文章

顯示從 10月, 2008 起發佈的文章

甲蟲 vs 保時捷

全球市值最大公司係邊一間? 埃克森美孚?抑或微軟? 係甲蟲車生產商福士,他的股價喺星期一、二兩日計埋急升過近四倍,市值曾經達到三千七百億美元,一度成為最大市值公司。 佢地今次可以成為全球市值最大公司,都係要靠保時捷呢個大股東。 福士點解可以成為最大市值公司,主要係星期日保時捷披露、佢地喺福士持股量由本來三成一,增加至四成三,而且仲另外有認股權,可以再增加多三成二股權,於是近日一直被沽空嘅對沖基金,就大舉補空倉,星期一急升左一點四倍後,到星期二一度再升多八成二,股價突過一千歐元一股,令公司市值成為全球第一。 其實保時捷同福士關係真係相當微妙,一九三一年福士汽車嘅設計師,就係保時捷創辦人擔任。 到左2005年時候,保時捷就以三十億歐元,買左兩成福士股分,成為最大股東。 不過單單係成為市值最大公司,都只係「一剎那光輝」,並唔代表永恆。 福士呢個紀錄即日都保持唔到,原因係股價好快又大幅回落。 今次保時捷突然披露佢地持有嘅認股期權,市場之前一直係毫不知情,佢地計埋晒持股量,已經係幾乎係指數基金以外、所有嘅流通股分,之前沽空左嘅對沖基金,於是今次就掉轉頭被挾淡倉,傳聞保時捷自己就賺左三百億歐元,可想而知對沖基金真係傷亡慘重! 好似係大摩咁、當日就傳聞佢地揸左福士大量SHORT POSITION,單日曾經急跌過兩成六,之後佢地同高盛、以及法興都要出聲明否認。 事後保時捷否認為佢地係有操控股價,不過好似經濟學人所講,今次事件最大輸家可能係德國嘅資本市場,因為而家條例係容許公司唔需要披露呢啲「隱藏式」嘅股權,似乎真係有檢討必要。 計我話,保時捷自己都未必有著數,你估仲有無對沖基金經理,會走去買架「911S」嚟揸!?

解窘

有兩件事唔知大家覺得有無關連? 1.美國又減息,不過又係唔關香港事! 2.富邦銀行發出盈利警告。 已經是第三次,香港銀行繼續不變應萬變,無跟美國減息,最優惠利率照舊。 通唔通呢? 金管局連番注資,市場流動資金多番,起碼拆息都回順咗,但銀行都係個句 : 無條件,連象徵式四分一厘也不願減。 全球發生金融海嘯以嚟,各地央行已經兩次聯手減息,單係美國聯儲局,減息幅度累計有一厘,雖然金管局最近已經多次注資,又調低貼現窗利率到1厘半歷史低位,但匯豐話,成效有限,即使外圍再減息,本港仍然無條件跟減。 銀行的論據是,存款利率已經係零點零一厘,如果減息銀行就要承擔虧損。如果要減息,就要同業拆息回落番到三月時水平! 其實由聯儲局舊年八月開始大幅減息以來,本港銀行都有跟足,但由三月開始以來嘅三次,銀行都以拆息同存款利率太低為理由, 無跟住減。 睇返三個月拆息,係喺九月中雷曼倒閉後,先明顯被抽高到四厘樓上,到近期拆息已經顯著回落,銀行本身肯定係有減息空間,而家唔跟減,肯定係為保住盈利。 其實任總今朝已經出定口術,話拆息回落已經提供減息空間,不過銀行就唔多「聽話」。 說來吊詭,呢個邏輯其實與雷曼苦主無異,而家有一間銀行執左,難道無人需要承擔苦果? 苦主就話要賠足本金,銀行就話要特成本回落先減息。 說回最初提出問題,富邦盈警其中一個理由是要為賠償雷曼債券做準備,換句話說,政府今次揼銀行心口,肯定是損害到銀行盈利,而銀行為了保障自己利益,就需要拒絕減息保障自身利益,最無奈肯定是一眾小市民。 值得留意是,連新加坡總理李顯龍都不點名提出: 「銀行如按規則行事,政府就不能因政治壓力,貪方便要求銀行做些事情,以便自行解窘。」 曾特首,這不是一語中的,說緊你嗎? /////////////////////////////////////////////////// 其實莫講話唔減息,銀行放款準則已經出現了一百八十度轉變,有銀行仲收緊埋按揭,部分仲將估價嚴格收緊,聽啲買家講,估價不足、降低按揭成數、 加按揭息呢啲手法,呢排都有出現,銀行好似預咗樓價會繼續跌。 好似恒生就要求客戶,要簽好咗臨時買賣合約、至肯傾按揭。 以往經濟好,買家唔會太擔心係咪有預先批核,因為銀行一般都估足價有餘,但而家市況一逆轉,銀行態度直接令買家卻步。 目前情況是收緊信貸令樓市再下滑,只會進一步拖低經濟,估計下一步,銀行連信用卡同其

教訓

喺環球股市一片回穩之中,兩個星期前先至大幅減息嘅冰島中央銀行,突然大幅加息六厘,令市場相當震驚! 雖然央行否認,不過分析認為主要係受到國際貨幣基金組織壓力,亦都再一次印證到九七金融風暴經濟經驗:就係接受援助國家,肯定要付上非常大代價。 冰島央行宣布,加息六厘,利率加到18厘。 冰島央行今個月十五號,先至減息三厘半,同時接管三間銀行,避免銀行倒閉引發經濟崩潰。 雖然銀行被被接管,不過信心危機已經是前所未有的嚴峻,貨幣克朗大幅眨值。 有分析指,冰島央行咁做,可能係應國際貨幣基金組織嘅要求,希望透過高息先穩定貨幣。較早前,國貨幣基金組織通過貸款21億美元、援助冰島、穩定經濟同金融市場。 有交易員就不大相信,單是加息就可以拯救經濟: 「如果貨幣每日眨值一成半,單靠增加六厘息口,你會否買克朗?」 冰島作為1976年以嚟、首個被IMF援助西方國家,今次被金融海嘯幾乎沒頂,加息係無可避免,國民肯定要為之前經濟泡沬付出代價。 不過要留意,係九七金融風暴以嚟,多國亞洲國家好似係南韓加息到三十厘,但都無助穩定金融市場,經濟復元最少要三至五年,今次冰島能否逃過宿命?

買五號

今日大跌市嘅一個主角,必定要數五號仔、滙豐相信好多fans 心都實埋! 股價由開市85蚊,插水式咁跌,最終以全日低位75蚊收市,跌左近一成半。在金魚缸邊愈看愈心寒! 隻匯豐連環比人恐慌性質低,兩日間,股價無咗三成,跌到零一年九月以嚟低位,市值單日蒸發千五億。 即係話,過去七月凡買過HSBC,都輸錢! 致命傷,係有不利謠言,傳要匯豐出售非核心資產套現,又傳要削減派息! 唔少香港人長揸佢,都係為咗貪佢穩陣、又年年派高息。 不過只是兩個交易日,滙豐一百、九十、同八十蚊,三個關口都失守,番番七年前個價。 見底未﹖ 似乎未必咁快。 一直喺專欄推介嘅東尼話,基金大舉拋售,匯豐可能未見底,現價雖然相當平,但佢都無打算撈底。 被恐慌拋售原因之一,係擔心匯豐嘅現金流不足。 市場傳出滙控,要出售旗下非核心嘅英國鐵路業務,套現20億英鎊,分析員擔心,消息係真嘅話,顯示匯控目前情況不利,特別係新興市場可能比想像中更差。 不過股東又唔駛太灰心,因為市場估計匯豐會大幅削減派息嘅講法,似乎機會唔大,以出年股息率升到去九點六厘計,足以抵消到盈利放慢,相信股價可以繼續跑贏同業。 //////////////////// 話口未完,另一間銀行又出事。 中期業績時,先講過話,債務抵押工具CDO,同結構投資工具SIV前景樂觀,甚至有機會回撥。 但由年中到而家,市況進一步轉差,東亞話,係出乎預期。 東亞已經全數出售持有嘅 CDO,下半年入帳虧損增加二十二億,連同上半年嘅減值,令全年損失達到三十五億。 目前就CDO投資,累計撇帳達到本金嘅七成半。 至於SIV數額,截至年中仍然有二千萬,累計減值有5億。 如果要比較兩間銀行,到底是成日開空頭支票好,還是腳踏實地、面對現實更叫人放心? 明日就掛牌,買番手五號。

