財經拆局

幫新股護盤，係保薦人責任。 不過作為匯賢房託保薦人中銀國際、中信證券同匯豐，以護盤角度看，真係完全不負責任。 結果係要接近三點鐘，沽盤不斷湧現，股價亦愈跌愈多。匯豐同中銀先積極排盤接貨，可惜係承接力始終唔夠、最後得返匯豐孤身作戰，尾段力托，先至以4.75元人民幣收市、未至於觸及全日低位，全日成交超過十六億人民幣。 不過匯賢依然係表現最差嘅新股用每手賺蝕銀碼去計，每手蝕490元人民幣，以港紙計，就蝕近580幾蚊，比起上星期上市嘅泰凌醫藥蝕300幾蚊仲多。 作為首隻人民幣計價產品、一開市就跌穿發行價，有散戶唯有喺低位溝貨、輸少當贏。 部分大戶更大手沽貨。 有個別證券行話，由於匯賢大戶分配比例高，乙組分配率高達七成，比起一般新股三成高好多，大戶為免持貨過多都寧願蝕讓。 無怪乎中信證券索性飛起外資，完全靠自己人搞上市。 話晒自己人此終好辦事。 匯賢由認購反應，同上市表現，中環跌落地嘅眼鏡，已經破左多年記錄。但亦搵唔到更好解釋! 認購反應差，賴回報唔吸引。但咁解釋唔到，舊年國債息仲少，但反應都比匯賢好。講到呢到，有人歸咎房產基金呢項產品，唔係香港人杯茶! 反應差，更要破發問題出喺邊。其實好簡單，市場係一個買賣雙方遊戲，匯賢呢場遊戲之中，由頭到尾，再次證明賣家，叻過曬我地! 懂得利用頭炮包裝，更再次發揮叫價進取技倆。銀行界中人話，結果價錢唔係定得咁貴，匯賢其實會好一點。 當然，聰明如李嘉誠，亦敵唔過天時因素。 因為內地市近日的確好難睇，新股連番破發，亦造就利淡理由。結果留意呢幾日市況，匯賢如此下場，又唔係令人意外!

考考大家，呢幅圖代表咩? 路透社用Cloud word呢個軟件、紀錄伯南克整個記者會講過啲咩，其中最多次提及就係「通脹」! 之後就分別係經濟、物價同失業率，反而利率呢個用字就縮到最後，你搵唔搵到? 克魯明就話，好明顯呢個伯南克既優先工作排行榜，一睇就知邊樣重要、邊樣無咁重要! 講真，今次伯南克舉行既歷史性記者會，可以話夠晒反高潮，外界由之前充滿期望，變成發覺無咩新意，唯有將焦點放喺伯南克一舉一動上。 好似佢坐定企? 記者會現場佈置又點呢? 有人甚至形容張櫈大到有啲不成比例，伯南克就好似坐喺鋼琴面前，莫非係對牛彈琴? 金融時報用「BB」來形今次記者會，當然BB就唔係指Ben Bernanke，亦非Big Ben, 而係Brilliantly Boring! 所以華爾街日報話要睇一場刺激既電視直播，不如轉台睇遲半個鐘開波既歐聯好過! 有好事分子搵身體語言專家、將BIG BEN同特里謝比較，話特里議可以用抑揚既法語、加埋手勢聳肩動作達到誇張既效果，相反BB就大過學者 FEEL，因此先大叫「BB」! 身體語言專家指，伯南克音調一向比人唔夠堅定感覺，而今次記者會最初都有同樣情況，但中段之後有明顯改善。 佢多次揮手加強效果，又經常仰望天空諗下點回應問題，算叫做交足戲! 其實伯南克都好努力營做輕鬆效果，好似玩下爛gag，有記者問佢美國人都好不滿氣油價格太高，你估佢點答? "FED Don"t create more Oil!" 真係比佢吹漲! 有經濟師話，伯南克創造呢場記者會，佢最唔想見到既一件事，就係創造「頭條新聞」! 不過好似FT社論比喻，伯南克肯一改格林斯潘年代揭開神秘面紗，點講都係德政，就好似為聯儲局引入更多「光明」，而佢對退市時間同係咪再入市都有留有「尾巴」，亦增加左日後貨幣政策既彈性! 當然，如果細心解讀整個記者會，都有得著，好似有記者問佢"Extend Period"即係幾長? 伯南克都首次講到係代表開幾次會議，換言之同之前市場解讀半年時間，雖不中亦不遠已! 伯南克破天慌開記者會、我地陳總都破天慌回應伯南克開記者會，仲好神奇講左伯南克無講既嘢: 美國可能比市場預期更早加息??? 唔通佢真係同伯南克咁老友? 我反而有興趣比較下兩個人表現，伯南克都叫做有板有眼，反而我地陳總唔知係太早開聲定係心情緊張，發言雙眼離不開「猫紙...

政府主動推出嘅紅磡高山道地皮，雖然首次有「發水」限制，但仍以市場預期上限近一萬蚊呎價、由南豐同永泰投得，成交價計係九龍區第五大地王。 當然，明眼人都留意到，賣地一共有九個發展商參與，但大部份時間，得兩個財團爭。 不過令人瞠目的是、舊年先發炮話限發水會影響供應，講到為國為民，長實而家可以突然提出話限制發水可以改善居住質素??? 變臉王當之無愧! 發展商由過去發水兩成半、到現在頂多一成，計落發展商利潤要打八八折，以今時今日樓市氣氛看來，投地買家真是信心十足，不怕他日重蹈藍灣半島的禍! 解釋可能係瑞信之前講過，有政策防炒樓，加土地增供應，但高地價政策不變，高樓價現象，亦無主動理由調整。 施老闆亦認同，即使政府出盡力、搵多幾塊地皮都只可以提供多數千單位，根本不能救火，即是無左炒家需求、供應仍然遠追不上因低息而買樓投資的港人! 我們之前都多次撰文提及勾地表失效，政府肯主動推地，總好過將問題視而不見! 南豐有無買貴貨，如果對後市樂觀，答案一定係無。問題係，塊地比新地攞到既山谷道村地，景觀低兩級，發水少一成。 就算比長實半山一號，亦遜一皮。 一手私樓無人買得起，又或者愈嚟愈少人想買。更令人唏噓係，九龍地王係前公屋用途，而警察，同海關職員宿舍，亦原來咁值錢。即係代表左的咩! 即係，普通平民百姓，要繼續遷離市中心。市區呎價過萬，已經進一步被合理化。 兩個發展商爭，未必有指標性。但將來有人買，就已經係市價。無疑有人質疑，無大發展商爭，係無代表性。 但唔好忘記，促成大發展商興趣欠奉，係嚟緊太多好野推，呢的地，可塑性更高。 值得一提係，舊年發展商賣樓部署係攻大單位，但依家情況有變，由於呎價太嚇人，識包裝既信和，就學乖左，旗下長沙灣樓盤明明呎價貴，但勝在單位細，令入場費聽到負擔有餘，似乎市區日後新盤，係咪再以細單位主導，值得留意

