文章

顯示從 9月, 2012 起發佈的文章

Q3遺憾

圖片
試想,如果你零七年十月就睇好股市到依家,儘管第三季港股升百分之七,一年三個季度升足兩個,咁代表係叻,定唔叻呢? 似乎後者居多,因為你多數輸緊錢!!! 剛剛完結既第三季,全球股市既豐收、但唔係經濟,亦唔係盈利帶動,而係人為,呢點無人會異議,連內地微博上載一段句子,都可以將市況掃高,原來市場是如何荒謬。 貨幣理論入面,簡單一條方程式,就係M=P,P依家暫且反映股價上,反映喺資產價格上,無人知幾時會正式顯示於通脹數據中,但可以肯定,係會一定出現!! 兩個星期前,聯儲局無限印鈔後,埋位搞左個伯南克會,結論係從來無證明印鈔有利經濟,過去亦從來未見過,靠印鈔谷經濟既央行有過退市例子。 WSJ 為QE 前因後果做左一個調查報道,揭發伯南克一早知無限印鈔計劃具爭議,於是聯儲局九月會議前一個星期,不停電郵,同致電俾各委員,總之有無投票權,佢都唔放過,甚至周末日都收到佢既電話,電郵突襲。 更由委員受不了伯老遊說,由鷹派,加入鴿派陣營。 伯南克係幾時有無限印鈔構思?原來早喺今年三月,佢已經心郁。 多名同伯南克交過手既委員,伯南克完全無將通脹放喺考慮之列,相反佢只驚新增職位每月跌至唔夠十萬。 當然,刻下睇唔到出事,嚟緊亦或者未嚴重到災難,但問題總有爆發既一日。 市場依家情況,令人聯想行為經濟學既遺憾理論,REGRET THEORY。 呢個理論簡單嚟講係攻破市場理智既假設。好似,你明知經濟有事,而唔買股票,就係想避過損失帶嚟遺憾。 但同樣你明知嚟緊有事,但又唔想因為錯失央行送禮製造既升市機會,而導致失去搵快錢既遺憾。 所以,因為唔想遺憾其實製造無數矛盾,市場近年情況可見一班。減少遺憾,既可以減少風險,但亦可能促使你增加風險。現時環境之下,唯有中間落墨!! 十月,或者第四季會點??人云亦云既話,幾間大行睇盡二萬二千五,唔人云亦云的話,就請繼續留意風險。 說來老套,十月係傳統股災月,美國印鈔無限兩周,已經想醞釀每月加印,歐洲事事未明,偉大祖國嚷著要政策,二百七十多日維持於憧憬狀態!! 世事無絕對係岩,伯南克今日功過,就算蓋棺當日,亦難有定論。 好似凱思斯,六、七十年代係經濟大師典範,八、九十年代就被視為自由經濟最大敵人,現在又何嘗唔係處於凱恩斯復辟!!!

「中國特色」股市

圖片
星期四「中國特色」既股市景況、又再上演。 靠著一條「證券市場周刊」記者既微博留言,話中國證監會下晝開新聞發布會,即時引發市場無限聯想,憧憬會暫停發行新股,炒起左兩地股市。 事後中證監既記者會原來只係例行發布會,內地媒體事後形容,「新聞發布會」呢五個字,成為左內地股市既敏感詞,而整個過程就好似市場整體情緒既發泄。 內地傳媒發現、似情似景、原來早有先例,喺八月五日,傳出會有新聞發布會,令到股市短時間內上升,但結果證實無利好重要消息,報道話為左避免內地一次又一次既「狼來了」,證監會應加強透明度同信訊披露管理。 雖然暫發新股只係市場傳聞,不過官方人民日報亦有評論文章,質疑喺市場低迷下,重啟IPO 係咪會雪上加霜? 報道提及,用行政命令關閉A股固然係市場倒退,發唔發新股唔應該由證監會決定,而係應由市場、特別係投資者做決定。 為左穩定市場決策層近日其實已經推出唔少利好措施,包括人行破紀錄逆回購穩定市場利率。 三十幾間創業板公司發出唔減持既通告,傳聞都係由中證監授意,同時亦推動左降低上市公司既分紅成本。 更重要係憧憬長假後既十八大會議,落實新一屆領導層後,將可以推行大規模刺激政策出台。 果然,收市後終於證實中共政治局已經召開會議,決定中共第十八次全國代表大會,喺十一月八日召開。 按以往程序,當十八大閉幕後,新選出的中央委員會,隨即會喺第二日,召開一中全會,選舉政治局委員、政治局常委、同黨總書記; 既然人事任命已經完成,相信落實救市方案亦有所期。 值得留意,係十八大會期,比外界估計遲咗,有內地學者認為,主要係薄熙來同王立軍事件,打亂咗中央部署。 似乎真的可以期待、係下周長假回來後,港股可以率先跑出!

圖片
內地股市有A股,有B股。但老外眼中,內地股市其實由頭到尾都係C股,有中國特色既股市也。 中國特色係咩?擺明係玩神秘,係外人咩都唔會明! 二零一二年九月廿七日下午一時,經典事件重演,開市埋位主持用盡十五分鐘,力數內地市況弱勢,痛罵救市無作為!! 結果,呢十五分鐘,上證指數由止跌,繼而升百分之零點八,更進一步升夠百分之三!!! 主持唯有即時收口,占少反應最快,由罵內地市,改為自責變"明燈"!! 點解?因為發覺內地股市原來有靈性。 長期被力數不是,士可殺不可辱,結果內地股市反應係:「喟,你鬧夠未?好,我升俾你睇,仲要由你地最睇淡既內銀股帶動,哈!」。 豈不快哉! 其實都係主持最後一句精警,股市只係懲罰願意做功課、著重基本因素的投資者。 所以最後結論係,內地股市是日升因不明,除非你相信見底千真萬確,內地知唔知咩事呢? 純粹奇聞共享,以下有好幾則。首先,和訊,新浪同證券時報,都各自列舉七、八、九大利好維穩因素,數字上加埋即係有廿四個利好原因,當然唔係! 因為,內容其實完全一樣。 慎防股市調頭向下,於是升市期間傳出第二個版本,就係證監會召開記者會,料重大消息公內,言之鑿鑿更包括中央台晚間新聞聯播有公布。 差唔多同一時間,原來人民網內地漲停,內地股市即時解讀係,當局借人民網漲停,發出政策維穩訊息。聰明!! 既內地網民更有驚人重大發現,就係星期三上證底位一九九九.四,有網民「穿鑿附會」,話用普通話講一次,發音形同「你就救救市吧!」 股市真係靈性?記得上次六四前後,一樣被揭其實係人為干預指數。 最令人佩服反而係下畫無離頭升市,一時間,內地股民發揮守望相助精神,努力發掘升市原因,中國人今日既團結,令人感動之餘,日本理應顧忌三分。 到今日為止,市場共識仍然係,十八大後見清天!!人事變動落實,政策隨時出台,大則來一次變種四萬億,小則降幾次RRR。 其實無需要咁多動作!!「九二七」事件告之,內地股市根本一個R就夠,就係RUMOUR可救市!!!

對抗央行?

圖片
對沖基金經理入行有兩條守則。 一、跟隨大趨勢, 二、唔好同聯儲局對抗。 咁如果聯儲局同大趨勢對抗,又跟邊個? QE3推出近兩個星期,市場興奮過後、開始回歸平靜。 同前兩輪QE股市有一成升幅唔同,歐美股市已經開始由高位回套,標普指數更係連跌五日,係七月以來最長跌市,亞太股市亦回落至QE推出前水平。 商品價格一樣有回套,期油比起九月中下跌左近十美元。即使金價亦無力再上。 新興市場貨幣叫做保持到升勢,摩通既新興市場貨幣指數,喺QE3推出以來,表現比上兩輪QE更加理想。 不過拆細睇,唔係所有貨幣都升得咁理想㗎,好似再次警告聯儲局印鈔會觸發貨幣戰爭既巴西雷阿爾、表現不升反跌,而上星期入市干預升勢既捷克克朗,更倒跌百分之二。 反而一向較少干預匯市既印度盧比、土耳其里拉、甚至俄羅斯盧布,就繼續吸引資金流入。 有對沖基金經理表明、聯儲局不斷印鈔,最終只會帶來災難後果。 摩根士丹利前貨幣策略師、已經轉為對沖基金經理既「任永力」Stephen Jen話,聯儲局有全球最具智慧既經濟師,幾乎無所不知,唯一會考起佢地、就係唔知聯儲局原來並非「無所不能」。(Got to know his own Limitation) 不過唔係所有人都對伯南克無信心既、債王「格羅斯」話,應該要繼續跟聯儲局買貨。 格羅斯話、既然聯儲局表明唔理估值高低、都會每個月買400億美元既按揭抵押債券。歐洲央行亦會出手買短期西班牙同意大利國債,就應該繼續跟隨佢地嘅動向投資。 不過重點係、要早過佢地買入有關資產,到佢地真係入市嗰陣,就可以獲利。

