財經拆局

原來移動取代固網的情況，不止中國獨有。 跟據經濟學人的統計，立陶苑有五成的人口，寧願選擇用mobile而不用固網。排後面的、就是Nokia發源地芬蘭，佔百分之四十七(唔怪得諾基亞電話咁好賣)。 事實上，而家在中歐同東歐更多人寧願用手提電話，都唔用固網，情況其實同內地一樣。既然手提電話收費與固網相距不遠，不如索性就只用手提電話，跳過固網的階段。 我們曾經分析過， 中移動 積極發展農村市場，其實就是產生「界外效應」，令農民增強生產力。今天看來，我終於明白中央為何遲遲不名發另外兩個3G牌照: 不是技術不成熟、不是對手不生性，而實實在在的是，中央需要中移動更大，可以深入拓展農村市場，只有中移動獨大情況下，進入農村先是有利可圖。 由固網跳至移動，其實同樣道理也可以產生在3G身上: 由3G跳至4G。 事實上，不少分析已指出，目前中國市場對數據傳送同流動上網需求正不斷增加，如果4G技術證實成遜，可以由目前3.5HSDPA的3-6M，增加至4G的100M，電話不單可以取代固網，用來取代流動電腦及寬頻上網也大有可能。 今天中移動已積極參與4G技術的制定，正是企業為未來部署發展的最好寫照。

每個打工仔都希望自己有價有市。 滙豐恆生事先張揚會加薪留人材，中原同美聯兩大地產代理高調公布出年後勤部門至少會加薪百分之八。 真係一片好景。 其實僱主同企業都「深知肚明」：遊戲規則從來都是這樣玩，市淡時候由僱主話事，要幾有幾低，僱員呻都無得呻，任由老細「魚肉」；到市旺時候，哈！仲唔「現眼報」，老細加少一個「崩」，即刻「擘炮唔撈」，理得你點樣「動之以情、說之以利」。 但可能我們的老闆在過去幾年，太過坐享其成，根本意識唔到時勢已變，仲認為打工仔無太大叫價能力，仲可以任舞任轉。 看看今年香港平均加薪幅度，唔多過百分之４點５，不單比其他亞太區平均加幅１成低，連祖國的百分之８也不及。扣除埋最新公布的通脹率，實質加幅百分之一，你問點頂？ 其實企業應該明白，培訓一個人材，需要的精神時間絕不低廉，加薪挽留人材的成本，肯定要比在外重新招聘低。更重要是，好似馮孝忠所講，由企業一手一腳訓練出來的人，先是企業接班的明日之星，如果一間公司唔明白呢個道理，很難成為一間優秀公司。 無論是Jim Collins 的「Good To Great」、對十八間企業作出的研究，或者是哈佛HBS對Xerox的研究，都證明最優秀的「第五層管理人」，特點都是由企業內部晉升。他們願意一直在公司內默默耕耘、低調、不張揚，但對帶領企業前進就有無限決心，情願將個人利益放在公司利益之下。與一些明星級的企管人相比，雖然是少了「一時的掌聲」，但研究發現，真正可以令企業「百年長青」，就是這些企業內部一手培訓的人材。 好啦，老闆，你肯加幾多？

「全國房地產經紀百強企業」深圳中天置業總裁蔣飛涉嫌拿巨款逃跑.... 這種嚴重事件，其實最少已有三宗，零五年秋天，安徽省規模最大的房產中介桃園房產老闆盜款失蹤，涉及金額六千萬，零六年秋天，天津市匯眾房產一夜之間全線停業，一億五千萬的房款不翼而飛，時隔一年，中天置業老闆又走了．．．．。 這三宗同是發生在秋天，都在內房市場面對宏觀調控政策下，正處於觀望氣氛濃重的時期。似乎這類事情頻發的關鍵性因素，這也不可排除市場成交量縮減確實會對代理構成壓力。 其實， 早在零三年，杭州市已推出房款保障機制。這個由杭州市房管局推動的保證金賬戶制度，要求客戶在中介公司買賣二手房時，房屋買賣雙方、中介公司以及銀行四方必須共同簽署一份房款監督支付協議，規定買方將購房資金存入銀行的專有賬戶，並由銀行予以凍結。 北京亦已有部份中介代理與銀行簽訂協議，由銀行擔任"第三方"，對買賣雙方的資金來往進行監管，中介代理公司無權動用這筆資金。 今年初，建設部與人行都發佈有關要求各地建立二手房資金管理制度，但似乎制度推進相對緩慢。而對交易資金的疏於監管，正是中介盜款的原因所在。 更重要的是，我相信，制度能否推行，關鍵在於當省，當市，當區幹部、管理部門的態度。 ************************************ 講開地產代理，很想在這贊賞中原及利嘉閣決定明年後勤員工加薪百分之八，贊許並不是因加幅，是因為這兩公司體恤後勤員工的辛勞...

