文章

顯示從 8月, 2008 起發佈的文章

阿「公」

近日有兩個關於使用權的問題同時在社會上引起不少反響: 前者是有劇團在旺角行人專用區做街頭戲劇,引起了看不過眼的網民組織起來,兩者在街頭有衝突鏡頭;另一則就是政府再公布了更多的公用空間,當中包括了長江中心的汽車通道。 為何有模特兒在行人專用區推銷產品、吸引一街「機佬」拍照時,同樣構成阻街,法輪功展示一篇篇的反共宣傳展版,除了引來部分區議員批評陷入無政府狀態外,又有幾多人真的有很大意見? 當然中間有分別是佔用空間的大少,但實際比較應知其實大少並非決定性,反而是有幾多人受落才是關鍵。前者深受男士歡迎,後者應沒有太大「壓惡」,所以構不成群眾壓力。 公共空間說穿了,其實是沒有私有產權、缺欠界定利益持分人的產業。 產業的管理人當中扮演了主要的角色: 旺角行人專區管理人是康文署,他們作為公務員當然是多一事不如少一事,除了易拉架因為形同觸犯小,旨意他們捉多一個垃圾蟲也不易。 相反,在私人公司豁下管理的公用空間,動機就清晰得多,當然是為樓上的物業增值,任何有利增加收入的方法,只要不觸犯法例(甚至明知故犯都寧願「蝦」政府不鍾意打官司。),都有動機去做到。 是否在公共空間真的沒有人會理會?看看天水圍的公園,劇團表演,警察介入不特止、甚至告上法院,表演人分分鐘被控入罪,到底與「好戲量」所犯又有何不同?其實同樣是公用空間,不過天水圍的設施有產權執行人「康文署」,對公共空間產權實施資源分配。 我們相信制度,因為只有法律下界定了產權,一個簡單方法就是以康文署轄下的場館租用方法,將場地劃分,一旦使用者要用較大面積的行人專區,就需要事先申請並繳交場租。唯有如此,產權才能執行,資源才可以有效運用。如果真有人欣賞「好戲量」,大可以以財政支持他們大量租場,雖然仍然會出現阻街情況,但至少整個社會可以因為收到補貼,資源可以運用到其他更有效地方。 當然,孫柏文提出交由私人管理公司執行產權亦可一試,但不要說九倉,就是其他私人公司也很容易觸發社會對「官商勾結」的疑慮,想想算了吧!

公地悲劇

公地悲劇(Tragedy of the commons)是一種涉及個人利益同公共利益,對資源分配帶出衝突的社會陷阱(Social trap)。證明有限資源,因為自由使用同不受限制下,很容易被過度剝削。其實這樣情況出現,全因為每個人都希望擴大自身可使用的資源,然而資源耗損的代價就轉嫁比本來可以使用這些資源的其他人,行人專用區的情況亦都一樣,無一定限制及規管,紛爭只會毫無休止。

思捷

一間藍籌公司半年盈利賺多24%,居然被冼倉股價跌兩成,思捷(330)犯了什麼錯? 思捷公布業績前,我地已提醒觀眾,要留意記者會上兩點: 1. 潘祖名離任後,到底策略上有無改改變? 2. 過去一直被視為高增長嘅批發業務,到底仲係咪可以持續? 結果發現,兩點都出事! 歷年嚟思捷都有對盈利前景做預測,到今年再無呢個指標。 環球經濟唔明朗,佔一半銷售嘅德國更陷入衰退,多間大行包括美林雷曼摩根大通野村,指管理層對前景嘅睇法,比預計仲要差,批發業務更係首次估計只有單位數增長。 因此都一面倒調低評級,更將目標價大幅下調,最誇張係雷曼,由135蚊降至62個半。 真的是今天的我打倒昨天。 主席高漢思承認,經濟逆轉、消費者唔肯再使錢,為了避免冒上不必要風險,佢承諾喺09年前都唔會再考慮收購。 之前曾經暗示過有意收購DONNA & KARAN,高漢思話,而家經濟唔見底都唔會考慮啦。 不過有危都有機,大摩同瑞信就繼續投高漢思信任一票,認為派息高,股息率達七厘,又有有回購計劃,對股價會有支持。 看到今天的局面,令我想起兩年多前思捷曾經有過一次因為錯看女裝潮流、引致股價一度大跌事件。 當年業績固然備受考驗,高漢思亦未做主席,仍然是CEO,在一致看淡下,這個德國肥佬一方面公開認錯,同時執行了一系列措施,包括換了一整批設計師,結果不出半年,下一分業績已經有好好交代。 當時就是以這個逆向思維,相信肥佬有決心改正,人棄我取。 數數手指,思捷上次急跌兩成已經是十年前的事,當時正值金融風暴,同樣是身處風眼。 所不同的,是當年思捷股價只是兩元,到今天即使再跌,股價仍然翻了三十多倍。 都幾認同摩通講,以股價跌低過七十蚊,股息率達到七厘,其實都值搏。

爆煲先兆?

由海域事件、到聯洲因為應收帳爆煲,到最近德發非執董集體「棄船」,基金已經成為「驚弓之鳥」,一旦公司有不利消息,都會唔問價沽貨。 上周有個報告都值得講下,又係摩根大通,佢地估由於經濟大環境逆轉,嚟緊一段時段都會係困難,現金勝於一切。 更要留意係過去兩年,唔少公司都大事擴張,中小企資金管理情況需要留意。 首要留意,都唔使多講,是公司負債水平,以及營運資金對銷售比率,以判斷呢的公司資金管理係咪完善,警戒線是負債比率一旦超過三成,就要留意。 太細公司其實大家無咩興趣(專炒二、三線的除外,但呢類股分又有咩基本價值好睇?)、因此不難歸納為有危機公司,摩通就統計過,市值夠一億美金嘅公司,最少廿四間資金管理欠佳。 點名提到有安德利果汁,同海升果汁,06如07年負債比率都高於一倍樓上。 至於已經爆煲就有宜進利,負債比率其實早由舊年兩成幾,升至超過一倍。 最慘係批接貴貨的員工,聽聞之前大老闆仲向員工「吹雞」,點之今次真係要輸突! 另一間值得留意係百營環球,負債比率由舊年一成6,升至今年一倍。 有銀行話,無論有無上市都好,近月已經加強留意中小型貸款情況,部分更追收貨款,而對於近日需要進行再融資公司,貸款息率亦比之前高一倍。 如果經濟無法扭轉目前悶局,睇落去都令人幾擔心!

