財經拆局

新地一向在企管界獲獎無數，堪稱地產界最有透明度藍籌。 不過Sorry，一直都唔多覺新地的企業管治如何了得! 說馬後炮又好，新地在售樓方面的手法一向不敢恭維，特別是那些售樓部高層的臉孔，以及四年前處理兄弟之間糾紛的手法，你說有高透明度嗎？完全感受唔到！ 今日復牌急挫過１成半，係十四年嚟最大跌幅，市值單日蒸發超過３８０億。 ３８０億等於幾多？ 夾埋幾乎等同兩間思捷市值，亦多過新地今年全年既售樓目標總額。 即係一次調查、就賠上左集團整年既成果！ 更令投資者話對股分有戒心，有大行就話，關注新地企業管治問題，即時調低目標價。 評級機構亦算快出手，標準普爾同穆迪同時將新地評級展望列入負面，即係三個月內可能下調評級。 雖然事件已屆醜聞性質，不過新地仍然堅持，聯席主席郭炳江同郭炳聯，可以繼續執履行相關職責。 股壇長毛David Webb話，一旦律政司提出起訴，佢認為新地董事會就要作出檢討，包括可能重新邀請郭炳湘出任主席。 相反、中環人問得最多既問題係，唔係企管，而係現實好多！ 到底經過新地高層事件後，到底新地值幾錢，好唔好撈貨？ 巴克萊，同幾間大行不約不同話，事件後，新地股價一定要有較大折讓。 用一個簡單分析，不明朗因素已經構成折讓，管治問題再構成折讓。無疑，就算公司管治點差，只要資產不變，總會值錢。 但上述兩大折讓問號，似乎無人計到，幅度有幾大。 新地係大行，同基金愛股，大行過往幾年，俾買入及增持評級，遠比建議沽出多。無他，管理質素溢價，但依家打折扣。 單一管理層事件，令大行變臉，就算中信泰富上次，都未咁快發生。 好簡單，大戶要向客戶交待，星期四晚美股時段已經掛左一批沽盤，你係分析員，你點？ 高盛最直接，暫停評級，理由係計唔到數。 原因的確合理，但同樣發生喺新地身上，絕對係罕有事件。 成交榜首，股價大跌，明顯係機構大戶減磅。因為，好多基金有明文規定，唔可以持有管治有問題既公司，而新地發生既事件，正正觸發違反準則，需要沽貨。 債市無咁既規定，但新地一批十年債，一開市就跌穿一百，跌左足足四美金，股債齊跌情況，完全唔係一個過度反應。好簡單，都係果句，投資者要問，到底仲有咩問題。 亦會問，七名執董，一人過身，三人先後被查，仲有無下個? 講番之前問題，到底新地值幾多? 如果用資產值計，分析...

開市無耐，相繼停牌。中環人話，唔少大行地產分析員，當時相當混亂。 一，即時收到客戶查詢，做咩事？ 二，當然係要估計，發生咩事？ 但由於停牌組合較特別，加上事先毫無消息話會集資，或有企業行動。部份分析員心水清，開始懷疑咩事。 作為藍籌企業，原本七名執行董事，一個過身，三個出事。 有基金經理直指，呢十日，連續三名高層被廉署調查，對公司嚟講，算係危機。從三間公司不同時段停牌，並要澄清停牌時間，內部混亂可想而知。 以廉政公署目前拘捕郭炳江、郭炳聯兄弟，同前政務司司長許仕仁，懷疑有人違反防止賄賂條例、同公職人員行為失當，罪名絕對不輕。 消息指、許仕仁涉嫌透露政府機密資料，廉署嘅調查會睇吓係咪有人官商勾結。 難道CY 未上場，就要先打大老虎? 又唔好忘記，此事另一潛在主角，大哥郭炳江，不正是CY支持者?