鍾意開會的總統

圖片
早排咪八國集團開會嘅,各國領袖合照入面,印象最深刻係邊個? 應係法國總統薩爾科齊啦,人雖然係矮仔一知個,但對佢嘅自信心一啲都無問題,佢喺呢次金融危機投入程度,可說是眾元首之冠〝風頭仲頸過早兩個星期風雲人物白高敦。 金融危機變得咁嚴重之前,薩爾科齊一向都幾低調下,不過自從各國相繼出事,佢就用佢嘅外交手腕,拉攏各國合作減息同救市。 唔止咁,佢仲自已邀請自已去喬治布殊嘅大衛營,一齊坐高球車、希望美國大選後,可以主辦另一個G8峰會,傾下到底資本主義,自由市場出咗乜野問題,應唔應該有超級監管機構之類嘅議題。 經濟學人仲笑佢好似唔記得咗G8嘅輪任主席係日本,英國唔係歐盟國,照請白高敦出席歐盟會議,不過,唔係有佢咁破格嘅話,歐洲各國都可能仲喺度各家自掃門前雪咁話喎﹗ 連開頭反對合作的德國,最終都同意合作,減息之外仲聯手向銀行注資,可說是半個推動救市的人。 薩爾科齊提出,重訂「Bretton Woods」協議,重新檢討環球目前的匯率制度。 如果真係如佢所願,咁﹗政府權力就會大到無可控制嘅地步﹗ 佢仲打算成立主權財產基金,保護國家有戰略重要嘅公司,免受外國接管,初步會有大約一千億歐元,年底前運作。 睇來而家真係全球一齊走向馬克斯,金融機構國有化晒之後,全球化幣一統,大家坐埋一枱食大茶飯﹗ 的碓全球嘅金融體制運作同資金市場風險管理係要再重新研究,學薩爾科齊話:「We cannot continue to manage the economy of the 21st century with the instruments of the economy of the 20th century」 十一月的G8會議到底會產生什麼樣的結果? 答案真的令人期待。

恐懼指數

過去一個月全球的市值蒸發了十萬億美元市值。 全球48個發展及新興市場,都無可避免大崩潰。 俄羅斯股市今年以來急挫七成三,其他好像中國、印度、冰島、希臘的股市,跌幅都超過六成。 我們常說的「恐懼指數」VIX Index,即是The Chicago Board Options Exchange Volatility Index,過去一個星期就升了一成三,創下79點歷史新高。 環球市場動盪下,無論股市,匯市,同商品市場同時大幅下跌。 道指,同標普期貨罕有喺歐洲時段已跌停。單計十月分美股跌幅達到兩成半,是一九三八年以來最大單月跌幅。 油價曾經跌百分之6。匯市更加動盪,英鎊錄得37年嚟最大單日跌幅。美元兌日圓大跌,跌一度跌穿91美 仙。日圓兌美元進一步急升至十三年高位,兌歐元、澳元交差盤、都升到六、七年嚟最高。 利息交易拆倉,日圓急升之下,令區內股市跌勢加劇。印度股市尾市跌超過1成。環球股市再出現骨牌式下挫,多個指數重要支持位一一跌破。 憂慮經齊衰退,南韓股市急跌一成,一千點關口、用左十六年建立,唔夠一年就守唔住。成個星期指數跌兩成,跌幅歷嚟最大。而CDS更顯示南韓當地有可能步冰島後塵,變成破產收場。 恐慌已經主導了所有情緒,係人都知匯豐八十蚊抵買,問題係到底仲有無人有這個膽量尋底。強者如巴菲特及巴頓碧斯都告訴我們股市現在己是非常非常抵買,但在一個藍籌股與二、三線股幾乎都無分情況下,現在願意撈底的人,就非要有莫大的勇氣? 你有嗎?

拆彈

煲呔一日之內拆去兩個高危炸彈,反映我們的行政長官有很高的政治智慧:決不容許任何人影響自己前程,那怕是昨日的我! 曾蔭權宣布,建議把長者生果金一律加至一千元,並擱置引入資產審查,政府期望明年初開始實行。 曾蔭權指市民一面倒反對,感性的反應蓋過理性討論,決定擱置生果金爭拗,全力應付金融海嘯。 這次可以說是打破了特區政府的紀錄: 十日前方提出的施政報告,各界都未算有具體的反對聲音,已經要率先投降,到底是什麼令我們這個視民望如浮雲的政治人物,突然咁重視民意? 難道是毓民條「蕉」? 咪講笑! 有理由相信,來自民建聯及工聯會的猛烈批評,對煲呔來說幾乎判了死刑。他自己也要想像:「到底是誰授權了他們狠批我? 是否來自更北的大人?」膽戰心驚下,唯有早早「縮沙」收場。 老實說,我自己是支持將老人金可以在毫無條件下,可以取得一千元生果金。想想,幾個月前單是一個外傭稅,已經花費了我們四十多億稅款,而家增加老人生果金一半都無,就叫做擔心秏盡我們的儲備? 老人家辛辛苦苦在港貢獻了他們的大半生,無論是高級官員或商界人士、甚至低至勞動力階層,他們也是窮了畢生的時功及精力去建設香港,對我們整體社會有很大貢獻,連這點都要留難老人家,我認為是起碼的一點尊重也沒有,就像有長者所講:「咪當我地係地底泥!」 不過支持增加生果金,不等於我們贊成今次政府的讓步。 如果就像特首所講,目前是感性的情緒、蓋過了理智討論,我們不是更應以整體社會利益為依歸,去決定政府的資源分配? 而家由於民怨稍為上升(肯定未到沸點),就要放棄立場,這算什麼政府? 再說,在政策推出前,政府難道未有考慮金融海嘯的沖擊,到底是誰想出來的點子? 事先未有完全通盤考慮,就倉卒推出措施,除非是特首自己一日堅持己見,否則就應有人人頭落地。 更令人擔心是日後政府的管治威信,一個只有十日的施政政策迅速被打倒,市民心目中肯定有一個印象,就是日後任何政府也有調整空間,任何政府也有談判空間,試問日後的政策,又有誰會相信? 唔知特首自已再看到那個政府拍出來的施政報告廣告,心中會有什麼感受? /////////////////////////////////////////////// 除了生果金,曾特首同日亦犧牲了范鴻齡。 「中信泰富董事總經理范鴻齡主動要求暫時停止履行行政會議成員,及積金局主席的職務,獲行政長官接納,即時生效。 」 個人對范生的印象是頗佳,特別是

資本主義之死

法國總統薩爾科齊提出,重訂「Bretton Woods」協議。 八個集團已經議定召開全球峰會,冀改革全球金融制度,並且會邀請中國及印度加入。 薩爾科齊認為,資本主義必須要提出革新,否則整個制度將會崩潰。 佢認為,有需再簽訂類似1944年簽訂的 Bretton Woods agreement,重新檢討環球目前的匯率制度是否要作出改革。 眾所周知的是,Bretton Woods agreement確立了世界銀行及IMF,但原來協議亦曾提出由美元與黄金掛钩,再由成員國货幣和美元掛钩,實行可調整的固定匯率制度,形成一個統一貨幣雛型。 當然,到了1971年美國取消了金本位制度,美元隨之大幅眨值,各國紛紛爭相與美元脫勾,Bretton Woods agreement早已名存實亡。 今天,各國元首再次探討全球貨幣掛勾的制度,其實有點令人心寒。成立預警系統不是問題,要求加強監管對沖基金肯定大有市場,不過對於Sarkozy說:「We want another monetary system」,就真的令人懷疑政府權力已經大到無可控制的地步。 Sarkozy亦提出,「自我監管」嘅年代已經結束。 歐美市場經歷左歷嚟最大規模嘅救市行動,由三十年前私有化發源地英國開始,將三大商業銀行國有化,到保爾森改變七千億美元救市方案、由買銀行壞帳到變成直接入股九大銀行,各國央行聯手動用左三萬億美元救市。 經濟學人提出,今次救市係咪代表自由市場已死、資本主義需要改變遊戲規則? 唔少評論都認為,今次金融海嘯起因,係對金融同銀行業係過於寬鬆同缺乏監管,最終做成今日局面。 經濟學人承認、未來遊戲規則會作出改變,但政府必須小心平衡,一方面唔能夠用公帑補貼銀行股東同管理層,但又要小心處理唔可以過於干預銀行商業運作。 更重要係、今次干預會唔會做成一啲發展中經濟體系,好似係中國同印度,對開放市場有更大戒心,以至影響未來十年嘅經濟發展。