不切實際

要再次多謝SKY 在九號風球的風雨飄搖日子,可以開解我們更風雨飄搖的投資心情!

局內局外

很喜歡呢集節目名。 順帶一提,為左遷就直選擂台,今個星期cafe first run提早 1930,second run就不變。

劉翔剩餘價值

圖片
睇百一米欄比賽,見唔到劉翔,只得來自古巴嘅四眼斯文look跑手「羅伯斯」,無咗對手,無敵最寂莫嘅表情、都令人有啲失望。 原來劉翔雖然無入會場,但佢一樣有睇比賽,佢話自己當晚喺房裡面睇決賽轉播,佢起初以為對手會威脅到「羅伯斯」,之後睇住「羅伯斯 」輕鬆跑出十二秒九三,自己心跳一直就加速,想像自己無受傷嘅話,贏唔贏到「羅伯斯」,佢話無覺得惆悵,反而充滿鬥志喎。 其實無論佢能唔能夠參與北京奧運,我地都好佩服佢,因為佢係第一位中國人,喺國際田徑場揚威,唔再只係黑人嘅天下。 對於今次劉翔要同京奧緣盡,全世界議論紛紛,當然經濟論亦都成為話題。 張五常 賽前在佢網誌上講過,翔飛人嘅成敗,個人廣告收入起碼相差十億元,重提消費者剩餘consumer's surplus嘅經濟理論。 根據資料,劉翔代言嘅品牌最少有十幾個,保守估計,商業價值超過五億。 不過暫時嚟睇,劉翔未能奪金牌,好多贊助商仲係支持佢。 其實不難理解,十多個贊助商肯使逾億支持劉翔,一方面是看中他的體育成就,但更大程度是支持他背後的十三億同胞。 當劉翔決定退賽一刻,現場有人落淚、有人悲痛奠名,當場更有八成觀眾離場,加上網上議論雖然紛紛,但整體都是支持的多,十三億人仍然希望劉翔可以傷後復出,就是這一個希望,繼續令廣告商支持我們的英雄。 我們訪問的廣告界都指出,劉翔知道自已有傷、仍然在跑道上亮相,從商業角度上,其實已經將形象上的傷害減至最低。 如果比起衛冕失敗,劉翔賽前退出,對贊助商來講,並不算是一個最差結局。 ///////////////////////////////// 講到奧運廣告,商業價格的確好高,今次開幕同閉幕嘅一分鐘廣告,竟然創下2千零8萬嘅天價。 至於對贊助商效益有幾大,數據就顯示,96年亞特蘭大奧運,200幾家有贊助權嘅企業,實際只收番兩成半嘅回報,短暫收益唔大,但長期效益可能好大。 經濟學人話,金牌數目向來都同國家經濟實力掛勾,中國96年亞特蘭大奧運,只攞到16個金牌,到宜家邁向世界第一。 睇番美國,84年洛杉機金牌數目當然驚人,有不可思議嘅83面,不過不要忘記,當年蘇聯是作杯葛。 到宜家,連四百米接力,無論男子定女子組大賽,接棒都可以同一日內「接失」,真係國運都唔幫佢地。 幾百億美金攪奧運,成本未必攞得返,但歷史證明,成功嘅體育運動,可以扭轉全球對主辦國嘅印象。 另一樣得意嘅野,就真係金牌有價,

白銀戰隊

隊長話永不言敗....睇下點?

罪過,罪過

很難想像一分研究報告可以引起市場這麼大的關注。 與內地分析員談起,事實上他們在周三是相當興奮,基本上人人都在爭相傳閱這分報告。 但股民只是開心得一日,救市憧憬未有官方回應,內地股市喺星期三急升後有回吐。 周三嘅升幅幾乎無左一半。又話4千億救市、又傳再完善大小非解禁、又憧憬調整印花稅,內地一分財經報評論文章形容「股市利好傳聞很逼真,兌現一半謝天謝地」。 對於令市場無限憧憬嘅摩根大通4千億救市方案報告,財政部旗下研究部話無聽過。 北大教授霍德明話,無需要救市。銀河證券更話,4千億救市係亂講。 有內地傳媒更同摩根大通計數,話摩通7月底,一日內狂沽十隻H股套現30億,但8月頭兩星期,又用8億買H股,之後更發表報告唱好。 我們找過曾經喺摩根士丹利主管中國經濟研究嘅謝國忠話,內地經濟係會放緩,但作為分析員,無可能估到中央嘅政策。 至於報告撰寫人,摩根大通龔方雄指,佢發表呢分報告係有嘅邏輯起點。因為同零四,零五年唔同,依家中國政府嘅關注點,已經由經濟過熱,轉為經濟衰退。 龔方雄話,自從報告出街後,收到好多客戶查詢問中國係咪會救市。 佢話內地股市之前超賣,投資者忽略基本因素好轉。但係咪會救市,最好由市場回答。 我們認為,基本上龔先生是一個值得尊敬的分析員,看了多年他寫的研究報告,龔方雄有自己分析內地經濟獨到的觀點,你可以說他不準確(目前仍然堅持看好中資股),但多年來他的觀點也非常一致,鮮有改變立場,更談不上因為要造市而刻意唱好。 我們要問的反而是、為何一分研究報告會被市場如此炒作? 如果報告在舊年牛氣沖天的時候發表,又會有多少人真正理會? 李生說如果有人因為刻意炒作消息而賺錢,只可以說是:「罪過,罪過」,我們反而想提的是:「Wrong Place in the Wrong Time」,可能更是龔先生的寫照。

先撩者賤?