同枱CEO

圖片
每股由過百蚊,跌到得番幾蚊,仍然對思捷關心既人,不外乎佢仲係股東,又或者要睇下思捷呢班每年數千萬人工既高層,到底有咩法寶可以力挽狂瀾。 作為藍籌,思捷管理層近年就等同奧巴馬上身,CHANGE!! 對方靠印鈔,而思捷業績就靠回撥。 全年經營溢利十一億幾,不能忽略係上半年已經有七億八,即係下半年唔夠四億,仲要入面有六億九係回撥,即係話,一旦無回撥,下半年經營虧損有三億幾,差過預期。 思捷下半年無論盈利大數,同營業額都未得,思捷還可以賴關閉分店,還可以用回撥充斥。 嚟緊點,思捷繼續發揮一招,只管信不要問。 但有進步既係,柯大俠始終有一手,下令全公司高層,兼所有董事列席見媒體同分析員,背後兩大意義明顯。一,思捷仲係一間陣容鼎盛既公司,二,係我柯清輝做到既野,之前高漢思都唔得。 更有趣係,思捷業績,大部份時間由已於今日卸任既范德施解晝。 一方面當然顯示佢為人有交帶,但法例上,佢唔再係思捷人,因為思捷已經公佈范德施離任,由外人身份講解業績,說服力無問題,話曬份業績係佢親手湊大。 但范德施始終欠股東一樣野,就係到今日,佢都無穿上一條真正思捷出品既牛仔褲出嚟,事關牛仔布產品,正係佢上任當日話既主打。 新任主帥馬浩思眼仔精靈,係咪可以寄以厚望,時間會證明。 馬浩思頭炮話,要內地,孟加拉、印尼、印度直接採購服裝,以節省成本,其志可嘉。 問題係採購既野,講求網絡,思捷正係之前無集中自行採購既經驗,似乎馬浩思真係要發揮在Inditex 的物流高手本色。 更大問題係市場比較少留意既現金,舊年佢地淨現金由廿七億幾,降至十四億八,未來怎樣應付轉型既一百八十五億預算計劃呢? 令人擔心係,舊年思捷廣告相關開支十五億,已經係全年盈利近一倍,簡單計,今年再有同等廣告開支,甚至搵多幾個男女名模,思捷咪會負現金流?? 毫無疑問,思捷未去到一文不值既地步。但既係上市公司,又係時裝品牌,困難比任何企業來得嚴重。 因為股東要盈利,但客戶要品牌質素。思捷要改革,要改LOOK,就要先將之前既產品一筆勾消,而用大量現金不斷償試,但期間幾乎無盈利增長可言,從思捷例子,股東同產品支持者矛盾盡顯。 思捷目前既企業對銷售值,係零點五倍,全球上市品牌最低。比H&M三倍係搖不可及,比有利可圖品牌平均一至二倍,亦不及格,撇除股價,思捷既估值告之,市場預

財經通識:波羅的海指數

圖片

盡沽?

圖片
空穴來風,傳出淡馬錫有意盡沽渣打,一股不漏,熟真熟假只有局內人知。 市場無「沒有可能」呢四個字,且管信著既大前題,會有幾個疑問,幾個分析。 渣打,對金融圈中人嚟講,算係人見人愛。市場愈動盪佢就愈見強,況且接手邱德拔家族主要股權以嚟,淡馬鍚獲利甚豐,選擇割愛實屬難明。 可能,金融時報講得岩,淡馬錫當日野心係拉動渣打同星展合併,憑其大股東身份,做其成王者,建立全球MEGA BANK,屆時全球無人唔識魚尾獅。 但幾年已過,憧憬落空,唯有打退堂鼓。 從另個角度諗,引申出既係,淡馬錫有極強既佔有慾,不單擁有,而且要控制。 從其背景,亦可見一番,淡馬鍚組合入面,星洲巨企為數不少,呢批公司,名義上淡馬鍚係投資者,實際上係新加坡政府既控制代表,習慣控制式佔有,將呢份感覺投射向渣打,但事與願違。 簡單例子,渣打董事會淡馬鍚無代表,管理層任命,星洲無得SAY NO,呢種西式文化對歐美投資者嚟講係應份,對東方投資者,就可能係不平等,渣打業績好,淡馬鍚亦無功可領,不是味兒可見一番。 淡馬鍚有個叫淡馬鍚憲章既物體,三大宗旨概括係:誠信監護者、積極投資者、前膽性機構。 如果按之前分析,同近期事件,或者渣打投資已經不再符合憲章宗旨,以新加坡人既強調原則,當然要另作他想。 人人估,摩通,桑坦德,或者歐美巨企係潛在買家,但不能忽略係,金融併購,好少係低估值收購,而且仲係大拿拿八百億港紙。 還有渣打賣點固然係新興市場,但賺錢業務係批發銀行,批發銀行就等同投行,投行併投行,過去成功嗎? 除非潛在買家,一開始就想將渣打拆骨。 我地一早講過,新加坡發夢都要同香港比,要同香港比,就要金融取勝,要金融發圍,就要靠中國。不過中國要數親香江定星洲,毫無疑問。 淡馬鍚既要中國造一頓可以預埋佢地既晚飯,當然要送禮。 的確,中國金融想走出去,買一成八渣打,作用未必太大,但最少以後渣打繼續有活力,外界順帶會一提,中資係大股東。 面子,中國人好緊要!!! 淡馬鍚同中國表面拉不上關係,但佢地手執多間中資內銀股主要股權,技術上影響力比香港更大。 魚尾獅搏得中國一笑,人民幣業務,預埋你又點話。 當然一切係推測,但中國要接手渣打,唔一定要建行,工行。中投得,再造一間未聽過既基金,亦得。八百億港紙,不要說中央、任何一個省市都輕易出得起啦!

點計四毫一?

圖片
只值四毫一。 潛在跌幅九成七。呢個係里昂最新給予比亞迪目標價。 里昂形容,比亞迪無範得。半年業績令人失望,所以大幅下調今明兩年盈利預測九成幾,最多預佢賺4500萬人民幣 至於備受關注既汽車業務,里昂彈,比亞迪舊年推出嘅SUV車款S6,7月付運量只有3千部,比年初跌咗6成2,遠遠落後對手,面對競爭加劇,嚟緊唯一出路不斷減價促銷。 因為咁,里昂用除稅前盈利計算,比亞迪最值錢既汽車業務,加埋只係值兩毫子一股,汽車電池業務值九仙。 加加埋埋計出四毫一呢條數。 四毫一代表比亞迪要創歷史新低,因為02年上市以嚟,股價最低係個七。 又或者,用比亞迪每股帳面值大約十港元計,就相當於股價對帳面值零點零四倍。 比對番其他大行既目標價,全部都十蚊樓上。里昂報告說服力肯定備受質疑。 但原來,負責撰寫報告既分析員樂天虎,舊年獲華爾街日報最佳分析員獎。 話說佢原來係愛之心責之切,最初佢睇好比亞迪,但親身試過揸比亞迪嘅電動車後,就睇淡,結果一筆成名。 如果樂天虎再下一城既話,巴菲特就係百分百輸家,股神遇著樂天虎,結果會係由大賺變輸突十七億港紙。 開市埋位占少總結: 繼高盛計錯數彈弓手事件、里昂匯豐廿八蚊、瑞銀神華一零一之後,里昂四毫一比亞迪被選為四大經典報告之首,亦令里昂實至名歸,四大佔兩席,貫徹里昂瘋人院集中營既招牌。 致電身在星洲既樂天虎,阿虎話人怕出位,分析員怕鬧,不作回應了。 其實,有線財經只係想親口讚佢一聲,無佢呢份報告,就啟發唔到我地既獨立思考。更重要係,要阿虎知道,我地知你用心良苦。 因為,以比亞迪重要性,研究報告有幾深入分析,未必有人會欣賞。但一個出位目標價,十二頁紙,我地通通睇曬。 樂天虎引證,分析員有幾本事,無用,目標價先係佢地立場,就等於女士們一對高跟鞋。 四毫一子,更加證明,里昂係一間不折不扣既獨立研究機構。行將寄中信證券籬下,呢枝歌仔,未必可以再重彈!!!

明燈補習社: 甚麼叫「高啤打」?

圖片
 不要學我們兩個主持,錯晒!!! 