忍唔住，要講下續集。 一間係滙豐，一間係花旗，兩間金融巨無霸。 滙豐注資拯救兩間結構投資公司後，全世界焦點，就放喺花旗點樣地處理結構投資工具嘅手法。 外國傳媒指，匯豐造法高明，同有透明度，反觀持有八百五十億美金結構產品嘅花旗正面對極大壓力，佢地亦表明， 唔會無意效法匯豐做法。 先睇下我們熟悉的滙豐。 創先河將旗下兩間結構投資公司SIV「孭上身」，兩間公司仲會併入埋匯豐帳目。 首先想到的問題是，就算重組完成，匯豐SIV票據持有人，仍然要承擔虧損，對匯豐盈利無影響。 咁點解，匯豐唔索性咩都唔做，第時兩間公司蝕幾多，撇幾多，涉及金額可能會比依家嘅３５０億美金少。 關鍵係匯豐唔想賤賣結構投資公司揸著嘅資產。 同其他金融機構嘅一樣，匯豐嘅SIV，係透過發行短期低息商業票據籌錢，之後收購包括次按，銀行票據，債務等有抵押高息資產。兩者息差就係回報。由於係短期票據匯豐需要不斷發行，受信貸危機影響、根本唔能能夠啟動，令匯豐預計嚟緊無新資金支持SIV運作，結果可能逼使匯豐變賣旗下SIV資產，什至牽連其他資產市場。 美林話，佢地理解相關嘅SIV，滙控只係直接持有百分之三嘅權益，其餘有九成七係由第三者持有，佢地仍然要承擔全數投資虧損。一來係由於相關債務工具係有信貸保障，滙控即使「孭數」上身，相關風險並唔大。 當然，更重要係滙豐有足夠條件咁做！ 相反，對於坐擁８５０億美元、持有全球最大SIV的花旗，由於第三季資本充足比率，已經跌至低於百分之七點五，令佢地無條件好似滙豐咁進行注資。 就喺壞消息一個接一個時候，花旗諗到一條絕世好橋，就係靠東望。 而家都係滙豐股東嘅阿聯酋國家投資公司「阿布扎比投資局」，動用７５億美元，買入花旗嘅可換股票據，年息 率１１厘。 據報係花旗現任主席魯賓穿針引線，魯賓高明在，阿布扎比投資局要承諾日後唔會持有花旗超過百分之４點９股權，亦無權管治花旗、或者派代表有董事局權利。 當然喺注入新錢後，有利花旗，重新部署自己的SIV，亦恢復了市場對佢地信心。 不過凡事有代價，大家有無留意花旗批可換股債券要比幾多厘息？前文都有提，係十一厘！仲高過花旗賣出街的結構產品。英國金融時報就話，今次注資幾乎係以借貴息去解決問題。 至於同樣由花旗牽頭、由美國財長保爾森倡議成立嘅「超級救市基金」，喺滙豐自救注資後，亦面對好大壓力，特別係SUPERFUND定價過程複雜，成效亦會大打折扣。 一直唱淡滙豐...

又到滙豐出事....... 月中公布業務最新情況時，仲話旗下結構投資工具即係SIV問題唔大。 事隔唔夠兩個星期，集團決定出年８月前，為旗下兩間從事結構投資工具公司注資３５０億美金。 又係大大隻黑天鵝! 匯豐話，旗下有兩間結構投資工具公司，為免佢地受信貸環境緊拙影響，佢地決定成立一間，或多間投資公司取代呢兩間公司，現有投資者，可以轉揸新公司票據，現有債務持有人，到期時可以收番錢。 呢個數，基本上過去一直係隱藏喺帳目以外，市場一直估計大約係二百億美元，點知一揚，就係要注資３５０億，仲要係「美記」．．．． 更唔明白係、點解唔係上星期五公布業務策略發展時一併解釋，令人費解? 兩間SIV公司日後會併入匯豐綜合帳目，而今次注資由匯豐內部資金支持，匯豐話應該唔會影響資本充足比率喎...... 印象中，未有銀行為siv注資，今次可能又會成為另一個黑洞，怕且其他投資銀行都會陸續有來。 甚麼是siv？structured investment vechicle，即是由銀行成立於帳目以外的投資公司，主要用來發行cdo/ mbs/ abs等。 瑞信今日先出左分報告，標題係「由懺悔到救贖」，報告指，主席葛霖喺業務策略中，承認過去曾經犯錯。 瑞信認同佢地發展中國、印度以印尼市場策略，指佢地如果可以執行定出嘅策略，將可以令滙控比其他銀行有更高溢價。 還是高盛醒，同一日出報告，就已經提早預警，話ＨＩ撥備將會沒完沒了，仲將評級降至沽售，指佢地次按相關撥備會再增加多一百二十億美元，令滙豐融資虧損增加至一百八十億美元，真係一語成讖。

各位，星期四凌晨有無睇波？ 英格蘭足球代表隊唔能夠晉身０８年歐洲國家盃決賽周，影響真係好大，就連的「 人在中環 」阿ck老闆、都話要提早收工唔寫扑，似乎「哭波衰」的人，單係中環都有好幾條街長。 眾矢之的當然是麥卡倫，他在於零六年八月接任艾歷臣，成為英格蘭領隊，簽約四年，在任１５個月期間，總成績係７勝４和７負，唔算見得人。 當然，球迷以「垃圾球隊」形容英格蘭今場表現，而當地主要傳媒好似太陽報就話「無用，無骨氣，垃圾」，係歐洲足球的笑話，其實都幾慘! 我們不是足球台，講咁多，都係想提下錢銀，因為英格蘭出局，經濟損失可能達到十億英磅，如果全數要麥卡倫孭，就真係死人! 其實除了如umbro等運動用品公司股價大跌外，成件事仲有一個輸家，就係英國、以至全球電視台。大家都知歐洲國家盃播映權都係天價(敝台當然深之其苦)，每年英超聯賽帶契的海外電視轉播收益，達到歷?最多２７億英鎊，今次英格蘭出局，真係唔知有幾多人要由頭計數。 英國著名博客「 sport economist 」就指，今次輸波，固然可以賴領隊麥卡倫，不過更大問題係英國目前球會同聯賽制度。 目前一半打英超的球員都唔係英國人，球會為求嬴賽事，寧願引入更多外援、都唔訓練本地球員，而歐盟的條例亦唔容許球會優先聘請本地球員，結果就埋下今天的結果。 以「UNDERCOVER ECONOMIST」的角度來看，其實就是經濟學人說的「溫布頓效應」(Wimbledon effect)。 三十年來，無一個英國人贏到溫布頓冠軍，不過英國政府就每花費數億英鎊在這項最古老的網球賽事上，其實就係反映球會只求贏得賽事，結果忽視了球員的培訓。 歸根究底，罪魁禍首是在九七年，當時英國青少年足球訓練，由聯會取代左學校訓練，結果成績就一落千丈。 經濟學人講得最直接，話英國雖然係足球發源地，不過根本就唔叻踢波。 其實運動員的經濟價值，成世人都係得個幾年時間，最近更有F1賽車手，計劃將自己上市，希望可以利用資本市場，為自己的價值取得最大化。邊到搵到食就去邊處踼波，就好似伍晃榮話:「波係圓既」，實在怪不得外援充斥，至多只能說自己唔爭口氣。 講左咁耐，成件事我地有咩學到？ 就係做人唔好「食老本」，成日諗住自已有優勢就咩都唔做，就好似我地香港作為區內國際金融中心，實在有需要加緊培訓本地金融專才，唔係有朝一日，成個中環都係老外+內地專才，到時真係怪不得人!