也談咪嘴

為什麼我們看到北京城內28個「腳印」煙花CG會認為是「造假」? 為什麼到imax看蝙蝠俠那個飛身由IFC俯衝下來的鏡頭,又沒有人投訴「造假」? 為什麼「林妙可、楊沛宜」、一個代唱,一個代演,會被人投訴幕後造假? 那麼陳奕信投訴濱崎步「咪嘴」又是否大驚小怪? 「 知日部屋 」告訴我們:「日本歌星在演唱會或電視演出時「咪嘴」是頗為普遍的事......一個藝人開演唱書sell的是聲色藝,除歌藝外,服裝、跳舞、口才及演技甚十分重要。」濱崎步需要為自己的演唱會預錄歌聲、以配合自己可以準備有更好的舞步、台風,再加上超誇的化妝、髮型及服裝,令台下觀眾看得如痴如醉。而這一切,是觀眾一早預期之內,並願意花上金錢入場看這一種表演。 兩個小朋友,一個幕前、一個幕後,本來也沒有什麼大不了,在製作名單之中亦有排名。不過入場的觀眾大概沒有什麼人懂得誰是林妙可、楊沛宜,在看過那個天使般的笑容、以及聽過那天籟般的歌聲後,居然被揭發原來背後是「咪嘴」,那是任何一個付上昂貴入場門票的觀眾、或是花數小時愷在電視機前看直播的人預期之外,而任何消費者,相信都不會接受與原來預期不一樣的消費品吧? 相反,如果有人告訴觀眾,最後散場的成龍或莫文蔚是咪嘴,你估又有幾多人投訴? 因此在戲院看CG,與看直播睇CG煙花,大概也是這種分別。 以國家利益為前提,是否就能將「咪嘴」事件合理化?如果說到國家利益,取金牌相信會更凌駕一場演唱show吧,那又有誰人可以接受運動員「造假」? 說到最後,也是製作人最愚蠢的地方,就是將小朋友捲入事件之中。 全世界人類有一個共識,就是認為保護兒童利益是比任何事情優先、偏偏這種對道德利益的關注,居然在這個以億計人士收看的電視節目中被「出賣」,激烈的反應也是不難想像吧!~

「劉翔」經濟學

一代欄王,未曾跳過一個欄,已經與京奧緣盡,黯然離開鳥巢。 我們不懂體育,當然沒有資格評論劉翔退賽,不過看著在場數以千計失望、無助、驚惶的觀眾表情,以及全球數以億計的觀眾看著直播那種失望的心情,我又知道今次不止一次體育運動咁簡單。 確實、背負著十三億人的期望、奧運五運首次在祖國飄揚,劉翔背負的擔子一定相當沉重,假設他賽前已知舊患有復發可能,更甚可能會影響自己的表現,劉翔其實沒有太多選擇。 一件重要的體育事件、不單影響著一個賽事、更甚處理不好會影響經濟、甚至觸發社會暴亂。如果看今次事件,其實善後處理是相當成功,堪稱是一宗危機處理的典範。 試想,如果劉翔勉強比賽,即使能順利起跑,相信也難獲得好成績,一旦中途有甚麼意外,不但可能傷了筋骨影響日報表現,更甚是在數以億計的觀眾面前跌倒,直播的晝面恐怕做成的震撼是更令人難以承受。 相反,如果劉翔選擇不出賽、恐怕會引來更多的負面批評吧! 更快速的反應是來自國家領導人,晚上已經迅速為事件「定性」,指全國都會理解劉翔背負的包袱,希望他好返後為國家爭取更大榮譽,正式將事件昇華為國家層次,將負面的批評壓至最低。 紐約時報以「老外」眼光,去看今次劉翔事件:「Liu's body had failed, which, in the eyes of many Chinese people, meant they had failed, too. 」即是說,劉翔的失利是由十多幾億人去承擔。 The Sports Economist 告訴我們,金牌數目從來就與國家經濟實力掛勾,中國由96年亞特蘭大取得16個金牌,到二千年悉尼奧運已超越德國、取得28面金牌排名第三,因此中國人努力創造出來的「The sports machine」(姑且稱為國產運動機器),就是要證明自己有能力挑戰美國霸主地位。 中國今次以超過四百億美元投資辦好奧運,The Sports Economist說以成本收入角度計算,是難以回本,因為收入同就業職位的刺激是微乎其微,不過以零六年德國舉辦的世界盃為例,一次成功的體育運動,是足以扭轉全球對主辦國的印象,因此今次實在是不容有失。 當然有一個問題大家會問,既然劉翔今次未能奪金牌,點解咁多贊助商仲肯支持佢? 下次再談。

聲明

Pakman 要求的, 不過下part未曾找到,再花些時間找找.....

報數

Moneycafe捱過了一年,認知率終於超過百分之五,可以首次打入 欣賞指數 內。 去年中開始港台更改了計算欣賞指數計算方法,將節目分為大眾(5%以上)及小眾(5%以下)節目類型,今次cafe是首次有幸被觀眾認同,雖然排名僅僅是21位,也是一個好開始。 排名: 4. 有線新聞 12. cable 早晨 13. 有線財經 15. 財經即時睇 21. Moneycafe 財經節目,收視很容易受股市上落影響,不過cafe由推出開始,就是不以股市為主打,希望透過另類財經經濟知識,由各嘉賓向觀眾傳遞,再次要多謝我們一班「財經達人」對節目的協助。

寒冬

暫告一段?