紅色風暴

中信泰富巨額外滙虧損事件公布以嚟,外界對公司管治、同處理手法,不斷出現質疑。 先有股壇長毛,跟著又有各政黨出來拈油水,但最慘係公司股東、眼白白睇住投資急速蒸發,但都無辦法知道、 係咪有搵人頂罪? 等左兩日、股東終於都等到監管機構出手,證監會正式介入調查,港交所亦話會跟進。 據了解,調查重點,涉及事件中嘅披露,同有無誤導。 到底今次監管機構高調站出來,但又會否重演當年話查電盈、結果又不了了之? 今個星期一正式公布,但中信泰富內部9月7日已經知道外匯衍生工具買賣巨額虧損事件,呢個日期成為調查關鍵。 既然9月7日知道成件事,但翻查資料,中信泰富喺知道事件後六日,即係9月16日,就一項收購向股東發出嘅具法律效力函件中提到,目前無導致公司重大虧損事項。 據了解,呢分函件對中信泰富不利,證監會有權要求中信泰富管理層更交更多資料,因為可能構成違反港交所上市規則嘅要求。 更多手尾係中信泰富主席榮智健本人,近期處理股分增持,同認股權一事上,亦被質疑。 增持中信泰富股分,主席榮智健由六月開始,一直有做。 直到九月頭,一共增持4次,涉及大約303萬元。 最後一次係九月五號,啱啱係榮智健話董事會知道有巨額外匯虧損嘅前兩日。 當然作為大股東,可以辯稱自己「缺水」,難以科水增持。 不過作為大股東,自己因為得悉消息而暫停增持,反而小股東見大股東屢次出手、諗著搭順風車就死,公司有壞消息就不公布,這又是否欠股東一個交代。 另外,零五年九月,榮智健獲得涉及一億股中信泰富認股權,但長毛翻查港交所權益披露紀錄,喺今年七月中,榮智健長倉減少左一億股,估計呢批認股權取消左。 點解有過億元「肥肉」睇住都放手,合理解釋是有更高層次的人出口,要求榮生都「做番口的野」,當做」誠意金」。 ////////////////////////////// 奇想一 榮生走去找阿爺,要求人民銀行以過萬億美元的外匯儲備中,將美元全數轉換為澳元資產,結果單日推高澳元由65美仙升穿一算,包括匯豐花旗銀行只有低聲下氣要求中信取消合約,阿爺賺了匯水之餘,仲一腳伸走榮智健,取得中信泰富全數股權。 ////////////////////////////// 奇想二 特區政府睇中中信泰富「趁佢病,攞佢命」。 有分析估計、以東隧每年賺五億﹐仲有八年專營權計,三十五至五十億政府可以回購中信泰富股權。 至於西隧、每年賺兩至三億,仲有十五年專營權,二

替死鬼

圖片
「迷底」經已解開! 因為買左外匯ACCUMULATOR、而錄得百幾億虧損嘅中信泰富股價重挫五成半,回落至十七年前嘅低位。 剩底嘅市值、仲少過琴日公布嘅帳面虧損百五億。 咁大宗嘅失誤,外界嘅反應就係﹕充滿問號。 到長毛David Webb查出,原來榮智健個女「榮明方」,亦都係擔任財務部董事,事件先可以說是「豁然開朗」,亦變得非常合理。 兩個五十多歲的CFO,有咩理由唔知呢類KILL仔高風險?要對沖都大把選擇,唯一解釋,就是有人做錯事,需要找人「祭旗」。 范先生說:「張立憲是高級過榮明方,點會做替死鬼,替死鬼係低級代替高級。」 有絕對理由相信,范先生是講緊反話! 三十六歲嘅榮明方,係主席榮智健嘅二女。 根據年報,佢係中信泰富財務部董事,范鴻齡證實,佢都受到處分,包括不再適合留在財務部,要減薪降職。 范先生不是已經告訴大家,榮明方係有分參與、否則邊個夠敢罰太子女? 至於范鴻齡自已角色,佢話公司嘅財務決策層,係直接向主席榮智健匯報,職責上唔係自己嘅管轄範圍。 一間大藍籌公司的CEO,居然無分參與財務決策,范先生,不如早點離開!? /////////////////////////////////////////////////// 大錯已經鑄成,咁到底中信泰富炒燶咗嘅外匯ACCUMULATOR,最終要蝕幾多錢? 單係計最大比例嘅澳元,要接嘅貨就達到94億澳元,高盛話若果澳元進一步下跌,每跌一美仙中信嘅損失就多九千四百萬美元。 如果喺最壞情況,花旗計過數,若然澳元最終落至五十美仙水平,總虧損會高達二百六十億港元,大過公司現時只得返142億嘅市值。 仲有一個兩難。 管理層雖然同我地講,想快啲一次過解決事件,但若果佢地真係咁做,就係一次過買斷晒幾年嘅澳幣,亦即係話,即使澳元升返都無仇報。

「毒匯」

有行家說雷曼迷債是「毒債」,其實講毒,又有咩產品毒得過I Kill U Later? 今次不同的是,中招的是一間市值三百多億的上市公司。 有理由相信,今次出事那位FD,並非是要貪錢/貪污,要不然合約只賺得最多七百萬美元,要貪也不至那麼小數。 當然,不可以抹殺是有高層希望搏表現,於是以對沖為名,實際就是希望賭大細,認為自己贏面是十比九。 可惜,現實往往是贏面十比一也沒有。 以澳元為例,平均購入價是87美仙,不過過去個多月,已經出現暴挫式下跌,一度跌穿過65美仙。 短短兩個月,帳面跌左兩成半。 如果單單是槓桿合約還好,錢蝕極也只是少數,但中信泰富買的卻是外匯式I Kill U Later,Upside有限(通常5%內),Downside卻是無限的「有毒」產品,而且仲要去到2010年7月。即使而家公司發現有問題,要中止合約也要賠足二十多個月錢先可以找數,結果帳面數要蝕147億。 成間公司一半市值! 以對沖為名,居然去買kill 仔,真的不能相信是一個CFO所為。(真的似賭仔過大海多一些!) 如今事件可以點收科? 相信公司總不能上街說自己什麼也不懂,是被銀行騙錢。唯一可行是同銀行講數,睇睇有無機會五折收數。 唔知邊間銀行咁堅? 總之不會是雷曼吧?

鬼拍後尾枕

圖片
金融市場開始回穩,不如花點時間講下金管局角色。 看看金管局的政策目標為: • 在聯繫匯率制度的架構內,透過外匯基金的穩健管理、貨幣政策操作和其他適當措施,維持貨幣穩定; • 透過規管銀行業務和接受存款業務,以及監管認可機構,促進銀行體系的安全和穩定;及 • 促進金融體系,尤其是支付和結算安排的效率、健全性與發展。 ///////////////////////////////////// 不知大家有無印象,在零三年六月底,當時的財爺阿松與任志剛之間,以書信往來「高手過招」。這次互換函件令我首度對金管局的法定地位起了興趣。 金管局雖然說是香港的中央銀行,不過其法定地位,並非如1913年的聯儲局的Federal Reserve Act般、由一條法例賦予聯儲局獨立的法定地位,央行總裁基本上是獨立於行政機關。相反,金管局是依賴「外匯基金條例」而存在。 這要倒數至1993年,當時聯繫匯率已經執行了近十年,為了加強金融管理專員的角色,在當時財政司翟克誠催促下,將當時的外匯基金管理局、與銀行監理專員合併,成立了金管局。 要留意,當時面對政治敏感情況下,根本難以催生一個獨立的中央銀行,於是政府透過外匯基金條例、由財政司司長委任金融監理專員(即金管局總裁),再將財政司司長的部分職權及職責,轉分予金管局。 因此,由第一天起,金管局就是依附財政司司長而生,根本沒有獨立性可言。 要說央行總裁獨立性的重要,最值得人津津樂道,當然是當年老布殊因應競選需要,要求格林斯潘減息,結果格老反而一再加息壓制通脹。連老布殊自己都埋怨: 「我任命其為聯準會主席,他卻讓我落選。」就可見央行獨立性的重要。 其實由一年前政府放風要任志剛退休開始,這場鬥爭早就開始,上星期到特首自己口中突然說到「任總也會老,也要有接班的人」的講法,就是這場政治鬥爭的高潮。正如 王永平 所說,老曾應是「鬼拍後尾枕」。 任志剛在二千年曾經說過: 「歷史上便出現過不少政府藉「印銀紙」或減息來降低借貸成本,以圖贏得選舉或爭取人民對某些事項的支持,結果導致民不聊生,甚至政府本身亦落得垮台的下場…………因此,國際間至今已有共識,認為應該設立適當機制,確保貨幣管理獨立運作,不受政治干預。」 今次,不能不說任志剛是「先知先覺」了。