由細到大，都未有想過要從事會計行業，因數口不精，大過之後，仍然對這行業興趣不大，但深信一定要學懂到這範疇，才能在商業社會打滾。 時移勢易，會計師已不單止心思細密，也要健談，也要懂得交際技巧，這樣就更加相信這行業不適合自已。 但一定要學懂會計，最主要原因是希望可以的話，減低比人欺騙機會。 還記得年少時，曾經投資一隻股分，初初看營業額，看純利，看毛利，看業務前景，仲有各界評論，都還不錯，決定作出小量投資，後來股價不震，決定自已再詳細看看招股書，年報，發現現金流跟業務帶來的收入，盈利不成比例，現金流奇低，做生意不一定變成現金是對的，但不明差距這麼遠，後來請教一名專業會計師，才明內面原來有掩眼法處理，蒙騙了．．．． 我也曾發現有一間公司派息率奇高，三年的派息竟然多過上市集資額，這管理層的經營誠意也令我懷疑．．． 所以就決定要好會計．． 今晚嘉賓龔耀輝就同大家分享下會計行業的苦與樂。

孫柏文說，次按係咪黑天鵝其實要「depends」。 今期經濟學人就是以美國衰退的機會作封面專題: 1929年股災後翌日，the Harvard Economic Society 仍告訴讀者:「衰退絕不可能發生!」 2001年95%經濟分析員說經濟衰退是「outside the range of probability」，即是計或然率的可能性都不需要。 殊不知黑天鵝已經靜靜到了身旁..... 先看當時人怎說，８月分仲話問題不大，事隔３個月，無論保爾森，同聯儲局現在都要轉軚，承認次按問題大。 先說保爾森，早一個月前仲振振有辭指不擔心次按，而家已經修訂講法，話斷供情況會擴大。最近已經有評論指高盛出身的保爾森是上錯了布殊的船，如果他的SUPERFUND最終失敗，美國經濟肯定會滑入衰退云云。 不過PAULSON並非一個輕言敗的人，七年來RUN 高盛令盈利升三倍，如果成功，他就會成為魯賓後另一個傳奇。 更大鑊的是伯南克，聯儲局首次發表季度經濟預測，頭炮就承認消費，以至經濟受次按影響緊。 今次首度作出季度報告就有咁大動作，難免令人有「陰謀論」。 但經濟學人就話其實唔驚奇，原因今次預測嘅年期，由兩年延長至三年，這一年是相當關鍵，因為對預測的分析來說，兩年的期限時間太短，難以觀察真正的經濟趨勢，因此三年時間是更為合適，因此有FED WATCHER話不難想像聯儲局對前景預測會有所調整。 不過經濟學人都留有一條尾巴，認為美國經濟衰退唔會拖累環球，原因係美國經濟作用往往被誇大，以二千年至今為例，美國佔環球出口比例，已經由一成九降至一成四。而最重要係，我們有中國在內的新興市場，將會扮演「stabilizer」角色。 值得留意的是，雖然美國樓市下滑，不過海外購買力不容小看，除了加拿大人入市外，更多的是歐洲及英國人。受惠美元長跌長有，他們的購買力連同樓價下跌，比起五年前是增加了百分之五十!不少英國人已經在紐約核心區置業，目標除了投資外，原來是渡假期!

聯儲局發表季度經濟報告，因應次按問題，調低出年嘅經濟增長預測。由６月時樂觀會有２．７５％增長，調低到可能只會增長１．８％。失業率亦會由原先估計４％左右，調高去到接近５％。 報告指，銀行收緊對次按貸款，令按揭市場收縮，房屋數據亦都比預期疲弱，加上油價上升，都不利經濟發展。樓價下跌蒸發美國人部分財富，會壓抑消費增長。 所以聯儲局看通脹壓力會減低，出年核心通脹介乎１．７％至１．９％，低過早前預計。 不過聯儲局預期出口會保持增長，最近兩次減息，亦刺激需求，等房地產市道調整完成，經濟會回復增長。 今次是聯儲局為了增加透明度，將經濟報告，由每半年發報一次，改為每季發表。 報告發表後，加深市場憧憬美國會再減息。 但另一方面，次按惡化再令金融市場震動，但其實影響港股的借口日日新鮮，昨天下午港股突然抽升，打給多位所謂的股市專家，都說市場傳聯儲局的報告會有好消息，可能會減息，亦有外匯業人士說，利差交易平倉拆倉完成。 不夠一天，相反的言論一湧而出，美國經濟放緩，但聯儲局無宣布減息，美匯指數創新低，擔心利差交易拆息重臨，港股就要下挫過千點。 一夜之間，形勢大變....所以連有基金界朋友都說，無法解讀形勢，完全無法做對沖，唯有先行離場避險。 這個次按風暴，有多嚴重，留意今晚MONEY CAFE，金手指孫柏文同大家分享一下。