多個人行官員先後發言、包括行長周小川在內都講，外匯儲備已經超出合理水平，點樣分散投資成為當務之急。 但手持大量美元資產，中國被動情況可想而知，情況就等於一個散戶，踏沉船，日日寄望明天會好轉，但一等就等左兩年! 儲備係百姓嘅錢，儲備大縮水，就算點歸咎係美國之錯，呢個政治責任，未必有領導人負得嚟。有跡而尋，阿爺對美元已經由等，到信心盡失。 中投獲注入第二批資金，其實醞釀多時，領導可能錯在內部討論太耐，令全街的野貴曬先至來拍板。他日錢到手，中投係咪重演買貴貨事件，真係好難講! 諗深一層，祖國比任何一個國家，都有急需減磅美金。 首先，如果信貨幣強弱取決於外儲備組合呢一套，咁人民幣已經有貶值壓力，因為美金係咁貶值，中國三萬億美金只係帳面，賣出去已經唔值錢。 再者，人民幣有升值概念，主要嚟自國際話事權增加，貨幣國際化，同自身經濟實力。但同意呢套同時，唔好忽略，中國亦濫發貨幣! 零八年，我國新增貸款四萬幾億，到零九年有近十萬億。零八年，我國M2有四十七萬幾億，一年後已經超過六十萬億。 人大財經委對呢個問題一直批評，近日副主席尹中卿更指，中國濫發貨幣程度，其實超出美國! 單邊美金儲備，同濫發貨幣，人民幣有雙重貶值壓力呢個講法，可能跨張左。 問題係，內地已經形成一種聲音係要盡快減少依賴美金。近日人行系統入面，小川行長外，夏斌，樊綱都先後提出問題重要性! 可惜，中國就好似係一隻特大巨輪，一嚟轉身難，更重要係國際間，唔係咁多碼頭俾你入去泊。 另外，如果信夏斌，中國要減持二萬億美金，咁大筆錢，要買的咩? 又點樣唔令淨底美元更大幅眨值? 官方，同評論都認為要買商品。但又有兩個問題，一邊有咁多俾你買，二來你走去搶高過價，令商品價格繼續不受控，內地通脹又會進一步升溫，結果就會出現「自食其果」四個字! 從現實分析，中國減持美元，係長遠艱巨工作。能夠有自主控制能力，只係先少收美金先，所以人民幣國際化只會快、不會慢! 因為美金而令阿爺"騰雞"，作為阿仔，香港似乎更無面，龐大外匯儲備，七成九係美金，呢個又係香港市民儲落既錢，為官者無理由係繼續不為所動，將明明有問題既事，講成無問題!!

詳情留意我們 facebook 專頁

佢好緊張，佢喺聯儲局所有職員都好緊張。 伯南克破天荒喺公開市場委員會議息後見傳媒，萬眾期待！ 面對政界，學者，甚至外國批評美國濫發貨幣，任由通脹失控。 華爾街日報形容，伯南克好想趁下星期首次記者會，令全世界接收清楚，佢想講既野。 於是，聯儲局內部成個月前已經預先草議多份模疑答案，同伯南克反覆做採排。 都未夠，伯南克近期頻頻睇帶睇咩，就係睇歐央行行長特里謝，同英倫銀行行長默文金記者會期間點應對問題。 而且早喺二月份．伯南克更加親自向特里謝請教，主持記者會嘅秘決。 前任聯儲局副主席，甚至委員都批評．開記者會講多錯多，做法不智。 不過伯南克反而認為，呢次係當局解釋政策嘅最好時機。 你或會問，下星期記者會係咪會有重大宣布? 既然模疑答案已經準備好，係都唔使多估。 華爾街日報亦指，雖然近日鷹派聲音抬頭，但伯南克同佢兩名副手，耶倫同杜德利會繼續堅持完成購債計劃，兼且表明未係時候加息。 伯南克形容，公眾對政策嘅誤解加大政策難度．佢期待，增加透明度，可以重拾80年代沃爾克時期，公眾對聯儲局控制通脹嘅信心． 但有聯儲局前高層講沃爾克既果斷，勇敢，係伯南克無既況且央行入市容易，退市難。 最新調查顯示，美國人唔信任伯南克比例升至四成二，係新高。 係咪可以扭轉劣勢，美國傳媒同樣期待，下星期呢一場，比起奧巴馬更重要嘅記者會。 其實伯南克主持記者會，要搵軍師(或偷師?)，香港國金中心88樓陳先生應該係人選! 好榜樣難學，但最少有得比，就唔會學過壞榜樣! 無疑，金融市場依家主要對手，係伯南克一個。須知一個博奕遊戲入面，最難應付既人，係無數可按常理出牌。 恐怕伯南克唔係呢種人。 伯南克希望搞新意思，其實只會俾市場更有信心，繼續沽美金。又如果，佢今日唔覺意睇左金管局年報，發現自己原來人工咁低，但做野咁多。佢心有不甘，決定唔撈，……到時美元咪有救!??? 美元指數連七十四都穿埋，跌至三年低位，下一個咩位，已經再唔重要，簡單講，美元已經崩漬。 金融時報一語道破，話現時美元以外所有資產不斷升，係市場不信任央行既無聲抗議。 無人信美國會停印鈔，亦唔信央行可以控制通脹。專家講得啱，眼前股市升市，其實係假象，因為拍埋商品，股市其實係負回報! 德州大學買金事件，令呢個大學高層成為新晉商品大王，CNBC直播亦要訪問佢。 大學負責人話，零九年買金，就係因為知道印鈔後遺症，佢用七億幾分段不斷買，依家值十億美金有多! 的...