今日喺「金魚缸」轉身望下批二、三線民企，業績公布後、簡直可以用「遍地屍骸」形容! 無他，業績見真章，妖鏡放大，尾巴盡現。業績差，無人怪，經濟舊年下半年唔好，要怪，係怪分析員過份樂觀，令你樂極忘形! 國美表現係點，真係無需多講。 業績差加埋第四季同店銷售竟然倒退，存貨額又累積至十六億人民幣，大行都話唔收貨，單日股價無左兩成，市值唔見左七十幾億! 人和商業，半年賺幾億，全年賺幾十億，靠既係重估收益，同期現金流大減，逾半年的應收帳急升100倍。 聯邦制藥，盈利跌九成。全年賺一億，但其實上半年盈利三億。 整多間，永暉焦煤舊年營業額創新高，全年賺多一成半，但其實每股盈利要跌兩成一。下半年表現更遠比上半年差，末期息要大減七成。 例子太多，難以盡錄，簡單講，有懷疑，就要信自己對眼，業績報表，睇多一兩頁，做多幾個比較，時間用多左，但可能令你避免不必要虧損。 勤力，未必有回報，但唔會被懲罰。 現金流減，存貨升，負債升，毛利下跌，應收帳大增，係民企甚至中資企業通病。 銀行呃唔到人，你信資旌資產無惡化，唔該對番佢地不良貸款比率分布詳情，高危行業，全部走樣。 市場之前對內地經濟太樂觀，造就左對盈利前景亦存在不必要憧憬，時間證明一切，玩復蘇概念，民企似乎未係時候。 單係一批存貨，如何清倉，已經問題極大。 更大問題係，唔少民企老總，之前傳周轉不靈，部份將股份押上。業績差，股價跌，連鎖影響，怕且，無人知會維持幾耐! 諷刺的是，今次死傷不止散戶，因為呢批股分唔少都係基金股，好似劉央持有既人和、富達歐洲股神又增持左霸王，對佢地來講，呢啲先係真正股災! 用「去妖股化」形容基金今次清洗行動，恐怕應無人反對。

富．事．通：美國第三大富豪-- 曲氏兄弟 (Koch's Brother)，荼黨幕後金主，提倡廢除聯儲局!!!他們還會是影響奧巴馬連任的重要因素?

地產股呢兩日表現，證明一樣野。就係義氣唔值錢，轉軚有萬金。 特首選舉結束後，新世界主席鄭家純突然轉軑為梁振英「站台」，呢兩日地產商中，就以新世界表現相當標青! 股價連升兩日，累積升近百分之九，接近返返去三月中跌浪開始前嘅水平。 兩日之間，市值增加48億幾。單計純官家族控股嘅四成二股權，就多左20億。 同期，跑贏支持唐營嘅地產股，論升幅，亦多長實好多! 特首選舉，市民最大得著，係睇到轉軚實錄真實版。地產股要升，好簡單係之前跌得多，但市場喜歡因應唔同情況，將唔同現象代入，再加以演釋，令所有事情都繪形繪聲。 無義氣都唔緊要，最怕有人扭曲事實。從來無話，新特首要推低樓價三成，但講到佢政綱內有關樓市同土地供應政策，其實利好私樓價格，又似乎有所偏離客觀。 上述論據，主要係話，既然新批土地集中公屋、居屋，咁即係私樓供地會少。 既然係咁，私人供應亦會少，樓價反而無大影響。 咦，聽落同當日好多人話，推居屋就不利樓價有咁大落差咩!!! 至於有關金融發展局構思，變相搞個金融版既貿發局，首先，無論從定位同角色上，不單同財經事務及庫務局、港交所，甚至投資推廣署有重疊，箇中細節亦有待釐清。 好遺憾，人總鐘意扮醒目仔，一個一貫支持市場自由發展既人，出口話金融發展局係好野，值得支持，就有令人噴飯之感! 市場發展，由政府牽頭，涉及既應否問題，從來係爭辯不休，唔會有結論。再者，多一個機構，就多幾把口，亦多左人有插旗意欲，有無諗過「混亂」呢兩個字。 無疑，依家係新時代開啟。正如狄更斯講，係最好同最壞，光明同黑暗之間。 大家睇唔通，社會率先進入表態期。金勞講得岩，識時務者為俊傑，義氣同原則，值幾錢斤?!