One Old Man

圖片
當今世上,試問有幾多人稱得上真英雄? 時間同事件,每每改變人對人既睇法,魯賓,薩默斯,格老,曾經何時被冠以為拯救地球三戰士。 奈何,三人今日卻由天堂墮入凡間,三人功過未輪到我地定論,但外界對佢地睇法既逆轉,亦係證明原來好多所謂既共識,根本未經教驗就去結論。 世態炎涼,以全球今時今日既環境,以美國貨幣量化步入危險狀態,主流媒體只會重複搵格羅斯,麥嘉華做訪問,而唔會再想起格老,更忘記左有沃爾克呢個人。 先後為5任美國總統,服務超過50年,做過十年聯儲局主席嘅沃爾克,慨歎時不我予﹗ 佢喺蘇格蘭演講時話,如果後生5年,就可以更加好咁幫手整頓充斥銀行家同政客貪婪嘅世界,亦可以繼續推動「未完成」嘅金融改革。 可惜而家已經85歲,覺得有心無力,形容而家可能係有史以嚟最困難嘅時刻,國會、政治、意態形態分野,根本就咩野都唔可能有共識,成個政治系統都令佢失望。 講到金融改革,一手鼓吹加強金融業監管Volcker Rules 既沃爾克就有啲「火滾」,話三十年嚟,金融創新唯一最有用嘅,就只有發明左自動櫃員機。 又批評唔畀銀行投機炒賣,世界就會冧嘅講法完全係廢話,仲直指華爾街大行唔鍾意嘅話,大可以唔好要銀行牌,轉做對沖基金就無皇管。 格老無疑係近半世紀最具知名度既央行行長,惟論影響力,沃爾克當之無愧。 佢瓦解金本位,拯救全球匯率危機,處理超級通脹,更重要係唔向華爾街賣脹,唔為白宮賣政治人情。 結果,局內幾乎叛變,八三年幾乎被炒,八六年幾乎劈炮,到八七年終於捱唔著交位置予格林斯潘。 沃爾克在每日電訊報既訪問,反覆細看,總有酸溜溜之感。無錯,八十五歲了,但佢既無借題發揮為自己平反、趁日子無多要贏得生前生後名,更無乘機抽水或者指三道四,反過來只係嘆時不與我,一句吾老矣,有心無力,意簡言賅,背後甘苦盡在不言中。 沃爾完係咪萬能?係咪真英雄? 如果英雄定義係寂莫,佢尚且稱得上真英雄。呢位八十五歲老人,可愛之處唔係夠高,唔係當年夠膽大幅加息,而係咁多年嚟,從來唔無利用自己既CV搵大錢,正當格老退任後跑去當德銀同PIMCO顧問,演講收費每場數十萬美金,沃爾克依然係當日既沃爾克。 以佢名望,總可以華爾街撈一分油水;以佢經歷,可以吊起嚟賣。 但對不起,多次擔當檢討顧問,佢收費只係象徵式一美金。 更感人係,幾十年前因為當官收入大減,佢太太

埃瘋看QE

大美國主義,橫行霸道,但始於好多時都盡顯公平,一啖沙糖,再一啖屎,奈佢唔何!! 一個美國人叫伯南完印錢,攤薄你回報,但另一個美國人叫庫克,就曲線派錢。明知你香港七百萬市民深害印錢之害,就擺到明,我係醒你!! iPhone5一出,懶理佢邊間網絡商制式問題,既然香江小島成為繼澳洲日本全球第三個發售之列,加上偉大祖國開售無期,就係咁,庫克其實為伯南克贖罪,香港買完,內地賣,好過你炒AH股差價。 中環無論快餐店、畢打街、甚至洗手間,離離去去聽到只有四個字:「你抽左未?」抽咩?抽「埃瘋」! 十六激機價五五八八,外面收機價八五零零,即係一日回報五成二。 買樓唔得,炒的士牌都唔得,真係唔抽就笨!!! IPHONE 令人瘋了!! 無辦法,大家餓機太耐了。大行報告特別多「埃瘋」報告,華爾街日報,頭條講「埃瘋」,彭博,CNBC近日有如一個「埃瘋」廣告雜誌。 似乎iPhone已經成為全球另類流通貨幣既一種。有庫克,大家暫且原諒了伯南克。 高盛光頭費思的確可愛,佢話既然印錢係懲罰存戶,佢義無反顧會接受邀請,咩都投資、咩都買! 高盛寶號當然有條件掃貨,但運作彊化既基金公司,因為回報呢兩個字,幾乎要跳樓自盡!! 以往,基金會先假設回報,繼而進行資金配置,決定不同類型資產比重。 但基金睇市叻,但敵不過央行傻,既然如此,輸錢風險大增。所以,金融時報已經提及,部份退休基金依家投資,前題係先假設輸到幾多,跟著再平均分配資產組合。 有人話,搵錢難。 當然你會話有IPHONE出既今日,唔難。 通街經常有錢執,你信唔信?除左執紙箱之外,話說幾年前,英國某條小巷,一夜間,原本鋪上既百幾年歷史地磚全數消失,據稱掘磚者轉售大賺一筆!! 講到呢度,唔係叫大家炒「埃瘋」,甚至要去街掘磚。 適逄無限印鈔QE3頭七,凡事諗開的,通街仍然大把機會。

去散戶化

圖片
二千點攻防戰,諗著可以有報復式反彈嘅散戶,又要失望。 全星期計,上證指數大跌百分之4點5,係11個月最大單周跌幅。 市況調整,散戶由失望到絕望。 面對市場沽壓,繼續有監管機構出手托市嘅消息、包括考慮將上市銀行將獲准降低分紅比例,增加利潤保留,強化資本水平,減輕市場再融資壓力。 而回歸A股嘅洛陽鉬業,更傳連夜被證監會叫停,要大幅縮減發行規模。 亦有傳聞指,喺近日大跌市中,監管機構禁止基金經理,發表影響市況穩定言論,幾乎「以言入罪」。 雖然有監管層力撐,不過股民唔多受落,市場活躍度減低,過去一年從未有交易嘅個人帳戶,達到六成六,內地傳媒形容,A股加速「去散戶化」。 另一個佐證、係一年一度既「新財富」最佳分析師評選,過去一直視為內地分析員既終極大獎。 今年,投票出呼意外既冷淡,舊年名列三甲既中金更罕有退出。 原因係,市況太差,而中金今年既預測,大部份唔準。 今年全年表現最差既股市之一,內地媒體用崩潰,甚至斬頭嚟形容。 最先睇淡中國既對沖基金經理JIM CHANO查諾斯更連踩幾腳,佢接受CNBC訪問時,公開呼籲唔好諗著可以喺中資股中獲利,因為中國市場唔係普通投資者玩得起,要投資新興市場,諗過其他。 查諾斯更形容,中國經濟係一間曱甴屋,入面烏煙脹氣,經濟數據甚至盈利無一樣信得過,唯一唔同係,中國特色既曱甴屋大好多。 民企之父張化橋更撰文,直指中國股市令千萬家庭受到傷害。 對於市場仍然憧憬政策,甚至救市,張化橋話,中國股市之前市盈率太高,唔可以救市之餘,更應該加快新股發行,等股市估值盡快回落。 佢批評上至官員,以至評論員不斷慫恿老伯性入市,做炮灰,極不道義。 張化橋更透露,地方政府為左幫公司盡快上市,不單止提供各種稅務,或者土地優惠,而且更幫企業設計做假帳,教佢地點解偽造銷售額,利潤等記錄。 股市搞成咁,張化橋話,係地方政府欺詐,對社會缺德既結果,而且毒害埋股市。

中國熊

圖片
一個由四十一個月低位反彈的PMI初值。 換來卻是A股收市跌至44個月低位。 上證2000點保衛戰再次迫近眼前。 當然好友解讀PMI,是可以脫離低點,最少邁向五十點盛衰分界線更進一步。 不過說服力顯然不及淡友。 連續十一個月處於收縮狀況,加上根據過往九月份按月反彈幅度,分析指,仍然唔及格。 警號出現喺反映製造業情況既產出部份,急跌至47,係十個月低位。 主要原因係,內地製造業仍然處於去庫存階段。 初值數字顯示,購進存貨改善,但製成品存貨仍然積壓。 面對著內地股市持續不振,內地股民由失望、悲觀、最終變成絕望離場。 就算剩底在股票行的股民,不是面目惘然,就是陷入悲痛交雜之中。 有網民幻想自己身陷「七大軍團圍剿中國熊」,並計出市值蒸發五萬億元,即六千萬股民,上半年每人就要虧三萬五千元! 其實要數內地股市問題,不少都人所共知:不說大少非解禁等結構問題,單是大量內幕交易,企業管治又差,公司分紅傾斜,就好似一個運作不當嘅賭場,落場的只有待宰的牲畜一樣,試問如何教人放心入市? 事實上十八大召開在即,股市未有起色,對中證監主席郭樹清來說,已經面對好大壓力。 之前已經向市場發出「維穩」訊號,又加快向外資發牌,等佢地可以盡快入市,現在更進一步,決定向外資招手! 上海同深圳交易所嘅官員最近罕有咁、去到歐美以及日本,同多個退休基金同保險公司等嘅機構投資者會面。 目的當然是希望吸引佢地重投內地,郭樹清亦提出建議,包括加快市場改革同埋加強企業管治,成為推介會的賣點。 要知道,過去中央擔心是外資到中國會「翻雲覆雨」,想盡方法落閘避免外資熱錢流入,現在要「槍頭掉轉」,實際上是政策一大扭轉。 不過面對眼前提振乏力的內地股市,唯有向「敵」求援,期望可以化外力為助力。 但當股市已經回落到十年前水平,連續多年奪得世界「跳水」冠軍,Buy China 的基金經理老早就彈盡糧絕,而家要說待重頭、收拾山河,又談何容易?