溫總又開腔，真係每次都有新意，仲要一日講夠兩次，真係嚇到你「傻」! 「人民幣流通的量過大，佔全國的一半，這裡就有許多不正常的因素、包括地下錢莊，非法流出，非法流入。」 「我們並不贊成現在的做法，應該採取法律的辦法....但我也要說明，他們這種做法的出發點是好的。」 回看整個事態發展，其實都幾有部署，特別係打擊杜玲的地下錢莊。不知大家有沒有留意，原來整個案件在七月底，基本上已經結案。我們在電視上看到的片段、原來已是半年前的消息，但到上星期先高調由中央電視台「經濟半小時」播出，到底當中有什麼玄機?我們也問過一些相熟的內地行家，他們只說：「不要過問來源，我們也不好說!」 成件事的安排，其實更令人值得深思! 由第一步先列出直通車四要點，到「唔知頭路唔知路」限制深圳銀行提款、到提出目標係限制資金非法流入港股，最後使出一招拉人封艇，對個市構成心理打擊，完全係有部署、好難令人相信不有早有預謀的行動。 由八月中公布港股直通車以來，香港股民的反應完全係「未到先興奮」，恆指短短兩個多月就升了一萬點，靠的就是依賴一個希望:ＡＨ股差價收窄。結果，當然係希望愈人，失望(絕望?)愈深! 事到如今，港股經過內地出手、已經一跌再跌，特別是國企指數，跌幅更驚人，以現水平計，看來內地股民應該都唔使「做傻仔、接貴貨!」，直通車看來真的到了啟動的契機! 那麼，成件事邊個先係傻仔？

節目中，呂大樂提出一個新看法：第二代人是阻礙了香港的轉型。 這個說法令人久久不能忘懷。 作為第三代人，看第二代人當真是充滿矛盾：一方面勤奮向上，有用不完的魄力、做事有遠景，肯付自己的精神體力換取別人的讚賞；但另一面就充滿因循、不肯接受新事物，凡事要求穩陣，甚至認為要求變革就是挑戰權威。 經歷了二十多年的成巧，「新嬰兒潮」下的第二代人已經進化成社會上的中流底柱，這群人數眾多的領袖成了主流意見，認為非我族類就注定失敗，後輩不肯聽從自己經驗就是自討苦吃，就會愈刻意去刁難他們，結果不知磨平了多少主流以外的人創新意念及雄心壯志； 對於新一代的成功，如GOOG、youtube、facebook、aNobii…..他們總是認為彩數多於創意，卻不能接受世界已經不再是他們可以壟斷資訊的年代，The World is not Flat！！！ 他們的確將不少社會經驗交予下一代，只是一萬個不放心將責任交給自己訓練出來的後輩； 結果無論第三代如何努力，在第二代眼中都是不求上進、或力不從心的人。 最不幸的，是目前掌握我們社會最多資源的長官們，絕大多數都仍是自認為精英分子的第二代人。資源都在他們手中作分配，不是搞一兩個WIFI Hotspot就叫新科技，下一代教育仍然是一團糟，點轉型？ 自己作為第三代，可能對第二代人有些偏見，而第四代人亦往往似對第三代充滿憐憫，認為他們錯信社會規範，永遠在第二代面前卑躬屈膝，沒有個性，在第四代看來:我才不要學你們，我們面前有的是新世界的大門(互聯網)。 說到底，原來這是一個對號數入座的遊戲。

到底次按危機係咪黑天鵝？ 構成黑天鵝的條件，包括：事出突然，影響深遠、以及事後看來又有跡可尋，次按都算得上係合標，當然說的是負面黑天鵝。 次按真的不可測嗎，事後看來當然是早有跡象。滙豐控股不是早在去年底已經發出預警，不過當時個個以為只是滙控自己太進取，搞到自己一褲都係，其他銀行，應該無事既！ 當然，現在看來是another story。 從Nassim Nicholas Taleb的角度看，不少金融危機都是Black swan，像98年LTCM爆破，就是一群專攻量子經濟學的數學專家，他們最擅長的、就是以數學模型作出預測，當然他們不能計算金融風暴會席捲全球，最終因押重注俄羅斯而倒閉。 Taleb認為最可笑的是到今天，這批數學專家仍然在不少對沖基金中呼風喚雨。 正由於BLACK SWAN的不可測，因此Taleb認為大可不必花時間費精神去預測Swan的出現，反而應用更多時間去研究Black Swan帶來的後果。 說實在，我們認為黑天鵝存在意義不在於不作預測(否則世界肯定會停頓)，而是在常規預測過程中，總留有一線後著，萬事存著最壞打算，其實幾似魯賓在Uncertain World中提出，所有決策均要預備出現不確定、最差的情況。 正面黑天鵝其實最顯而易見的，是創造了英雄。九一一出現了朱利亞尼與布殊的對比，沙士我們有「九點半前特首」鄭大班。歷年的股災亦為股神巴菲特創造了歷史上最大的財富。 機會，總是留給有預備的人。