剃頭

政府,金管局,同銀行公會喺特首提出嘅限期前,終於由銀行就範,解決了回購迷你債券問題。 較早前市場計過除左一批以雷曼票據做主要抵押品嘅債券價值跌至零之外,其餘多個系列資產仲有價值,相當益本金5,至6成左右。 銀行公會已經委任安永,評估眾多迷你債券嘅抵押品剩餘價值。銀行收到估值後會正式向投資者,提出回購價。 我們問過一些銀行,他們話,由於估值一定有差異, 按一般做法, 銀行會以比市價折讓價錢回購, 折讓幅度通常係兩成, 但債券到期後,債券升值,投資者一樣收番差價,唔會有影響. 今次事件明顯變成了政治事件,銀行擺明要蝕比這些投資者, 以今天的信貸市場表現,抵押品只有跌價的分兒,就算他日咁好彩有得升番,銀行也是要賠番比投資者。市場對這種政治壓力是相當審慎,周五看看中銀香港、大新及渣打的股價就知。一旦立法會大會真的通過埋引用權力特權法案、成立調查委員會,到時銀行就需要使用更多資源應付官司,銀行不諱言可能到時會反口。 我地無意包庇銀行,如果證實銀行有不良手法,我們十分贊成投資者透過政府協助、民事訴訟銀行追討損失。而事實上,有銀行亦自知理虧,寧願賠足,就知道這是一條出路。 而家事件被曾蔭權一手政治化,到底香港的法治及商界會有什麼變化? 我擔心的正是這點。 ///////////////////////////// 咁到底投資者有無機會取回賠償? 證監會已經即時處理24宗由金管局轉介個案, 佢地會採用由上而下方式盡快處理。 所謂由上而下的方式,即係證監會唔會逐個個案慢慢睇,而係直接調查分銷銀行銷售程序有無缺失,如果係有就研究係咪構成失當行為。過去證監亦曾經用類似手法,好似98年正達事件, 由於首批轉介個案只係涉及兩間銀行,即係只需要直接調查兩間銀行銷售問題,就會有定案。 業界話調查結果,會係嚟緊轉介個案嘅參考指標 證監會話一旦確認需要處分,罰則會包括暫時撤銷或撤銷註冊、譴責、罰款或禁制令。亦唔排除銀行肯賠償,會進行和解。 銀行最大機會係以和解方式解決, 最近期一宗係基金公司羅德利,以和解形式, 就04,同06年不當銷售同證監和解,向客戶賠債。

備戰衰退

圖片
勢估唔到結業潮比我們出故仔的速度還要快! 周一先同新聞台一齊想部署出一系列應戰衰退的新聞,不過一星期內已先後有多間公司結業。 連老字號泰林電器都敵不過呢場海嘯。 泰林喺1946年成立,係香港其中一間最早期嘅電器店。 當時電視未普及,聽收音機就係市民一大娛樂,泰林初期,就以修理及買賣收音機為主要業務。 之後佢地亦開始售賣錄音機,唱機同擴音機等產品,根據泰林網頁介紹,佢地喺1957年,首度引入身歷聲音響器材到香港。 之後亦開始,售賣其他家庭電器。 近年,公司開始為形象改革,設計新嘅門市裝修,又推出多個新廣告。 不過效果只可以說是強差人意。 喺零六年八月,政府計劃開徵銷售稅,當時泰林唔做生意半日,號召三分之二員工近二百人遊行,主席林作禮遊行時話,開徵銷售稅會令佢地少兩三成生意。 銷售稅最後冇推行,但最終泰林都係敵唔過市道轉差,宣佈結業。 其實有行街睇鋪都知,泰林近年的銷售手法未能與時並進,近年銷售量最高的電子消費品/ 手機佔樓面比重遠比對手低,傳聞公司內部亦以家族式管理,令經營日趨困難。 ///////////////////////////////////////// 除了泰林,一日內合俊同金至尊都先後清盤。 高負債比率、短期債務重,都係令上市僅僅兩年嘅合俊倒閉原因。 環球經濟衰退、加上銀行收緊信貸,倒閉潮已經是一觸即發。 加上公司底子弱,有分析員認為,行業最壞嘅情況仲未過去,唔排除黎緊會有更多嘅公司倒閉。 摩根大通就著本港上市、市值介乎一億至三十億美元公司進行調查,發現負債比率高過三成半、而短債超過兩成嘅高危公司有二十四間,其中金至尊同德發都已經出事。 佢地特別睇淡一啲出口股、舊年進行過重大收購、或者好似佑威同宜進利呢類債台高築嘅公司,摩通話要特別審慎。 貿發局都認同,本港出口市場有萎縮嘅跡象,預計會有更多港商會受影響。 佢地話聖誕旺季,除左有訂單減少外,仲有cut單嘅情況。

親密戰友

估唔到任總一日之間,就變成阿伯。 「任伯」...... 琴日特首最好睇部分,除了毓民拋蕉,就要數老曾在記招上怒駡銀行「拖數」(其實佢真係有鋪駡銀行癮,記唔記得銀行家打高爾夫球事件?),以及話,特區金融斑子個個年記大,個個開始約滿. 「任總先生佢都過左六十,任總先生做左好多野...不過佢年紀大啦」 最衰係仲要係講埋陳德霖個名出嚟....... 我真係孫柏文咁講,由陳德霖做,唔單止恆指要跌,銀行之間更家會不互信,到時拆息唔知要升到幾高先夠? 老曾真係好涼薄,仲夠膽說什麼親密戰友,想嘔..... /////////////////////////////// 其實成分施政報告最大message,係話受金融海嘯影響,經濟會進一步放緩,警告定今次嘅危機,破壞力遠超過十年前嘅金融風暴,因此有需要重新檢討政府角色,喺關鍵時刻,可以強而有力介入。 關鍵係「介入」! 因此政府喺銀行、證券、基金、以致保險同強積金都可以順理成章被要求加強監管。 特首話,拖得太耐, 銀行今個星期內一定要回覆。 曾蔭權話,金管局一直調查緊雷曼迷你債劵嘅投訴,一旦確認銀行銷售有問題,必須立即同客戶展開商討,而金管局會成立獨委員會跟進。 有銷售銀行話,銀行根本無拖慢處理問題。 由於雷曼迷你債券系列眾多,估值無可能今個星期內做到,銀行無估值,亦根本唔可以向客戶提出贖回價。 有銀行更指,特首提出咁嘅要求,令業界好難做,希望當局了解,整個估值工作繁複,同要時間,銷售最多雷曼迷你債券嘅中銀香話,唔能夠確定係咪可以喺呢個星期內決定。

鴻門宴

破天荒用2千5百億美金入股銀行。 背後由策劃,到拍板,只係用左3日。 美國傳媒報道,保爾森,同有關部門星期六開始深入研究入股銀行問題,到星期日正式拍板。 之後財政部官員親自打電話俾九間金融機構高層,華盛頓時間星期一下晝3點,到財政部辦公室開會。 金融機構管理層當時完全唔會咩事。 九間金融機構高層中,大摩JOHN MACK「麥克」親自收到保爾森電話,保爾森向對方講:「你盡快嚟,我有事同各位講」,仲話,「你知道後,一定會好高興!」 摩根士丹利上星期股價急挫,違約掉期合約溢價升至過千點子。 講番會議情況,保爾森先發言,佢話市場對金融機構無信心,又對著九間機構高層話,「相信依家無人夠膽用眼望著我講,自已公司有好多資金!」 之後輪到伯南克發言,佢話,依家美國面對嘅惡劣情況比大衰退時更嚴重,需要集體行動配合! 整個會議室即時「靜曬」...... 無耐,財政部官員逐一派發一分協議,要求佢地出售股權俾美國財府。 有與銀行話,當時情況係無得揀,一定要簽。 大有設下鴻門宴、請君入甕感覺! 三個半鐘後,即係星期一,華盛頓時間下晝六點半鐘,九大金融機構高層,遂一簽署承諾,俾政府入股。 3個半鐘頭會議,據稱只有富國銀行行政總裁最高調反對,佢喺會上,多次問點解政府要咁做WHY?

做大事

二十五年前十月十五日,香港設立聯繫匯率。 二零零八年十月十四日,政府首次動用外匯基金,由而家到二零一零年底、為本港存款,提供百分百擔保。另外亦設定特別資金,有需要時,會向金融機注資。 即日起到2010年底,本港存款會獲外匯基金全數擔保。 目前本港加埋有5.6萬幾億存款,比外匯基金入面嘅1萬4千幾億外匯資產多好多。 即係話如果火燒連環船,間間銀行都出事,外匯基金根本唔夠賠。 但金管局話,本港銀行資本充足比率比國際水平高,唔擔心有銀行出事,外匯基金可以不用動一分一毫。 催促金管局出招,可能是自從九月底起,歐美,以至區內多個地區都暫時比存戶提供百分百存款擔保,最先提出係愛爾蘭,之後冰島、同區內嘅澳洲,新西蘭,以至台灣近期亦宣布同樣造法。 政府消息形容,如果本港唔出手,資金肯定會流向有存保全保的國家,因此一做就不如做得最徹底。這個邏輯,相信不少干預派都是以此陣陣有辭。 在我看來,反而覺得任總是有意將焦點由「迷債」轉移,看他的一舉一動,不正是告訴我們: 我管的是大事,是關乎香港數萬億元存款及外匯基金,區區那二百億元同數萬人的要求,留給他人處理吧。 ////////////////////////////////// 除了全保,為左確保銀行必要時有足夠資金,政府會設立「備用銀行資本安排」,一旦銀行有資金需要,只要向提出,喺審批後,外匯基金會向呢的金融機構提供緊急資金。 金管局講明,提出資需要嘅銀行要附合令帶條件,當局唔肯銀行係咪要交出部分股權作為交換。 使唔使玩到咁大?