梁候任特首大局已成，有人不安，但日子總要過。 得票率少於六成，梁振英要修補既、唔止係建制派之間既撕裂，仲有係商界、特別係大地產商之間既利益沖突。 多個大地產商到最後一刻仍然支持對手，但亦有人最後一刻倒戈支持。 華爾街日報話，一旦處理唔好同大企業之間既緊張關係，會增加未來五年香港前景既不確定性。 施永青施老闆話，發展商要有心理準備，會有政策傾斜、大幅增加公營房屋供應。 施生相信，梁候任的調控會好似溫家寶一樣，絕不留手！ 樓價跌幾多，外界似乎過份將問題單一化，預左係咁，往往未必係，地產股同個別巨賈既表現引證到。 反而兆富今日提出兩大問題，值得關注。一，假如大吉利是，金融市場有震盪，班底上同應變能力上，可能比董伯伯十五前金融風暴更蝕底。 二，就係聯匯。 外界估緊，新一屆班子，換屆在即，呢個亦係指定遊戲。 誰是財爺？有人估林鄭，有人傳係近日擘炮的瑪嘉烈．梁。 但中環人認為，最佳結果係約翰．曾再坐一會。 正如大和所講，內外因素都令香港經濟下降風險大過上升，不明朗因素只會增加，穩著現有班子係無選擇中唯一選擇。 至於八三年到依家既七點八問題，傳媒之前的確問過候任特首，佢答得直接，就係咁敏感既事，佢唔會講。 簡單講，佢無力撐聯匯，亦無話會郁。 郁唔郁聯匯，一定唔會事先預告，但佢有咩動機郁呢？ 美林，同大和提出，梁振英係著重收入再分配模式，而事實梁振英之前民望高，變相係受惠於資產價格高企，貧富不均，如果同意聯匯係造就資產價格急升原因之一，佢又的確大有理由，思考七點八呢個問題。 當然，好多人都話，聯匯不會變，因為無更好替代品。 但繼續同美元掛勾，不代表唔可以改「七點八」，況且梁振英喜歡「微調」！ 中環人話，無論脫勾，或一次過升值，根本唔係最大問題，因為遲早其中一樣會發生。反而，聯匯箇中特性，有如一個秘方，梁營中人未必掌握到。 一旦有人知少少、扮代表下去搞，先係最大災難性。

明燈補習社-- 大藍燈籠高高掛! 941原來是最大藍燈籠?

政治事件，歷史證明往往到最後會係一個 Non event 。 但中環人今次明顯唔係咁諗。 話不明朗，甚至驚，有道理。因為政治學者話，今次其實係九七年以嚟，香港最大規模既一次大換班。 當年，改過區徵，換枝國旗，但今次，好多人疑問係，仲有無咁簡單 ?! 幾個月嚟，成個局變化之快，無人拆到，得個估字。 大行美林話，換特首無影響，因為聯匯不改，核心經濟環境唔會有變。 但，將來講既金融發展局角色係點？ 係咪會現行三層架構下，加多一層？ 財金班底咩人？又係要關注 !! 里昂夠老實，講得直接，就係一注獨沽地產股。原因有幾個，一，履行政綱承諾。二，往跡，三、跟緊中央，四，攞民意，為五年後鋪路。 的確，眾地產股一周累積跌幅明顯，由介乎百分之一，至大約百分之九不等。當中，恒隆跌最少，新地，信和，長實跌最多。 我地之前在 開市埋位曾經開出過一個 Pair Trade 提議，代號係 L101 ， S1 。 結果依家揭曉，二月中以嚟，長實累積跌超過百分之十，恒隆同期跌近半成。 近幾日，外國主流都開始連載有關香港既專題。 星期四一個標題，極之抵死。標題總結過去五年，話到「曾氏皇朝底下，香港成為左最污糟既金融中心」 ! 不要被標題嚇怕，細看內文，原來係批評香港空氣質素，同污染問題。 同樣， WSJ 一樣有一篇題為「香港特首選舉娛樂了誰？」的文章，大意是梁振英後來居上﹐預計他將在週日的選舉中獲勝﹐而儘管選舉醜聞像娛樂片一樣吸引眼球﹐但香港其實已經再沒有時間逃避現實。 Capital Economics 就列出一大埋耳熟能詳的挑戰 : 不斷放緩的出口﹑不斷擴大的收入不均以及容易發生泡沫的樓市。 而歷史提醒我們﹐樓市極容易受到政府更替的影響。 1997 年樓市崩漬就是在香港回歸的時候。 文章最終推測﹐梁振英將傾向一種帶有更濃重家長式作風的新加坡式管理方法，而結果可能是遭到市民本能反對。 更令 Capital Economics 關注，是新特首會否考慮調整聯匯 ? 畢竟﹐聯繫匯率制正是香港高樓價和輸入型通脹的根源所在﹐而兩者正是推動香港創下歷史最大收入差距的因素。 但有無諗過邊個邊個做特首，其實會最少短期都會利好股市？ 呢個...