富豪榜

圖片
強烈要求福布斯取消富豪榜,年年如是,新意欠奉。 美國離離去去係蓋茨、巴菲特,巴菲特或蓋茨,全球榜頂多加個墨西哥電訊大王。窮人無興趣知邊個係全球最有錢,有錢人亦未必介意排名先後次序。 中環人戲言,福布富豪榜唯一稍具睇頭,僅餘十三億人的中國富豪榜,因為邊個上榜,通常都..... 人人話貧富懸殊,對,一比九十九,但富豪入面既人,似乎亦分零點一對零點九九之分。 當然,富豪榜統計身家排名,有其局限,就事實而言可能係不盡不實,但一年一度,同一班頂級富豪,反映啲咩?就係富豪本身既上移能力,大概限制愈嚟愈大。 譬如,三十年前,蓋茨係黃毛小子一名,三十年後不斷係全球富豪榜首。 但有無諗過,再三十年之後,會唔會有一個新BILL GATE,同新股神出現? 莫非富豪榜到時,同依家仍然會大致一樣? 經濟創造財富,十幾廿年嚟,全球經濟翻了幾翻,但頂級有錢人名單,變動出奇地少。 係呢班有錢人太叻?依家新晉一代企業家,創業者無用?抑或係經濟本身出了問題? 實話實說,世界尚算和平,六,七十年代怕既冷戰無左,古巴革命,無埋,全球思想同知識更加進步,當年,肺癆係絕症,依家少事。 社會肯定進步左,但經濟數字上進步既同時,人類係咪物質上已界極限,發揮有限,造成富豪上移動力有限? 經濟史學家提到,工業革命之後,二次大戰後,社會重建,可以算係全球第二次經濟革命。 七十幾年嚟,經濟發展,除左資訊發達之外,進步無幾,全球可能要既,係有需要醞釀第三次經濟革命。 革命啲咩?無人知,要提升經濟,從而擴散令人類福祉受益,仲有咩可以做? 有人話環保,有人建議繼續提升科技,更有人認為,要嚟一次世界大戰,先可以推倒重來。 有留意既話,已作古者,更多人懷念,更多人問如果,如果佢仲喺度,會點呢? 美國四年前大選,奧巴馬之外,談論最多係列根,四年後今日既大選,情況一模一樣。 英國人仍然對邱吉爾念念不忘、中國人想鄧小平,香港最掛著係麥理浩、夏鼎基。 講到呢度,全球人類面對既,係人既質素下降問題,還是僅僅局限於經濟問題咁簡單呢

貴客自理

圖片
如果,周小川唔提地方債,市場可能唔記得內地有地方債既問題。 舊年全球關注之際,有識之士已經洞悉先機,話地方債不是問題。 事後回想,對,因為比地方債,內地有更多債,更多問題,區區一個地方債,已不起眼。 地方缺水,舊年中央試點下放地方政府自行發債權,目的有二。 一,財政彈性,二,風險自負。 目前,內地地方債,主要由財政部代為發行。 只係得廣東、浙江、上海同深圳,可以自行發債,發售對象限於機構投資者。 睇返早前完成發債嘅廣東同上海,認購反應確係唔錯,大概超額兩倍,但收益率與同年期嘅國債比較,其實溢價唔高。 小川行長深明風險控制之道,提到地方債,佢反過來有更新提議,就係地方債發售對象要係地方居民,究其原因,就係要收居民約束政府之效。 無錯,地方債問題沿於道德風險,政府濫發,抵押品現金流係假等等,小川行長構思,變相將民間監察政府既功能,擴大至民間監察融資市場,表面上合情合理。 但實際上而言,中環人部份聽畢,就搖頭輕嘆。 第一,小川行長假設內地居民意識同市場知識足夠,是與否,太明顯。 二,本應由監管機構做既事情,要由老伯姓兼負,小川之言,莫非係為自己自廢武功,背後訊息其實係,我技窮至此已,管不來了,煩請老百姓代我承擔。 結果周小川建議一出,內地微博即時駡爆! 網民認為出售地方債俾當地居民,同搶錢無分別,質疑老百姓有咩渠道同權力,可以約束到政府發債! 中國股市廿年多歷史,股民輸錢數目多過贏錢,由期望,不滿,到放棄,已經引證民間制衡不到上市公司,現在更要提升層次,要民間制衡政府,小川是否活在烏托邦? 內地地方債,由於今年唔係熱話,最新數字欠奉,按去年人行計算既十四萬億數字推算,周小川難道曲線要全國人民,每人揹一億??! 又調轉想,小川其實係高明,引入既係用者自付原則,有用途,有詳情,可以說服居民的話,錢,地方可以籌,否則閣下自理。 但同樣,小川可能顯示自己不懂政治,事關地方要錢,向地方人民舉,中央一概不理,技術上亦會為地方政府製造借口,好,咁以後地方稅收不應上繳中央。 每年一度全球央行評分,舊年小川冠絕全球,三百六十五日後今日,最新排位,小川十大不入,菲律賓,馬來西亞央行通通攞A,小川你在何處? 當然,大家都明,評分年年海鮮價,大概視乎經濟同通脹而定。既然如此,小川,你要理,不如搞好經濟先,地方債

玩得起?

圖片
內地反日情緒高漲,示威演變成騷亂,畫面看到不是和平示威,而是暴力搶劫,對於日本人,其實可以理解撤資的舉動。 單看做零售嘅好似日前青島分店被破壞嘅吉之島,結果內地35間分店有30間無開。 便利店7-11同羅森以及服裝零售商、內地叫優衣庫嘅UNIQLO多間分店都被迫休市 生產線一樣受影響,佳能、索尼、松下電器同獅王嘅廠房停工,豐田、本田、日產等多間車廠亦關閉廠房。 反日情緒升溫引發中日貿易危機,單係舊年中國進口日本貨、就達1946億美元,係日本嘅最大出口國。 至於中國,舊年出口到日本嘅貿易額有1483億美元,只係佔中國出口百分之8,單看數據,似乎的確係日本對中國較依賴,一旦爆發貿易戰,內地抵制日貨,傷的似乎係已經衰退廿年的日本。 但不要忘記,日本係主要電子零部件生產商,單係舊年日本311大地震,美國唔係日本嘅主要貿易夥伴一樣被拖累、經濟增長下跌零點5個百分點。 全球供應鏈更出現可怕性斷裂,連本港廠商樣受累,所以日本的底子仍然不容低估,今次嘅反日事件,最終亦會損害到內地經濟。 訴諸歷史,作為中國人,釣魚島,美日私相授授,日本所指釣魚島屬其領土,從來於理不合。 四十年,中日一直習慣處理獨特關係既藝術,惟變既係,我國強大左,美日窮左,問題只因此而起。 政論家話,近十年中日真係密月期僅僅福田康夫在任首相一段短日子。但日本領導如走馬燈,越換越右,而來一個奧巴馬去年重返亞洲主場論,日本身先士卒,巧合係埃及棄美投中之後,更令中美日關係變得微妙複雜。 對中國嚟講,美日夾擊,忍夠。從官媒評論,內地的而且確認為經濟實力大佔上風。 我國既成第二,你跌至第三,日對華出口佔整體一成八,豐田、本田、日產巨企中國業務佔比兩至三成。要玩? 中國似乎玩得起!!! 話雖如此,全球第二,鬥全球第三,任何經濟或貿易戰,蝕底係全球。 更現實諗,日本無疑訂單靠中國,但中國工業零部件,還要由日本供應。再者,日本經濟衰足廿年,講衰,經驗多過中國,日資企業服從性強,國家吹雞,以風險溢價升溫為由,將生線基地轉移,我國又未必承擔得起囉!! 漁人得利呢四個字含意極廣。經濟影響,縱使講到極之嚴重,但中日股市反映,市場唔覺得日本有問題,反而內地股市就要累積跌百分之三。 大美國主義充斥,左一個日本,中間一個菲律賓,右一個越南。中環人驚既係,花旗會不斷玩其激漲

富.事.通:花花公子之王 HEFNER

圖片
仲有三個主持分享自己的花花公子歲月....KAKA

為誰歡喜為誰憂?‏

圖片
市場為QE而歡喜。 市場亦為QE而煩腦。 伯南克啟動QE3,股市,商品,甚至匯市全線上升。 不過講到底,QE目標係要救就業市場,問題係點救? 歐美傳媒開始將焦點討論QE既「傳導作用」。 今次QE集中購買MBS按揭抵押證券,金融時報話,好大理由係伯南克希望透過樓市復蘇,可以帶動消費同就業市場。 不過銀行界話,QE3只會令伯南克第三次失望。 美國指標既三十年按揭定息利率,回落至3厘55左右水平,比起2010年初5厘顯注回落,理論上QE係會幫到置業人士供樓負擔。 不過銀行表明,負責審批按揭既部門同中介機構,根本無意慾向貸款人減低息率,特別係而家審批時間延長到一至三個月,加上監管要求、令銀行要加派數以千計既人手處理,更無意慾減低按揭利率。 以星期五按揭抵押證券孳息率回落左三十點子,但同按揭利率既利差、仍然高達近一厘半,比起以往既半厘高好多,反映問題已經變成結構性。 諾貝爾經濟學獎得主克魯明話,佢年半前曾經相信,QE靠樓市產生傳導作用,但事後判斷樓市既缺口可能比佢預期大。 克魯明話,佢始終懷疑,無左財政政策,單靠QE仍然係難以推動經濟復蘇。 更不明朗係通脹前景,同前兩輪QE唔同,當時好大目標係要對抗通縮,但上星期公布既消費物價指數,已上升到三年嚟最高。 即使財富效應真係令消費信貸有起色,但企業係咪願意增加投資,都成好大疑問。 趁著低息環境,大企業的確願意借貸,不過資金並非用作投資,部分回購股分,甚至寧願持有現金,但無新錢可以投入私人市場。 呢個由全球製造業指數疲弱,可見一班。 相比起股市投資者,金融時報話大企業既行政總裁、似乎對伯南克既派錢招數更加無信心。 數遠些,亞洲更成為首新興市場係伯南克政策受害者。   前銀監會主席劉明康更用四個字形容伯 南克.......「不負責任」。 劉明康不滿可以理解,因為潛在新一批大量熱錢,令中央喺保增長同控通脹之間更難選擇。 簡易解讀、係無限QE一出,令中國政策彈性更細。 以往內地每次數據差,經濟師都估會好快減準備金率。 但伯南克銀彈政策令大行轉軚。潛在通脹壓力令佢地原先估人行餘下時間會減息,同最少減兩次準備金率,依家話,機會不大。  