錢從何來?

圖片
救市銀彈攻勢,暫時穩定市場。 不過秏費驚人。 英美兩國加埋超過萬三億美元。 德國、法國、西班牙都要承擔萬三億美元。 夾夾埋埋救市規模已超過三萬億美元,破晒歷嚟最大規模。 你會問,錢從何來? 當然,唔使呢代人比,係你下一代、甚至係子孫嘅子孫..... 就好像二世祖,以為自大把錢花,結果未老已經過唔到世。 目前美國國債已超過十萬億美元,加埋將會推出嘅救市方案,勢將突破十一萬億大關。 那個國債鐘已經顯示,每個美國人要背起三萬三美元,即係成廿五萬港紙債務,足足佔國內生產總值超過七成。 債台高築,美國可以做嘅係印銀紙、以及發國債。 現時超過七成嘅國債係國際持有,日本同中國係最大債權人,一旦美國資不抵債,持有國庫券嘅國家肯定會蒙受損失。(甚至開戰都有分!) 保住美國,亦即係保住自己,美國嘅問題,最終中國唔洗幫手埋單? 美國財政部,較早前表示會為救市方案發債集資,有傳中國會認為當中最多二千億,人行唔評論事件。

救市英雄

連續經歷兩個黑色星期一,十月十三日就成為改變英國銀行業發展極重要一日,英國府一次用最多370億英鎊,國有化多間商業銀行。 首相白高敦話,一定唔會白費納稅人金錢,而獲注資銀行嘅股東亦有代價。 4間銀行,包括蘇格蘭皇家銀行,HBOS,萊斯,同巴克萊,均會啟動發售股分集資程序,除巴克萊外,唔夠數嘅話,政府全數包底認購。 尋求2百億資金嘅皇格蘭皇家銀行,總裁以至一眾高層均要下台,6成股權會由政府持有。 HBOS亦被政府揸5成8股權,將來同萊斯合併後,政府持有合併後銀行4成3股權,亦係最大股東。 當局話,3年內,3間銀行需要向按揭貸款人,提供有競爭力嘅貸款條件,銀行管理層今年內,唔好期望獲分現金花紅,而完成注資後,銀行資本充足比率會超過百分之9,超過國際水平。 不論歐元區十五國、還是亞洲各國,最終達成達成一個較有組織嘅救市方案,要多謝嘅,係原本冇被邀請出席呢次首腦會議英國首相白高敦。 金融海嘯捲起,英國唔係最先、掟出救市方案,亦冇緊跟美國步伐,去主力收購不良資產。 白高敦比其他國家,更睇通問題核心,就係救市,就要先保住銀行體系,為銀行信貸做擔保。 白高敦指出大方向,大膽提出用公帑,直接注資國內出問題嘅銀行同金融機構,而且計劃周詳。 建議一出,原本各自為政、見步行步嘅歐洲國家,都認為可行,紛紛以白高敦主張做藍本,調整救市方案,美國最終亦要修訂亦加入類似做法。 被形容「扭轉乾坤」,是來自白高敦做過十年財相嘅歷練,喺呢場金融危機中,高下立見,贏盡讚賞。 救到經濟、亦暫時保住自己仕途,佢出任首相後,工黨民望冇起色,造就在野保守黨支持度。 工黨內部甚至預測,白高敦今年內會交出首相寶座。 鋒迴路轉,白高敦真係幫到全球避過另一場大蕭條嘅話,佢嘅位置相信到最遲2010年、下屆大選前都唔會動搖。 抵佢牙擦! /////////////////////////////////////////////////////////////////////////////////////////// 相反,保爾森輸左,係輸俾白高敦、甚至戴理德。 早喺保爾森公布用巨額資金救市後,就兩度撰文批評計劃嘅索羅斯話,保爾森一開始就錯得「離譜」。 紐約時報亦批評保爾森,話佢由最初唔接納伯南克直接注資銀行建議,又喺國會堅持。幾星期後終於轉軚,令人質疑財政部今次救市方案太唔周詳,當局評估能力。 英國金融時報亦加入戰團,話

經濟學界的莫扎特

事前不少盤口估計,今屆諾獎得主會由Macroeconomist奪得,包括研究資產價格理論的Eugene Fama或Kenneth French,以研究國債及Information Asymmetry、來自哈佛的Robert Barro均是熱明人選。 最終揭開的得主,居然由普林斯頓大學教授「克魯明」Paul Krugman奪得,表揚佢研究全球貿易模式嘅成就。 翻看林行止的「原富精神」,當年林行止已「貼」克魯明有機會以38歲之齡奪諾獎,是年為1991年。 原來已經遲了17年。 諾貝爾委員會話,「克魯明」喺研究貿易模式上有貢獻。 克魯明屬於高調嘅經濟學者,經常發表言論,定期喺紐約時報撰文。對於美國次按問題,佢公開預測過美國樓價最少要跌兩成半,部分重災區要跌夠五成。 佢最新一篇文章就係比較英國,同美國救市方案。佢話,由英國首相白高敦為首嘅直接入股金融機構救市方案最有助解決問題,克魯明喺文章話,白高敦最少顯示出,願意清楚思考問題。 佢話,唔敢講白高敦拯救左世界,但就成功為國有化辯護,話經濟處於危機時間,唔少經濟學家都讚成咁做。 克魯明又評論過兩名總統侯選人,特別是批評麥凱恩唔識經濟。 佢82至83年間,曾經擔任列根時代總統經濟顧問委員會成員。 94年,開始研究亞洲,佢批評,亞洲多國債務多,經濟增長主要靠密集勞動力,克魯明早喺十年前亞洲金融危機爆發前就提到,區內固定匯率,同部分國家經濟政策,最終會拖累經濟。 克魯明預言亞洲神話不再,認為單靠廉價勞動力的經濟增長是沒有前景,當時當然沒有市場,不過事隔三年爆發出的亞洲金融風暴,就確立了克魯明今天的地位。 學術界中不少人指克魯明是凱恩斯之後,最懂得寫文章的人,曾經讀過「Pop Internationalism」,那枝筆的確是經濟學家之中鮮有,因此有人稱呼他為經濟學界的莫扎特。 克魯明自已曾經講過,經濟學文章可分為三類: 希臘文、不斷波動及候機室文章。第一種不用說,無人可以看得明白; 不斷波動文章就仿如今天我們說的「財經演員」散文,今天隨大市看好,明天又轉為看淡; 至於候機室文章,就只需到機場書局看看,最暢銷的一定是「大崩市」、「大蕭條」等富娛樂性、但缺乏經濟理論的書本。(今天又以這類書最受歡迎,死未?) 就Krugman的得獎,請教過科大的雷鼎鳴,他同意今屆經濟學獎大熱,本是是研究宏觀經濟,不過今次克魯明也不能說爆冷,因為他以「經濟規

懷念馮兩努

圖片
相信大家睇新聞,留意到我地其中一位嘉賓,馮兩努懷疑因為心臟病過世,終年55歲。 馮兩努為左勉勵自己要付出雙倍努力,將自己名改做「兩努」,佢的自強不息,鼓勵別人的正面態度值得學習,真的感謝馮生對我地節目的幫助,每次跟他談論節目題目時,往往感受到他對事物事情的真心及熱誠。 我地會永遠懷念佢,亦都記著佢對後輩嘅教導,亦很想在這向佢既家人致以深切慰問。

童叟無欺?

夏佳理說,買左迷債的人,好收手啦! 居然覺得廷啱聽。 如果要數今次在金融海嘯中沒頂的人,相信肯定不上雷曼那數千人,為何沒有這類人上街? 香港投資者有個好處,就是蝕了股票都心甘命抵,絕少賴人賴地硬。 今次多得政府介入,中銀以阿爺利益為先,穩定壓倒一切,其他銀行唯有跟隨。 多得那批政客從中拿政治油水,投資者變成有莫大憧憬,加上政府又開了空頭支票,人人憧憬只要日日上街,真的就可以拿回全數本金。 其實我們仲值得花咁多時間在這單消息上嗎? 外面風大雨大,CDS、商業票據市場、對沖基金、以至銀行一間接一間倒閉,香港以為感受唔到嗎? 你看本地大錢莊,就因為拆息高企而唔肯減息,反而中小型銀行仲要以高息爭存款,就知道銀行一收柴,百業必然受損,裁員倒閉肯定是零九年主調。 銀行如囷因為今次事件而被迫付上政治代價,股東存戶又失去信心的時候,代價由邊個找數? 尊貴的議員,請問你們明不明白? //////////////////////////////////// 到底雷曼投資者值唔值得幫? 如果像我們跟進的個案福伯,字又唔識、成世人都未做過投資,就肯定係告得入銀行,當局應該要考慮他們的處境,無論透過訴訟或調查,理應還他們一個公道及賠償。 不過看電視日日上街的投資者,又唔覺得佢地無學識、個個樣仲非常中產,佢地真係唔識風險? 咪玩啦! /////////////////////////////////// 雷曼迷你債券事件當中,收到八千幾宗有關投訴,逐一評估緊,有七十多宗正式立案調查。 無論調查結果係點,金管局話,會研究類似高風險嘅投資產品,係咪繼續比銀行銷售。 目前投資者保障雖然係屬於證監會範圍,但根據現行規定,投資產品只要有足夠風險披露,係唔需要經過佢地嘅審批程序,至於向邊啲人銷售產品,就係中介人嘅責任。 更值得深究係、金管局一直係推動銀行增加非利息收入,而家出事,雙方監管機構係咪只係識得一味互相推御? 一場迷你債券風波,揭發出市面上嘅投資產品、部分名不符實,亦引發監管機構責任問題。 金管局話,投資品種類煩多,唔少可能涉及高風險投資,佢地喺06年發出嘅指引,已經強調銀行要加倍審慎向長者在內嘅弱勢社群、解釋清楚產品風險。 至於日後亦有需要研究,係咪再俾銀行銷售類似產品。 金管局話,產品只要過到證監嗰關,就可以喺市場推售。而銀行前線銷售人員,亦係要遵守證券及期貨條例持牌,或註冊人操守準則。 證監