財經通識-- 永贖債券與1720年南海泡沫事件

今期福布斯與誠哥齊名! 富．事．通：是日推介-- 女士白手興家，五千變十億! SPANX 的 Sara Blakely

當十年美債息率升穿兩厘三之後，華爾街開始覺得，伯南克唔係一條螢火蟲，而係放火龍。 債息升，市場由處之泰然，變為坐立不安，係短短幾日內發生既事。 問番好基本好簡單既問題，點解債息升，對股市有咩影響？ 原來，大家認為債息升係反映番美國經濟持續轉好，之前避險資金重新搵出路。但搞搞下，又轉為係擔心無QE，同埋驚債市泡沬爆煲嘅初期徵狀。 所以，豪賭QE一眾，開始話伯南克玩火。因為債息升，影響事關重大!! 新興市場教父Mobius 提出，債市拆倉早就預期之內，原因係通脹來了之際、坐收一、二厘息只係慢慢蝕入肉。 叫得教父，佢當然係唱好新興市場，理據都係離不開資金由債轉股，當中三分一都會投入到新興市場。 基本算術問題，十年美債近兩厘四，比標普五百指數一厘九左右派息率高，股市吸引力減。但之前債息就算低至一厘七，美股派息水平亦唔見吸引，所以債市對股市暫時影響不大。 買股票，係講盈利，以往債息四厘閒閒地，市咪又一切正常。市場俾人縱壞咗，債息跌又嘈、債息升又嘈。 結果，將伯南克神化，由弱小螢光蟲，被封為玩火龍。 都係果句，後市如何，還看數據，經濟好緊要，定放水緊要。市場太貪，經常想收盡齊人之福。 港股怎府辦？由此至終，香港無美股既盈利賣點。不明朗因素多左，容易製造利淡借口，況且第一季升咁多，趁踏入第二季前，鎖定利潤。

強力推介: 明燈補習社第三集-- 劉紹文親述如何避開宜進利、泰興光學等細價股陷阱!

英國樂隊「DIRE STRAITS」名作係MONEY FOR NOTHING。 蘋果變奏，係MONEY FOR TROUBLE。  蘋果公司行政總裁庫克喺今晚美股開市前半個鐘，就會主持電話會議，宣布點樣運用９７６億美元嘅手頭現金。 庫克喺上個月嘅股東大會上話過，龐大嘅手頭現金已經超出營運一間公司所需嘅資金，會深入考慮股東嘅訴求向股東派息或者回購公司股分。 蘋果真係一次過派息、回饋股東。咁會派幾多﹖ 計番蘋果嘅手頭現金之中，有三分之二，即係超過六百億美元，係存放喺美國以外地方，將資金調返美國，涉及繳稅。 換言之，即使派息都唔會涉及呢部分嘅資金。 分析員計過，派息率可能係股價百分之２至３，以上星期五收市價計，相當於每股派１１點７１至１７點５７美元。 不過亦有人計數、參考番微軟同ＩＢＭ等大型科技公司嘅派息水平，估計每股派息只係兩美元。 喺今年第一季度，蘋果嘅現金收入160億美元，預測今年全年蘋果嘅現金會產生大約750億美元。 華爾街日報話，一旦蘋果加入微軟、思科同甲骨文等持有大量現金嘅科技股、派息嘅行列，可能反映蘋果嘅高速增長期已經過去。 錢多，教主在生時係為蘋果迷，但庫克，明顯要為股東。 派錢，無人意外，每間公司要面對有錢人既煩惱。既然如此，蘋果一派，首先想到，自然係啲錢已完全無用。 現金多既公司，美國太多。大摩計過，科技股由高增長，變為低增長，唔緊要。只要派息及其他形式回報股東，股價表現比同類科技股跑贏一成四。 股價如果繼續跑贏，股東高興。但蘋果迷會唔會開心，要睇以後產品。如果單睇新iPad，首批轉手只係賺二，至四百蚊。庫克要好好檢討。