由標準普爾一手主演、白宮背後編劇既「降級驚魂」，只係上演僅一日就「謝幕」! 呢啲陰謀論，雖然大家都知係事實，不過都係唔好過分張揚..... 而當市場消化左美國唔會真係被降低評級，不得了，無論商品、匯市、股市全部爆升! 亞太呢邊，更加要關注英特爾，佢地預計第二季銷售理想，區內科技股全線上升，LG業績好過預期，股價升半成創新高，三星亦升百分之四。 台灣科技股亦做好，HTC亦升近百分之五，市場傳出蘋果新一代iPhone七月投產、多間生零部件廠商股價急升，帶動台灣股市百分之二。 不過ACER同期間大跌百分之六! 佢地上個月炒左做左多年既鬼佬CEO LANCI，原因係佢同董事會就平板電腦前景不咬弘! 雖然公司委任左新既本地龍做新總裁，不過呢間原本佔全球第二大電腦公司，股價因為調低銷售預測，收市大跌百分之六! 再對照下我地聯想，其實命運相同，以往INTEL靚靚業績、聯想都會炒一轉，不過今時今日大家都只係追有「平板」慨念，而聯想既樂Pad呢...... 相反，南韓既LG同三星，雙方雖然對3D TV前景各有睇法，但全程投入電子產品市場，「雙核」Android機將先後面世、用家話完全有能力挑戰iPhone功能! 講開三星，佢地Galaxy 2望穿秋水都未見影，相反蘋果既iPhone 5、終於有消息，七月投產、九月面世! 所謂有麝自然香，蘋果最近入稟，告三星最新嘅手機同平板電腦系列，外觀抄到足。 有心人關注，三星一向係蘋果嘅處理器供應商，咁樣一告，會唔會影響零件供應？ 先唔講勝算有幾高，呢啲官司短則幾年，長則十年都有。告，究竟符唔符合成本效益？難聽啲講句，到單案有判決，iPhone都唔知出到第幾代。 為啖氣，已經不切實際。詳細睇分入稟狀，更可能係為業績發定盈警，咁就真係損人不利己! 蘋果自己披露，截至三月iPhone面世以嚟，賣咗過億部，iPad就有近2千萬。 心水清嘅即刻會計到，第一季iPhone去貨1千8百萬部，低過預期。不過iPad更弊，三個月只係賣咗420萬部，比平均數大跌四成！ 姑勿論呢個數，有幾可信，收市就會揭盎，但可以肯定嘅係iPad2推出無耐，就遇上３１１大地震。零件供應缺乏，價錢仲一下子扯高，唔單止供貨受影響，連毛利都受壓。 且看教主今次如何拆招!

標普調低美國評級展望，引發金融市場掀起軒然大波! 其實美國有財政問題都唔係咩新聞，點解市場仲有咁大反應? 講真，標普呢次調低前景展望、除左帶出市場對呢次褻瀆神明既裁決、有一絲快感外，根本就亳無新意! 但同時亦引起市場對美元前景既憂慮，因為可以肯定既係、無論財赤幾大，美國都唔會違約，最終都係可以靠通脹去擺脫債務，市場淨低要擔心既、就係美元不斷眨值引發既危機! 有外國傳媒報道，白宮早喺上星期五已經知道有關消息，懷疑係政府其實係有預謀、透過標普既報告，增加同政黨喺削減開支上既籌碼。 睇番標普全世界１２７個主權評級中，得１９個有三個Ａ既評級，而美國成為唯一當中、前景展望「負面」既國家，真係事有巧合? 翻查紀錄，透過降低評級迫政黨合作唔係第一次，96年穆迪就因為調低前景展望至負面，令兩黨加快制定國債上限。 華爾街日報亦提出，今次係09年標普調低英國主權評級既翻版，由於第二年就係大選、標普既決定間接令支持削債既保守黨擊敗工黨，之後一年英國就恢復AAA身分! 不過，金融時報既社論話，同十五年前唔同，而家既政治形勢除左兩黨之外，仲有一個「貌似」主張削減財赤既鷹派「茶黨」，但實際上佢地只係一批「民粹主義」既烏合之眾，佢地不惜將美國人帶落懸崖! 而一直提倡美國要繼續增加開支、刺激經濟既諾貝爾獎得主克魯明直頭話，調低展望冇咩咁大不了。 克魯明話，由美國債市表現來睇，標普報告既影響都只係一瞬間，因為市場如果信美國會違債，應該係要大手減持美債，不過十年期債息飊升至3.45厘後、好快已急跌落番3.36厘水平，認真係"No Big Deal"! 講真，美國國力強，但借錢多。整個國家根本上係以債渡日。 人均負債，多過日本。有評論計過，美國計埋最新發三十年長債金額，總負債水平十四萬三千幾億美金，技術上較債務上限超出百一億美金。 美國唔掂，已經唔係秘密。標普將美國評級前景展望下調，講唔上美國爆煲。問題係點解標普夠膽咁做?! 首先，美金實在太殘，歐債問題好，早前日本核危機好，美金完全失去避險功能。標普出手，做醜人，就係測試美金仲有幾多實力。 更重要，標普係咪成為棋子，製造市場亂局，為QE2之後一的部署鋪路，亦都值得懷疑。 標普做醜人，為免對市場破壞力太大。 評級機構成為美國絕招之一。周小川賴理仲話評級機構欠專業。但小川行長重點，在於首次講明，中國外匯儲備，超出左合理水平。 正如羅家聰...

樓價指數連跌三周，累計跌左1.6%。 原因是:1. 政府加快推地? 2. 金管局收緊銀行貸款? 可能吧，但相信政府都未必能確切說出答案。 但更多人想知的問題是、樓市是否轉勢? 先不要忘記，雖然樓價跌了，但今年樓價累積升左9%。(只是首四個月。) 近日有機會與監管機構人士會面，更了解當局出手調控樓市的思路。 監管當局強調反周期的重要性。今次樓市升浪大家有印象，是由零三年開始，中間經過08年金融海嘯、短暫調整了一個季度，不過很快回復升勢。 八年的一個經濟周期，到底是否足夠，呢個問題其實最好下次問「趨勢大師」羅家聰。 且看近日樓市負面因素的變化: 1. 外圍開始收水。(包括歐洲加息以及人行舊年十一月以來首次加息) 2. 銀行面對息差收窄、需要調整貸款政策。(銀行取消H按/ 加H按息) 3. 樓市的自然調節。(樓價已上97年水平) 當局的結論是、雖然唔知樓市幾會跌，不過可以預早提防就早提防，但力度又不能猛至令周期轉勢，所以寧願採取逐步收緊的措施。 的確，為防樓市泡沬爆破、再嘗97年的6年調整痛苦，我們贊成當局可以提早防範風險，當中SSD是沒有辦法中的好方法。 不過在看到樓市升溫的同時，其實有幾個當局指的「警告」指標，我們認為值得大家再深思: A. 金管局警告，市民的供樓負擔比率由去年的44%，增加至近日的54%，已經屬於偏高平。(當局目前比銀行的審批指引是供款負擔能力不能高於50%) 但凡事均有比較，看圖中(金管局三月出版的半年報告)的藍線，目前五成多的負擔比率，只是回到2000年水平，與97年的泡沬水平110%比較，相距仍甚遠。 B. 圖二同樣來自金管局三月半年報告，表面好像好複雜嚇人，其實簡單講就是目前樓市的各樣指標與97年比較有何變化。 最顯而易見的三點是樓價、按揭貸款總量(約是8000億港元)、以及樓價佔收入入率，都已經回到97年狀況。 不過其他指標例如供樓佔收入比率(A.點)、以及成交量、以至確認人買賣(炒樓)水平，仍遠遜97年。 結果將A與B 兩點合併思考，可以說明甚麼? 樓價回到97年、貸款總量相近、人口總數基本無大變化、收入又唔見得比97年高很多，但供樓佔收入只是97年的一半。 簡單結論就是目前市民的借貸槓杆水平，遠低於97年。(當然有部分買家的確是來自內地，但對基本結論沒有影響。) 這點其實在過去我們的文章都有多次提及，目前市民買樓不論自願抑或被迫、都不敢...