國有化

交易員以恐布形容星期4美股最後一個鐘情況 過去7個交易日,單係美股市值蒸發25000億美元。 更可怕係,作為大藍籌,通用汽車股價落番到1950年嚟低位,當時同依家一樣每股都係4蚊美金多些。 市場惡化情度遠比預期大。 華爾街日報報道,美國當局正研究,取消存保上限暫時向全國銀行存戶嘅存款百分百擔保。 銀行貸款方面,當局亦考慮,向依家到年底到期嘅涉及九百九十億美金銀行債務,提供擔保。 至於原本計劃用嚟收購不良資產嘅8千億美金救市計劃,當局可能效法英國改為直接入股金融機構。 外國傳媒報道,最快幾星期內落實。 自從英國首相白高敦公布,有需要會直接入股金融機構後,英國救市計劃大受好評,而剛召開嘅七國會議,亦會額外討論英國救市模式係咪值得各國參考。 保爾森亦承認有需要時會模仿英國救市方式。 全球救市升溫,歸根究底,觸發呢大半個月嚟全球金融海嘯,英美多分報章話,唔救雷曼係關鍵。 華爾街日報話雷曼出事,同業拆借市場,對沖基金,貨幣基金,同商業票據市場全數被波及。 互信盡失,美元隔夜息一度升至10厘樓上。 更令聯儲局意幾係估唔到係唔少對沖基金喺雷曼有戶口,雷曼破產,資產被凍結,加速佢地要喺股市沽貨套現應付贖回。 一子錯,滿盤皆落索,海嘯幾令全球末頂。 救市、減息都無作用,點消滅恐慌,要睇全球能否團結解決。 美國當局似乎評估緊最壞嘅情況會出現。 考慮緊嘅應變,由沿用嘅救金融機構,擴展到救存戶。 近日有跡象顯示,市民對銀行無信心,開始提走存款,連優質金融機構亦受影響。 方案一係構思將原先廿五萬美金嘅存保上限取消、變相所有存款都有擔保。有關方案仲係評估階段,當局唔想高調。 另外,當局考慮到拆借市場停頓,第二個方案係考慮擔保埋、依家到年底到期涉及九百九十億美金嘅銀行債務,舒緩再融資困難之餘,大前提係令拆借市場回復運作。 資本主義市場經濟,要靠干預企圖解決危機,但每次干預,又敵唔過市場負面反應。 難道最後出路真的只有國有化?

國家破產

圖片
有無諗過一個國家破產會點? 人破產就要做債務重組、唔准坐的士、唔准做股東,咁國家破產會唔會唔准做金融、唔准出口、唔准做旅遊業... 喺舊年,被聯合國評為全球最適宜居住嘅國家,我諗冰島居民自已都無諗過,事隔一年唔夠,會由天堂跌落地獄! 因此呢個只有三十二萬人口嘅細少國家冰島,就成為我地一周風雲人物。 今次海嘯真係可以話令冰島幾乎「沒頂」,冰島貨幣克朗大跌五成。過去幾日、政府更接管左全國第二、第三大銀行,總理哈德亦正底發出警告,話面臨「全國破產」危機。 其實早有徵兆,原本天然資源極度豐富嘅冰島、過去幾年積極發展金融業,三大銀行「南征北討」,資產值增加至一千二百幾億歐元,係整個冰島GDP、145億歐元嘅9倍,而家銀行被接管,政府點頂得住?唯有破產! 更嚴峻係由於克朗大幅眨值,以目外債千四億美元,係GDP十幾倍,唔破產「有鬼!」 面對今次危機,冰島其實都四出想辦法借錢,不過首選就肯定唔會係IMF,最後要尋求由俄羅斯借債四十億歐元渡過難關。 有政治觀察家認為,以北約成員身分向俄求助做法非常罕見! 冰島面積有大約900個香港咁大,但人均收入,就全球排名第五! 而今次冰島政府接管面臨破產嘅三大銀行,亦觸發同英國嘅外交風波,英國政府罕有運用反恐法,凍結冰島「土地銀行」喺英國嘅資產,並警告會對冰島採取法律行動。 經濟學人話,冰島經濟泡沬快速增長、同以更快速嘅速度「墮落」,正係一個「貪婪」同「傲慢」嘅教訓,一個國家嘅漁民同農民,由於貪心、令自己過渡負債,負債係收入兩倍以上。呢個教訓雖然喺發生冰島,不過推而廣之,其實咪又係發生喺整個金融制度身上。 話分兩頭、答返第一個問題,到底冰島破產之後會點? 最好發展旅遊業,一來匯價大跌,去旅行以前嫌貴、而家就超值。除左可以出海睇鯨魚,仲可以睇下一個國家破產之後,到底係咩景況! 不過總理哈德就搞笑,居然叫國民去釣魚,認為冰島咁細根本唔適合發展旅遊業,不如釣魚咁話! 有啲似乎放棄資本主義、回歸以物易物制度,唔通真係金融海嘯唯一出路?

減息

圖片
史無前例7國央行聯手減息,今日值得再詳細睇睇來龍去脈。 評論讚行動果斷,有默契。 金融海嘯升級,外國傳媒一早報道,多國央行聯手減息係備用方案之一。 岩岩過左嘅周末,聯儲局主席伯南克,同英倫銀行行長默文金,以及歐洲特里謝通過多次電話,正式討論聯手減息問題。 伯南克,同默文金以前係麻省理工同事,歐洲銀行倒閉危機,就令特里謝唔再堅持唔減息。 星期日 ,佢率先得到瑞士,同瑞典答應加入聯手減息行動。 到星期3,本港時間下晝5點半,市場仍然恐慌,聯儲局即時召過公開市場委員會,一致通過減息。 一個鐘後,伯南克,就聯同英國,歐洲,日本,同加拿大央行召開電話會議,正式啟動聯手減息。 到晚上七點,多國正式公布聯手減息,而人行亦幾乎同一時間,公布減息。 華盛頓郵報話,人行雖然無聯儲聲明,亦無參與電話會議,但星期日已經表態會一齊減息,因此財長保爾森亦感謝包括中國在內嘅多國央行合作解決金融危機。 聯手減息暫時未見成效,紐約時報話,當局仲有備用方案,特別係考慮到拆借市場幾乎停頓,財政部正構思喺超過8千億救市方案機制下,直接入股金融機構,希望由政府做股東,可以令市場回復信心,恢復貸款。 ////////////////////////////// 雖然金管局放寬銀行透過貼現拆入資金,但外圍拆息高企,3個月拆息近期持續企喺4厘以上,比銀行透過金管局貼現借錢嘅兩厘25拆借成本高近兩厘。 銀行話,暫時睇唔到措施收效,結果香港就無減息空間。