最後一刻沖刺，有史以來最大規模既債務重組計劃，令希臘避過一劫。 喺私人債權人換債期限屆滿後，政府表示，喺希臘法律下發行既１７７０億歐元債券，最終有１５２０億歐元嘅債券持有人願意接納削債，佔呢部分總數百分之八十五點八，政府啟動埋「集體行動條款」 CAC ，強制所有債權人要接受換債。 至於有近三百億歐元既債券，由於唔係喺希臘法律下發行，呢部分只有二百億歐元係同意換債。連同 CAC 第一部分、換言之一共有一千九百七十億歐元既債券會換債，佔國家債務２０６０億歐元中，總數既九成半，令希臘終於達到歐盟跡近嚴苛的貸款條件。 希臘財長維尼澤洛斯形容，今次「債務轉換計劃」係史無前例，將會帶領希臘進入新時代，為下一代人、減輕逾千億歐元債務負擔。 今次希臘私人債權人接受削債，係歐盟同國際貨幣基金組織、發放第二輪 1300 億歐元希臘救助貸款先決條件。 對於市場下一個焦點，視線轉移至負責監管ＣＤＳ合約嘅「國際掉期及衍生工具協會」ＩＳＤＡ。 根據ＩＳＤＡ條款，假如一個國家或者機構，無能力還債，拒絕或者係延遲還債等，都會被視為「信貸違約事件」。 雖然執筆時仍然未知ＩＳＤＡ最終會否將希臘換債計劃中，啟動集體行動條款係咪會觸發信貸違約事件，不過據估計即使要賠償希臘的ＣＤＳ，金額亦只是２３億美元。 說實在，這與比較起逾二萬億美現的ＣＤＳ市場，其實只是幾個賣ＣＤＳ的美資投行要賠錢，對大部分投資市場沒有甚麼大不了的影響。 相反、一旦ＩＳＤＡ決定不賠，將觸發整個ＣＤＳ市場拆倉，不單令持有ＣＤＳ投資者受損失，連帶因對沖而持有歐洲國債的大行，亦分分鐘要拋售手上國債，結果情況可能弄功反拙。 既然係咁、實在沒有不賠的理由吧？

個個為內地通脹數據而雀躍，但無為一連幾個更重要既經濟指標而憂心，反映係市場選擇性接收資訊，主觀性分析結果。 內地通脹回落，大家一早預見，但市場少提季節性因素，反而大打寬鬆牌，並且成為繼希臘之後，另一個用作解釋市況上升既理由。  要睇好，只有寬鬆借口。要審慎，工業生產，固定投資，同零售銷售有排你驚。但市場解釋數據差，就套用番季節性因素。 要推高股市，咁打矛波，勝之不武! 中央放棄保八，最新數據都反映，推動經濟嘅三頭馬車都放慢步伐。 工業生產一，二月份只有一成一增長，比舊年同期一成四低，更係兩年半最低水平。 李克強愛用既指標，發電量，頭兩個月只升百分之七，遠比舊年同期近一成二低。睇埋固定投資，都令人失望。 差唔係大數、而係嚟緊細分部份，特別係房產投資，以及銷售額都係唔好。其中銷售額增速，更大跌兩成。 羅奇，同羅傑斯話，中國不會硬著陸，係岩。因為稍有差池，國家可以話，本著科學客觀精神，將基建現代化，科學化。 國家今年目標只係保七點五，假設出口有好一段時間唔得，零售市道任重道遠。但一二月零售銷售增長一成半唔夠。內需之道難行，問題出喺邊？ 工資同人均收入仍然有增長，如果假設經濟未真正轉壞，經濟師話，其實係DISINFLATION，即係通脹降溫過重，根本不利消費市道。 投資心理係，股價升，搶著入市，消費心理亦一樣，不斷起價，反而會製造購買力。 相反，消費者建立價錢回落預期，就正正唔急於消費。 祖國要谷高消費，就會推高通脹，呢個未必係負責任講法。但外資大行，依家正係用緊呢招，每周一份報告，賭你繼續放水。 如果人行繼續無行動，斷估稍後內地任何一個經濟數據，都會被製造成為寬鬆政策加馬既理由。