深圳銀行突然限制每日提款金額，官方解釋係禁止走私、洗錢等非法行為。 但點解只係深圳？ 孫柏文 估，係內地要打擊通脹、因此先透過減少現金流量，希望現金交易宗數減少，可以壓抑通脹。 但都係解釋唔到點解只有深圳。 實情係同我地有關，針對的是居民非法匯款炒港股。 而家唔少內地居民要開戶炒港股，方法係先將人民幣現金交比地下錢莊，然後佢地喺香港嘅帳戶就獲得港幣，再將資金投入股市炒股。由於深圳最近香港，唔少呢啲非法資金轉換都係喺深圳進行。 而家銀行限制左每日提款，變相係截斷左呢啲非法來源，但由於地下錢莊規模非常龐大，相信只會係暫時收歛，仲係「打不死」。 另一項證明係，過去六年深圳嘅人民幣淨投放金額、都係全國第一，單計今年頭九個月現金淨投放、就佔左全國一半，現金大部分去左邊？ 咪就係解釋左而家港股每日成交千五億之謎。 另一邊看，內地要用到咁蠢方法限制資金炒港股，幾乎等同全國禁食豬嚟壓抑生豬價格，某程度都反映資金自由行、港股直通車需求甚殷切，即管睇下頂得幾耐！

兩天連續做了兩宗新聞，發現幾吊詭。 「中國走出去，暫時要蝕錢;外資走進來，依家賺大錢。」 當日幾間內地銀行上市，埋班搵策略股東，單以上市價比星期2收市價計，工行，中行，建行，同交行，已經為佢地歐美策略股東，帶來大約超過3千億港元帳面利潤。 大贏家，暫時首推美銀，當日拍板入股建行，美銀話，持有百分之8.5股權帳面賺百六億美金，計埋認股權可以增持到近兩成股權，仲利害，帳面獲利300億美金，為番2千幾億港紙，比唔少藍籌公司市值仲要多，匯豐亦唔差，用上市價計，淨賺大約900億。 舊年工行上市，亦為高盛，同美國運通進帳超過500億。蘇格蘭皇家銀行，同瑞銀透過策略股東身分入股中行，雖然賺得唔算好多，但亦搵到近360億盈利。 正當次按呢個浪，令歐美金融機構面對大手撇帳危機之際，呢批中資銀行股股票，可能為佢地帶來及時雨。 當日幾大外資都係以二倍左右股價對帳面值入股，部分更低，已經有意見話，係明益外資。 作為策略股東，美銀，匯豐同拍檔建行，交行合作最明顯，但建行當日答應美銀入股條件之一，係可以在美國搞零售銀行業務，到依家都未落實到。 相反私募基金BLACKSTONE，同英國巴克萊銀行，作為內地官方今年第２季兩項主要對外策略投資，中國投資公司以超過２３０億元，入股BLACKSTONE一成股權，而家蝕足５個幾月，累積蝕近６０億元。 到國家開發銀行７月，又以差唔多作價，買入英國巴克萊，結果又蒸發左近６７億元。單係呢兩項投資，已經令內地帳面唔見左１２６億元，當中以阿松牽頭、扯埋中國投資公司頭炮即滑鐵爐最受批評，個別內地傳媒已經窮追猛打認為投資失當。 英國金融時報專欄文章LEX就獻計話，中國日後應該透過其他投資工具，好似啲「殼王」最鍾意個招、即係以可換股債券形式入股，避免價格下跌風險。 不過文章提到，而家想到海外收購的中國資金實在太多，情況就好似拍賣場入面，外資賣家根本就唔憂賣，所以中國最終難免買貴貨。 ########################## 題外話 之前寫過呂大樂的四代香港人，引來不少迴響，李兆富明日(周四)都會討論呢個話題。而我們亦請來「始作俑者」呂大樂一齊參與，看看幾位二、三、四代人聚首一堂，會有咩火花。

繼續談談迪士尼，其實注資及豁免專利費非第一次。 1985年決定興建巴黎迪士尼後，在92年開幕當日，只有25000人次入場，遠比預計60000人少，由於入場人數不理想，原本計劃興建的MGM STUDIOS亦需要押後，結果首年就出現三億法郎虧損，在冬天更要關閉部分入住率不理想酒店，而巴黎迪士尼巴黎迪士尼的救亡方法，包括94年委任前紐約州檢控官，作為LEAD NEGOTIATOR，要求銀行直接購入歐洲迪士尼股分，並作出削債，免十八個月利息開支，並延期還款三年。同時迪士尼需要注資七億五千萬美元，並豁免收取五年專利費。 同時，迪士尼改革樂園運作，包括更改餐牌、賣歐洲最鍾意啤酒，同時95年加建新設施，包括SPACE MOUNTAIN，結果同年獲得首次盈利，並於02年開設MGM STUDIO。 但之後盈利仍然起起伏伏，到02年又再度獲得盈利，之後又連續幾年虧損，到05年迪士尼同意全數撇去予歐洲迪士尼貸款。 回來到香港，兩年運作，虧損擴大，入場人數未達標，救亡大計，包括獲免收兩年專利及管理費。同時將長債變短債，好彩這筆貸款只是迪士尼集團的數，否則我真想不到如何突然將原本預期是長債的數，一筆清還，同時聽報章報導今次還債是債權銀行要求，被逼長變短。 今次迪士尼的財務報表，在香港數目上仍然未有太多著墨。 但要記著，華特迪士尼只持有香港迪士尼四成多股分，我們大眾有分嘅政府持有超過五成股權。 政府作為香港迪士尼樂園的大股東，若果真要注資，話事權真的要拿回，還有真的要增加透明度，披露財務，這樣做可避免不必要的負面揣測，希望政府真的明白，時代不同，「收收埋埋」真的不一定是好的，還有早點解決，才是對香港大眾好的，才是對得起我們小市民。 在我的角度，不贊成關閉這個樂園，但是真的改革，改革就要大刀闊斧，長遠增加香港特色東西，增加新遊樂設施之外，是否要想一想我們主要對象是誰？是否內地旅客嗎？可否在這方向想想，我們中國人最講物超所值，可否先試減價吸引他們，或是.....如何是好....大家一齊比比意見...... ############################ 題外話 說到迪士尼，都要說一下海洋公園。 盛智文向來是以think out of the box見稱，當全世界都想著當迪士尼來臨時，海洋公園會像「荔園」一樣成為集體回憶之際，盛智文反而掌握著這種公司上下「不同心、就滅亡」的同仇敵愾精神，...