一如所料,曾特首最終按捺不住,需要迫公務員事務局出手,令梁展文自行離職。 政府報告透露、八月一號返工,任職新世界中國地產執行董事嘅梁展文,係喺五月九號向政府提出申請。 佢喺申請表話業務同母公司新世界發展無關係,十日之後、公務員事務局、向三位相關政策局的常任秘書長徵詢意見,最可笑的是接任梁展文的運輸及房屋局常任秘書長陳鎮源,佢回覆話,梁展文同佢個局無合約同法律往來 ,認為批准梁展文的申請,無可能引起公眾負面睇法,亦唔會令政府尷尬、並建議唔駛加任何額外條件,就批准梁展文申請。 發展局常任秘書長楊立門亦話,新世界中國地產同建築署無合約,只有非公務員出身、負責工務的另一位常秘麥齊光算是最有政治智慧,佢提出基於新世界嘅業務性質,即使梁展文負責嘅業務唔喺香港,公眾仍然可能有意見。 公務員事務局綜合意見後,認為梁展文轉職無可能構成利益衝突,並將呢個意見,交俾離職公務員就業申請諮詢委員會做主席的彭鍵基。 委員會最後,建議批准申請,並由俞宗怡親自拍板。 而家表面上是由俞宗怡負全責,而她目前雖不至於人頭落地,但估計不出半年,亦會提走離職。 梁展文參與過處理紅灣半島的事,幾乎是全香港市民都知,為何這樣明顯的事實,兩位常秘可以視而不見? 是無知? 還是為自己日後留定後路,等第二日按任人又可以「隻眼開,隻眼閉」? 今天的局面你可以說令曾特首鬆一口氣,不過自副局長風波之後,在公務員之間埋伏的一股怨氣,肯定會愈積愈大,一旦有天失控,這才是令人最人憂慮。 /////////////////////////////// 後記: 「從 上 述 情 況 可 以 看 到 , 在 處 理 紅 灣 個 案 上 , 其 實 並 非 如 坊 間 所 說 , 我 或 其 他 個 別 同 事 有 任 何 的 酌 情 權 , 正 如 早 些 時 候 i-Cable 一 個 由 胡 孟 青 小 姐 主 持 的 評 論 節 目 中 指 出 , 正 正 由 於 政 府 在 處 理 這 些 敏 感 問 題 上 缺 乏 透 明 度 , 導 致 市 民 種 種 的 疑 慮 , 這 是 可 以 理 解 的 。 」 今天看到梁展文的回應,原來他也有看我們的節目。 只想補充一點,今次特首推了俞宗怡孭起了整單風波,自己一點也不用上身,表面雖然漂亮,不過作為最高負責人、真的可以做到如此疏離,如此與己無關? 我信,凡事總有代價,只是差在幾時還

羨與忌

圖片
當大家都 "閉翳" 緊環球經濟嘅時候,睇下越南嘅現況,會唔會安心啲啲?! 就兩個月前,越南股市 "冧" 落400點樓下,無咗六成幾,曾經同內地股市,雙雙列入全球最大跌幅嘅市場。 當內地股市仍然尋底,跌到落近兩年低位之際,越南股市原來已經靜悄悄由低位反彈三成! 原來要多謝政府,推出多項政策救市,今日又有新攪作,限制股市每日嘅波幅,擴大到百分之5,刺激越南股市連升第七日,再升百分之2點6。 越南官方報章報道,越南政府調高出年嘅經濟增長預測上限,由六月時估計嘅百分之7至7點5,輕微調到百分之7至8,並表示會致力將通脹率,遏低到只有單位數字。 越南證監會亦加以配合,由下星期一起,會將股市嘅每日波幅上下限,由目前嘅百分之3,擴大到百分之5。 而喺胡志明市證券交易所的OTC,每日波幅限制就由而家嘅百分之4,擴濶到百分之7,消息刺激越南股市顯著上升,比6月20號嘅十年低位,反彈番三成。 另外,越南國營石油公司宣布,調低兩類汽油產品嘅零售價,減幅介乎百分之4至5。 越南目前嘅經濟,面對九十年代中、經濟改革以嚟最嚴峻嘅挑戰,越南政府喺今年六月,先後加息三次,以遏止通脹進一步升溫。 不過前景仍是有相當隱憂: 早前油價大升,越南國營石油公司喺上個月底,大幅調高汽油零售價三成一,雖然因應油價近日回番,而減番半成,分析相信今個月通脹仲會進一步惡化,可能會高過百分之二十七。 而越南當局採取了不少干預措施,包括會嚴懲外資企業將生產成本轉嫁予市民,更甚會取消營業牌照,這類行政措施是否有效,相信大家心中有數。 ///////////////////////////////////// 今時今日,對照越南股市,我國股市就頗有「斯人獨憔悴」之感。 內地有戲言:「愈多金牌、股市愈跌」,其實又是反映股民捱到奧運都唔見中央出手,大有「哀莫大於心死」之感。 其實捱到今日,真係唔明點解仲要痴心妄想等阿爺幫。 看看這個星期公布的CPI及PPI數據,雖然居民消費物價指數是有所回落,不過生產物價指數反而升上百分之十的新高。如果企業能將生產成本轉嫁予客戶,情況還好一點,可是中央就是在奧運期間透過種種的壓抑價格手段,不容企業將成本轉嫁予消費者,以免做成社會不穩,結果企業是有苦自己知。 在毛利人為壓抑下,說真的,作為一個股民,奧運又何喜之有?