絕招

圖片
全球多國,包括中國在內嘅中央銀行,史無前例聯手減息。 美國,歐洲央行,英國等五個國家減幅達到半厘。至於瑞士就減四分一厘。 而內地亦首次加入聯手減息救市行動,人行將存款利率,減零點二七厘,反映內地市場角色日益吃重。 市場環境惡化,央行前所未有同時宣布減息半厘。 牽頭嘅美國減息後,聯邦基金利率由兩厘,減至一厘半,落到04年8月以嚟最低。 多個央行話,經濟日益恐化,需要對策。 聯儲局聲明話,金融市場危機擴大,波動經濟有需要聯手行動。 有分析師就話,多個央行聯手減息,會令市場重拾少量信心。 聯儲局對上一次提前減息係今年一月,而多個央行聯手減息,從來未試過。 值得留意是,今次聯儲局是FOMC一致同意,聯儲局話,會密切留意市場情況,有需要時再行動。 觸發央行最終要聯手減息,由三星期前,雷曼清盤引發。 市場擔心交易對手風險上升唔願意拆出資金,拆息全線急升,歐美多次向市場注資規模過千億美金,仍然未解決到。 而商業票據,同企業債券市場幾乎停頓,令企業再融資有困難。 美國當局先後用超過800億美金,拯救美國國際集團,同通過總值超過8千億美金救市方案,美股未止跌。 危機已經擴散到歐洲,多間歐洲主要銀行被接管,冰島更幾乎弄致破產。 而聯手減息之先,英國政府亦公布救市方案,直接出資五千億英鎊,預備隨時入股金融機構,八間銀行包括匯豐,渣打參與計劃。 救市計劃中,最受關注嘅係當局隨時準備入股金融機構,涉及規模500億英鎊。 即係每名納稅人要承擔2千英鎊。 ///////////////////////////////////////// 下一步點走? 聯邦基金利率已經跌至一厘半水平,離格老最低的一厘歷史水平,只有半厘減息空間,即係子彈好有限。 雖然銀行間的互信,不會因為一次聯手減息而有顯注改變,不過央行間仍然可以再重施故技,聯手減息,而美國利率處於極低水平,樓市即使不能一時三刻好轉,但我們都希望可以做到審慎樂觀。

買斷

似乎美國真係愈買愈過癮,今次聯儲局不先減息,反而出推出奇招,買起商業票據。 美股經歷另一Black Monday,一度大跌八百點,市場信心已經蕩然無全,恐慌更進一步蔓延至所有企業,總值一萬六千億美元的商業票據市場幾乎崩潰。 聯儲局今次選擇買起三個月期商業票據,背後思路就是避免金融機構的恐慌蔓延至實體經濟,因為企業一旦出現融資困難,無論做傳媒以至賣漢堡飽,肯定會出現一幕幕倒閉裁員潮,這才是伯南克保爾森最害怕的事情。 目前聯儲局暫不選擇減息,相信就是估計以銀行目前恐慌狀態,單單減息似乎難有收效,反而過早調低目前已經偏低息口(目前只有兩厘),只會令自己提早彈盡糧絕。 不過澳洲已經率先重手減息一厘,似乎環球聯手減息應非遙遠之事。 ////////////////////// 冰島克朗幾乎眨值五成,將貨幣與歐元掛勾,不過同我們的聯繫匯率不同,冰島的聯匯制度並無任何backup,很難是一個credible的制度,炒家會不斷測試政府的決心。 更大難題是目前冰島目前的外債是國家經濟的十二倍,當中有九成是來自三大銀行因擴張過渡,而需要不斷借錢。雖然說一個好像冰島的細小經濟體系未必有太大殺傷力,但一旦真的有國家因此破產,牽連還是會甚廣,都要小心留意。

揼心口

潮流興揼心口,美國揼完到歐洲,最新香港都有! 政府就要求分銷銀行,要向客戶回購雷曼迷你債券,雖然就無話係硬性,但如果你係銀行,你話有無得揀! 此事令人想起十年前美國有兩間銀行無支持救LTCM,一間係完全無比錢嘅係貝爾斯登,另一間係比得少嘅係雷曼兄弟,十年後嘅今日,收場係點都唔使點講! 經過三個星期的醞釀、積累到民怨在上周六中銀總行門外大爆發後,終於迫令政府出手,以最高層之有形之手,為數以千計的雷曼苦主一鎚定音。 125億幾總值嘅雷曼迷你債券中,系列5至9,由於主要資產係雷曼票據,市值近乎0。估計投資者完全攞番錢,呢批債券佔發行額1成。 另一批較幸運的債券系列15至18,資產包含美國按揭保險機構MBIA票據為主,預計投資者最多可以攞番本金嘅5成。 其餘最好彩,也佔最多數的、由於債券資產較佳,投資者可以攞番本金大約6至7成嘅錢。呢的債券佔發行額8成。 政府話,已經要求多間分銷銀行按剩餘價值回購債券。 由於雷曼迷你債券唔能夠覆行派息。投資者已經陸續收到違約通知,最後一批要出年3月先收到,按一般嚟講,佢地要等半年,甚至一年先攞到錢。 而按依家嘅方法,希望最快今年內攞到錢。 萬一不幸如果債券正式到期,抵押品比依家升值(十分不可能),銀行會補番差價比投資者,如果貶值就唔會追收。 咁仲唔算筍? 作為分銷銀行中銀香港,好明顯係被國家利益出發行先,被阿爺揼心口,寧棄股東利益於不顧,也要先穩定人心,幫特首挽救民望。 我們訪問的部分雷曼苦主,仍然不滿有關安排,究其原因是認定銀行最初是立定心腸欺騙他們,因此要求是取回全數本金。 不過銀行有白紙黑字合約,寫明閣下之大名,官司上到庭亦未必有十足把握,舉證亦非易事。更重要的是,銀行呢招有助大舉分化現有苦主。Collective Action首要條件是目標一致,當部分人開始願意接受銀行安排時,其他人相信已經難成氣候。 話說回來,如果是在風平浪靜的日子,爆出雷曼苦主呢類case,我相信銀行肯聽話至奇。不過而家撞正全球大爆煲,政府權力無限擴大(看看保爾森就知),加上銀行自己衰左第一步,而家唯有硬食,投資者不宜策略上過於進取,也要避免淪為政客工具。 ///////////////////////// 到底今次事情發展昤基於社會利益,定真係有陰謀論?星期三一於搵埋孫柏文上嚟啡一啡!

經濟學家的選擇

今次救市方案的成敗有唔少分析,都指共和黨叛變,一方面係要同喬治布殊劃清界線,更重要係打造麥凱恩「救世主」形像。 今次救市方案成為左兩個候選人之間角力,其實都不難想像, 因為而家離開選舉只有幾個星期,任何議題都可能會改變由邊個嚟做白宮新主人。 對於奧巴馬同麥凱恩,市場一直有過感覺,係兩個人嘅經濟政策都係大同小異,包括係透過向低收入減稅去刺激經濟,不過今期經濟學人就做左一個調查,睇下邊個嘅經濟政策係「得啲」。 呢個調查同一般民調唔同,經濟學人向683個經濟學家發出電郵,睇下佢地對兩個總統候選人嘅經濟政策評價。 結果收番142個回應,結果都幾令人意外,大部分意見都係睇好奧巴馬,認為佢經濟政策得嘅、有六十八個經濟學家,話麥凱恩得,就得個二十個。 呢個結果真係奇,麥凱恩之前唔係攞左六百幾個經濟學家簽名支持自己的經濟政策? 可能同問卷另一條題目有關,就係你覺得邊個候選人嘅經濟顧團係更有勝算,結果又係以奧馬巴佔八成一,完全「技術擊倒」麥凱恩。 呢點反而不難理解,因為奧馬巴顧問團星光閃閃,好似前財長魯賓、前聯儲局主席沃爾克、股神巴菲特、仲有GOOGLE 總裁舒密特,反而麥凱恩最叻都係得阿惠普前女總裁「菲奧麗娜」。 回應嘅經濟學家指,奧巴馬無論喺能源政策、醫療保險、改革金融監管制度,以至改善財赤同刺激經濟增長,得分都比麥凱恩高。 麥凱恩只係贏自由貿易一個議題,(奧馬巴亦是此點最受市場批評),不過回應嘅經濟學家,就有一個好統一嘅共識,就係無論邊個贏,經濟政策一定好過布殊。

御猫

由七千億美元加碼至八千五百億美元,票數:263 vs 171,過。 當中有58人轉軚,不過共和黨當中佔的不足十人,票數比想像中少。 在投票一刻,CNBC一面影著點票數目,一面影著華爾街一眾交易員,當時幾乎所有人都放下工作,視線都離不開眾議院直播,那一刻我又感受到鏡頭的威力。(作為電視人真的應好好參考。) 不過道指由投票前升三百點,在投票後當十五分鐘幾乎全數打回原形,收市更要跌百五點,反映投資者仍然傾向觀望、寧願趁好消息出貨。 孫柏文 認為,今次救市措施已經是美國政府的最後彈藥,面對美元倫敦拆息長期創出新高,銀行一點也沒有改善互信,下星期股市將會出現大崩潰。 不敢說這個講法沒有理據,不過如果昨夜的方案沒有通過,不用等下星期,昨夜已經肯定又跌數百點。 而家市場開始揣測,到底保爾森會搵邊個出任「御猫」,而家估計最少要委任十間金融機構,大贏家可能會是一直支持救市方案的債券大王格羅斯及Blackrock。 /////////////////////////////////// 昨夜有一個消息,反而比救市方案更令人注目。 富國銀行出手,以換股方式同美聯銀行Wachovia合併,總值154億美元。 還記得周一大跌市之前,花旗靠FDIC出手,收購美聯資產,出資只需21億美元,已取得美聯所有最值錢網絡及資產,當日睇住美聯銀行股價由十美元跌至一美元,嚇到目瞪口呆,擺明花旗是賤價執平貨,因此今次被富國截糊,當然心有不甘。 值得留意是富國背後有手持8%股權的巴菲特做代表,即近一星期內,股神先取高盛、再拿GE,轉身吞併埋美聯銀行,「高」! 令人注目的是,美聯今次寧面對法律訴訟,也背棄花旗,就是睇中富國方案中、可以不花費納稅人一分一毫,與花旗方案一相比,就即時高下立見,亦反映金融機構有得揀,都寧願自行解決本身的爛帳問題。 數下數下,其實美國金融機構所剩無幾,再爆煲的機會、反而比歐洲同新興市場而家先開始陸續出事,難怪美匯指數反而可以屢創新高。