經濟差、通脹又重臨。以為聯儲局難以出手啟動ＱＥ。 不過主席伯南克一樣有方法。 喉舌報WSJ話，雖然聯儲局大部分官員都相信兩輪量化寬鬆ＱＥ，唔會造成通脹威脅，但明白大眾同小部分官員會有呢種憂慮，所以構思緊一個改良版ＱＥ方案。 一方面一樣係啟動「印鈔機」，由聯儲局向市場買入長債或者按揭證券，用意係推低長期利率，令銀行同投資者願意借貸同增加投資。 不過同時為左更好控制流出既資金，聯儲局會調轉頭、向銀行同投資者借入短期貸款、例如係２８日既低息貸款，用意係控制番短期既流動性。 聯儲局內部認為，呢種類似「逆回購」操作。收緊番短期資金沖銷、有助減少一啲短炒活動，特別係避免炒高商品市場、變相刺激通脹。 ０９年以來首次先後兩輪ＱＥ，製造左一萬六千億美元既資金。 到舊年改用「買長債、沽短債」既ＯＴ２扭轉操作，注入四千億美元既新錢。 不過由於短債規模有限，市場預計再有ＯＴ２，規模都大唔過二千億美元。 相反，改良版ＱＥ並唔受到聯儲局既資產規模影響，同時亦可以配合貨幣基金一齊運作、唔需要再過分依賴銀行。 有人批評伯南克不懂理論，只懂鳥托邦，希望可以一邊印鈔、又唔需要付出成本。 更有機會推高短期利率、而同時釋放同收返流動性，亦會向市場發出矛盾嘅訊息。 其實局長何嘗唔知此法會自我反駁，其實伯南克都公開講過，要再救經濟，其實應用財政政策，奈何兩黨爭拗已非佢個人可以介入。 作為討論，其實問題可以倒轉: 如果沒有OT 2，今日的世界會否不一樣? 雖然美國的樓價指數Case Shiller近日再跌至０６年低位，不過在mortgage rate 屢創新低下，如兆富所言，個別地區已有反彈，甚至有業主反價情況。部分原因係Case Shiller指數大約滯後三個月，所以未反映最新情況。 先不說失業訊，單睇GDP，美國經濟比預期好，舊年第四季美國國內生產總值，由原來上升百分之２點８，向上修訂為百分之３，比預期高０點２個百分點。 以３個％計，作為發達國家，應該不算壞吧？ 覺得今次改良版ＱＥ高明之處，不是實際有無用，而係影響市場預期。 當各界一致話美國通脹重臨，令聯儲局難再出手之際，伯南克透過口舌報，拋過改良ＱＥ，就係令市場開始改變呢種預期。 到最後，好彩的話，經濟真係有起色，咁有無改良版，其實都不太重要

港交所延長交易時段新節目第一擊: 「富．事．通」首集登場，兆富傾力演出，首集介紹大蕭條仍可致富的美國隱影富豪FLOYD ODLUM!

東邊不亮西邊亮? 我們已不止一次說過，今年最大風險可能不在歐洲、而是新興市場。 結果、金磚四國神話逐個破滅。 繼中國放棄「保八」之後，巴西經濟亦明顯放慢，舊年全年增長百分之２點７，增長率係零三年以來第二低水平，亦遠差過前年嘅百分之７點５，跑輸比中國同印度。 雖然通脹由舊年中接近百分之十、回落到百分之６點５，但仍然係７年嚟最高，亦係Ｇ２０國之中最高既國家 巴西歸疚問題出喺「貨幣戰爭」，因為全球央行濫發貨幣，令熱錢湧入巴西， 令雷亞爾由０９年開始，累積升值左約四成，單係過去兩個幾月都有百分之６，嚴重削弱左佢地競爭力。 事實係單靠中國，無運行。 一個係巴西，一個係澳洲。堂堂資源大國，最終成也中國，敗也中國。 巴西經濟數據走樣太明顯，按季增長得百分之零點三四，簡單講差零點零一個百分點，雖然成功取代英國晉身全球第六大經濟體、但連續兩次經濟倒退，技術上係衰退。 巴西賴係熱錢流入，貨幣升值，新總統係經濟學家，佢其實無理由唔明，巴西其實罪有應得，因為當地財政政策過份擴張，同樣犯左新興市場通病。 有經濟師亦批評，巴西只係識得批評外國印鈔，但無正視本身既結構問題，競爭力正係逐步削弱。 同巴西一樣，澳洲亦衰在強勢貨幣手上。無疑，全年計澳洲經濟百分之二點三，發達國家之中，贏曬歐洲，英國，比美國增長亦高零點六個百分點。 但第四季經濟只及預期一半，誤差幅度亦係發達國中最高。 澳洲繁榮，經濟學人一度選佢地做全球天堂。但一切笑中有睙，澳洲人本土幾乎零消費，有錢存曬銀行，令儲蓄率有百分之九，樓價又貴。 中國令佢地繁榮，但代價其實亦不菲。 巴西同澳洲，近幾年出口中國，大量貿易盈餘，就算無熱錢，貨幣都係有升值壓力。當然，個個人擔心，內地經濟指標降溫，固定投資減慢，巴西澳洲前途有限。 但調番轉諗，兩個國家其實同中國一樣，靠出口帶動經濟，依家咪大不了一齊轉型靠內需!