勾結

很難忍住唔講。 前房屋規劃地政局常秘過檔新世界中國,震撼了整條下亞厘畢道。 看到新世界堅叔不斷在電視前自辯,稱在商議購入紅灣半島(即而家就來入伙、通街蝕本貨的海濱南岸)時,只是與地政署、律政署等部門糾纏,卻從來沒有與一個姓梁的高官有接觸。 大佬呀,傻既都知梁展文當時是位處房屋地政規劃局第二把交椅,對上個個又出名唔理嘢,即使你無見佢真人,都知道同邊個deal緊嘛! 唔通特首真係要每事問先叫盡責? 有不少評論提出、錯不在新世界或梁展文本人,因為以商為商,上市公司一定是講究公眾利益,請過曾蔭培後公司管理層一定是賺了不少好處,因此先至會食髓知味,再下一城。而梁官一向出名不得政府歡心、當年退休都搞到滿城風雨,今次擺明是即使剃政府眼眉亦不惜一試。 不過老實說,問心你新世界請得梁展文,真係無預到媒體會炒作、譽論不會反彈?如果兩位鄭生真係咁唔政治敏感,就唔好學人請高官。擺明係希望事件可以不了了知後,可以憑住梁先生在政府的人脈再取得好處。因此,總不能說成自己是受害人吧? 那麼政府同特首又有什麼角色? 我們要明白,公務員體系經過數十年發展,本身已經是一台龐大的官僚體系,當一個個案並無明顯觸犯法例、最重要是過去曾經有先例可援,為官的沒有一個會有膽量會作出挑戰,因此梁展文這個個案我們雖然大駡官商勾結,不過作為公務員我們相信是有理由不出聲。 老實說要公務員事務局孭呢個政治決定,也著實困難。那麼特首呢? 我們認為有很大很大的理由相信,他要去看北京奧運,因此什麼梁展文旺角大火英雄殉職,都不及奧運吸引。

修橋補路無....

跌鑊「金」

圖片
商品市場終於出現了一次顯注調整。 單看香港的金鋪,99金單日跌超過五百蚊每「兩」落到7千幾蚊,算是歷來罕見。 商品,貴金屬市場進入熊市,金,銀白金市場更出現恐慌性拋售。金價由高位跌超過兩成,白金更跌3成6。 由於美元反彈幅度遠超預期,資金重新部署,部分對沖基金更拆倉,令貴金屬短期仍然有壓力。 導致黃金、白金、白銀今年以嚟嘅升幅全部蒸發哂。 期金合約被大手拋售,東京同上海期金、雙雙跌停板。上海十二月期金跌左百分之五,首次觸及跌停板機制,落到每古182蚊人民幣,亦是期金合約推出以黎最低水平。 現貨金上個月中開始,接連跌穿900同850美元關口,落到嚟800美元邊,同歷史高位比調整超過兩成。 白金跌得仲急,現貨白金跌穿2千美元大關之後,唔夠一個月、急跌超過五百美元,比三月初高位,累積跌左三成六。 白銀亦由紀錄高位回調三成三,曾經跌穿14美元,去番舊年年底水平。(不過 白銀戰隊隊長 仍堅稱只要守得住八月就有好日子。不過問題是,離八月底仲有半個月時間.....) 正如金融時報LEX所講,商品價格調整主要是來自美元急速反彈,導至利差交易投資者今鋪真係要全面拆倉,重災區當然是今年初一直反彈的澳元,連11個交易日,是八零年嚟最長跌市。 似乎一夜之間,美元再次喺全球匯市中,再受追捧。 兌多個主要貨幣全線上線,你會問,美國經濟面臨衰退,經濟數據差,金融機構壞消息仍然一個接一個,支持美金升勢嘅基本因素近乎「零」! 不過美元確實出現了轉勢,問題不在美元,而是在其他國家。 美元轉勢並非美國經濟好轉,而係衰退會由美國蔓延至全世界,反而令美元變成相對安全嘅投資。 歐洲央行行長特里謝已經發出警告,面臨經濟放緩,息口有落無升,英國更是瓣瓣衰、零售消費樓市全部是紀錄新低,日本經濟更是調頭講緊要減息。 一直以為是經濟神話的澳洲,也難以抵擋次按火燒連環船的效應,央行已提出要減息刺激經濟。 看來今時今刻,商品市場亦難以避過全球陷入衰退的危機。

奧運選手

圖片
奧運已經正式開幕,上星期六亦都係全球信貸危機一周年,華爾街日報好有創意,公布左金融界奧運得獎名單。 選出嘅唔單止冠軍人馬,連臨門脫腳出唔到場嘅都有人選。亦成為我地一周風雲人物,分別係比利時啤酒廠頭號人馬卡洛斯,美林行政總裁塞恩,同埋聯儲局主席伯南克。 講到未入場就要出場嘅人物,當然係伯南克,因為佢服食禁藥,大家都知佢喺今次危機,出嚟拯救貝爾斯登,但就引發道德風險問題,市場相信只要公司夠大,做錯事,聯儲局都會出手。仲破格發出緊急資金注入投資銀行,伯南克嘅行為,完全諱背體育精神,同奧運背道而馳,明顯犯規,要out。 勇奪背泳金牌嘅係重整美林江山嘅塞恩,塞恩喺信貸危機初期,仲成日話美林無事,點知一個轉身,唔單止賣野,仲大舉集資,創下美國歷嚟最大配股集資活動。游背泳,當然佢最快。 跳水冠軍人馬,一定係貝爾斯登前任行政總裁凱恩,同現任行政總裁施瓦茨。集中講下James Cayne,貝爾斯登舊年年中已經出事,但凱恩無盡到責任,參加橋牌比賽,打高爾夫球,最終令貝爾斯登賤價賣比摩根大通,佢就退休,跳水走人。 自由摔交,被Wall Street Journal選出嘅自由摔交冠軍,係比利時釀酒廠英博行政總裁卡洛斯,因為英博以敵意方式向百威啤酒展開追求,其間歷經一個月嘅官司戰同公開罵戰,但最終都比佢打勝仗。併購成功,成為全球最大啤酒生產商,咁難打,都打贏,呢個獎非佢莫屬。 擲鉛球嘅奧運精英,就有沖基金主腦人物,約翰鮑爾森,五十二歲嘅John Paulson,喺次按危機,美國人人擔心無屋住嘅時候,佢put option,令富有嘅佢更加富有,Shot Put大獎實至名歸。 仲有花旗嘅Charles Prince是跳高高手,撐竿跳有雅虎行政總裁楊致遠,楊致遠拒絕微軟收購建議,被認為令股東利益受損,可能會被撤職,點知總算過關,獲選連任。