潛伏十年，嘉能可老總格拉森伯格呢個星期可以搶盡左證券同商品市場兩邊既焦點。 84年加入嘉能可後、02年連替被美國通緝既商品界奇人、前大股東MARC RICH既接任人，格拉森伯格既真面目係呢個星期都無咩人知，有傳媒形容佢係一個Private Man! 之前傳媒只係知道佢三項資料:58年南非出世，加入嘉能可25年，02年接替CEO，其他就全部一概唔知! 今次上市，格拉森伯格選擇由幕後走向台前，而且仲要用一種「一鳴驚人」既方式登場，對市場真係收到震撼既效果。 嘉能可既上市文件，唔單止令證券分析員、商品交易員都人手一分，誓要揭開呢間全球最大商品市場交易商既神秘面紗! 點知唔睇由止可、一睇就嚇死人，佢地除左持有兩間資源公司Xtrata同 俄鋁股權外，喺貴金屬既「第三者市場」，佔有既佔有率，用壟斷來形容都可能未夠跨張! 睇睇呢個THIRD PARTY Market Profile，嘉能可操縱左「鋅」既六成買賣、五成既銅資源、四成半既鉛、三成八既氧化鋁同幾乎三分一既電力煤。 所謂既第三者市場，就係「可交易」既商品。雖然嘉能可喺數以萬億美元既商品市場、佔比例唔多，不過每年商品交易量中、絕大部都係由早已經定價既供應商同用家佔據，真正可以作為商品交易既，就係「第三者市場」。 所以經濟學人都形容、嘉能可一旦同Xtrata 合併，會成為商品市場既「怪獸」，唔單止有能力挑戰前四位既資源公司，包括力拓、BHP、淡水河谷同我國既神華集團，誇張啲講，連商品大國中印都要忌住忌住! 其實嘉能可近年既商業模式、都已經有好大轉變，由一間中間人只係買買賣賣商品、到而家變為一個「垂直整合」既商品交易商，既擁有自己既採礦公司，同時又透過全球五十個辦事處、喺主要市場進行商品交易。 呢個由上游貫穿下游既模式，已經可以雄霸商品王國。 唔講唔知，原來「格拉森伯格」曾經喺香港同北京嘉能可辦事處任職，時為1989年，相信呢個都係其中一個原因，令佢同馬世民熟絡，找對方出任非執行主席! 其實嘉能可上市整件事，好睇到高手過招樂趣。 作為全球最大招股，全球首席高盛竟然無份承銷。結果…. 結果高盛不斷唱淡商品。實行人做喜事，我做白事。一星期四次出招，為既就係推低商品價格! 呢個可能係美麗誤會，亦可能係合理懷疑。高盛無份幫嘉能可上市，一早已知。 事關，高盛亦係商品大玩家，嘉能可無理由俾底牌人睇。就算連另一商品大莊，摩根大通，亦係不入承...

通脹再度破五，貸款又多過預期，市場好自然會估，存款準備金率要加幾多，幾時加？ 當然，搵到周小川問吓就最好喇！ 其實了解國情都知，的確，睇返國際做法，央行行長對幾時加息、加幾多，有絕對話事權。 美國有伯南克、歐洲有特里謝、日本都有白川方明… 但「小川行長」表面睇好大權，實則係完全相反。華爾街日報問過幾個央行委員，究竟邊個先係「中國嘅伯南克」？答案係「查無此人」。 點解會咁？因為內地嘅貨幣政策，唔係人行「說了算」。 承襲黨中央「集體領導」嘅思想，重大嘅政策決定，原來都係「集體創作」。 加息、加存款準備金，一定要經總理溫家寶、率領嘅國務院常務會議拍板。其他貨幣、匯率決策，就由中央政治局決定。周小川？都叫有分開會、俾吓意見咁，但當然唔到佢話事。 就係咁，中央有親乜嘢決策，人行通常要到最後一刻先知。想影響貨幣政策嘅，仲有發改委、商務部，其實仲有好多。有經濟師話，人行只係十幾個部委之中，區區一個咋。 唔怪得之國際社會，對內地嘅政策走向，無晒乎。因為出面傾嘅官員，往往都話唔到事。 做過奧巴馬經濟顧問嘅「薩默斯」，曾經同「小川行長」打過場友誼網球，賭注係贏咗果個，可以決定人民幣匯率。場波邊個贏？唔重要，因為佢搵錯人喇。 被視為改革派、工程師出身嘅周小川，都曾經好話得事。原來係周小川爸爸，曾經係前國家主席「江澤民」嘅老闆，隨即被「朱鎔基」視為心腹。 改朝換代，周小川投靠另一個政治局常委「黃菊」，可惜佢四年前過咗身，離權力核心又遠一步。 有人行中人話，周小川同溫家寶，原來互不往來，甚至係形同陌路。 還記得去年曾傳出小川出走美國的傳聞嗎? 現在想來未必空穴來風……. 要直達天庭，唯一靠副總理王歧山，因為大家背景相同，曾經為銀行業改革努力過。 無實權，人脈網絡又逐步萎縮。再計一計數，６３歲嘅周小川，差唔多時候要退休，睇嚟都幾難再上一層樓？

時間倒數番一月分，在國統局公布一月內地經濟數據前夕，二月十二日晚，有股民已經收風知道通脹率會低至4.9%、比市場預期低。 當佢有兩個朋友同時收到呢個消息時候，佢地決定周一開市就撲入市。 結果在周二數據一如預期，而呢個股民亦開開心心將賺到的2%利潤平倉。 佢話:「投機窗口在內地多的是，在內地炒股，炒意外消息倒不如早作準備。」 雖然泄密事件一再發生，但以內地經濟架構，這種數據泄密事件肯定陸續有來。 知唔知一個通脹數據，由編制完成到發布，要經過多少個部委? 是十個! 由人民銀行、發改委、以至商務部都要預先過目，那數據又豈有秘密可言? 歐美政府近年收緊對泄密事件的刑責，以美國為例，刑期最高可達5年以及罰款25萬美元。 高盛04年有一個經濟師、就因為預先將財政部計劃停賣30年債券消息泄露予交易員，結果要入獄33個月。 雖然中國都有法規防止敏感經濟消息外泄，但多次泄密事件、就從來未有人試過孭鑊。 更可笑的是，原來在中國因為泄露經濟數據而買賣股票，中國證監會並不定義為「內幕交易」! 理由是內幕交易是規範上市公司、避免因為透露股價敏感資料而制定，所以經濟數據是宏觀數據，並不涉及上市公司層面! 說實在，有理由相信，官方唔會主動放料，但民間機構，或主要學者，係咪一早獲知數據，無需多講。 所以更深一層，數據一早有人知，係咪更多利益團體可以搵著數。值得懷疑!!