談過數集航運業，明晚專家陸元華繼續同大家談談集裝箱行業。 談到美國航線，原來都幾持別，美國聯邦海事委員會話事權很大，每年都同航運商訂立合約，就運費，航權各方都有訂立協議，所以一年只加價一次，不過不用擔心，他們是可以透過徵收附加費，以對抗成本上漲。 談到附加費這回事，我真的不太喜歡，好像每次坐飛機，票價說是七，八千元，但最後連及燃油附加費後，實際只是機票總是要花上過萬元，所以最新的士要求徵收燃油附加費，我就不太贊同，我比較傾向直接加費，感覺比較好一點．．． 說回美國集裝箱航線，亞洲輸往美國的產品多是輕工產品，至於美國到亞洲的，原是主要是三廢，包括廢鋼，廢紙，廢塑料，輸往到亞洲循環再做。 從美國線亦看一些新趨勢：因不平衡，美國小麥等乾散貨竟開始用集裝箱運輸，第二是美國船，送往歐洲裝貨．．． 想知詳情，留意明晚MONEY CAFE...

這個星期終於深深體會到、中央領導人發言，真係要「比心機、花精神、仔細聽」，否則，真係會輸好多錢。 先有溫總直通車「四要點」，之後港股星期一先跌千五點，但影響都只是一個港股市場，反而到星期三上晝十點半，全國人大委員會副委員長成思危一句中國應該分散外匯投資言論、一出街，就即刻震散左全球美元，有鬼佬TRADER更周圍打聽、到底成思危係咩人，點解會有幾大影響力？ 影響力有幾大？睇下美匯指數就知，成思危言論一出之後，幾乎可以用插水形容，即時創出新低。以美元兌日圓為例、由上晝十點半左右，落到１１３．６９日圓全日低位。美元兌歐元，同加紙再跌到記錄新低。 影響所及不止匯市，美元一弱，商品價格就升，油價直撲一百美元大關，有TRADER直情用「癲」左形容油市同金市。 到底係市場係咪反應過敏？經濟學人就話，成思危本身唔係負責匯率政策、充其量形容佢只係「mid-ranking Chinese officials」，即係無咩實權，咁點解市場有咁大反應？ 其實經濟學者出身的成思危、透過出口術令金融市場震盪，都唔係第一次，記得今年二月佢話內地上市公司上市質量唔高，有七成最終都要倒閉，結果就做成黑色星期二大跌市。 不過今次做成咁大震盪，相信成思危本人都此料不及，其實一切都是「趁勢」。多間銀行今個星期都出事，加上預期美國減息，成思危的言論只是觸發點。 反而美國財金官員的反應先是一味曖味。好似保爾森都只係「識用把口」繼續講強美元，而伯南克更話，中國調整美元外匯儲備的比重，都唔會影響美元作為全球主要儲備貨幣的角色。 經濟學人就用陰謀論解釋，認為只要無做成入口通脹，其實布殊政府係樂於見到、透過弱美元刺激出口，此終唔好唔記得，出年係大選年!

香港迪士尼， 去過一次， 印象不是太差，但真的太細．． 海洋公園去過數十次， 因越來越多新玩兒， 亦可作為小朋友教材．． 開幕兩年多的香港迪士尼， 入場人數不理想，首次透露虧損擴大。 香港迪士尼決定更改接近3億美元的貸款協議， １５年轉做１年， １年內全數清還， 當然可以減低利息支出， 但錢何來？ 我們要注資？ 　 香港迪士尼說，會加大投資， 加大投資是為轉虧為盈．．． 而注資，擴建又是否可以令香港迪士尼轉虧為盈？ 我想未必．． 迪士尼是否要改變管理模式．．高高在上的管理模式是否籌效．． 這些話題，就等下周一施老闆施永青來到咖啡室一齊談談．．．