菊花與機關槍

圖片
今個星期,睇外國報紙(包括新一期經濟學人),唔少都大字標題講,日本人番嚟囉! 呢個有過億人口嘅國家,喺華爾街風雲突變嘅時候,市場原本呼聲最高係中國會出手,點知中國有心無力,阿爺又擔驚受怕,換嚟係日本踏上重返華爾街嘅版圖。 接踵而來嘅併購消息,包括三菱UFJ入股摩根士丹利21%股權,同一日,野村成功買到雷曼亞洲歐洲業務。 其實喺呢兩單DEAL之前,日本已經開展喺美國嘅大規模收購。今年以來以購已經超過六萬億日圓,比去年升左足足一倍,相反歐美收購規模反而是下跌了三成同一成半。 8月,三菱UFJ就全面收購左美國加州聯合銀行。7 月保險商東京海上宣布收購美國保險集團費城統一。 美國傳媒,用咄咄逼人,雷厲行動,嚟形容今次日本大軍。 美國咁殺有戒事,當然因為美日有千絲萬縷嘅微妙關係。 八十年代日資曾經大舉投資外國房地產業,到了二千年科網熱,又趁熱鬧投資科技公司,結果都大敗而回。 而伴隨日本十幾年經濟蕭條,就算幾年前仲有大型銀行瀕臨倒閉邊緣,所以日本傳媒形容,連佢地都估唔到三菱UFJ 會買到大摩嘅股份, 併購消息,引證日本金融業大抵逃過今次次按危機,亦都因為慘痛嘅過去,吸取教訓,日本銀行無再沾手高風險嘅金融資產,為佢地重返全球併購舞臺帶嚟條件。 所謂經一事,長一智,當然仲有文化差異,日本金融業一向講求紀律,穩定同資深嘅管理團隊係最受重視,唔似美國強調個別表現同獲利。 貪婪嘅投資銀行,同保守嘅日本人,相影成趣。 根據彭博資料顯示,日本企業目前持有嘅現金大概佔資產11%,排喺全球排第二位。 華爾街劇變改變一切,重新塑造全球新形勢,亦唔怪得有哈佛大學嘅教授提醒大家,"泛美國"時代已經衰落,"泛日本"時代開始崛興。

救世主

有咩能夠對抗通脹? 美國國庫券?黃金? 是盛惠106萬港元一股的巴郡。 巴郡年中落過11萬美金的低位後,已經迅速回升上近14萬美元,升幅兩成半。 比起歷史高位只係跌一成。 單睇第三季埋單,巴郡錄得百分之8點2嘅升幅,遠比標普五百跌9%理想。 面對全球金融動盪,投資者己經將「巴郡」視作資金避難所之一,相信巴郡股價抗跌力會較強,亦吸買盤吸納巴郡,帶動股價造好。 股神話周街跳樓貨,巴群會繼續買,但就奉勸大家要量力而為,買乜唔緊要,借錢槓杆就盡量減少。 /////////////////////////////////// 不過我認為真正的救市主、不是巴菲特,是考克斯。 在整個救市方案經修訂後,加入了不少新條款,不過有一點在傳媒算是較少報道,但就令我眼前一亮。 就是SEC放寬「Mark to Market」規定,、即係金融機構可以自行決定,唔需要再以市價入帳。 哇,呢招如果過得,敢肯定是終極救市方案,保爾森再用唔用公帑買銀行爛帳,已經變得無關重要。 銀行可以按自己的計算方式,將不流通資產計算入帳,換言之,過去拖累銀行要大幅撇帳的理由已經不再存在,銀行無需要再「Fire Sale」那些資產。 有分析指,未來將銀行有很大誘因,調高資產的Fair Value,如果方案通過,我係銀行就一定重新做過第三季分業績, 肯定盈利會大幅增長,到時仲要低聲下氣、監平監賤賣資產比你保爾森! 其實早在去年第四季,黑石已經公開呼籲放棄市價入帳做法,不過當時未有銀行爆煲,呢個做法當時無咩市場。 當然現在是「急事急辦」,沽空已經率先被禁,而家連會計制度都可以改埋,你係炒家仲點唔會盡快平埋淡倉?

股神撈底, 係咪咁抵

金融危機中 股神巴菲特呼風喚雨 買乜升乜 1211比亞迪再升兩成三 九唔搭八比亞迪電子升七成六 搞到唔買好似好蝕底咁 證明散戶唔係無錢 只係無主題無信心 相信以人傳人嘅速度 加上充滿投機性嘅本港市場 兩隻股走勢好有機會彷效276蒙能 都係炒到連我阿媽都會叫買入嘅股份。 股神形容金融市場正經歷珍珠港戰爭 七十幾歲人 從來未見過咁人心惶惶 過去8日 一共用80億美金,入股高盛,同通用電氣。 今年至今一共投資咗超過二百八十億 已用咗巴郡過半嘅手頭現金。 人棄我取係股神嘅投資要點 但逆市又點會唔拿下著數 條件吸引係首選 既然有人包底 怕咩買 況且佢買完實升 管理層為穩定股價 高盛同通用汽車俾十厘息就知幾大犧牲 大家以為股神出手 股市見底 但佢巴菲特接受cnbc訪問時坦言 經濟仍然好差 唔識睇未來半年市況 但指五年十年後肯定好 佢有大把錢大把HOLDING POWER 坐五年有乜所謂... 我坐五日都想死 不過佢咁POWERFUL 又唱好保爾森嘅救市方案 通過機會又大咗 但背後政治動機有幾多?? 佢仲講笑話 話如果可以啲話 佢願意參與救市 但只限百分之一嘅風險 贏輸都係百分之一即係七十億美元 但佢SELF-FUFILLING POWER咁強 一開口都好可能贏 巴郡第三季股價表現係逆市奇巴 入場費每股至少要過百萬港元 好過買MINI BOND 投資貼士係咩 巴菲特話 首要有錢有勇氣 第二要唔投資熟嘅行業 最後就要量力而為 借錢槓杆就盡量少 小林

任總的夾萬

不知大家知不知道在任總的辦公室有一個夾萬,內裡藏著的,不是國庫券或什麼金銀珠寶,而是一個個的備用方案。(唔知有無一個係聯匯脫勾?) 據聞這個夾萬已經由一個變成兩個。 昨天任總應該開過呢個夾萬,當中抽出了任五招: 可以簡稱為「任借」 目前銀行要流動資金,除左向同業拆借市場借錢外,亦可以透過金管局貼現借入臨時資金。 新安排下,金管局決定,暫時放寬抵押品要 美國國債都得,唔限於目前只接納外匯基金票據,借款期限亦可以由隔夜,延長到3個月,並取消以往5厘罰息要求。 另外金管局擔當最後貸款人角色,有需要時,會為銀行提供掉期安排,並首次可以按個別情況,為銀行提供一個月臨時資金。 任總話,如果銀行透過呢個機制借錢,金管局係會按情況處理,包括收邊種抵押品,再決定係咪要「剃頭」。 我知任總對美國的救市方案是相當著緊,由上星期尾起已四出打聽救市的進展,到星期一凌晨知道方案被否決後,早上先為出口術叫市場安心,到下午已經出手安定市場資金,真的做到未雨綢繆。 所有事有利都有弊,任志剛承認,新安排下,金融機構較以往更易攞到港元資金,措施只可以暫時推行,否則唔排除港元會被炒賣,即是被人「以子之盾、攻子之盾」。花旗話,金管局五項措施,只會令拆息輕微回落。花旗話,金管局貼現提供最多三個月期資金,息率係基本利率,三厘半,亦即係變相為一至三個月拆息,設定三厘半上限。 假設拆息大幅上升,銀行可以即時向金管局拆入資金。但如果拆息徘徊三厘半水平,情況唔會有改善,而除非美國減息,否則仍然相信銀行要加息四分一厘。 花旗又指,現時最新安排,銀行太易攞到港紙,又唔需要沽出美元,港匯將會轉弱。 可以留意的是,本港的外匯基金票據,未來六個月到期的均出現負利率,反映銀行寧蝕息也寧可將資金放在最安全地方,也不願意在同業之間拆放,任總呢五招應是具針對性,不過真的要留意市場情勢一旦逆轉,就應見好就收,避免後欄失火。