今個月底主動拍賣招標三幅紅磡住宅地後，嚟緊兩個月就主動推多六幅較低密度地皮。 五月嗰三幅，以司徒拔道前嶺南書院最受關注，估計只係起到一百個單位，市場估每呎地價值萬八蚊，估值高達32億。 其餘好似係九龍塘海棠路、六月賣嘅西半山波老道都係觸目市區大型地皮。 本來二月只係話全年主動推18幅地，第二季開季就變咗連續三個月個個月賣，發展局死撐話，唔係改變賣地政策。 說實話、由唔肯，到變相肯。政府唔認，但骨子裡，正正就係定期賣地。點解？ 要做又遲遲都唔肯做，到依家樓價升破九七先做。到底係後知復覺，定默認左原來政府一直睇住九七價做決定。 兩個原因，就算是旦一個係事實，都再次令市民失望。 肯推地，好過堅持繼續玩勾地。但根本問題，官府高地價政策一日不變，一日就繼續為發展商高價開盤，開下綠燈。 高地價，高樓價，根本係惡性循環。 你會問，官府依家嚟個土地傾銷，對樓市係咪再構成利淡因素呢? 中環人話，嚟緊主動賣既幾幅地、幅幅係好野。豪宅有價之下，一幅前嶺南學院地，分分鐘又天價成交。 信供應大增，會影響樓價？似乎忘記左高地價成交，亦會推動樓價嘅現實。 九幅地係咪推得低樓價，九幅地加埋二千多個單位，比發展商今個月新盤三千幾個單位仲要少。與其驚，不能驚樓市超級四月分，新盤，加三塊紅磡地，到底對市況有無影響！ 紅磡地三幅，三幅都唔差，特別係高山道，就算一個唔覺意，三幅成交都唔好。五月，又有司徒拔道接力，可以帶番旺。如果月底三幅賣得好，咁樓市咪又火上加油！ 如果咁講，發展商近日做到市價散貨，就係比政府更高明。首先，預留彈藥，二係真心釋出、或扮釋出善意！ 但說到底、所講善意其實會唔會係詭計?你明知樓價咁貴，係傻嘅先會夠膽喺元朗賣過萬蚊呎。 只要識做人，扮散貨，政府就唔會出絕招，就係居屋！ 中環的確近日流傳過政府四月搞居屋，但依家發展，看來居屋無影，靚地到手，政府又中正發展商圈套！ 無疑，樓價係貴，銀行近期舉動，亦令準買家少少舉棋不定。後市點唔知，升與跌，難料。 有原本估樓價今年升三成嘅大行話，距離達標仲有一成多少少。如果咁好彩達標，下回將會不設樓價預測！

香港內地化又一最新例證。 金管局陳總決定向周小川學習，為香港銀行業寫下新的一章:將本港銀行同內銀看齊，將金管局人行化。 名義上是為免由信貸推動既樓市泡沬、對銀行同本港金融體系既穩定性構成風險，金管局決定加強監察、會派人到銀行了解特別係特定貸款以及銀行既貸存比率。 而銀行需要喺今個月底前、向金管局遞交今年「重新」檢討既貸款目標。 雖然88樓未有就貸款設定上限、但此舉同內地每年設新增貸款目標、相差幾何? 一句「重新」，已經足以令本地所有銀行總理層「陣腳大亂」、要將Business Plan重新制定。 做過呢類計劃的人都知，一條貸款收入比率大數有變、影響所及，無論是原定的擴充、請人、甚至是加人工計劃，都幾乎要重新規劃。 令金管局咁緊張、究其原因係貸款業務長雖帶動本港銀行舊年盈利上升，但亦埋下隱憂。 睇番由09年起，貸款增長速度加快，單係舊年多左三成，但港元存款增長遠遠落後。 結果形成銀行貸存比率、由七成一，升至上今年頭兩個月八成一水平。 有銀行承認，有問題佢地已經見到，業界開始將競爭轉移至存款市場，確保有足夠資金應付貸款增長。 現實係銀行爭存款，只係岩岩開始。 不過競爭下，銀行存款成本已經抽高，當中以中小型銀行最受影響，咁情況，會令銀行批貸款時更加揀客，貸款增長一定回落。 金管局開聲，話關注貸存比率過高問題，同要睇實佢地嚟緊貸款計劃。 有大行話，問題唔單嚟自銀行，因為本港存款結構轉移，人民幣存款增加已經令銀行無息差優勢，呢個情況繼續，就算美國唔加息，本港優惠利率出年年中前亦可能要加一厘。 大家睇好樓市的，可能要有心理準備坐下過山車!

打破近十年沉默，嘉能可總裁格拉森伯格首次同傳媒會面，就係為左今個星期展開上市進程鋪路。 為左加強投資者既信心，更邀請前和黃大班馬世民、成為競逐主席三名候選人之一。 今年七十一歲既馬世民話，對獲邀請出任嘉能可非執行主席感到好興奮。 金融時報形容嘉能可趁著大宗商品價格飊升、取得六百億美元既「藍天」高價估值。 格拉森伯森接受佢地訪問時話，嘉能可絕對唔係機會主義者，今次上市集資係預留彈藥將來做收購，提高回報。 集資最多一百二十億美元，嘉能可會發售兩成股分，公司目前四百八十五名員工，上市後平均每人會獲得價值一億美元既股分。 不過格拉森伯格話，今次上市唔係散水，佢一日仲喺公司，一日都唔會賣股分，至於其他高層，股分上市後要遵守五年禁售期。 由從來唔接受訪問，到主動走向台前，嘉能可老總格拉森伯格無非係想講一句，就係公司唔係機會主義者。 兩年前嘉能可一批可換股債券，當年公司價值係三百五十億美金。兩年後今日，市場計過，嘉能可頂盡值五百億鬆的。 但無六百億都唔上，投資者又受，咁代表咩呢!? 貴，但貴得未致於無道理，金融時報專欄話，唔可以用過於簡單標準，去計算嘉能可。 事關，佢地手持多間資源公司，本身又係交易商，商品市場幾乎玩曬! 簡單講就係既係PRICE TAKER又係 PRICE MAKER。即係又可享有承受商品價格變動優勢，亦具備創造商品市場價格功能! 嘉能可作為一間垂直式商品企業，本應唔憂做。依家搞上市，有人話係從良，為嘅係打破外界對佢地不友善形象。 但講真，嘉能可四百幾員工係股東，一旦佢地要沽貨，情況等於香港公務員長奉退休基，潛在資金需求好大。而且，要搞大公司，上市亦不二之選。 南非藉格拉森伯格的確唔簡單。公司要搵非執行主席，只要開口，大把猛人排隊。但大熱，竟然係馬世民。點解呢? 作為誠哥前頭馬，馬世民大中華市場人物網絡夠。白手興家嘅佢，形象好。唔好忘記，就係佢當日策劃買赫斯基石油，佢對商品市場眼光，比好多人都要好。 中環人話，嘉能可上市無需急於下注，歷史告之，世紀招股過後，市況多數會跌。但作為一間錯綜複雜，兼異常神秘公司，佢地本招股書，值得細讀之餘，仲應該好好留為記念。 嘉能可太多可以講嘅故事。而佢地證明俾外界睇，搞商品，唔一定要有金礦，有油田都得。只要模式定位正確，咩公司都可以做商品!