鐵打的衙門、流水的官.... 蔡子強講過，我們的特首愈來愈懂得玩spin doctor。 在曾生第二屆政府之中，任志剛任期事件可以說充分反映這種spin doctor的處事作風。 先選擇所謂一個飯局(根本可能只得兩人)、一封所謂致特首信件，就將即將年屆六十的任志剛玩到頭昏腦漲，難以作出抵抗。明眼人知是測試市場反應，因此官府中人一概不承認又不否認，到適當時機先決定係咪去馬。 到Spin doctor見勢色對路，就得勢不撓人，再放風指兩年只係一個初步協議，更可以早過兩年結束任期。 好一個任志剛，不同你拆招，只說一句:「鐵打的衙門流水的官，無問題既」，跟著就與大家分享他對未來香港與金融業的隱憂，好像是與內地金融融合(在直通車事件上就表露無遺)、邊沿化，與及銀行「體檢」。說的時間不是兩年、是十年的事情，就是要告訴spin doctor，我根本不用與計較那兩、三年的任期，要看的，是十年八載的金融發展。 對於自己任期，任志剛算是不亢不卑回應了，認為根本不適宜由佢回應自已去留問題。 試想，當老細要炒要升，作為下屬，有權話事嗎？ 兩、三年的變化實在難掌握，任志剛花左更多時間，談的是他對未來本港金融業憂慮，仲警告，國際金融市場的力量係殘酷的，一旦被邊緣化，就會演變成資金外流和貨幣金融不穩的風險。在我們看來，這才是專業的表現。 大家有無印象香港有邊個官講過「鐵打的衙門流水的官」？印象中是施祖祥及楊啟彥。相信任志剛都估不到，昔日打大鱷的拍檔，今日會以相同待遇對自己。

預告: 今晚嘉賓孫柏文會同大家談談 The Black Swan {The Impact of the Highly Improbable}－－隨機的致富陷阱 黑天鵝是指稀有事件｛Rare Event｝，稀有到何地步，就是大家以為它並不存在，直到它突然發生在你的眼前，以前某的國家一直以為天鵝只有白色，並不知原來是有黑色。 黑天鵝反映如果將事物概念化，有時有用，但亦錯誤地方同誤解，這本書就是要人們應留意事物的"不一致性"。 雖然歷史可參考，但都是由無法預視的稀有事件。 隨機性有兩大類：一是"平均隨機"，群體特質，譬如身高體重比例；另一類是"極端隨機"。 書本大致提出數大點：Error of Confirmation，Narrative Fallacy等等。 想知詳情，留意今晚MONEY CAFE，看完大家一齊分享．．．．

先申報，抽唔到阿里巴巴。 不過，在三十元樓下追入。 自問入貨時都諗，出年市盈率升至一百倍，仲值得追？ 對阿里巴巴的經營模式略為了解後，相信未來競爭對手難成氣候，盈利增長仍然有保證。當然自問有心理準備，上得車，早要有「會坐艇」的覺悟。 不是叫散戶再高追，我們在新聞中亦先後兩日、詳細再講阿里巴巴、支付寶、誠信通到底做咩，作為用戶付款有無好處，經濟學人點分析利弊，要做的投資者教育都做了，希望大家不是只認識1688。 今天，我們再做多一步，街頭訪問散戶，到底阿里巴巴是做什麼？近似的、有人識答做電腦、有人答IT，無厘頭的、有人答做「咖啡」，就是無人識講B2B。連馬雲在記者會上、被我們同事問到時，都承認十多萬個股東之中，他也懷疑到底有多少人真正了解阿里巴巴。 今日阿里巴巴的走勢，明顯係有脫離「今天的」基本因素，零七年市盈率三百倍，當然是我們做傳媒最愛的頭條，不過而家離零七年仲有幾多日？但如果計零八年，PE就回落至160倍左右，假設未來幾年盈利都可以倍數升，都要三年時間先可以回至四十倍水平，當然已經偏離最初買入的原意。 很想說，股票不是提款機，辭工炒係咪一定每月有錢賺？股市大跌、仲要跌足一個月的話，係咪成個月都唔開飯？ 有網友曾經笑我們、如果個市真係比我地講中會大跌，咁你們那些「交易所直播室」、「財經即時睇」、甚至Money Café仲有人睇？相信認識我們的觀眾都知，真正令投資者擺脫「NUMBER黨」行列，先是青姐黃師傅為什麼每日苦口婆心對大家說那麼多的話。 話說回來，你認唔認識阿里巴巴同阿里媽媽的分別？ ########################### 題外話： 孫柏文與Leona的輸賭，最終由孫柏文勝出，不過觀乎 Leona 要封blog一周，是輸得漂亮。柏文，你真的認為自己無取巧嗎？

溫總係咪掉了一個大炸彈到港股？ 每件事我們不單要單看表象，溫總係咪想港股大跌，好等內地股民可以買平貨？ 我們私下接觸的香港政策局官員對於直通車的講法、其實一直都不敢高調「領功」。雖然直通車是在財爺任總北京之行後公布，不過我們都理解，根本特區政府從來想都未想過會取得直通車。 仔細睇下溫總四要點: 1 〉中國資本市場還沒有完全對外開放，因此必須有相應的法律法規監管，否則將引起內地資本市場大的波動。 2 〉當前內地資金過剩，若大量資金融入香港市場，會對香港股市產生甚麼影響，需要做科學判斷和分析。 3 〉內地股民對香港市場的了解極之有限，要讓他們對資本投入香港市場有一個全面認識和正確判斷，以便自我保護。 4 〉中央政府還要聽取包括香港有關金管局(金融當局?)等方面的意見，令作出的決策不至於發生大的偏差。 「四要點」都沒有說不能直通車，第一點及第三點最容易解決，只要為相關規定進行更多仔細的披露要求及提高投資門檻已經可以解決。至於第二點及第四點又是一脈相承，我們要有更科學的判斷及分析，那麼應從何分析入手？ 其實我們要問的問題是很基本，到底內地排洪的政策有沒有改變？資金係咪要走出國外？香港係咪合適市場比內地投資者投資？大方向無變、政策亦肯定會配合，溫總的講話可以理解為政策出台前的一種理順，希望解決官員之間的矛盾，但直通車最終一定會到、限制QDII的講法更令人摸不著頭腦。 說到金管局的分析，可以重看任總在九月的 觀點 ： 「雖然此計劃的落實時間似乎較早前傳媒報導所預期的遲了點，但由於實施細節涉及內地監管當局之間的協調，這是可以理解的。無論如何，我深信啟動這列直通車是符合內地利益的：鑑於內地宏觀經濟的不平衡情況，能引導相當規模的資金有序流出對內地來說是非常重要的．．．．．有些人更可能以為直通車計劃只是中央政府給香港帶來的另一件禮物。這樣的話，他們就掌握不到事情的全貌了。直通車計劃無疑會使香港受惠．．．．．但這都不是計劃本身的目的，這個計劃是要引導內地資金有序流出，以助解決國際收支盈餘持續增加所帶來的問題。我認為直通車是國家處理宏觀經濟問題所採取的正確一步。」 李兆基今日回復我們查詢，重申佢三萬三千點的預測，仲指跌得多就應買得愈多，不相信今次跌市是大調整。對於目前市況我們不敢輕視，但當通街開始轉淡、人人話死話死時，可能又是另一個考驗勇氣的時機．．．．． 題外話： 四要點中的第四點，溫總...