紙幣

舊年,不斷有人話世界末日。世界未末日,但人類既想法,已經愈嚟愈末日。   無限印鈔後廿四小時,巴士,地鐵,茶餐廳,話題離唔開樓,同錢。重點依然係,點可以喺有限既時間,不斷貶值既銀紙,可以盡快買到樓。   簡單一條數,當畢業無耐年輕人,月薪二萬,三百萬一層樓,唔使,唔食,唔玩,都要三點七五年先可以儲到首期。   唔好忘記岩岩過左既三點七五年樓價升左八成!   即係三點七五年之後,如果樓價升勢未完,又要等多三點七五年,不斷循環,好可能到到斷氣前一刻,仲諗緊過去既咁多個三點七五年所為何事。   中環分析員話,銀紙貶值,而且係無了期既貶值。銀紙係咩?銀紙依家只係一種交換工具,但論升值能力,比紙扎鋪入面既陰司紙更低。   因為前者過去十二個月貶值,後者反而加價。   一年前買十扎陰司錢既價錢,依家買唔番。聽到呢度,係咪可悲呢?   所以思歪,加攞命,過去兩周幾乎合共五招,地產代理會同你講,你仲怕咩?政府從供應著手,但改變唔到一個現實,就係物業已經成為市民儲蓄既主要部份,唔怕買貴,最怕無買,更多人有咁既諗法,就會製造更多恐慌性買樓。   最諷刺係雖然金管局收緊第二套房住宅按揭,效力一日貨仔都無,過去周末入市氣氛持續,主要屋苑都錄得30宗成交以上成交。   新盤更乘機大賣! 本來驚政府出手、迎海同瓏門一再延遲開售,而家多得伯南克,將本來預期最重手的按揭招數,打發得無影!   伯南克警告左我地,儲錢無用。但自己又會埋恕自己,無錢無用。矛盾兼無奈!!   可以點?樂觀而積極,九月十八日機會又嚟!!   廿蚊一注,頭獎八千萬,夠買八個太古城六百七十五呎單位,或者大約十八個黃埔四百幾呎既單位,所以機會嚟拉!!   廿蚊,一個希望,再唔係當自己做左善事,也心安理得吧?

九一四

圖片
還記得四年前的今天914? 毫無疑問, 2012年9月14日 ,可能區內為主新興市場央行最痛苦既一日。 伯南克嘅QE3期票、今次唔淨止兌現,仲要無人估到,佢會簽一張、未填數字嘅支票! 完全殺市場一個措手不及!! 先係歐央行、依家連聯儲局都跟住無限期、兼無限量印錢! 金融市場即進入亢奮狀態! 但對於新興市場嚟講,依家就即時要搵辦法、防止歐美大量熱錢湧入、造成嘅通脹同資產泡沫! 所以金管局總裁陳德霖、喺朝早回應左聯儲局政策後,下晝就隨即宣布,為防範銀行體系風險,收緊第二套房按揭,包括降低供款入息比率。 論反應速度、金管局今次係贏左! 但講到實際作用,如果真係要打擊投機炒賣,要收緊按揭成數先至係最有效! 但宜家只係由買家嘅負擔能力入手,直證明到自住同樓換樓仲可以獲豁免! 現在買第二個物業及以上嘅按揭申請,佔成交大約係三成半至四成,不可謂不低! 相反,金管局話佢地留意到大約有百分之五既貸款人,刻意延長按揭年期、甚至做到四十年,由於咁會增加銀行風險,所以即日起限制新造按揭年期,唔可以超過三十年。 以原本買3百萬樓、供40年,每個月供款6千5百幾蚊。 但收緊到30年每個月就要用近8千蚊供樓,俾多千4蚊,除左增加供樓負擔,亦會直接影響買家、去做按揭時既供樓入息水平。 結果是影響埋首次置業買家。 或者多得伯南克,沒有他,陳德霖唔會八小時內兩度現身,先預警,再出招。 所謂招,有用與否,意義不大,正如卓伯德所講,要買,咪俾人買!! 人人話,金記出手因為思歪,實際係思歪供地至上,金記事宜一直不管不問,中環人話,八十八層高火速出招,係行動話俾大家知,大事不妙也!! 確實、經濟向下,貨幣政策本應屬於寬鬆性。 但因為驚伯南克呢個人,南韓,菲律賓,泰國,印度,甚至內地應該減息都唔敢減息。 而俄羅斯更提前預防,出乎意外加息四分一厘,指標利率加到八厘二五,係九個月以來首次加息。 經濟師話,俄羅斯決定唔係個別例子,而係突顯美國無限量印鈔,令其他央行政策進退失據。 確實,歐美兩個央行行長不約而同將貨幣政策轉為無限寬鬆,令其他經濟體系面臨重大決擇: 到底係再掀「貨幣戰爭」、落閘禁止熱錢流入。 定係跟隨「大隊」,無視通脹風險先加馬寬鬆救經濟? 顯然美國政策撤底影響新興市場,區內央行一日之內,由防衰退

超越無限:Infinity and Beyond!

圖片
加買400億美金按揭抵押債券,另加原有既扭轉操作。 即係每個月,聯儲局會向市場注入850億資金。 以後無需要估幾時QE4,QE5,因為聯儲局唔止對購買資產期限隻字不提,仲講明經濟同就業市場無起色,會再買,同買多啲。   即係,伯南克領導既聯儲局正式啟動史上首次既無限量寬鬆。 其實早在聯儲局聯會後,我們已預覺無限量QE的身影 身影 ,只是當時大家也說不準何時現身。 那大選前再加馬推量寬,係咪受到政治壓力﹖ 伯南克話,佢哋完全獨立。 話同政治無關,不過紐約時報統計過,過去十五次既總統大選,聯儲局有十次喺選舉前兩個月,改變貨幣政策。 市場歡迎,但部份美國政客有保留。 一直批評聯儲局既眾議員Ron Paul保羅形容,係「失控」,亦造成恐慌,代價最終要伯南克自己承擔。 以每個月聯儲局變相印鈔金額計,到明年底,聯儲局既資產會增加近一萬二千億美元,相當於整個QE1規模,而總資產就達到四萬億美元,佔左美國本地生產總值兩成四。 黃金戰士潘國光講得好,作為佢「魔鬼」一面(其實每個人何嘗不是),對有QE當然高興。 不過短期市場既興過後,QE代價其實係劫貧濟富同之後引起超級通脹。 之前大手減持債券既債券大王格羅斯亦指,伯南克無限量寬鬆,經濟效益未明,但通貨再膨脹已成定局。 英美大報形容,伯南克進取之餘,可能玩緊危險遊戲。 經濟學者指,貨幣政策,作用只會推高通脹,無論學術理論同實際證據,都睇到都刺激就業有幫助。 就算十二年前已故幣學派大師佛利民呼籲日本買債,原因都只係當時日本嚴重通縮。 雖然效用成疑,多間大行相信,伯南克會繼續擴大收購資產規模。 伯南克面紗揭開,教授背後既真面目就係癮君子一名,BERNANKE DRUGGIE毒性之大,全球震驚。 亦都方串大亂。 BERNANKE DRUGGIE決定,係咪不負責任? 算,市場總有既得利益者,總有人舉腳讚成。 引用黃金戰士今日一句話,二零一二年, 九月十四日 ,係全球致哀既一日。  

獨賣之謎?