商品熊

圖片
商品市場面臨熊市,從技術走勢睇的確成立。個別商品已經由高位跌左兩成。 油價跌至117美元一桶,由高位岩岩跌左兩成,技術上正式踏入熊市。 其他商品情況類似,農產品商品跌幅更大,一度引起全球糧慌的米價,由高位跌兩成九,而較7月初高位,玉米更跌超過3成。 反映19種商品價格走勢嘅CRB指數由高位跌一成六。 單係上個月,跌幅達到1成係1980年3月以嚟最大跌幅。 當然各類商品中,油價表現最值得關注,彭博嘅評論指,油價表現,正反映全球經濟放緩,會影響石油需求。 鄧普頓的麥樸思話,新興市場仍然對石油有龐大需求,問題係價錢太貴,一定要調整。 供求之外,另一個左右商品價格走勢嘅資金外流。 商品熱,過去吸引大量資金流入巴西市場,但根據巴西交易所資料顯示,上月分當地錄得近50億美元資金淨流出係8年半以嚟最多。 之前賭油價升嘅投機活動亦180度轉變,最新數字顯示,期油未平倉合約比上月底大增1倍4,但呢的全部係沽空倉。 特別是看到拉丁美洲國營油公司近日大手買入沽空倉對沖,因為佢地睇油價喺出年年底,會落到70美元一桶。 觀乎,誰可以說今次商品大牛市不是由炒家一手做成? 到底今次商品牛市是否轉勢? 商品熊市又是代表股市熊市結束? 以目前環球經濟轉向疲弱,零九年經濟不明朗來看,投資市場似乎是宜審慎居多。

一年後....

圖片
今日八月八號就係中國「百年奧運」值得紀念日子,咁一年前你又記唔記得係咩事? 一年前嘅八月九號,當日法國巴黎停止旗下三隻對沖基金贖回,同日,歐洲央行、美國聯儲局同日本央行聯手向市場第一次注資。 呢個情景,真係好似琴日發生一樣。 一年落嚟,各大銀行已經累積撇帳四千億美元。 六個華爾街最大投資銀行總裁要「人頭落地」。 環球股市市值蒸發超過十三萬億美元。經濟學人有個統計都值得睇下: 集中看頭四大次按撥備最多銀行,包括花旗、美林、瑞銀同滙豐,頭三間一年嚟股價跌左都有六成,唯獨滙豐因為早發盈警,一年計跌百分之六! 仲有樣嘢叻,就係三大行老總都換左人,反而葛霖到仲可以坐正,仲飛左去北京睇奧運開幕! 咁,一年過去,之後會點? 我就無水晶球,不過可以聽下前聯儲局主席格林斯潘有咩方案: 一年前自傳「The Age of Turbulence」出版時候,次按危機原來只係啱啱開始。 一年後決定推增訂本,經濟學人取得嘅新增內容,格林斯潘再次對繼任人伯南克大潑冷水,話唔應該由聯儲局接管有問題嘅金融機構、包括貝爾斯登,因為咁只會損害聯儲局嘅資產負債表。 要搵出路,格林斯潘建議政府應該擴大權力,成立一個更高層次嘅委員會,直接接管被認為危害整體經濟嘅金融機構、同時可以有權力削債、甚至將容許整個銀行倒閉。 十八年嚟坐鎮聯儲局,外界一直指格林斯潘、需要為次按問題負責, 格林斯潘唔係無反省過。一直認為政府唔應該有太大權力、格老承認次按問題令佢改變睇法,而家應該透過更明確嘅立法,授權政府主導,希望可以做到最少傷害(Less Evil)。 經濟學人話,一年過去,聯儲局同其他中央銀行除左知道減息外,就係重新回歸凱恩斯主義。 經濟學人認為,由拯救貝爾斯登開始、到為房地美房利美包底,都係回歸七十年前凱恩斯提倡嘅政府干預。 結果只會係令金融機構出現「道德風險」,有動機愈做愈大,最後等政府出手拯救。 因此佢地贊成格林斯潘建議,由政府出手,而中央銀行就應該只係集中對抗通脹。