今個星期可以話係全球最大投行CEO最難過的一個星期，由美林開始揭開第三季業績，「爛數」一個衰過一個，美林CEO O'Neal已經率先「祭旗」。 現年五十六歲的奧尼爾、可以說是一個活生生的傳奇，他不單止由低做起，曾經做過通用汽車文員，仲成為第一個躋身華爾街大行的黑人。 雖然奧尼爾已經離任，不過仲有不少手尾跟，美國證監會已經開始介入調查，美林點樣處理次按的撥備虧損。 WSJ引述消息話，美國證監會已經開始介入調查，主要是美林十月初公布，需要為次按投資撥備45億美元，當時佢地已經表明係足夠。 怎知事隔不夠三個星期，美林就修訂撥備金額，增加到七十九億美元的破紀錄水平，前後二十日，比起幾個星期之前公布多左三十二億美元。 據了解，美林隱暪手法、是透過向一個對沖基金，出售左總值十億美元的票據。而基金就有權在一年後、以保證回報賣番比美林。 跟據美國會計準則，如果資產係無人要，銀行係需要以市值將虧損入帳，但經過呢個一買一賣手法，分析員話，虧損的問題最少可以隱暪一年，而當年「ENRON」亦都係以類似手法隱藏虧損。 有分析員話，美林可能仲要在第四季，再額外撥備多四十億美元。 雖然奧尼爾已經離職，仲獲得一億六千萬美元「分手費」，但事件已經引起美國國會參議員銀行委員會主席關注，表示稍後可能會要求修訂法例。 更大件事是奧尼爾被揭發、炒了一個在舊年已經預先向佢警告定息部門主管，四月董事會亦都無視呢個預警，顯示整個管理層都忽視了應有的危機感。 看來，奧尼爾就是敗他那分過人的自信，現在離職後，市場就開始玩「估領袖」，到底下一個被炒大行CEO係邊個。 估計都離不開花旗總裁CHUCK PRINCE同貝爾斯登總裁凱斯。 特別是凱斯，佢又被WSJ揭發，話他在七月貝爾斯登兩隻基金爆煲的時間，在無帶電話同BLACKBERRY情況下走了去打GOLF，完全應了特首個句:「BANKER 愛高球!」 波友亦爆料，話「凱斯」經常星期四下晝已經唔見人，一係去打波，一係就打BRIDGE。雖然凱斯試圖向員工發表聲明，想證明自清明，但以今時今日形勢，凱斯好大機會會被叮走 而花旗啊總裁CHUCK PRINCE，亦被CIBC睇死佢一定落台。 今期經濟學人就有專題講呢批大行老總難捱，亦都係質疑佢地將次按虧損入帳手法上，係有好多唔明白不清不楚的地方，因為唔少有「AAA」評級CDO，以前值一美元、而家分分鐘、二十美仙都無，因此，大行...

有網友問點解琴日我地會用有97feel 形容金管局入市? 其實可能是自己過敏，因為又係見到外圍有些非常揣測性報告，金管局又連番入市，自己都做到精神緊張! 到今日任志剛出來解晝，一句呢啲報告別有用心，市民唔好輕信謠言，就已經將一分捍衛聯繫匯率決心表露無遺，港元同拆息都輕鬆回落，任總真係值九百萬! 今日瑞信陶冬有分報告很值得詳談。佢認為，金管局目前要捍衛強方兌換保證，比起九七年金融風暴時、炒家沽空港元容易得多。因為九七年金管局要動用外匯儲備，不斷用儲備接港元沽盤，自己袋中的美元亦很容易「彈盡糧絕」。 相反，現在外匯儲備中的美元反而不斷增加，要幾多港元就比幾多，的確輕鬆得多，炒家要成功衝擊港元機會根本好細。 既然衝擊港元咁大困難，點解炒家仲要買入咁多港元？ 星展話，炒家嘅戰場根本唔係港元市場，而係志在襯住熱錢流入，可以趁住資產市場升值，推高股市同樓市， 「雙邊套利」，而本港要承擔嘅代價，就可能會形成資產泡沬。 咁到底聯匯係咪唔使改？ 高盛話，而家未係最好嘅改變時機，原因係外圍形勢仍然動盪。 佢地相信隨著人民幣仲有很長升值空間，未來仲有好多機會改動聯匯，不過最好就係喺任志剛任期內進行。 都係任總......