圖片
教主臨終前遺作,iPhone 5終於見人,但由於洩漏太多,最終變成驚喜欠奉,功能、外觀毫無新意。 屏幕長咗、機身薄咗,升級4G,睇嚟好似好大變革。 但撇除果粉以外,一眾智能手機用家會話,今次充其量只係追貼三星產品技術,真正突破喺邊? 不禁令人懷疑,蘋果中人係咪驚後勁不繼、仲有殺手鐧未出?難怪有評論話,手機設計已經好成熟,每一代都要再推陳出新,其實唔易。 你會問,咁換機定唔換機好?似乎作為一般用家,吸引力的確唔大。真正用家似乎可以觀望吓,等到新機出貨,有人玩過試過、睇埋讀後感先決定,都未遲。 但睇完蘋果發布會,分析都即刻上調今個月嘅銷量預測,究竟點解? 因為有炒作因素。星期五預售,下星期出貨,沉寂一時嘅iPhone炒家,又再蠢蠢欲動。iPhone資訊網站重新啟動,炒家又率先教路,先喺網絡商登記、再喺蘋果專門店排隊,十月過後又再上網買多次,粗略估計,前前後後十部經手,難度唔算高。 其實最緊要係首批無強國,而家就睇埋同胞們肯俾幾多。 率先有內地網站,開價7千人民幣代購,仲有叫價截圖為証。 扣返匯水同收貨折讓,平均每部仲有2千蚊落袋。難怪有資深炒家推算,如無意外,今次炒iPhone要有5位數字落袋,無難度。 但前提係收機舖,係咪見貨即收?點都要提返句風險警示。「炒賣有風險,價格可升可跌」。 最佳例子就係上一代4S。叫價托唔起,損手嘅唔止普羅炒家,半年前仲搞到實力雄厚嘅「收機舖」周轉不靈要執笠。 係咪要炒埋一分?暫時都唔建議。但要強調呢個、一年一度嘅蘋果炒賣大會,可觀性十足。 諗起網站攻陷晒,蘋果店門口又雲集各路人馬,瞓街瞓足一星期。相比起投資市場,股市無方向,樓市一味升,齋睇,都已經值回票價。 況且,蘋果產品,必受追捧。就算山窮水盡,大不了來一部蘋果懷舊版2G,亦肯定不乏買家。 主流財經傳媒話今次係蘋果創辦人喬布斯逝世一年來、蘋果推出最重要既產品,但設計上似乎只掛著繼承喬布斯既承傳,未有太大創新。 無計,你點彈,你點挑剔,佢係蘋果! 而家預計今個月就可以賣到一千萬至一千二百萬部,破盡蘋果以至所有電子產品紀錄。 難怪庫克可以夠膽講: 「蘋果從未如此像今天強大」! 今次較耐人尋至於iPhone 5既Presentation 上,點解會獨家點名數碼通? 按照iPhone 5制式,佢地支援係 850/

對沖之王

圖片
伯南克、德拉吉、默克爾講話你可以唔聽,不過Bridgewater 的Ray Dalio開壇,講美國經濟、歐債危機、投資部署、以及中國經濟,就一定咪走寶!

財政天劫

圖片
FOMC會議室即將座滿人。 鴿派陣容頂鼎,激辯可能欠奉。 QE與否,無需爭論。 傾既可能係有限額,定係無限量。 彭博認為,環看歷史,伯南克算係聯儲局最進取,最具試驗力既史上唯一主席。 幾年間,聯儲局資產負債翻一翻。 超低息延長又延長。 但論評估經濟準繩度,有經濟學博士資格,並唔代表經濟預測準。 五年嚟,聯儲局80次年初經濟預測,75次要調整,只有五次唔使修訂。 而佢下調增長預測次數,佔左六成六。 經濟預測唔得,政策有無用? 股、匯,債表現已經有答案,全數反映市場預期一定加馬印鈔。 資金氾濫,尋求回報,垃圾有價。巴克萊篇制既垃圾債券指數創出新高。 正如摩根大通指,製造資金氾濫係市場唯一推動力。 商品大王羅傑斯話,伯南克即將製造超級通脹,加埋依家面對既天文數字債務問題,全球最終出現「財政天劫。」 印鈔成為常規政策,但好多人會話,大選前,聯儲局未必會有政策舉動。 錯。 1952年到依家,十五次大選年,聯儲局足足有十次調整過貨幣政策。 較令人觸目係92年,聯儲局拒絕進一步減息。 結果老布殊落選後,點名批評佢提名連任既格林斯潘令佢失望。 廿年後今日,奧巴馬會唔會對伯南克講,我提名你連任,你無令人失望? 歷史終有記載。 而貨幣政策係咪最終由伯南克摧毀?歷史更應該要有記錄。 既然QE已成定局,對在太平洋彼岸的我們,又有多大影響? 中環人話要解答,首先要全城先尋找到陳德霖。 尋他不代表他能幹,而係假如幫佢制定貨幣政策既鴿南克,再次印鈔。周五之日,陳氏總裁到底會唔會講野?同講的咩野? 第一個問題,機會唔大,極其量佢可能喺八十八樓自己同自己講,但要解答第二個問題,就要假設佢會作出換屆後首次露面,到時講咩? 以下係一段模擬講話,命中率高達百分之九十九點九!! 「我地留意到美聯儲決定買債,即係所講既QE3。 雖然市場對美聯儲既決定早有預期,但金管局一如以往繼續密切留意市場情況。 我想提醒大家,資金多可能對資產價格產生潛在催化作用, 增加泡沫形成機會。市民一定要留意風險,我地必要時亦會採取措施。 最後,我想強調,環球市場波動,穩定匯率機制相當重要,我重申,聯匯維持不變。」 明知老調重彈,中環人話,想八十八層落樓,無非係太耐無見,想知佢肥定瘦左!!! 隨時又有大

社會融資

圖片
七月新增貸款七千零三億,社會融資總量連續兩個月破萬億,牛市經濟師話,鬆一口氣了。 花旗指,信貸寬鬆作用反映,減低經 濟下行風險,更估當局全年新增貸款目標已經上調到八萬五千億。 佢有佢牛,唔少中環人就繼續有保留 。的確,過萬億社會融資規模大數,對內地資金不足假設似乎不攻自破,有錢萬事足? 係咪 咁簡單?,事關逾萬億入面,除左信託貸款充斥之外,企債涉及近二千六百億,相當於社會融資規模兩成八。 周小川一直強調社 會融資數據重要,企債主導融資,相關比重由三,四月份佔比唔夠一成,升至呢兩個月兩成以上,貸款佔比五成,股票融資更僅得百分之一點六。 換句話講,內地融資機制其實 已經由股,債,同銀行貸款三頭馬車,淪為只靠債市。 講得好聽,就係發展債市,但更現實 係銀行唔肯借,同市場唔想借。前者怕壞帳,後者要考慮借貸成本,因為目前內地銀行貸款實際借貸利率超過八厘,相反內地買賣既企債成本,部份仍然低至兩厘,借貸同發債成本極不平衡之下,就造成債券大旺,單天保至尊局面。 中環人形容,依重 債券融資,風險不能不正視。原因係,以內地在岸債,同離岸點心債債息相比,在岸遠低於離岸,背後原因唔係資金流動性問題咁簡單,而係風險計算不盡不同。 因 為,內地企業債券,到二零一二年今日為止,字典入面都無「違約」呢兩個字。 野村同渣打都相信,八月既社會融資顯注回升, 反映基建投資資金到位,表明中央係睇到經濟下行風險加大,係採取左更前瞻性既措施,野村更預期,喺寬鬆措施下,到第四季經濟可以有強力反彈。 社會融資總量有令人疑問地方,八月 七千多億新增貸款同樣係咁。如果睇番細分數字,七千多億,近四成係住戶新增貸款,而一向認為最反映銀行借貸意慾,最代表貸款投入實體經濟既企業中長期貸款,萬內只有一千二百億,佔比一成六,比七月時一成七少,較正常合理既四成左右水平,更係少得唔正常。 正如陶冬所言,八月數字在在確認, 民間企業資金困難依然。中環人話,內地銀行七成盈利靠借貸,但持續幾個月,近半貸款要由住戶需求充撐,銀行盈利怎麼辦? 已經唔再係意見分歧既問題,而係已 有共識。 睇番八月新增貸款 同社會融資大數,講到尾,銀行不願貸,資金還是緊,成本仍然高。 同時間,新增存款五千多億,居民存款止跌為升,多番一千億,但銀行還是要透過拆借市場拆入資金,到底點

造空中國

圖片
由零售,到工業,再由工業到出口,經濟指標通通無改善。 內地評論警告第四輪造空中國來了!! 矛頭直指外資,形容佢地持續撕開中國經濟既裂縫,而且有耐性咁造空中國。 單係上星期,瑞信,瑞銀,德銀,花旗,高盛,法興分別輪流調低中國增長預測,或者係對內銀股既前景睇法。 接力唱淡既目標,最新輪到盈利前景?更巧合係,同日內三間一次過睇淡。 大行綜合中資股半年業績,頭六個月,仍然有內銀股支撐,整體企業盈利只係微跌百分之二,扣除內銀既話,按年其實賺少左一成三。 下半年點?美林話,未見底。 瑞信話,困境未過。里昂亦加入,話內地谷基建政策,製造更多泡沬。 一,兩個月前仲話盈利下調周期尾聲,反彈在望,而又估值吸引。 依家,睇好變為少數。睇淡成為主流。 全年盈利預測,瑞銀估,零增長。 美林更悲觀,估上證成份股全年平均盈利要倒退百分之九。 多次喺中資策略員排名第一既美林分析員更大膽預測,年底上證基本要見千八點左右,最差可能千四不保。 國指年底基本目標亦只有八千五百六十點。 佢話,除左經營環境外,半年業績顯示企業現金流改善係唔正確,因為單睇自由現金流對銷售比率,上半年跌至負百分之4.5,其實屬於歷史新低。 係咪差成咁?無人會知。 擔唔擔心? 如果樂觀的諗,正如羅奇同羅傑斯話,中國經濟差,但大把國家差過我地。 或者又好似總理達沃斯「臨別贈言」,相較歐美,其實我國先有真正空間加大財政同貨幣政策力度,到時一旦重出招,「造空中國」者分分鐘被挾死都唔知咩事!