黑天鵝過去兩年我地都講過唔少、今年有兩個事件可以歸入呢類，分別係「311日本大地震」、同埋中東茉莉花事件。 呢兩件係咪歸類黑天鵝都有爭論地方，不過仲有一件，就係來自澳州既「黑天鵝」! 係佢，澳洲「天鵝」財長--Wayne Swan斯萬! 花旗報告就係「黑天鵝事件:新交所合併觸礁」，形容斯萬拒絕新交所以８４億美元收購澳交所既建議！ 不說不知，原來黑天鵝有個特質、就係性格爆燥，似乎都幾貼合斯萬既性格。 今次斯萬以「國家利益」為大前提，否決左新交所既合併，觀乎外國傳媒以華爾街日報批評得最嚴厲，連日嚟都公開批評澳洲既外資政策，仲提出所講既國家利益，係咪就係"Closed for Business"，即係「唔做外資生意」? 表面睇斯萬唔係無理據，因為澳洲都定位自己作為區內金融中心，而家要將成個交易所拱手新加坡玩，就好似佢自己咁講、等如將錢同人材都交比對手! 不過同其他企業合併一樣，自己唔夠競爭力，就唯有透過同人合作加強領先地位，本來兩個交易所合併，就係希望晉身為全球第五大交易所、喺區內亦可以超前本港同東京! 而且無論係紐約、歐洲以至中東既交易所都可以透過合併收購來壯大規模，華爾街日報話佢地睇唔到點解澳洲唔可以咁! 講到底、斯萬可以咁有信心拒絕新交所合併要求，都係由於呢個被稱「亞洲沙特阿拉伯」既國家，有豐富既天然資源，面對全球大宗商品價格上升，自然係水漲船高，最近有報道都提到，當地一個採礦工人，薪酬甚至超過聯儲局主席伯南克，你話幾威! 但商品價格有起有跌，就算好似係沙特、90年代都試過因為油價跌穿10美元而幾乎搞到破產! 今日既澳洲，雖然可以話表面風光，但只有打開引入更多外來資金，先至係長遠提高競爭力既一步!

交響曲，通常有四個樂章。 先奏嗚，再嚟慢板，緊接係小步曲，最後既大合奏就係代表終樂章! 散場前一刻，大合奏通常係最激昂，澎拜，所有樂器全部會加入發揮唔同音效。 既然係咁，股市交響樂呢個遊戲下，大行大合奏，係咪代表散場前嘅預示!! 似乎大部份人都傾向係唔係。大行近日的確相繼出報告話港股好，港股勁，但心水清會發現，大部份大行恒指目標維持不變，近期連番報告面世，主要原因係第二季開始，要應酬客戶! 股市無疑自從上月中起，升唔少。但曾氏通道發明人，曾淵倉話港股只係喺通道中心，而且停左好耐。大家會想問，幾時買野，曾教授二話不說，而家好買! 無謂計教果一千點，因為港股要升，會升到你唔信，意思係，實破零七高位! 如果信曾氏，咁大行今回大合唱，只係熱身。當年中，盈利又覺得比預期好，市盈率又再拖低的，到時恒指預測水平，間間上三萬，絕對唔出奇。 盈利確實難預測，曾經可時，零七年估零八盈利有雙位數增長，誰不知，埋單係倒退三成多。但有經驗既投資者，信係直覺，同傳統智慧，而且準繩度多數，甚至完全比大行準確。 既然傳統智慧認定，錢太多，錢唔會走，咁下一步點行動，大家都心中有數! 有答案既仲有美國投資者，當地睇淡情緒指數，最新按星期大跌三成二，係九三年嚟最大跌幅。 當然，一的唯恐不亂既分析，會話根據統計，市場一面倒，睇淡情緒大跌，股市緊隨其後多數會跌。 股市一定會跌，但有無咁易跌? 信錢能夠推動一切，咁又係果句，答案俾左你。 錢有幾多，內地M2有一成六增長，比海嘯前高好多，香港流動資金過萬億，仍然不正常。 怕且，就算加三、五、七次息，每次四分一厘，都未夠抵消呢批熱錢! 一場好音樂會，總會曲終人散。但今次樂團指揮，同樂師，唔係普通人，而係個個都係大戶。 樂曲一樣，演譯方法可以令你意想不到。唔好忘記，主菜就算完，指揮大部份都先「安歌」，到你最陶醉一刻，先正式開燈散場!!

金融時報形容係對「貨幣戰爭」採取既升級行動。 巴西財長宣布，將對外資購買債券既百分之六特別稅，限期由三百六十五日、延長至七百二十日，換言之即係買入兩年內到期既債券，都要比特別稅。 今次係巴西一個月內、第四次加強限制外資流入措施。 由於大量外資流入，巴西貨幣雷阿爾過去兩年已經升值四成半， 巴西指責，做成大量熱錢流入新興市場，源頭都係美國既量化寬鬆政策，佢地需要採取行動。 日前國際貨幣基金組織首次制定指引，同意部分國家可以採取、匯率同利率既外匯管制措施。 為左自保、巴西同南韓透過限制外資流入、「關閘鎖門」，其他就好似中國、舊年開始加息四次，目標都係減低資產泡沬既同時、但又唔想損及經濟增長。 金融時報就有專題，指交易員同經濟師而家對QE2完結後、新興市場既表現意見分歧，部分擔心調控措施如果「過籠」，經濟可能有硬著陸風險。 不過樂觀一派認為QE2完結後唔會咁快退市，資金會繼續留戀新興市場，以舊年十一月QE2開始以嚟、流入新興市場股市同債市既資金多達580億美元，相反今年以來因為中東局勢流出既只有160億美元。 呢個亦都解釋點解資金唔怕繼續買新興市場股票，今年以來MSCI新興市場指數就升左百分之六，市盈率亦由舊年中既15倍回落至13倍左右。 不過華爾街日報質疑、打擊措施未必收效，以巴西為例，雖然多次出手限制資金流入，利率又加至11.75厘，幾乎係全球最高，但係息差已經吸引更多唔怕風險既資金，佢地認為最有效既方法應該係控制政府開支。