一張邀請函，帶挈蘋果股價創過新高，市值更加突破５千億美元。 蘋果星期三就會推介新產品，到底係iPad 3定係iPad HD都未知，但往績就證明，對股價一定有支持。 蘋果０７年，推出第一代iPhone亦推高埋股價，一星期內急升近百分之７。 令市場期待新產品之餘，亦吼實蘋果股價。 由推介會、到正式上架期間，吸引買盤入市，股價平均升百分之４點５。新款嘅iPhone 同iPad 上架前一星期，蘋果股價都衝高近百分之３。 連獲利時機都有規律，所有蘋果產品，正式開售後一星期，股價就會回吐番百分之３點５。 蘋果投資者已經仿如粉絲一樣，對蘋果產品作出「條件反射」，而且由往跡看，幾乎例不虛發。 華爾街日報評論話，蘋果業務要保住增長速度，幾乎係無可能，但推介產品，刺激股價嘅定律，可能會無例外。 但長線黎睇，蘋果股分，可謂人見人愛。 調查顯示，４６５隻大型資本成長基金，超過８成半，都話有持有蘋果股分。 其中２７０隻，更加佔佢地組合超過半成，蘋果股價表現，變相成為呢啲基金回報嘅、主要動力來源。 有基金經理更笑言，佢想像唔到有行家可以不持一股蘋果公司股分。 其實都唔難理解，蘋果股分過去一年，升足５成６，跑贏大市七倍有多，又真係幾難抗拒！ 蘋果佔標普５百指數比重達到佔百分之４，所以，有基金經理直頭話，唔揸蘋果，就等如買個市跌。 不過由近幾日蘋果股價見過５４５元後頗有見頂回落趨勢，一旦投資者真係傾向避險、換轉頭以逆向思維、將蘋果股價作為大市先行指標，亦未嘗不值一試。

憧憬中央加大力度刺激經濟，進一步放水？總理有嘢講 ! 佢無話會、定唔會，但就八年嚟首次調低全年經濟增長目標。 唔再係八，而係七點五。慣左講保八，要改口，保七點五。唔好睇少半個百分點，因為呢半個百分點，區內股市跌近一個百分點，西方機構投資者愈諗愈唔對路。 零九年咁困難，舊年亦講到咁不明朗，中央繼續八字行先。百分之八代表中國增長勢頭，中央要保一定得，點解依家放棄，唔同人有唔同解釋。 無疑，每年增長目標，其實年年超標，目標定低的，驚喜大的，亦符合舊年定出未來五年百分之七增長目標。 重質、不重量，唔少經濟學家一直提出，依家肯做，係好消息，最少係願意正視現實，同時中央都明白、面子不能當飯吃，當前最重要是先安內。 另一邊，有人擔心係反映內地預示不妙，外圍係個借口，根本從來都無明朗過。 將出口增長目標由二十降至百分之十，確實得人驚。但要驚，應香港先驚。 百分之七點五目標一定，最直接訊息係管理市場預期，唔會有不切實際幻想。 了解中國政策既中環人話，總理報告帶出意思明顯不過，就係寧願增長低一點，亦不想物價高一點。貨幣政策維持穩健，一如預期，財政政策積極，但中國一向係靠赤字預算推動經濟。 今年呢？財赤預算八千億，比舊年少一千億，佔國內生產總值比重由百分之二，降至百分之一點五。 即係，積極財政政策，並非一如預期咁積極 ! 評論話，總理工作報告少不免令人失望。大篇幅講經濟，但新事項唔多，只係堅持要轉移，但點轉，點提高個人收入，金融市場發展點搞，著墨不多。但調轉諗，唔再充大頭，肯先苦就會後甜，未嘗不是好事。 唔好睇少工作報告，由於正式定調，不計教增長慢一點，令中國對資源需求未有預期咁多。 中國人喜歡好大喜功、當年阿爺出四萬、地方政府驚執輸出夠十八萬，結果引來今天後患無窮。 有大行形容，內地今年政策，大前題係「穩定」，放棄保八，其中一個信息，就係向地方政府發放指令，唔好刻意過份進取、追求增長，市場亦唔駛再憧憬、當局會大幅放寬貨幣政策。 結果人人掛著炒兩會，結果一開就中招。阿爺夾完淡倉，依家調轉夾好倉，此招高也 !