明燈補習社-- 強迫金

圖片

中國模式

圖片
多事的周末日,再嚟一輪內地經濟數據,真係好事唔多覺,壞事一籮籮。 睇完八月一抽經濟數字,ING經濟師一句精警:「對不起,我要加入硬著陸陣營了」。 而周一公布的進出口,一樣嚇人,特別是進口,扣除一月的季節因素,已經返到去海嘯水平。 加埋PMI 同IP 同 PPI 一齊解讀,整個內需生產市場,已形同崩潰。 有經濟師形容,未曾見過如此差劣既八月經濟數字。結果繼上周三間大行降內地增長預測後,今日再嚟兩間,第三季而言,七點五預不保。 硬著陸與否無謂爭辯,反過來,配合市況氣氛轉好,得來不易當然要好好珍惜。 云云分析員之中,中環人話,九月十日之日,正係牛市策略員最困難之時,事關佢地要雞旦裡挑骨頭,喺極差數字之中,搵出正面既指標加以放大。 結果,牛斌屈宏斌同花旗沈明高決定煲大降存準金,但分析員逐項數字搵線索,結果搵嚟入口數字加以放大。 對佢地嚟講,整體進口負增長,關係不大。反而,眾裡尋他,八月鐵礦石進口量大增,水平去到三個月嚟最高,加埋同期重工業生產輕微回升,憑咁,繼續有人公開中國經濟見底論。 重工業回升,可能同基建有關,加大鐵礦石進口,或者符合情理。但中環人話,八月內地進口鐵礦石大增,千萬不要太認真。 何解?正正係因為期內鐵礦石價格下跌(詳見上周財經通識),內地進口商之前合約進口撻訂,但改為現貨價購進,簡單講,就係一減一加效應,如果睇同期銅以及石油進口全數下跌,後者更係近兩年最低,話經濟活動見底,未免武斷一點。 政策憧憬離不開減息,減準備金。但陶冬同馬駿一直堅持,減又何用? 美林陸挺分析更為合理,內需同出口弱勢未止,七點五面子大過天,我國嚟緊基建QE,同時加快推地令政府多一點錢,除此之外,已別無他選了。 如果我地睇番八月內地整體出口數字,難得係按月計,到歐美出口分別按月升近三近一。但以此造好,就請先隻眼開隻眼閉,事關內地對東盟同區內出口,幾乎全線下跌矣! 一年前,市場對區內仍然樂觀,兩年前市場對區內好樂觀,三年前,市場對區內經濟更加之樂觀。但正如瑞銀所指,賣點欠奉,佢地好懷疑,依家到底仲有無亞洲經濟奇跡呢回事。 所以英美傳媒已經大力質疑:現行經濟模式,以政府投資推動經濟,仲係咪行得通? 金融時報話,三十年嚟,雙位數嘅經濟增速,無論係投資者同企業,都視為常態。 華爾街日報指,今次經濟放緩,無出現裁員潮,影響社

財經通識: 拖累中信泰富一年又一年的鐵礦石惡夢

圖片

大海無量

圖片
今日開始,要向天主教廷申請將一個人列入做「聖人」! 外國傳媒形容德拉吉就好似「 救世主 」一樣,拯救一眾陷於苦海既投資者! 由S&P同納斯達克指數反映,美國根本就無發生過金融海嘯,過去兩年日講夜講既歐債危機,原來都無出現過。 納指真係「地上最強」,單睇一隻蘋果,十二年來股價累積升9571%,即係足足一百倍! 中環呢邊一樣愈戰愈勇,貼近尾市仲沖高六百點,特別係國指,升幅少過半成都嫌寒酸! 過去兩個月烏蠅飛過都聽到既證券行,完全變左另一個世界,幾乎以為係拍緊「大時代」! 有經紀笑行家今日收市後唔使再去揸的士! 當然買得起成個資產市場,全靠係四大央行力挽狂瀾,09年以來,聯儲局夥拍歐央行、英倫銀行同日本央行,向市場注入總額達3萬9千億美元既資產,市場點可以唔歡呼喝采! 講番德拉吉,今次OMT高明之處,就係靠兩招做到左右逢緣,一招係貨幣手段、另一招就係政治手腕! 先講沖銷,名義歐央行通過沖銷可以將印出來既新錢重新由銀行體系抽走,貨幣理論假設咁係唔會構成通脹。不過明眼人一睇,就知呢招其實只係用來「呃」阿太唔識野! 咁就要先理解歐央行既沖銷機制,目前佢地只係透過向銀行提供有利息既一星期存款,將印出來既買債既鈔票由銀行體系抽走。 不過呢啲停泊喺歐央行既存款,正正就係銀行可以用來向歐央行借錢既合資格抵押品,結果變相啲錢又返到去銀行體系! 另一招被認為更高明,簡單講就叫「金蟬脫殼」,原因佢將點樣界定尋求援助既附加條件,完全交比IMF! 通過抬高IMF地位,德拉吉成功安撫左德國對購債計劃既反對聲音,兩日前仲撐行長魏德曼,阿太已經轉軚支似ECB。 市場已經開緊盤口,賭佢幾時會繼前行長韋伯後辭職! 外國媒體都讚德拉吉呢招高明,喺確保OMT順利實施同時、又令各方面既政治力量又保持穩定。 兩日前我地講過央行統治世界,今日已經證明到確有其事,不過凡事有利有弊,投資者過分依賴央行行為,事實係中央銀行無可能照顧大家一世,最終都係要靠經濟有穩固同堅實既復蘇,但呢個日子幾時先會真正來臨? 講到底,人性鍾意接受掌聲,面對德拉吉兩個月前一句「信我啦」,佢作出左中央銀行家有史以來最豪賭既一鋪大細,而家叫做SHOW HAND 贏晒三家,伯南克自己看在眼裡,然後再望望電視機入面猛話要炒自己魷魚既羅娒尼,相信佢心入面會點諗,都唔需要多講啦掛!

殺手鐧?

圖片
揀咗兩幅喺啟德新發展區嘅地皮做首批港人港地,涉及1千1百幾個單位,限制年期比之傳既3年長好多,去到30年! 兩幅地原本放咗喺勾地表,出年一月至俾人申請勾地,而家改咗做港人港地,有測量師就將估值調低兩成,預計只係賣到4800蚊呎。 而日後落成連同建築費,估計就要賣萬一蚊左右,同而家市價差唔多! 「英十招」出手啱啱一個星期,而家咁快又作補充,證明只有一件事,就係力度不足! 口痕友話,思歪一講完「港人港地」一千一百個單位,就突然落起傾盆大雨,似乎天公都要話比佢聽,「唔收貨」!!! 咁我地問過施老闆,佢講明、唔會用「失望」呢類字類形容,不過都覺得有啲地方可以再做好啲,例如可以限制唔比出租甚至係只賣比首次置業人士,而家計劃細節就太簡單,幫唔到真正需要買樓嘅人。 客觀啲講,呢個星期出招後成交方面確係睇到顯注回落,不過業主似乎都係仍然強勢,叫價繼續進取,所以價錢完全無回落跡象! 成日話到底樓市有無泡沬,其實泡沬永遠都係爆破之後先會察覺!但一啲樓市唔健康既現象,就仍然係可以喺數據之中搵到。 以啱啱公布既八月樓市成交數字,一百萬至二百萬既成交宗數,只有808宗,佔整體比例,由同期一成九大跌至一成水平,創左近年新低,似乎都反映,二百萬樓下成交絕跡,係有數據支持。 再睇到多兩個數據,八月既居屋同公屋成交,喺政府話會推出五千名額免補地後,都吸引大量買家「恐慌性」買入,公屋交投八月分有35宗,急升左16%,有三宗更超過二百萬。 而居屋就更誇張,全個月成交有645宗,升幅有四成半,創左三個月新高,神加既係、三百萬以上成交多左七成半,呢個價錢肯定追得上私樓! 實際數據反映,呢兩個月既樓市升浪,同過去幾次升市唔同、係由中小型單位帶動,由於直接影響到民生、亦都成為左思歪最頭痛問題! 咁港人港地似乎係對症下藥,至少可以做成心理預期,唔需要搶高地價! 但最叫費解係上星期先話港人港地涉及法律修訂,唔通我地新上任既袁司長,唔聲唔聲先至係政府最有效率既部門? 花旗今日都出左報告幫思歪把脈,直言相信英十招唔會收效,相信政府好快會出新招,而且焦點會由增供應、變成壓需求,務求盡快收到效用,可以向阿爺交到功課! 當然最效方法係由金記入手,直接降低LTV、即係按揭成數。 雖然舊年四月金管局名義上已經將投資物業成數降至五成,不過有買樓都知,其實買家只