俗語話，有咩，留返拜山先講﹗原來人行加息，都係要留返清明先嚟加。 正確嚟講，應該係大時大節，先嚟做世界。假期加息，市場多啲時間消化，唔會影響個市。 真喎﹗上證指數企穩三千點。 可憐班經濟師.....同埋有返工既同事! 今次加息，唔單止剝左陶冬同高盛棚牙，就連自己人易綱都犧牲埋。十日前先講過，目前利率水平「好舒服」之嘛。 但話時話，又唔算好出奇不意。 中央行政手段壓物價，三月通脹可能再破5，同中央百分之4目標，差天共地。 為面子、為民生，更係打定預防針﹗ 打完針之後，大家會問，療程完未呢？ 華爾街日報話，高通脹，低利率，老百姓儲蓄會被蠶蝕。 不過，企業同政府喺金融海嘯後，借落一大堆債。最大債主就係中央，做咩要係咁加息先？ 第二個理據係，通脹第二季將會見頂。而除左通脹之外，其他數據，都反映經濟增長開始慢落嚟。 再加，真係會頂唔順。 無錯，好似內地中小企借錢，基準貸款利率係6厘，但實際上俾緊十厘，資金成本高，走投無路，唯有停產，炒人，閂廠。 到時，就算經濟唔潛水，失業率都坐火箭。 所以，佢地估，息，會繼續加，甚至會繼續喺假期加息，但密密加，可能性就唔大。 不過，人行政策委員李稻葵，漏夜喺微博留言，話人行加息，係要解決負利率問題，當負利率成為常態，會影響金融穩定。又話，解決負利率問題任務仲未完成。 那嶵豈不是即係仲要加多一厘息??? 亦唔需要擔心，加息會引入更多熱錢，因為通脹已經殺到埋身，就連歐央行都放晒風，可能加息，隔離嘅英倫銀行，今次唔跟，下次都要跟。 似乎暗示，加息周期，仲未接近尾聲。 唯一變數係，就係坐喺直升機上嘅伯南克。令中央調整貨幣政策，明顯係有啲滯後同被動。 又唔可以怪晒人﹗歸根究底，都係內地經濟，存在深層次茅盾。 中央信唔過，老百姓唯有死慳死底，自求多福。 政府要振經濟，就猛咁投資。 末日博士魯賓尼最近都專程去大陸打個轉，話自己「深入探討」左內地經濟模式，認為單靠投資推動經濟增長，過多兩年就玩完，到時分分鐘「硬著陸」咁話。 但要真正改革，起碼廿年。 佢獻計，話中國可以再加快人民幣匯率升值，同利率市場化，最緊要，全國加人工﹗不過，問題如果咁容易就解決到，亞爺就唔使次次都靜雞雞拜山先做野﹗

先看看內地人來港產子數目: 06年 16044 07年 18816 08年 25269 09年 29766 10年 約40000 去年共有88000名新生嬰兒在香港出生，當中約45％由內地母親所生。 面對大量公立醫院流失到私營醫院，八間公立醫院的婦產科主管上月岯聯手要求政府限制內地孕婦來港產子，否則產科服務將受影響。 周一政府與私家醫院開會，會上政府希望每年分娩數字，與去年一樣保持於八萬八千宗。 私家醫院聯會僅承諾，短期不會擴充產科，但不同意限制產子數目於去年水平。 其實只要略為了解本港醫療制度，都會知道本港婦產床位並非不足夠，特別是私家醫院，但全港八間公立醫院卻只有一百張新生嬰兒深切治療床位，而且現時已長期超收，入住率經常介乎百分之一百一十至一百二十。 公立醫院指責的是，私家長期不投資改善產前檢查，結果內地孕婦急急來港產子，變成出現問題的機會也較大，結果錢是私家醫院賺了，但手尾就由公立醫院執，轉頭仲要被私家醫院高薪搶走醫生護士、唔㷫就假! 看看內地孕婦來港產子收費:平均7-15萬元。 以去年產子數目4萬人計，乘一乘乖乖不得了，生意額是28-60億元! 今次產子的問題突顯出稅收與福利的沖突，即使是幫襯私家醫院，亦很大機會會佔用到部分公立醫院資源，難道你叫香港好似內地醫院一樣「先收錢、後救人」? 施老闆提出，即使港人本地產子，都不能保證父母有交稅，所以沒有理由拒絕內地孕婦來港，特別是她們真的有助推動本港的醫療產業。 其實大概所有人(相信包括周局長)都認同，單以配額分配跟本就難以收效、一來行政費用高，二來亦容易催生枱底交易，社會共識應是以收費來分配本地私家醫院的配額。 問題係收費如何釐定? 又如何確保私營醫院不會像零售業般、因尋求高回報而歧視「本地客」? 其實這是一個”二為一”的問題，石Sir就提出，收費應以逾千萬元計，而且不由私家醫院袋落袋，錢應歸納稅人。 這不是說笑，當然到底是一千萬、五千萬抑或三百萬可以再傾，但高昂收費應是唯一準則。 雖然即使是本地父母亦難保有交稅，但大家記得，香港的高稅率來源是「高地價」，本地市民無論買樓租樓，都已經間接付出了地稅，如果是公屋居民，大概社會都會認同佢地係需要照顧一群。 既要知道在港分娩可以獲得香港居民身分，單計12年免費教育納稅人已需要付上近50萬元開支、仲未計日後有機會入讀大學，以及其他醫療福利開支。如果只是繼續容許私家醫院賺取...