上任以嚟，第二次接受英國報章訪問，「九哥」歐智華講明，佢目標，係令匯豐重返九十年代光輝。 當然，匯豐股價對帳面值有三倍，歐智華話，做左行政總裁後，佢多次請教前主席浦偉士意見。 換言之，呢位在浦偉士年代只是擔任經理的小夥子，現在對浦大班當年的光輝歲月，羨慕之情是溢於言表! 被形容係工作狂，歐智華話，係想為匯豐盡快達到營運目標，因為股東鐘意。 長遠嚟講，佢唔會甘心匯豐係新興市場銀行。 香港最關心既總部問題，歐智華答得直接，話唔係倫敦，就係香港，新加坡一定唔係選擇之內，最終係點，十一月有決定。 到底係咪搬，佢笑而不答。但批評，英國銀行稅，加埋其他監管政策，令匯豐額外承受28億美金成本。 佢數口精，話用十倍市盈率計，相當於匯豐市值唔見280億美金，即係無左一成七。 仲話，一直會繼續同英國當局爭取。 歐智華又批評外界指責，投行喺金融海嘯前營運好似「賭場」嘅講法，話實際上係「賭場」補貼緊零售銀行業務，而且英國無一間銀行係因為「賭場」而失敗。 外界認為，匯豐盛衰在於收購HOUSEHOLD，歐智華承認，收購係錯，但就算未有呢宗收購之前，匯豐美國業務一直低沉， 佢話唔會放棄美國，仲首次提到，將來美國業務模式，會效法加拿大，日後，只會集中一個有少量分行，用純粹商業銀行模式經營。 唔少人話，歐智華進取，但佢重申，匯豐有本物既DNA，就係審慎，HOUSEHOLD既失敗，就係佢地無呢個DNA。

選擇性違約最終無得賠，全球總值２萬９千億美元嘅ＣＤＳ投資者，好難唔失望。 負責監管ＣＤＳ合約嘅「國際掉期及衍生工具協會」ＩＳＤＡ，獲得與會嘅１５個大型銀行、同基金代表一致通過，換債方案唔構成「信貸事件」，亦即係話，希臘ＣＤＳ無得賠。 要裁決嘅兩條問題，包括將還款俾歐洲央行嘅優先次序提高，同希臘與私人債權人之間嘅換債協議，決策委員會都話，無構成「重組信貸事件」。 不過委員會強調，希臘情況仍然有變。 隨住更多訊息曝光，唔排除日後再有新嘅仲裁，可能觸發違約賠償。 削債高達七成半、仲有「集體行動條款」強逼債權人換債，點解都唔算違約？ 協會無詳細交代，投資者亦無得上訴。 牽涉全球龐大利益，舉足輕重嘅呢十五票，原來十票都俾投資銀行壟斷。 除咗高盛、大摩等嘅美資行，原來巴克萊、德銀同法巴三間、淨沽出咗希臘嘅ＣＤＳ嘅歐資行，都一致認為唔算違約。 投咗票，就一毫子都唔駛賠，難怪市場質疑，有無牽涉利益衝突? 被批評欠缺透明度，協會行政總裁皮克爾反駁，話機制有方法制衡，避免利益衝突，同時獲得紐約聯儲銀行等嘅監管機構批准。 真係叫聲大哥，美聯儲經過雷曼Too Big To Fail，今日可以唔使比一毫子就可以穩著銀行，何樂不為? 但事件是否已經結束? 明顯不是! 未來九日是希臘債權銀行是否接納削債方案，一旦只有67- 95%債權人接納，仍然有機會被界定成信貸事件，ＣＤＳ仍有機會獲賠債。 至於希臘嘛．．．．唔，歐元集團主席容克話佢地有Plan B，且看如何!