明燈補習社-- 巨無霸、的士、通脹與iBond

圖片

央行「屈機」

常言話「大話」唔好講咁多,到底德拉吉今次有無呃人,仲有廿四小時左右就有分曉!   市場反應似乎就唔多受落,由美國到歐洲到亞洲、由銅價到歐元,似乎市場都係買重德拉吉令人失望居多。   假設,真係假設,如果佢唔呃人,咁又如何?   到時德拉吉會買起左一半歐洲,晉身超級央行行列。計一計數,歐央行再啟動購債計劃,勢必增加資產負債表一萬億歐元,到時佢地佔GDP比重,會由而家三成半,跳升到近五成!   到時德拉吉就唔止係「超級馬里奧」,而係變身做「特級馬里奧」,唔止鐵娘子默克爾要就範,恐怕QE始祖伯南克都要借開!   斷估伯南克都唔會咁易認輸,肯定全球央行會出現「競爭性」QE,有估計到2013年底,全球央行會佔左全球經濟生產總值GDP既五成,到時真係由中央銀行統冶地球,恐怕都要改名,變成「永不腐朽」既央行!   但係接連不斷既QE,已經令投資市場變得完全扭曲,套用「占少」講法,就係催毀左整個投資市場,恐怖既地方,投資者居然開始覺得咁係理所當然!   以總值一萬億歐元既貨幣市場做例子,由於德國同法國既債券成為投資者避險天堂,佢地既短債已經出現負回報,作為主力投資呢類穩陣項目既貨幣基金,就變成無辦法向投資者交到功課!   消息話,四大貨幣基金已經計劃修訂佢地既發行基金既法律文件同認購文件,令佢地可以將負回報轉嫁比投資者。   其實歸根到底,元兇原來又係德拉吉,話說歐央行七月史無前例將銀行存放喺佢地既存款減息到零、仲將隔夜存款收取罰息,結果就令貨幣基金面對兩難!   由於按例呢類貨幣基金既淨資產值、每個基金單位唔可以低於一歐元,結果佢地被迫要喺自己既基金收費方面落手,試問你係基金經理又點會願意???   而家佢地構思既一個方法,係資產淨值繼續保持喺一歐元,不過就會隨著負回報而減少每個投資者手上持有既基金單位,又或者係將收費喺基金既結構內剔出,換言之可以隨著負利率而調高收費水平。   今時今日做投資者真係一殼眼淚,被大戶挾倉之餘,而家仲要被中央銀行「屈機」,想搵個安全投資、居然又要比「保護費」!   難怪愈來愈多投資者意興闌珊,寧願將資金轉投回報更理想既物業市場~! 難怪思歪出盡辦法都壓唔到樓市,寧願唔去海參威出席APEC,都要掛名留底話要處理「港人港地」!

富.事.通:香港精神--尋找紅A故事

圖片

綠色通道

圖片
中央要保增長,不過銀行受制於存款流失,八月五大行既新增貸款只有2500億人民幣,計埋其他銀行,預計總額都只有六千億,略高於七月。 不過同期間,有一項融資工具,規模就不斷攀升。 截至七月底,企業債券融資淨額迫近二千五百億,同比增加2065億,亦高過今年初近5倍。 而佔社會融資比例,就由百分之四,跳升到兩成四。 人行行長周小川都大力鼓勵發債、形容債市喺國民經濟地位日益突出,人行同證監會、發改委已經成立協調機制,進一步推動債券市場改革。 發改委亦加快審批企業發債,將企業債分為綠色通道、重點支持同正常審批,其中包括保障同國家重點基建既綠色項目,會做到即審即批。 中金公司話,內銀面對逾期貸款急升,為左控制風險,信貸已經好難配合中央同地方既投資需求,企業債券正好彌補左當中信貸投放不足既缺口。 對中央來講,發行企業債好處係由民間籌資,不用擔心甚麼三角債問題。 但去年經歷過渾水民企洗劫事件,除本地需求外,企業債券亦難獲國際投資者垂青。 不過最近呢個情況稍稍發生變化。 騰訊最近發行一批總額6億美元既優先債券,就獲得超過十倍認購,其中機構投資者就超過三百間,四成都係來自美國,遠高於舊年底既一成比例。 同樣由中海油發行既20億美元債券,單係來自美國投資者,認購金額就有65億美元。 舊年發生嘉漢林業被渾水既沽空報告指責後,美國投資者對內地企業債券需求一度大跌,不過隨著美國本身既企業債價大幅飊升後,投資者不得不將注意力重返亞洲。 高盛就話,雖然內地經濟增長放緩,但投資者相信高質素既企業債券仍然係穩陣既投資,而且年期較長,對佢地都有吸引力。

消失的交易大廳

最近有無去上海? 喺金融區出現左個怪現象。   我知你講咩,內地股民稱呢個現象係「消失的交易大廳」,原因係愈來愈多證券公司,面對成交萎縮,為左削減開支,陸續關閉證券行既客戶大堂。   曾幾何時,呢類大堂一度係證券行必爭之地,甚至連中證監都發出通知,要求將交易大廳整得舒服啲!    不過而家巡一巡上海東方路,會發現好似係齊魯證券、或者係銀河證券,都減少左呢啲交易大廳數目,有啲就算唔關門,都已經烏燈黑火!   呢啲交易大廳到底有幾多生存價值? 仲記唔記兩星期前傳出左中信證券巨額虧損29億人民幣?而家搵到元兇,傳出呢個謠言,就係成都一個證券經紀喺呢啲交易大廳聽番來,之後再喺網吧傳出去。   內地股市熊市已經步入第5個年頭,唔少股民而家去到證券行打發時間。八成既交易電腦無人用,有股民打牌、捉棋、甚至織毛衣,甚至微博流傳有張相,係有個股民喺空空如也既交易大堂「洒太極」,股民笑言既可打發時間,又鍛練身體!   唔怪得有證券行甚至喺黑板上寫著「本周工作重點-- 引導客戶交易期間不要打牌」! 問你死未?   面對一潭死水既股市,有投資者諷刺自己由股民變「棄民」,係被中央遺棄既一群!   更經典係有基金經理棄股養豬。大家唔好笑,係真有其人,仲係華廈基金上海分公司總經理,舊年不堪股市折磨,選擇離職返家鄉務農養豬,臨走前仲將自己幾袋名片,用碎紙機粉碎! 其實都咪笑人,股市成交轉弱其實都係全球現象,美國如是,就算本港散戶咪一樣喺度吹水? 經紀趁空檔揸的士早有所聞,難怪大摩今日都出報告,話呢個股市寒冬要預備長期作戰,將388目標降至72蚊!美林仲跨張,預期中港股市今年ADT,即係每日成交量會下兩成八同三成三!   講下講下,好在我地啲節目一早多元化,既有每日樓市又有商品有價,夜晚仲有Moneycafe 同華爾街速遞,否則恐怕連觀眾都會離棄我地!

Jackson Hole

圖片
上星期五、由紐約到倫敦、由里斯本到香港,全世界都播著同一個晝面。 伯南克自然係主角,不過佢身邊人都大有來頭,正係伯老「師傅」、以色列央行行長費沙是也。 今年既「Jackson Hole」年會,歐央行繼任人超級馬里奧缺席,所以伯南克唯有搵自己師傅頂當! 伯老既演辭呢個周末都有唔少演繹,詳情唔再講,不過反而想喺佢分演說中,搵下有「微言大義」! 有細心睇個十多頁既講辭,雖然只有4600字,但居然引用左40個Reference,而且伯南克仲QUOTE 左五大經濟師名師,支持自己一套非常規既寬鬆措施。 不過細心一睇,當中包括既三大諾獎得主之中,居然有「凱恩斯學派」James Tobin,同「芝加哥學派」、貨幣學系始祖佛利民,就令整個經濟學界相當奇怪! 無錯,引經據典支持自己做法唔係罪,不過「監生」將人家理論套用到自己既學說,似乎就有點牽強! 對近代經濟稍有認識都知,喺伯南克仲喺哈佛同MIT 圖書館日挫夜挫既年代,當時托賓同佛利民已經係勢成水火,可以話大纜都扯唔埋。 托賓鼓吹以減稅同增加政府開支來刺激經濟、創造就業,不過佛老就認為呢啲係多餘動作,收效唔大,認為只有貨幣政策先係「王道」! 可以將兩者擺埋一齊支持自己,係伯南克搵到托老1965年一分Journal,提出喺三十年代美國經濟大蕭條期間,提出聯儲局應該購入長債推低利率,幾乎就係而家QE既始祖! 至於佛利民,伯南克引述既就係佢二千年喺加拿中央行年會上發言,就係支持日本央行應該不斷買入長期國債直至經濟復蘇。 兩篇文章結論相近,不過唔好唔記得前後相差35年!何況托老之所以獲得諾貝爾經濟學獎,主力都係佢對凱恩斯經濟學說既進一步推廣、其次就係佢提出「Tobin Tax」,即係鼓吹向外匯市場徵稅,至於佢呢個1965年既論文,恐怕只有伯南克、同托賓既學生,現任聯儲局副主席「耶倫」先記得! 不過自己一直聲稱、係受到佛利民啟蒙既伯南克,重提佛老二千年文章,其實呢個先真正既整分演說既「微言大義」,因為已經代表左「無限QE」!  因為按佛利民既前提、就喺經濟出現復蘇之前,央行應該係要不停買債,即是以有限為無限! 的確,經過一個周末討論,局內亦逐漸形成共識。 包括聖路易聯儲銀行行長布拉德、芝加哥行長埃文斯、三藩市行長威廉斯、以及波士頓行長羅森格倫,佢地都一致表態支持加推寬鬆措施,而