又到左環球央行議息重要既一個星期，星期二有澳洲央行，星期四就有歐洲、英倫銀行，以及日本央行議息。 本來唯一想有加息機會只有歐洲央行。 勢估唔到最後由人民銀行跑出，周小川行長揀清明節來加息，係今年來第二次，今次真係「留番拜山先來講」! 值得留意又係存款利率加息幅度高於貸款，以5年期貸款為例，兩者息差相距一厘半左右，對內銀股真係相當不利! 各位大概都估到下周公布的通脹率會好大件事，預期會超越舊年十一月的高位5.1%。 不過現實係PMI反映，內地經濟真係有放慢跡象，如果果象陶冬所言，咁今次加息後，大概會係一段長時間觀察期。 至於歐洲方面，上個月罕有用「高度警惕」形容目前通脹，行長特里謝幾乎每次講親呢句都會加息。 由於預期三月通脹會升至百分之二點六，瑞信估未來一年特里謝仲會加息多一厘三，不過現實係歐元區債務危機未解決，愛爾蘭又過唔到銀行壓力測試，希臘財長亦警告加息會令經濟重整更痛苦，相信會限制年內加息幅度。 講到分歧、月底先議息既聯儲局，同歐洲央行可以話不惶多讓。 華爾街日報統計過、過去兩個星期，有十三個聯儲局既官員，發表過二十三次言論，當中、多個官員都發出鷹派言論，甚至認為年底就要加息。 不過華爾街日報認為，佢地分量都唔及一個紐約聯儲銀行行長杜德利。 被認為係同主席伯南克、副主席耶倫組成既三人核心小組，杜德利提出而家無理由收緊貨幣政策、因為聯儲局遠未達到、控制通脹同刺激就業既政策目標。 作為聯儲局鴿派最新代表人物杜德利上星期五，就業數據後個半鐘，隨即發出「鴿鳴」，背後已經引嚟唔少揣測！ 佢分預備講稿十點鐘派發，個別大傳媒仲早的攞到。即係話，有理由相信佢一早知道八點八呢個數字。問題係根據好嚴肅規定，經濟數據只有伯南克一人可以預先獲知，佢之下就算係總統都無權過問！ 杜德利掌管紐約聯邦儲備銀行，基本上就係影子主席。 杜德利不旦話經濟未完全復蘇，仲要重新搬出「核心通脹」呢個連老世都唔用嘅名詞。 通脹係人都知嚟緊，「杜鴿」為證明無通脹，公然向記者話，物價無上升壓力，仲指睇部iPad 2就知啦。新型號功能勝舊，但價錢一樣！ 作為傳媒，第一個反應可能係What The Hell…。於是有記者忍唔著問，阿SIR你幾耐無去雜貨舖買野? 杜鴿出身高盛，高盛依家首席經濟師哈祖斯正正係佢徒弟，無獨有偶係，多次出現重大事件前，好似舊年QE1臨完結後，師徒都裏應內合，一唱一和。 世事無絕對，偏偏師徒...

第一季過左，股市表現中規中舉。基本因素最差市場，升幅最大，代表的咩?! 進一步證明市場已經被扭曲。既然第一季大致有驚無險，第二季相反，變數重重。 要擔心嘅問題，十隻手指用唔曬。但市場係現實，現實亦告之，尋求回報逼切性，已經蓋過市場需要避險既理由。 今季，影響市場，甚至今年數年全球狀況最大因素，莫過於QE2後，到底資金回收，定係繼續循環再用，甚至加息? 最新失業數據跌至兩年新低、非農位職位增長又好過預期。鷹派企圖發功，話要終止再印，甚至要加息。問題係，呢個只可能係少數人想法。 以聯儲局架構，伯南克唔出聲，佢之外，最有影響力就係紐約聯邦儲備銀行行長杜德利。 杜德利最新發言在公布美國失業率後，果然有鴿派影子，只係警告市場唔好因為一個數字就過分樂觀， 佢同高盛最老死，因為佢高盛出身，高盛想點，大家都知，就係繼續印錢，近期佢地經濟師已經多次發功，警告話會調低美國增長預測。 無獨有偶，上年QE2之前，高盛亦做同一樣野，結果伯南克正中下懷，歷史似乎會重演‧ 正如黃師傅講，細路岩岩識行識走，做父母點會咁快放手呢!? 麥嘉華講過，QE3一定會有，但未必六月底後即刻有。換言之、QE2完左，未有新錢印發，區內股市係咪好似舊年咁，QE1一完就跌番一成半呢? 瑞信話，一定唔會。因為估值，資金，同基本因素，三大方向都係向有利一方走! 無錯，過多資金一日唔蒸發，市場唔會有大調整‧況且通脹兩隻字，觸動全城進行尋求回報行動! Sky Sir都表明，股市有跡象發力，仲要由大股價先接力，資金將如四叔般換股炒樓，當然我們一眾散戶希望貴言成真，可以搵多幾餐晏仔! 否則，人民幣而家得番四分一厘息，唔通真係坐喺度等升值咁無志氣咩!

今個星期對馬化騰來講，可以話係雙重打擊。 先有「賤價賣股」事件重現，令馬化騰個人誠信受挑戰! 不過更大打擊、係來自星期三，一間叫奇虎360既中國互聯網公司，到左紐約證券交易所掛牌，表現仲係今年最好既新股。 對於「仇家」有咁好既市場反應，馬化騰自然係「分外眼紅」，但亦令我地更有興趣了解，到底奇虎360係有咩背景? 奇虎360創立於06年，創辦人係曾任雅虎中國既「周鴻禕」，呢位人兄原來有好多稱號、包括「網絡流民」、瘋狗，但又有人叫佢「互聯網戰士」、「紅衣主教」，一聽呢啲名，就知係一個爭議性好大人物! 今次奇虎360集資一億七千萬美金，招股已經獲四十倍超額、首日掛牌升左一點三倍，亦係舊年十二月、優酷上市以來表現最好新股! 今次奇虎360上市，仲吸引唔少大名鼎鼎人士，包括傳聞索羅斯都有分入股。 「周鴻禕」因為持有18%股分，身家已經增加至6億美元， 睇睇奇虎360背景，佢地自稱係中國第三大互聯網公司﹐主要提供免費互聯網同移動安全軟件﹐而收入就自要來自遊戲或團購網站、賣比奇虎用戶既第三方互聯網產品拆帳。 奇虎舊年收入增長了左79%﹐達5,800萬美元﹐盈利就增加一倍﹐不過只係賺900萬美元。 以佢地坐擁全國用戶超過3.39億人計，其實盈利真係唔算多! 其賓奇虎最初成立時候，主營希望借鑒Web2.0帶來增長，但結果同大部分網站一樣係失敗! 不過後期佢地發明左一個封殺木馬程式既產品、就令奇虎相當成功，產品名稱就係叫360! 之後360擴展到防毒市場，仲以互聯網免費提供為賣點，打破左其他防毒軟件要每年賣license既商業模式，成為左最多喺個人電腦上使用既軟件之一。 熟悉周鴻禕既人話，喺佢身上可以睇到好多蘋果教主喬布斯既狂熱同偏執影子。 佢自己都講過，幾乎睇過所有喬布斯傳記，全中國亦無一個人比佢更熟悉蘋果歷史! 而同喬布斯一樣，周鴻禕具有凡既講故事能力，可以將復雜科技同商業模型用最平實語言解構，仲加上自創既幽默感，將沉悶既PRESENTATION講得極富感染力! 講番佢同馬化騰「過節」，舊年因為騰訊唔再為安裝左奇虎360軟件既電腦提供QQ服務，爆發出兩間企業既互相封鎖! 周鴻禕甚至不點名批評過馬化騰係抄襲成性既剽客，不過由於騰訊規模實在太大，佢發現唔能夠直接對抗，於是改為「低調再低調」，亦提出只有比騰訊更關注用戶體驗，先至有機會嬴! 要了解360既商業模式，核心概念就係「免費」!周...