是會消秏了社會資源,不過放眼世界,新加坡有資助「組屋」,德國有同類型資助房屋、甚至我國都有經濟適用房,似乎單說起居屋只是幫了一些八十後、就有點偏頗了。

我們同意如果增加限制居屋轉售條件,居屋需求肯定會大減,所以當局在制定具體政策時,一定是相當困難。

匿名 說...

當年八萬五撞正跌市,你地班報棍就日吹夜吹話董生幾唔應該,居屋點衰,之前仲吹八萬五是德政,一出事就180度轉,居屋從此無左你地班報棍責任最大!
而家又見風使舵,又話居屋係好野,唔該你地自已反省下!如果唔係香港遲早被你們這班報棍害死!

匿名 說...

港英時代報紙佬一樣日鬧夜鬧,好了回歸中國後就日日懷念港英政府,換上對董建華政府日鬧夜鬧,換了曾生又懷念董建華政府,日日話曾生無能,日後換了另一個人上台,睇死你地班報紙佬又會歷史重現

說...

報棍 ????
97之後好多報紙都係呀爺條靚,
好驚唔小心踩親人地條尾

匿名 說...

驚死踩親人地條尾,就報導D唔知咩野出來,唔係報棍係咩???

匿名 說...

當年又唔見有線出來支持董生!!!

MoneyCafe 說...

上面位阿生,請你睇睇我條link,寫明舊年三月我地就支持有居屋喎.....

匿名 說...

其實MoneyCafe的各位主持都係打份工,唔使係咁罵人

匿名 說...

大家都有怨氣,唔好只識找人發洩

匿名 說...

thanks for share......