長夜

圖片
有無發現最近零舍多天氣、或光明黑暗嘅形容辭! 講次按就話係咪「隧道盡頭」、樓市就係風暴核心,股市唔使問、打完個風,好友落空,本來四百幾點升幅都吹走晒! 任總就歸納為一句,未到雨過天清! 任志剛今天又再提醒我們:美國經濟問題已經擴散到全球,本港經濟前景未必有預期咁樂觀,由零三年沙士後展開長達五年的經濟反彈,可能分分鐘玩完。 任總以沙士後樓市的調整為比喻,指我們的樓市調整了四、五年先有反彈,因此無理由美國樓市問題可以在一年內解決。 至於區內新興市場,任志剛提醒我們話有跡象顯示,資產質素下降情況,已經由次按蔓延到其他質素更高的資產,而國際金融市場調整,亦令資金外流,加埋外貿放緩,佢形容區內新興市場情況令人憂慮。 其實我地早前都 提過 ,好似出口兩年嚟首次出現下跌,加上全球緊縮貨幣政策令投資放緩,大家都已經有心理準備,知道零九年,肯定係要「縛緊安全帶」! 不過最慘是我們一批打工仔,啱啱喺今年人工叫做加番百分之四至五,都未追到經濟增長同通脹率,已經有大銀行話出年唔會再請咁多人。 看到這個圖大家會知道,香港經濟由零三年沙士後開始出現強勁反彈,到今年三月已經係連續十九個季度錄得增長,係前所未見。 不過睇番過去五年工資表現,零三、零四年,經濟有番起色,打工仔仲要減人工。 即使今年第一季經濟增長百分之七點一,工資加幅百分之四都無,仲要面對通脹這頭猛虎。 香港僱主聯合會話,年初預計,今年會員公司加薪百分之4點7,而家經濟環境轉差,相信公司要就住經營狀況,調節員工薪酬。 真係反應快..... 都係個句,真係要睇住自己「飯碗」,09年一點也不樂觀。

遲,好過早

圖片
睇完成分會後聲明,聯儲局嘅評估同上次幾乎完全一樣,都係話消費同出口帶動,令經濟活動保持擴張。 要搵唔同、就係今次喺形容通脹前景時,加多一句「非常」(Highly)唔明朗。 而另一個更顯注嘅分別、就係今次聲明,刪除咗六月時提及、經濟下滑風險會逐步「減退」的字眼。 就係呢一加一減,令市場確信加息時間會押後。 聯儲局嘅觀察家(Fed Watcher)原本以為會議上有更多「鷹派」聲音,但結果只有達拉斯聯邦儲備銀行行長「費希爾」繼續支持加息。 但底係「鴿派」抬頭、定「鷹派」主導,綜合大報及經濟學家嘅意見,係無明確立場。 金融時報話,過去幾個月聯儲局努力控制嘅通脹預期,喺期油步入熊市下,已經輕易達到目的,主席伯南克可以話鬆一口氣。 但以聯儲局最重視的個人開支價格指數升百分之4.1%計,華爾街日報話以而家實質利率係負兩厘,因此加息係遲早嘅事。 而家淨低嘅問題係、到底聯儲局可以捱到幾耐先加息? 如果商品價格真係持續回落,聯儲局官員係寧願、遲好過早。 Bernanke:"Thank God!"

有毒

今天絕對要談東亞。 投資大幅撇帳,東亞出嚟嘅業績遠差過預期。 上半年佢地要再為手頭兩個「字母湯」CDO同SIV,合共撇左15億幾港紙。 因為咁上半年盈利大跌5成2,派息當然同時減少,股價星期二下晝就好食左瀉藥咁,疴得一乾二淨。 最大鑊係未見底! 雖然SIV幾乎全數撇帳,但CDO計落仲有4億3千幾萬美元,即係話,下半年仲有得撇! 連高盛肥佬分析員羅慕斯,亦即場向管理層質詢,認為東亞呢個撇帳水平,可以比美歐美銀行。 最令人氣怒係,除左寶哥哥,東亞管理層似乎毫無悔意,仲口口聲聲話,7月分市況已經回穩啦,已經有50萬撥備回撥,嚟緊可能仲有。 佢似乎唔記得左半年前都講過同樣承諾。結果呢?大家有眼見! 事實上,美林同高盛都估下半年東亞仲要再撇帳。高盛就估要做多2成撥備,美林更加估會錄得5億幾港紙撥備虧損,嚴重影響下半年盈利。 花旗就更批評得不留餘地,直指東亞根本無為經濟放緩做過任何準備,話東亞一級資本率、資產回報及淨利息收益率,都差過本港同內地大型銀行。 以目前東亞的股價,雖然泊住本港防守性銀行嘅水平,但根本就無甘既質素。 一言中的! 曾經有分析員形容過,次按有如CANCER,而受到次按影響結構產品,就等於TOXIC,買咗就即刻中毒。 弊就弊在呢兩日先係銀行業績期第二日。之前大摩開口中,話東亞係首席高危分子。 跟隨住仲有中信國金、大新、富邦、工銀亞洲,亦都有揸著呢批投資工具、要大撇帳,盈利肯定倒退。 不過有國泰經驗睇,其實公司只要早有準備,認定業績會令市場失望,就預早發盈警,雖然有一陣陣痛,但雨過後,反而更令人看清真實面貌,總好過唔聲唔聲嚇你一驚,之後仲要惡言相向!

更快,更高,更強.....更多錢

上一回說過,奧運從來不是一場體育競技。 當然你可以駁: 運動員在競技場只是爭奪最高金牌榮耀,根本沒有獎金獎品。 IOC奧組委從來強調自己是非牟利組織,賺回來的錢都是投效在推廣奧運體育精神。 不過榮耀之後,後面跟著的,就是數不清的讚助商將金錢塞到你的口袋之中。 廣告商之間爭到頭崩額裂,動軋付上數千萬以至逾億元廣告費,而電視台之間,亦需付上一大筆轉播費用,奧運從來都是一場商業遊戲。 我們中國組同事訪問了北京奧組委,連他們都承認奧運相關廣告收入不菲。 「它都交了很多錢,賺助商交了上億美金,合作夥伴交上億人民幣,最少也幾千萬人民幣,這些錢不是白花的,因此它要獲得獨家保護它品牌宣傳的權益。」 「想喺電視宣傳自己品牌都好貴架,好似喺奧運開幕式、閉幕式前後十五秒落廣告,中央台就收2008即係2千零8萬人民幣,相等於每秒三十幾萬」 北京奧組委規定贊助商先可以用「2008北京奧運」呢啲字眼,贊助商可以用福娃宣傳,非贊助商就傾向自己搞個奔向2008運動的LOGO。 於是我們看見了什麼「奔向北京」,「中國加油」,「面向世界」等等不同的標題在北京大街小巷出現。 面對種種仿效奧運的宣傳廣告,奧組指全部都是違反奧運憲章同法規。奧組委設有法務部、專責處理舉報目前被索賠企業已經不下幾千家。 「它會面臨著高額的罰款,公眾道德的,要道歉,要沒面子,要讓大家指責,要公登報道歉」 其實數數百年來奧運的十二個主要贊助商: 最早要數Kodak,1896年。Coca-Cola,1928年。最新有我們中國聯想,2005年。過去四年,他們投入的贊助費,高達八億六千萬美元,有時真的懷疑,要用多久才可以做回這六十多億現的生意。 經濟學人形容,今屆奧運將會是歷史上最「No Fun」的奧運會,到底華麗的開幕及倒水般的廣告宣傳後,奧運宣揚的體育精神,我國知道的又有幾人?

Hello, Moto!

圖片
有無用過細龜?V仔? 以前真係人手一部,不過呢兩年在中環就真的是「鬼影難見」! 作為美國最大手提電話生產商,摩托羅拉呢兩年真係可以話「江郎才盡」,所以當摩托羅拉可以交出一分令市場有驚喜的成績表時,就令人更加著目。 摩托羅拉第二季盈利有400萬美元,遠比舊年同期虧損二千八百萬美元好。 由於業績比預期好,因此摩托羅拉收市股價急升一成三,是四年嚟最大單日升幅,不過咁,由高位計,一年股價都係無左四成六。 好在佢地今季付運量雖然跌咗兩成一,在連續第六個季度下跌,但就多過預期,因此仲保得住全球第三位手機佔有率,不過同第一位NOKIA同「老二」三星比,差距是愈嚟愈遠,連排第四嘅LG,差距只係唔夠一個百分點。 由於市場佔有率持續下跌,摩托羅拉早就同計劃將手機業務分拆,相信今次業績有改善,將會有利第三季嘅分拆計劃。 不過大家要留意,其實今次業績好的背後,主要係全球裁員同削減成本收效,銷售實際係跌左百分之七。 做成摩記今天的局面,不得不提零四年到零八出任CEO的Zander,其實在他導下,MOTOROLA都曾經有風光一面。 Zabder可以說是典型行動型領袖,在他任內,研製出「V3」手機,累積全球銷售超過一億一千萬部,可以話破晒手機史上歷史。 佢曾經提出,要求有四分一嘅BONUS,是需要以「滿足顧客」同部門合作作為主要指標,成功將摩記由家族企業變成國際巨企。 不過經濟學人話,由於摩托羅拉忽視左3G市場發展,加上手機缺乏多媒體功能,只係一味將成功產品減價、以及推出平價手機,結果諾基亞在發展多媒體及互聯網的功能上愈跑愈快,Zander最終被Icahn(不錯,正是最近入主yahoo!的股東)為主的一批憤怒股東趕下台,今年五月亦辭去主席職位。 Zander可說是一個「領袖型」人物、因為睇錯大趨勢,累到成間公司方向「錯晒」的典型例子。

奧運效應2

奧運效應?

圖片
奧運倒數踏入第九日,到底是否真的有奧運效應? 看看以下數字:(瑞信統計) 跌有三屆,不過升的更多,好像LA、韓城同上雅典,不少股市升幅都有三、四成。 當然,像金融時報LEX所講,奧運對舉辦城市是「毒藥」多於「良方」,不少城市像1976年加拿大的蒙特利爾,因為財政管理差,結果要還債三十年,先可以清還所有欠款。而二千年的悉尼奧運,市政府亦因為大額超支令財政一度陷入困難。 而實際上,北京佔全國GDP的比重,只有百分之4左右,遠比首爾、悉尼及雅典的兩、三成比重低,可以說對全國經濟不會有太大效應。 不過由經濟學角度看,奧運其實創造了不少界外效應,並非單由一個市政府的開支就可以看到全貌。 反而股市的表現是更為全面,而近六屆的奧運會,一年後股市表現都是非常正面,說明辦奧運應該還是有「著數」。 今屆北京奧運又如何?表面看的確有不少暗湧:股市不用說,一年來下跌了四成多,是全球表現最差市場之一。連之前一直看好的旅遊及消費行業,目前有不少三、四星級的酒店,到今天仍然有空房,連首都機場都要發出盈利警告。 連瑞信亦認錯,承認之前是過分高估奧運帶來、對消費及旅遊的行業效應,現在看來奧運反而是「負面效應」多一些。 LEX提出,其實不少負面因素是北京自己一手製造出來,好像旅遊消費不振,就是源於中央過早收緊審批外地旅客簽證,結果做成不少旅客寧願不來華、或者押後到最後一刻先前往看賽事。 以酒店為例,由於限制旅客入境,令北京唔少酒店都失晒預算,奧運期間五星級酒店預訂率、得七成,四星級以下酒店,預訂率更加不足五成,部份要減租四成吸引客人。 對電力、煤炭、電信甚至建築行業來說,中央因為節能減排或環保等因素,要求企業作出不同程度配合,包括電信公司停止建網、電力公司不論成本都要廿四小時發電,煤炭又要設置價格上限,說穿了,其實是犧牲股東利益去辦好奧運。 另一個黑洞是房地產市場,尤其是北京樓市、有內地傳媒報道,連北京樓價由高位也累積跌了兩、三成,如果情況持續,不排除會有更多人斷供,原因是過去一段時間北京並無跟隨深圳等地區作出調整,如果有任何資產價格下跌,肯定就是北京樓價。 當然,說穿了奧運會從來不是單單一場競技。 有機會下次再談。